༤།༣༠ ཉིན་བསུ་བ།

བདེ་སྐྱིད།

དེ་རིང་ནི་ཕྱི་ཟླ་ ༤ ཚེས་ ༣༠ བོད་ཀྱི་ཡིག་གཟུགས་ཉིན་མོ་རེད། ཉིན་མོ་དེ་སྲུང་བརྩི་ཞུ་དགོས་དོན་ཡང་མང་ཚོགས་ཀྱིས་བོད་ཀྱི་ཡིག་གཟུགས་སྐོར་ལ་གོ་རྟོགས་ཡོང་ཐབས་དམིགས་ཡུལ་གཙོ་བོ་ཡིན་ངེས་པས་ཕྲན་གྱིས་དེ་རིང་ལས་ཞོར་དུས་ཚོད་བེད་སྤྱད་ནས་བོད་ཀྱི་ཡིག་གཟུགས་སྐོར་སློབ་སྦྱོང་ཕྲན་བུ་བྱས་པ་ཡིན། བོད་ཕྲུག་གཅིག་ལ་མཚོན་ན། བོད་ལ་ཡི་གེ་ལོགས་སུ་ཡོད་པ་དང་། ཡིག་གཟུགས་འདྲ་མིན་སྣ་ཚོགས་ཕུན་སུམ་ཚོགས་པ་ཡོད་པ་མ་ཤེས་མཁན་ཧ་ལམ་མེད་ངེས་ཀྱང་། དེང་དུས་ཀམ་པུ་ཊར་སོགས་འཕྲུལ་ཆས་དར་ཁྱབ་ཆེ་བ་དང་། སྐད་ཡིག་གཞན་གྱི་ཤུགས་རྐྱེན་འོག་ལ་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་གྱི་གོ་སྐབས་ཉུང་དུ་འགྲོ་བཞིན་པ་དངོས་ཡོད་གནས་སྟངས་ཆགས་ཡོད།

ཕྲན་དེ་སྔ་ནུབ་ཕྱོགས་ཀྱི་གཙུག་ལག་སློབ་ཆེན་གཅིག་ལ་སྐད་ཡིག་གཉིས་པའི་སློབ་ཁྲིད་དགེ་རྒན་འོས་སྦྱོང་བྱ་སྐབས། འཛིན་གྲྭའི་ནང་ལ་མི་རིགས་འདྲ་མིན་སྣ་ཚོགས་ཡོད་པ་དང་། དགེ་རྒན་ཚོ་ཡང་སྐད་བརྡ་རིག་པ་བ་སྐད་ཡིག་མི་འདྲ་བ་ ༦ ཉུང་མཐར་མཁྱེན་མཁན་ཤ་སྟག་རེད་འདུག ཁོང་རྣམས་སྐད་བརྡ་རིག་པའི་ཐོག་ལ་འབུམ་རམས་པའི་སློབ་སྦྱོང་གནང་སྐབས་ཀོ་རི་ཡ་དང་། རྒྱ་ནག་སོགས་རང་ཉིད་ཀྱི་སྦྱོང་རྒྱུའི་སྐད་ཡིག་བེད་སྤྱོད་བྱེད་སའི་ལུང་པར་དངོས་སུ་ཕེབས་པ་དང་། ཕར་ཨིན་ཡིག་སྐད་ཡིག་གཉིས་པའི་ལམ་ནས་སློབ་ཁྲིད་གནང་བ་དང་། ཚུར་ལུང་པ་དེའི་སྐད་ཡིག་སྦྱོང་གནང་མཁན་ཤ་སྟག་ཆགས་འདུག ནུབ་ཕྱོགས་ཡུལ་ཁག་ལ་སློབ་སྦྱོང་བྱེད་སྟངས་མི་འདྲ་བ་གཅིག་ཡོད། དགེ་རྒན་གྱིས་ཁྲིད་རྒྱུ་ཉུང་བ་དང་། མང་ཆེ་བ་ནི་སློབ་ཕྲུག་ཚོས་འཛིན་གྲྭའི་ནང་ལ་བྱེད་སྒོ་འདྲ་མིན་ནང་འཛུལ་ཞུགས་བྱེད་དགོས་པ་དང་། དགེ་རྒན་ཚོས་བྱེད་སྒོ་ཁག་ལ་ལེགས་སྤེལ་ཉེས་འགོག་གི་ལམ་སྟོན་ནམ་ Feedback གནང་སྲོལ་ཡོད། ཐེངས་ཤིག་ཡིག་གཟུགས་སྐོར་གྱི་བྱེད་སྒོ་སྤེལ་སོང་བ་དང་། ཕྲན་གྱིས་སྤོབས་པ་ཆེན་པོས་བོད་ལ་ཡིག་གཟུགས་བརྒྱ་ལྷག་ཡོད་སྐོར་བཤད་པར་དགེ་རྒན་དང་སློབ་ཕྲུག་ཕལ་ཆེ་བས་ཡིད་ཆེས་གནང་མ་སོང་། དོན་དངོས་ཐོག་ངས་དེབ་ནང་ནས་བོད་ལ་ཡིག་གཟུགས་བརྒྱ་ལྷག་ཡོད་སྐོར་མཐོང་བ་ཙམ་ལས་མིང་དང་། ཡིག་གཟུགས་མི་འདྲ་བ་གང་དང་གང་ཡོད་མེད་ཤེས་ཀྱི་མེད། ༧རྒྱལ་དབང་ལྔ་པའི་སྐབས་སུ་བོད་གཞུང་དགའ་ལྡན་ཕོ་བྲང་བྱུང་ཚུན་ལ་བོད་ཀྱི་ཡིག་གཟུགས་ལ་འགྱུར་བ་ཞེ་དྲག་བྱུང་མེད་སྐོར་དེབ་གཅིག་ལས་མཐོང་བ་དང་། ཡང་། རྗེ་ཙོང་ཁ་པའི་སྐབས་ནས་དཔར་ཤིང་བསྐོས་པའི་རྗེས་བོད་ཀྱི་ཡིག་གཟུགས་ལ་འགྱུར་བ་ཆེན་པོ་ཕྱིན་མེད་སྐོར་བརྗོད་པ་ཐོས་མྱོང་ཡང་དེབ་དང་རྩོམ་ཡིག་མཇལ་མྱོང་མེད། དེའི་སྔོན་ལ་ཡིག་གཟུགས་ལ་འགྱུར་བ་མང་པོ་བྱུང་ཡོད་པ་ཡིག་ཆ་ཁག་ཅིག་ལ་གསལ། བོད་ཀྱི་ཨང་ཀིའི་ཡི་གེ་དང་། མཁའ་འགྲོ་བརྡ་ཡིག་ཟེར་པ་སོགས་མིང་ཙམ་མཇལ་བ་ལས་ཕྲན་གྱིས་ད་བར་དངོས་སུ་མཇལ་མྱོང་མེད།

སྔར་བོད་ནང་ལ་ཤེས་ཡོན་སློབ་གསོའི་བསྟི་གནས་གཙོ་བོ་དགོན་སྡེ་ཁག་ཡིན་པ་དང་། སློབ་གྲྭ་ཡང་མི་ཉུང་བ་ཡོད་པ་ལས་ཉག་རོང་ཤག་སློབ་གྲྭ་དང་། སྦྱར་པ་ཁང་གསར་སློབ་གྲྭ། དཔལ་སྤུངས་སློབ་གྲྭ། གོར་ཁའི་སློབ་གྲྭ། རྩིས་ཁང་སློབ་གྲྭ། སྨན་རྩིས་ཁང་སློབ་གྲྭ། ཏར་ཁང་སློབ་གྲྭ་སོགས་ཡོད། སློབ་གྲྭ་དེ་དག་གི་ནང་བོད་ཀྱི་ཡིག་གཟུགས་འབྲི་སྦྱོང་གལ་ཆེན་ལ་བརྩི་ཡི་ཡོད། ཡིག་གཟུགས་སློབ་ཁྲིད་བྱེད་སྟངས་ཀྱི་རིམ་པ་ནི། ཀ་ཞིབ་ཀྱི་འགོ་བཙུགས་ཏེ་སྦྱངས་པ་དང་། ཀ་ཞིབ་ཀྱི་འོག་ཏུ་ཀ་ཁའི་རིམ་པ་དང་། ཚུགས་རིང་ཞིབ་འོག་ཏུ་ཚུགས་རིང་དང་ཚུགས་ཐུང་། ཚུགས་ཞིབ་ཀྱི་འོག་ཏུ་ཚུགས་ཆུང་། སྤྱི་གྲལ་ཞིབ་འགོའི་འོག་ཚུགས་ཐུང་དང་། ཚུགས་ཆུང་མུ་མཐུད་ནས་སྦྱོང་བའི་ཁར་འཁྱུག་ཡིག་སྦྱོང་བ་བཅས་ཡིན། དཔེར་ན། ཀ་ཁའི་རིམ་པ་ལ་ཆ་བཞག་ན། རིམ་པ་དེ་ལ་བཞུགས་པའི་སློབ་མས་དང་པོ་ཀ་མད་རྐྱང་པ་འབྲི་སྦྱོང་བྱེད་པ་ཡིན། དེ་ནས་ཡ་བཏགས་དང་ར་བཏགས་འདོགས་ལུགས་སྦྱོང་རིམ་གཅིག དེ་ནས་ཡ་བཏགས་དང་ར་བཏགས་ལ་ཞབས་ཀྱུ་སྦྱོར་སྟངས་སྦྱོང་རིམ་གཅིག དེ་ནས་མགོ་ཅན་སྦྱོར་སྟངས་སྦྱོང་རིམ་གཅིག་བྱས་ནས་སྦྱོང་གི་ཡོད། ཅེས་བོད་ནང་བཞུགས་པའི་རིན་ཆེན་བསམ་གྲུབ་ལགས་ཀྱིས་འདས་དོན་གསུངས་པ་གཅིག་མཇལ། ཁོང་གིས། སློབ་ཕྲུག་ཐང་ལ་འདུག་ཅིང་པང་ལ་སྦྱང་ཤིང་འཇོག དགེ་རྒན་རྒྱབ་ལ་བཞུགས་པ་དང་། སློབ་ཕྲུག་གིས་ལག་པས་སྨྱུ་གུ་བཟུང་། དགེ་རྒན་གི་ཕྱག་གིས་སློབ་ཕྲུག་གི་ལག་པ་བཟུང་ནས་ཀ་ཁ་འབྲི་སྦྱོང་བྱེད་ཀྱི་རེད། དེ་ལ་ལག་བྲིས་བརྒྱབ་ཟེར་ཞིང་དེ་ལྟར་ཉིན་ཤས་ལ་སྦྱང་དགོས། གསར་ཞུགས་ཀྱི་སློབ་མ་རྣམས་ལོ་ན་ཆུང་སྟབས་སྨྱུ་གུ་བཟོ་བ་དང་། སྦྱང་ཤིང་འཁྲུད་པ། དེ་ལ་ཐིག་འདེབས་སོགས་ཡིག་སྦྱོང་གི་ཡན་ལག་གི་ལས་དོན་ཡི་གེ་སློབ་མཁན་དགེ་རྒན་དེས་བྱེད་ཀྱི་ཡོད། ལག་བྲིས་རྒྱུག་ཡུན་གྱི་ཚད་དེ་གཙོ་བོ་སློབ་མའི་བྱང་ཚད་ལ་རག་ལས་ཡོད་དེ། སྤྱིར་བཏང་ཉིན་གསུམ་བཞིའི་ནང་ལ་ལག་བྲིས་ཀྱི་རང་མགོ་ཐོན་འགྲོ་ཡི་རེད། དེ་ཚར་ན་ཀ་མད་སུམ་ཅུ་བྲིས་པའི་སྦྱང་ཤིང་ཁྱེར་ནས་སྨྱུ་གུ་དང་མཉམ་དུ་ཀ་ཞིབ་དེ་ལ་འབུལ་དགོས། ཀ་ཞིབ་ཀྱིས་དེ་ལ་ཀ་མད་སུམ་ཅུའི་མ་དཔེ་ཞིག་སློབ་མ་དེའི་སྦྱང་ཤིང་སྟེང་ལ་སྐམ་བྲིས་ཤིག་རྒྱག སློབ་ཕྲུག་གིས་དེ་ཁྱེར་ཡོང་ནས་ཐེངས་དང་པོར་ཚིག་སྣག་ཟེར་པའི་སྣག་ཚ་ལ་བསྒྲེས་པའི་སྨྱུ་གུ་དེ་དགེ་རྒན་གྱིས་བྲིས་པའི་ཡི་གེའི་སྟེང་ལ་བུགས་ནས་དེའི་སྨྱུག་ལམ་གྱི་སྦོམ་ཕྲ་དང་། གྲིམ་ལྷོད་ལྟར་འབྲི་སྦྱོང་བྱེད། དེ་ནས་ཡང་དགེ་རྒན་གྱི་རྩ་ལ་སྐམ་བྲིས་ལེན་དུ་སོང་། དེ་ཚུར་ཁྱེར་ཡོང་ནས་སྔར་བཞིན་འབྲི་སྦྱོང་བྱེད། ཡིག་གཟུགས་སྦྱོང་རིམ་དེའི་རང་མགོ་ཐོན་པ་བར་དུ་དེ་ལྟར་བྱེད་དགོས། སྦྱོང་རིམ་དེ་རང་ཚུགས་ཟིན་པའི་ཉིན་མོ་དེར་ཀ་ཞིབ་ཀྱིས་སློབ་མ་དེ་ལ་ཤོག་ཐོག་ལ་བྲིས་ཡོད་པའི་ཀ་དཔེ་ཞིག་གནང་། ཀ་དཔེ་དེ་གཞིར་བཟུང་གིས་ཐེངས་དང་པོར་ཤོག་བུའི་སྟེང་གི་ཀ་དཔེ་ལ་ལྟོས་ནས་འབྲི་སྦྱོང་བྱེད། དེ་ནས་བཟུང་ཀ་བྲིས་རྒྱག་མཁན་དང་སྐམ་བྲིས་རྒྱག་མཁན་གང་ཡང་ཡོད་པ་མ་རེད། ཡོད་པ་ནི་ཤོག་གུའི་ཐོག་གི་ཀ་དཔེ་དེ་རེད། དེ་ཡང་སྔོན་མ་སྐམ་བྲིས་ཀྱིས་ཡིག་སྦྱོང་བྱེད་རིམ་ལྟར། དང་པོ་ཀ་མད་རྐྱང་པ་སུམ་ཅུ་འབྲི་སྦྱོང་བྱེད། དེ་ལ་ཀ་ཞིབ་ཀྱིས་གྲལ་ཞིག་རྒྱག་པར་འགྱུར། དེ་ནས་ར་བཏགས་དང་ཡ་བཏགས། དེ་དག་ལ་ཞབས་ཀྱུ་འདོགས་པ། དེ་ནས་འགོ་ཅན་སྦྱོར་སྟངས་སོགས་སྦྱོང་། ཤོག་བུའི་སྟེང་གི་ཀ་དཔེ་ལ་ལྟོས་ནས་སྦྱོང་ཚུགས་ནས་བཟུང་སློབ་མ་གང་ཞིག་ལ་ཀ་དཔེ་འཇོག་ས་ཞིག་དང་། སྣག་ཚ་འཇོག་ས་བཅས་དགོས་ཀྱི་ཡོད་ཀྱང་། དེང་སང་གི་སློབ་གྲྭ་ལྟར་ཅོག་ཙེ་ནི་ཡོད་པ་མ་རེད། སློབ་མ་དེའི་གཡས་གཡོན་དང་མདུན་གྱི་ས་དེ་མ་གཏོགས་ཡོད་པ་མ་རེད། རིམ་པ་འདི་ཚར་ན་ཀ་ཁའི་སྦྱོང་རིམ་ཚར་པ་རེད། དེ་ནས་ཚུགས་རིང་ཞིབ་འགོ་ཟེར་པའི་རིམ་པ་དེར་སླེབས་ན་སྦྱང་ཤིང་ཐོག་ལ་མུ་མཐུད་ནས་འབྲི་དགོས། རིམ་པ་དེའི་ཀ་དཔེ་ནི་གསལ་བྱེད་ཙམ་མ་ཡིན་པར་། ཚིག་དོན་གོ་རྒྱུ་ཡོད་པ་སྟེ། དཔེར་ན། ས་སྐྱ་ལེགས་བཤད་ལྟ་བུ་ཀ་དཔེ་སྣ་ཚོགས་ཡོད། ཀ་དཔེ་གང་ཞིག་ཉིན་གསུམ་བཞི་ལ་འབྲི་སྦྱོང་བྱས་རྗེས་ཀ་དཔེ་གཞན་པ་ཞིག་གནང་གི་རེད། དེ་ཉིན་གསུམ་བཞི་ལ་སྦྱངས་རྗེས་ཡང་གཞན་ཞིག་གནང་གི་རེད། ཀ་དཔེ་གཅིག་ཐོག་ནས་འབྲི་སྟངས་ཆ་ཚང་བ་ཞིག་སྦྱོང་ཐུབ་ཀྱི་མ་རེད། ཀ་དཔེ་ཅི་ཙམ་གྱིས་མང་བ་བརྗེ་ལེན་བྱས་ན་དེ་ཙམ་གྱིས་འབྲི་སྟངས་ཆ་ཚང་བ་ཞིག་ལ་བྱང་ཆུབ་ཀྱི་ཡོད། སྦྱོང་རིམ་དེ་མ་ཐོན་བར་དུ་ཀ་དཔེ་བརྗེ་ལེན་བྱེད་ཀྱིན་སྦྱོང་དགོས། ཤོག་བུའི་ཐོག་ལ་རིམ་པ་འདི་ལེགས་པོ་ཐོན་རྗེས་ཚུགས་རིང་གི་རིམ་པ་ཚར་ནས་ཚུགས་ཞིབ་ཟེར་པའི་རིམ་པ་དེ་ལ་སླེབས། རིམ་པ་འདིའི་ནང་དུ་ཚུགས་རིང་འབྲི་མཚམས་བཞག་ནས་ཚུགས་ཐུང་དང་ཚུགས་ཆུང་ཟེར་པ་དེ་གཉིས་མཉམ་དུ་འབྲི་སྦྱོང་བྱེད། རྩ་བའི་ཆ་ནས་ཡི་གེ་ཆེན་པོ་ནས་འབྲི་སྦྱོང་གི་འགོ་ཚུགས་ཏེ་རིམ་གྱིས་ཇེ་ཆུང་དང་ཇེ་ཆུང་དུ་འགྲོ། ཚུགས་རིང་དང་ཚུགས་ཐུང་གཉིས་སྦྱངས་ནས་བྱང་བ་ན་སྤྱི་གྲལ་ཞིབ་འགོའི་འོག་ཏུ་སོང་ནས་འཁྱུག་ཡིག་འབྲི་སྦྱོང་གི་འགོ་འཛུགས་པར་གྱུར། དེ་དུས་སྤྱི་གྲལ་ཟེར་བའི་སྦྱོང་རིམ་ལ་སླེབས་པ་རེད། འཁྱུག་ཡིག་ཀྱང་དང་པོ་སྦྱང་ཤིང་ཐོག་ལ་སྦྱོང་དགོས། སྦྱང་ཤིང་ཐོག་ལ་ཡག་པོ་འབྲི་ཐུབ་པར་གྱུར་ཚེ་དེ་ནས་ཤོག་ཐོག་ལ་འབྲི་སྦྱོང་བྱེད་དགོས། སྦྱང་ཤིང་ཐོག་ནས་འཁྱུག་ཡིག་གི་སྦྱོང་བ་ཐོན་པ་ན། སློབ་ཕྲུག་གང་ཞིག་གི་མི་ཚེའི་ནང་གི་སྦྱང་ཤིང་གི་ཐོག་ལ་ཡིག་སྦྱོང་བྱེད་རྒྱུ་དེ་ཡོངས་སུ་རྫོགས་ཏེ། ཤོག་ཐོག་ལ་ཡིག་སྦྱོང་དང་ཡིག་འབྲི་བྱེད་རྒྱུའི་འགོ་ཚུགས་པ་རེད།

སྔོན་མ་སྦྱངས་པའི་ཚུགས་རིང་དང་ཚུགས་ཐུང་། ཚུགས་ཆུང་རྣམས་ཤོག་གུའི་ཐོག་ལ་སྦྱངས་མེད་སྟབས། ཡང་སྐྱར་ཁོངས་སོ་སོར་སོང་ནས་ཤོག་ཐོག་ལ་ཐེགས་གཅིག་འབྲི་སྦྱོང་བྱས་ནས་ཡོང་དགོས། ཤོག་གུའི་ཐོག་ལ་སྦྱོང་སྐབས། ཤོག་གུ་མཐུག་པོ་སྤུས་ལེགས་ཀྱི་ཐོག་ལ་སྦྱོང་ཆོག་གི་མེད། ཡིན་གཅིག་མིན་གཅིག་གོང་ཁེ་པོ། ཧ་ཅང་སྲབ་བུ་ཕྱི་ནང་མ་མཐོང་ཙམ་ཞིག་གི་ཐོག་ལ་སྦྱོང་དགོས་ཀྱི་ཡོད། ཤོག་གུ་སྲབ་བུ་དེའི་ངོས་གཅིག་ལ་བྲིས་ཚར་རྗེས་དེའི་རྒྱབ་ལོགས་ལ་མུ་མཐུད་ནས་འབྲི་དགོས། དེ་ལྟར་བྱེད་དོན་ནི། ཡི་གེ་འབྲི་དུས་སྨྱུ་གུ་གནོན་ཤུགས་ཡང་སྙོམས་ཡོང་ཆེད་ཡིན། སྨྱུ་གུ་ལ་ཅུང་ཙམ་གནོན་ཤུགས་ཤོར་ན་ཤོག་གུ་དེ་རལ་འགྲོ་ཡི་རེད། དེའི་ཐོག་ལ་སྣག་བུམ་ལས་སྣག་ཚ་ལེན་སྐབས་རན་པོ་ཞིག་ལེན་པའི་གོམས་གཤིས་ཤིག་འཇགས་པ་ལ་ཡང་ཕན་གྱི་ཡོད། སྨྱུག་རྩེ་ལ་སྣག་ཚ་ལེན་པ་མང་དྲག་ན་ཤོག་གུའི་ཐོག་ལ་འདལ་འགྲོ་གི་ཡོད་པ་རེད། ཉུང་དྲག་ན་ཡི་གེ་ཞིག་གི་ཕྱེད་ཀ་བྲིས་ན་སྣག་ཚ་ཚར་འགྲོ་གི་ཡོད་པ་རེད། སྤྱིར་བཏང་སྨྱུག་ཁ་ནས་སྣག་ཚ་རན་པོ་ིག་ཡོང་བ་དེ་སྨྱུ་གུའི་སྣ་ཡུར་གྱི་ཆེ་ཆུང་ལ་ཡང་རག་ལས་ཡོད་པ་རེད། ཤོག་བུ་བེད་སྤྱོད་གཏོང་སྟངས་དེང་སང་འདྲ་པོ་མ་རེད། བོད་ཤོག་ཚང་མ་ཞེང་ཆེ་ལ་སྲིད་དུ་རིང། སྔོན་མའི་ཤོག་བུ་རྣམས་ལ་དེང་སང་གི་འབྲི་ཤོག་གི་ལྟར་ཤིག་བརྒྱབ་མེད། ཡང་ཡི་གེ་འབྲི་མཁན་གྱིས་ཞ་སྨྱུག་དང་སྣག་སྨྱུག་ལྟ་བུས་ཐིག་རྒྱག་སྲོལ་ཡང་མེད། ཐིག་ནི་ལྟེབ་མ་ཡིན། ཡི་གེ་འབྲི་མཁན་གྱིས་འབྲི་འདོད་པའི་ཡི་གེའི་ཆེ་ཆུང་ལ་གཞིགས་ནས་ལྟེབ་མ་རྒྱག་པ་དེ་ནི་ཐིག་རེད། ཤོག་བུ་དེ་ལ་འབྲི་བྱས་གང་མིན་ལ་མ་བལྟོས་པར་ཆ་ཚང་བལྟབས་ཏེ་གཡོན་ལག་གི་མཐིལ་དུ་བཟུང་ནས་པུས་མོ་གཡས་པའི་ཐོག་ལ་བཞག དེ་ནས་ཡི་གེ་འབྲི་གིན་འབྲི་གིན་ལྟེབ་བཤིག་གིན་བཤིག་གིན་འགྲོ ཤོག་བུ་བེད་སྤྱོད་བྱེད་པའི་ཐོག་མའི་དུས་སུ། ཡིག་མཁན་གྱིས་སོར་མོས་ཚད་འཇལ་གྱིས་ལྟེབ་ཐིག་རྒྱག་དགོས་ཀྱང། སྦྱངས་གོམས་སུ་སོང་བ་ན་མིག་གིས་ཚད་འཇལ་ཐུབ་པར་འགྱུར། ཤོག་གུའི་ལྟེབ་ཕྲེང་དྲང་མོ་དང་སྙོམས་པོ། མཐའ་ཆག་ཚད་ལྡན་ཡིན་མིན་བཅས་ཀྱང་སློབ་ཕྲུག་ཞིག་ཡི་གེ་སྦྱོང་རིམ་འཕར་མིན་གྱི་ཆ་རྐྱེན་ཞིག་ཡིན། ཤོག་ཐོག་ལ་བྲིས་པ་གང་ཞིག་ཚད་ལོངས་ཡོད་མེད་རྒན་བདག་ལ་སྟོན་དགོས། རྒན་བདག་གིས་གྲལ་རྒྱག་དགོས་པ་རྣམས་བརྒྱབ་སྟེག་ཤོག་བུ་དེ་རང་གི་ཐོག་ཏུ་འབྲིབར་འགྱུར། སློབ་ཕྲུག་དེས་གྲལ་བརྒྱབ་པ་དེ་མ་དཔེ་ར་བཟུང་ནས་འབྲི་སྦྱོང་བྱས་ཏེ་ཡང་རྒན་བདག་ལ་སྤྱན་འབུལ་ཞུ་དགོས། རྒན་བདག་གིས་ཐུག་ལ་མ་བབ་བར་དུ་ཁོང་གིས་གྲལ་བརྒྱབ་པ་མ་དཔེར་བཟུང་ནས་འབྲི་སྦྱོང་བྱེད་དགོས་ལ། རྒན་བདག་གི་ཐུགས་ལ་བབ་པ་ན་གྲལ་རྒྱག་པ་མཚམས་བཞག་ནས་ཡང་ཀ་དཔེ་གསར་པ་ཞིག་གནར་བར་འགྱུར་བ་དེ་དཔེར་བྱས་ནས་སྦྱང་དགོས། ཅེས་སོགས་གསུངས། ཕྲན་གྱིས་གོང་གི་ལུང་འདྲེན་རིང་པོ་ཡོད་ཀྱང་། ཀློག་མཁན་རྣམས་ཀྱིས་དེ་སྔ་བོད་ཀྱི་ཡིག་གཟུགས་སྦྱོང་སྟངས་སྐོར་ཅུང་ཟད་རྒྱུས་མངའ་བྱུང་ན་བསམ་ནས་ལ་རྩེ་དཔེ་མཛོད་ཁང་གི་དུས་དེབ་གཅིག་ནས་བཤུས་པ་ཡིན།

ཕྱིས་སུ་རྒྱ་གར་ནང་ལ་བོད་ཀྱི་ཡིག་གཟུགས་གལ་ཆེན་བརྩིས་པའི་དཔེ་མཚོན་གསལ་ཤོས་ནི་གཞུང་ཞབས་ཡིག་ཚད་གཏོང་སྐབས་བོད་ཡིག་ཡིག་གཟུགས་ལ་བརྒྱ་ཆ་ ༥ བཞག་པ་དང་། ལས་བྱེད་ཀྱི་གསང་སྙན་ནང་ལ་ཡང་བོད་ཀྱི་ཡིག་གཟུགས་ལ་བརྒྱ་ཆ་བཞག་ཡོད། བོད་ཀྱི་ཡིག་གཟུགས་ཐོག་ལ་ཐུགས་སྣང་བྱེད་མཁན་གཅིག་ཡིན་ན། བོད་སྨྱུག་བཟོ་བྱེད་ཤིང་རྒྱུ་འདྲ་མིན་ཁག་དང་། བོད་ཀྱི་ཡིག་གཟུགས་འདྲ་མིན་སོ་སོར་གཞིགས་ནས་སྨྱུ་གུ་གཞོག་སྟངས་འདྲ་མིན་ཡོད་པ་མ་ཟད། སྣག་ཚ་སྡེབ་སྟངས། སྣ་ཚའི་སྦྱོར་རྒྱུ་དུད་དྲེག་དང་ཆུ་སོགས་ལ་རྒྱུས་མངའ་ཡོད་ངེས། སྣག་ཚའི་སྡེབ་རྒྱུ་སྐྱེས་ཤུན་དང་། སྒྲོན་ཤིང་གི་ཐལ་བའམ་དུད་དྲེག ཆུ་སོགས་ཡོད། དེ་སྔ་བོད་ཀྱི་ནང་ལ་སྐ་རགས་ལ་འདོགས་པའི་སྨྱུག་ཤུབས་ཡོད་པ་དང་། རས་རྒྱུ་ཅན་གྱི་སྣག་བུམ་གྱི་འཇོག་སྣོད་སོགས་ཡོད་པ་མ་ཟད། ཡི་གེ་འབྲི་སྐབས་ཅོག་ཙེ་སོགས་མི་དགོས་པར་ཡི་གེ་འབྲི་མཁན་གྱི་པུས་མོ་དང་། མཛུབ་མོ་ཤོག་གདན་ལ་བྱས་ནས་ཡིག་གཟུགས་ཧ་ལས་པ་འབྲི་ཡི་ཡོད་ལ། ཤོག་བུ་ལྟིབས་བརྩིགས་ཀྱིས་ཤོག་དཀར་ཐོག་ལ་ཐིག་ཕྲེང་བཟོས་ནས་ཡིག་གཟུགས་གཙང་མ་འབྲི་སྲོལ་ཡོད།

ཕྲན་ལོ་ཤས་སྔོན་ལ་ནུབ་ཕྱོགས་ཀྱི་མཐོ་སློབ་ཤིག་ནང་ལ་ཡིག་ཚགས་ཐོག་ལ་སློབ་སྦྱོང་བྱེད་སྐབས། དེ་སྔ་རྡོ་དང་། ཤིང་ལོའི་ཐོག་ལ་ཡི་གེ་འབྲི་སྲོལ་དར་བ་དང་། དེ་ནས་ཤོག་བུ་ཐོག་མར་རྒྱ་ནག་དང་། བོད་ (Tibet) ནས་དར་བ་ཞེས་སློབ་དེབ་ནང་ལ་མཐོང་སྐབས་ཚོར་སྣང་དམིགས་བསལ་གཅིག་སླེབས་མྱོང་། དེ་ནས་ཐོག་མར་ཡོ་རོབ་དང་། ཨ་རི་སོགས་ཡུལ་གྲུ་ཚང་མར་དཔར་བསྐྲུན་ཁང་མ་དར་སྔོན་ལ་ལག་བྲིས་དེབ་བཟོ་སྐབས་ཡིག་མཁན་ལ་གླ་ཕོགས་སྨན་ཞབས་པ་སོགས་ལས་ཧ་ཅང་མཐོ་བ་དང་། ཡིག་མཁན་གྱིས་ལག་པས་བྲིས་པའི་དེབ་དཀོན་པར་བརྟེན་རང་བཞིན་གྱིས་དེབ་ལ་རྩ་ཆེན་བརྩི་ཡི་ཡོད། དེ་ནས་ཡིག་ཚགས་དང་། དཔེ་མཛོད་ཁང་གི་སྐོར་སློབ་ཁྲིད་སློབ་ཚན་གཅིག་ནང་ལ། ཆོབ་བམ། དགོད་གཏམ་གཅིག་བྲིས་ཡོད་པ་ད་ལྟ་ཡང་ཧ་ཅང་གསལ་པོ་དྲན་གྱི་འདུག ཧར་ཝར་ཌི་གཙུག་ལག་སློབ་གྲྭ་ཆེན་མོའི་རིགས་བདག་མཆོག་ཕེབས་སྐབས་དཔེ་མཛོད་དོ་དམ་པ་དང་མཇལ་བ་དང་། ཁོང་གིས་དཔེ་མཛོད་ཁང་གི་གནས་སྟངས་བཀའ་བརྩད་གནང་བར་། དཔེ་མཛོད་དོ་དམ་པས། དེབ་གཅིག་མ་གཏོགས་ཚང་མ་དཔེ་མཛོད་ནང་ལ་ཡོད། དེབ་གཅིག་གཡར་པ་དེ་ད་ལྟ་ཕྱིར་ལེན་པར་འགྲོ་ཡི་ཡོད། ཅེས་ལན་བཏབ། དགོད་གཏམ་དེའི་དོན་ནི། དཔེ་མཛོད་ཁང་གི་དེབ་ནི་དེབ་ཉར་ནས་སྡོད་རྒྱུ་མེད་པར་གཡོར་དགོས་པ་དང་། བེད་སྤྱོད་གཏོང་དགོས། དེབ་དང་ཡིག་ཚགས་ཀྱི་རྒྱུ་ཆ་ཁག་དཔེ་མཛོད་དང་ཡིག་ཚགས་ཁང་ལ་ཉར་ནས་བསྡད་ན་སྙིང་པོ་མེད་པ་བརྗོད་ཀྱི་ཡོད། ཡིག་ཆ་དང་དེབ་ཉར་ཚགས་བྱ་དགོས་དོན་ནི་བེད་སྤྱོད་གཏོང་བའམ། བཀླགས་ནས་ནང་དོན་ཤེས་པ་བྱ་རྒྱུའི་ཆེད་དུ་ཡིན་པ་གསལ་སྟོན་བྱ་ཡི་ཡོད། ཡིག་མཁན་གཅིག་གིས་དཀའ་ལས་རྒྱབ་ནས་བྲིས་པའི་དེབ་དེའི་དམིགས་ཡུལ་གཙོ་བོ་ནི་ཉར་ཚགས་བྱ་རྒྱུའི་ཆེད་དུ་མ་ཡིན་པར་གཞན་གྱིས་བཀླགས་ནས་གོ་རྟོགས་སྤེལ་རྒྱུའི་ཆེད་དུ་རེད། ཕྲན་གྱིས་སློབ་ཚན་དེ་སྦྱོང་སྐབས་དང་། དམིགས་བསལ་དགོད་གཏམ་དེ་བཀླགས་པ་དང་ལམ་སེང་དྲན་པ་ནི། ༧རྒྱལ་བ་རིན་པོ་ཆེས་བཀའ་བསྟན་ཀློག་དེབ་ལ་བེད་སྤྱོད་ཀྱིས་ནང་དོན་རིག་པའི་སེམས་ཁམས་རིག་པ་དང་། ལྟ་གྲུབ་སོགས་སློབ་སྦྱོང་ཀྱིས་སེམས་མ་ཞི་བ་ཞི་བ་དང་། སེམས་འདུལ་བའི་ཐབས་བསྟེན་དགོས་པ་ལས། མཆོད་གཤོམ་ནང་ལ་དཔེ་ཆ་སྒྲིག་ནས་མཆོད་པ་འབུལ་བ་ཙམ་གྱིས་མི་ཕན་ཞེས་བཀའ་སློབ་གནང་བ་དྲན་ནས་བླ་མ་ཁོང་གི་བཀའ་དྲིན་དྲན་པ་དང་། བོད་ཁ་བ་ཅན་གྱི་བསྐལ་ལྡན་ལ། །མགོན་ཁྱེད་ཀྱི་བཀའ་དྲིན་བསམ་མི་ཁྱབ། ཞེས་པའི་ཚིག་ཁ་ནས་ཤོར། དེ་སྔ་བོད་ལ་བོད་ཤོག་ཟེར་པ་ཡོད་ནའང་། ཁོར་ཡུག་སྲུང་སྐྱོབ་ལ་ཕན་པའི་ཁ་ཡོད་ལག་ཡོད་ཕྱག་བསྟར་གཅིག་ནི་བོད་ཡིག་ཡིག་གཟུགས་སྦྱོང་མཁན་གྱིས་སྦྱང་ཤིང་ཐོག་འབྲི་སྲོལ་ཡོད་པ་དང་། ཕན་ཚུན་འཕྲིན་བསྐུར་སྐབས་སམ་ཊ་ཞེས་པའི་ཐོག་ཕན་ཚུན་བསྐུར་ནས་ཤོག་གྲོན་མེད་པའི་ཁྱད་ཆོས་ཆེན་པོ་ཡོད། སྦྱང་ཤིང་ཞེས་པ་དེ་སྔ་བོད་ནང་ལ་བེད་སྤྱོད་གཏོང་མཁན་མང་བ་དང་། ཕྲན་གྱིས་དྲན་ཚོད་ལ། དེ་སྔ་ཤེས་ཡོན་སྲིད་བྱུས་གསར་པའི་དགོངས་དོན་འོག་དགེ་རྒན་འོས་སྦྱོང་གནང་མཁན་ཁ་ཤས་ཀྱིས་སྦྱང་ཤིང་ཐོག་ཡི་གེ་འབྲི་བའི་ཟབ་སྦྱོང་གནང་ཡོད། ཡིན་ནའང་། ཟབ་སྦྱོང་ཐོབ་རྗེས་དགེ་རྒན་རྣམས་ཀྱིས་དངོས་སུ་བཙན་བྱོལ་བོད་མིའི་སློབ་གྲྭ་ཁག་གི་ནང་དང་། དམིགས་བསལ་མེས་དབོན་དཔེ་སྟོན་སློབ་གྲྭའི་ནང་ལ་ཕྱག་བསྟར་ཇི་ཙམ་གནང་ཡོད་མེད་མི་ཤེས། དེ་ནས། སམ་ཊ་ ཞེས་པ་བཙན་བྱོལ་ནང་གི་མི་མང་པོ་གཅིག་ལ་གསར་པ་ཡིན་སྲིད། སམ་ཊའི་ངོས་ལ་ཕྱེའམ་གྲོ་ཞིབ། རྩམ་པ་སོགས་རིམ་པ་སྲབ་མོ་ཞིག་བརྡལ་བའི་སྟེང་ལ། སྣག་ཚ་ལ་མ་བསྒྲེས་པའི་སྨྱུ་གུ་སྐམ་པོས་འཕྲིན་ཐུང་འབྲི་བར་བྱེད། འཕྲིན་འབྱོར་གྱིས་འཕྲིན་དེ་བཀླགས་རྗེས་དེ་བསུབས་ཏེ། སམ་ཊ་དེ་ག་རང་གི་སྟེང་ལ་འཕྲིན་ལན་འབྲི། སམ་ཊའི་སྟེང་གི་འཕྲིན་ཡིག་གནས་ཡུན་ཐུང་སྟབས། དེ་གསང་རྒྱ་ཅན་ལ་འཕྲིན་ཡིག་གཏོང་བ་ལ་བཀོལ་སྤྱོད་བྱེད་པ་མང་། འཕྲིན་ཡིག་གཏོང་མཁན་གྱིས་སམ་ཊ་བརྩེགས་མའི་འགྲམ་ངོས་སམ། ཡང་ན་དེའི་ཀོ་བའི་གླེགས་ཐག་གི་སྟེང་ལ་ལ་ཅའི་ཐེལ་ཙེའམ་དམ་ཕྲུག་བརྒྱབ་ནས་གཏོང་། དེ་འབྱོར་མཁན་གྱིས་ཐེལ་ཙེའི་དམ་རྒྱ་ཞིག་ནས་འཕྲིན་ཡིག་བཀླགས་རྗེས་དེ་ལས་སླ་བོས་བསུབ་ཐུབ།

བཙན་བྱོལ་ལ་ཕེབས་པའི་བོད་མི་རྒན་གྲས་མང་པོ་ཞིག་མཇལ་མྱོང་བ་དང་། ཁོང་རྣམ་པ་མང་ཆེ་བའི་བོད་ཀྱི་ཡིག་གཟུགས་ཧ་ལས་པའི་ཡག་པོ་འདུག དེ་བཞིན་བཙན་བྱོལ་ནང་དཔར་བསྐྲུན་བྱས་པའི་དེབ་རྙིང་མང་པོ་གཅིག་ཕྱག་བྲིས་ཕྱག་བསྟར་མ་མི་ཉུང་བ་མཇལ་རྒྱུ་ཡོད། དཔེ་མཚོན་གསལ་ཤོས་གཅིག་ནི་གདོང་ཐོག་རིན་པོ་ཆེ་སྐུ་ཕྲེང་ལྔ་པ་བསྟན་པའི་རྒྱལ་མཚན་མཆོག་ཨ་རིའི་ནང་ཕེབས་བཞུགས་གནང་ནའང་། ཁོང་གིས་གསུང་རྩོམ་མང་ཆེ་བ་ཕྱག་གིས་བྲིས་གནང་ཡོད། ཕྲན་གྱིས་བོད་ཀྱི་ཡིག་གཟུགས་སྐོར་ཞེ་དྲག་མི་ཤེས་ནའང་། བོད་ཀྱི་ཡིག་གཟུགས་འབྲི་སྐབས་པིར་སྨྱུག་དེ་སྔ་བེད་སྤྱོད་བྱེད་ཀྱི་མེད་པ་དང་། གཞུང་ཡིག་ཞེས་ཡིག་གཟུགས་མི་འདྲ་བ་གཅིག་ཡོད་པ་སོགས་ཕལ་ཆེ་བ་སྨྱུག་ཁ་གཞོར་ནས་འབྲི་ཡི་ཡོད་པ་དང་། ད་དུང་ཡི་གེ་འབུལ་ཡུལ་བླ་ཆེན་དང་། གཞུང་སོགས་མི་འདྲ་བར་ཡི་གེ་འབྲི་སྟངས་མི་འདྲ་བ་ཡོད། དེ་ཙམ་དུ་མ་ཟད། ཕྲན་གྱིས་གསར་དུ་ཤེས་པའི་གནས་ཚུལ་གཅིག་ནི། ཨ་རིར་གནས་བཞུགས་བསྟན་འཛིན་ཆོས་འཛིན་ལགས་ཞུ་བའི་སྐུ་སྐྱེ་མ་གཅིག་གིས། མོ་ཡིག་ནི་ཕོ་མོ་གཉིས་ཀའི་ཡིག་གཟུགས་ཀྱི་མངོན་སྟངས་ཤིག་ཡིན་པ་ལ། དེ་ནི་བག་དང་ལྡན་ཞིང་། སྣག་ལམ་གཙང་ཞིང་ཡིག་གྲལ་འགྲིག་པ་བཅས་ཀྱི་ཡིག་གཟུགས་བག་ཡོད་དང་འཇམ་པོ་མངོན། འདིའི་ལྡོག་ཟླ་ཕོ་ཡིག་སྟེེ། ཡིག་ཟུགས་ལ་བག་ཡངས་དང་རྒོད་བག་མངོན། ཞེས་གཙོ་བོ་མོ་ཡིག་འགྲེལ་བརྗོད་གནང་བ་ཞིག་མཇལ། རྟགས་འཇུག་ནང་ལ་ཡི་གེ་ཕོ་མོ་ཞེས་སྒྲ་གདངས་དྲག་གཞན་ཐོག་ནས་དབྱེ་བ་ཕྱེ་སྲོལ་གཅིག་ཡོད་པ་དང་། ད་ལྟ་ཁོང་གིས་ཡིག་གཟུགས་བག་ཡོད་དང་བག་ཡངས་ཞེས་པའི་ཐོག་ནས་ཡིག་གཟུགས་ལ་ཕོ་མོ་དབྱེ་ཚུལ་གཅིག་གསུངས་པ་དེ་ཐེངས་དང་པོར་ཐོས། ད་དུང་དེང་སྐབས་བོད་ཀྱི་ཡིག་གཟུགས་ནི་རྒྱ་ནག་གི་ཡི་གེ་ལྟར་མཚོན་རིས་ནས་འགྱུར་བའི་ལྟ་བ་འཛིན་མཁན་བོད་ཀྱི་ཡིག་ཟུགས་དང་བོད་རིག་པའི་མཁས་པ་ཡིན་ཟེར་མཁན་དེ་འདྲ་ཡོད་འདུག་པས་དེ་རིགས་བསམ་གཞིགས་ཀྱིས་མཁས་པ་གསལ་སྟོན་ཡག་པོ་གནང་གལ་ཆེ་བ་མཐོང་།

དེ་སྔ་ཞྭ་སྒབ་པ་དབང་ཕྱུག་བདེ་ལྡན་མཆོག་ལ་བོད་ཀྱི་ལོ་རྒྱུས་སློབ་ཁྲིད་དགོས་པའི་བཀའ་ཕེབས་པ་དང་། རྒྱལ་རབས་ལས་བོད་ཀྱི་སྣོད་བཅུད་ཆགས་ཚུལ་ཐོག་ལ་ཞིབ་རྒྱས་སློབ་ཁྲིད་དགོས་པའི་བཀའ་ཕེབས་ཡོད། དེ་ཡང་བོད་ཀྱི་ཁོར་ཡུག་ཆགས་ཚུལ་དང་། བོད་ཀྱི་ཁང་པ་དང་། ཟས་རིགས། གྱོན་གོས། བོད་ཀྱི་ཡིག་གཟུགས། བོད་ཀྱི་ཤོག་བུ་སོགས་གཞན་དང་མི་འདྲ་བའི་ཁྱད་ཆོས་གང་ཡོད་པ་རྣམས་གསལ་སྟོན་ཐུབ་པ་དགོས་པའི་བཀའ་ཕེབས་ཁོང་གིས་སློབ་ཁྲིད་ཐོག་མར་གནང་སྐབས་གསུངས་ཡོད། དེང་སྐབས་ནུབ་ཕྱོགས་སུ་སྡོད་མཁན་ཚོས་གསལ་པོ་ཤེས་ཐུབ་པ་ནི། ལས་ཀ་བྱེད་ས་དང་། མཐོ་སློབ་སོགས་ལ་བོད་པའི་ཁ་ལག་དམིགས་བསལ་ག་རེ་ཡིན་པ་དང་། བོད་ཀྱི་ཁང་བཟོའི་ལག་རྩལ་དང་། བཟོ་དབྱིབས་དམིགས་བསལ་མི་འདྲ་བ་དང་ཁྱད་ཆོས་གང་ཡོད་པ་སོགས་གླེང་མཁན་དང་འདྲི་མཁན་མང་པོ་ཡོད། ཡིན་ནའང་། བོད་ཕྲུག་དང་བོད་པ་མང་ཆེ་བས་བོད་ཀྱི་ཁ་ལག་ལབ་པ་དང་། རྩམ་པ་དང་། ཡང་ན། མོག་མོག་ཙམ་ལས་ལབ་ཀྱི་མེད་ལ། བོད་རང་ལ་འབྲུ་རིགས་གང་དང་གང་ཐོན་གྱི་ཡོད་པ་ཡང་ལབ་ཐུབ་མཁན་དཀོན་པོ་ཆགས་ཡོད། སྐབས་སུ་བབ་པ་ཕྲན་གྱི་སེམས་ནང་ལ་དྲན་པ་ནི། བོད་ཀྱི་ཤོག་བུ་ལ་དམིགས་བསལ་ཁྱད་ཆོས་མི་འདྲ་བ་ག་རེ་ཡོད་དམ། ལོ་ངོ་བརྒྱ་ཕྲག་མང་པོ་སོང་བའི་དཔེ་རྙིང་བོད་ཤོག་ཐོག་ལ་བྲིས་པ་ད་ལྟ་ཡང་འབུ་ཡིས་མ་བཟས་པ་དང་། མ་རུལ་བར་གནས་ཐུབ་པ་དེ་རིགས་ལ་དོ་སྣང་བྱེད་མཁན་ག་ཚོད་བྱུང་ཡོད་དམ། ཡིན་ནའང་། ཕྱི་རྒྱལ་གྱི་མིས། བོད་ཀྱི་ཤོག་བུའི་ལམ། ཞེས་པའི་ཚོགས་པ་ཡང་བཙུགས་ཡོད།

བཙན་བྱོལ་ཙམ་མིན་པར་དེང་སྐབས་ཀམ་པུ་ཊར་དར་ཁྱབ་ཆེ་བས་བོད་ཀྱི་ཡིག་གཟུགས་སྦྱོང་མི་དགོས་པ་དང་། དུས་ཚོད་འཕྲོག་བརླག་ཡིན་པའི་བསམ་ཚུལ་འདོན་མཁན་ཇེ་མང་རེད། དེ་སྔ་ཕྲན་སློབ་གྲྭ་ལ་ཡོད་སྐབས་ཡིག་གཟུགས་སློབ་ཁྲིད་གནང་མཁན་གཅིག་ཡོད་ནའང་། ང་རང་ཚུད་པའི་སློབ་ཕྲུག་མང་ཆེ་བས་ཡིག་གཟུགས་ལ་དོ་སྣང་བྱེད་ཀྱི་མེད། ཐེངས་ཤིག་ང་ཚོའི་སློབ་གྲྭར་སྐབས་དེ་དུས་དགོད་གཏམ་ཤོད་མཁན་གྲགས་ཆེ་ཤོས། པ་ཚེ་རིང་ལགས། ཕེབས་སོང་། ཁོང་དང་ང་ཚོའི་ཡིག་གཟུགས་རྒན་ལགས་གཉིས་གླེང་མོལ་གནང་སྐབས་སློབ་ཕྲུག་མང་པོས་པ་ཚེ་རིང་ལགས་ཀྱི་ངོ་གདོང་ལ་ཅེར་ནས་དགོད་གཏམ་ཉན་རྒྱུའི་རེ་བས་ཁེངས། པ་ཚེ་རིང་ལགས་ཀྱིས། བོད་ཆོལ་ཁ་གསུམ་གྱི་ནང་ནས་སྤྱང་ཤོས་ཨ་མདོ་བ་ཚོ་རེད་འདུག དབུས་གཙང་དང་དམིགས་བསལ་བསལ་ལྷ་ས་བ་ཚོས་བོད་ཀྱི་ཡིག་གཟུགས་ཚུགས་རིང་དང་། ཚུགས་ཐུང་སོགས་སྦྱོང་སྐབས། ཨ་མདོ་བས་དབུ་ཅན་གཅིག་པུ་སྦྱངས་པ་དང་། དབུ་གཙང་ཚོས་དབུ་ཅན་སྦྱོང་སྐབས་ཨ་མདོ་བ་ཚོས་རྩོམ་ཡིག་བྲིས་ཚར་པ་རེད། ཅེས་བཤད་པ་དང་། ཁོས་མུ་མཐུད་དེ། འཛིན་གྲྭ་དང་པོ་ནས་བཅུ་གཉིས་མ་ཐོན་བར་དུ་ཡིག་གཟུགས་སྦྱོང་མཁན་དང་། མི་སྦྱོང་མཁན་ལ་ཁྱད་པར་མེད་པར་འཛིན་གྲྭ་བཅུ་གཉིས་ཐོན་སྐབས་ཚང་མས་གི་གུ་རིའི་རྩེ་འདྲ་པོ་འབྲི་མཁན་གཅིག་པ་རེད་འདུག ཅེས་བཤད། སྐབས་དེ་དུས་མཐའ་འཁོར་གྱི་སློབ་ཕྲུག་ཚང་མ་དགད་མོ་ཤོར་བ་དང་། ང་ཚོའི་ཡིག་གཟུགས་རྒན་ལགས་ཀྱི་ཞལ་ལ་འཛུམ་ཤར་པ་ལས་གང་ཡང་གསུངས་མ་སོང་། པ་ཚེ་རིང་ལགས་ཁོང་ལྟ་བུ་བོད་ཀྱི་ཡིག་གཟུགས་ལ་གལ་ཆེའི་རང་བཞིན་མ་རྟོགས་མཁན་ཚོས་དེ་ལྟར་གསུང་སྲིད་ཀྱང་། ངས་བསམ་ན་ཁོང་གིས་དགོད་གཏམ་རང་གི་ཆེད་དུ་གསུངས་པ་ལས་གཞི་རྩའི་ཆ་ནས་ཁོང་གིས་བོད་ཀྱི་ཡིག་གཟུགས་ཀྱི་གལ་ཆེན་རང་བཞིན་དང་། སྒྱུ་རྩལ་གྱི་ཁྱད་ཆོས་ཤེས་ཀྱི་ཡོད་ངེས་སྙམ། དེའི་ཐོག་ལ་མང་པོ་མ་བཤད་པར། གདོང་ཐོག་རིན་པོ་ཆེས། པོ་ཏི་བཞི་ངོ་བཤུས་མ་བརྒྱབ་པར་ཡིག་མཁན་དུ་མི་འགྱུར་། པོ་ཏི་དང་པོ་བྲིས་ནས་རླུང་ལ་བསྐུར་། པོ་ཏི་གཉིས་པ་བྲིས་ནས་མེ་ལ་བསྲེག པོ་ཏི་གསུམ་པ་བྲིས་ནས་ཆུ་ལ་བསྐུར་། པོ་ཏི་བཞི་པ་བྲིས་ནས་དགེ་རྒན་ལ་འབུལ་ཞེས་ངག་རྒྱུན་ལ་ཡོད། ཅེས་གསུངས་ཡོད་ལ། གདོང་ཐོག་རིན་པོ་ཆེས་དེང་སྐབས་ཀམ་པུ་ཊར་ཐོག་ལ་དབུ་ཅན་དར་གསོ་ཆེ་བ་དེས་བོད་ཀྱི་ཡིག་གཟུགས་ཀྱི་ལས་དབང་ལ་ཐུགས་ཁྲལ་ཆེན་པོ་ཡོད་སྐོར་བཀའ་གནང་ཡོད། འོ་ཡ། ད་མང་པོ་ཆགས་སོང་། འབྲི་མཚམས་འདིར་འཇོག་གི་ཡིན། ཐུགས་རྗེ་ཆེ། །