བོད་དོན་ཞི་བའི་ལམ་ནས་ཐག་གཅོད་བྱས་ན་རྒྱ་དཀར་ནག་གི་ས་མཚམས་ཀྱི་གནད་དོན་ཡང་ཐག་གཅོད་ཐུབ་རྒྱུ་ཡིན་སྐོར་བརྗོད་འདུག
དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་དཀར་ནག་དང་བོད། རང་སྲིད་རང་སྐྱོང་གི་འཚོལ་སྙེག་ཅེས་པའི་དཔེ་དེབ་ཅིག་དབུ་འབྱེད་བསྐྱང་གནང་ཡོད་ཅིང་། དེབ་དེའི་ནང་བོད་མི་ཚོས་རང་སྲིད་རང་སྐྱོང་གི་ཆེད་དུ་འཐབ་རྩོད་བྱས་པའི་འབྱུང་ཁུངས་དང་། རང་སྲིད་རང་སྐྱོང་ངམ་རང་བཙན་གྱི་ཆེད་དུ་ཞི་བའི་ལས་འགུལ་སྤེལ་བའི་རིམ་པ་སྣ་ཚོགས་གླེང་ཡོད་པ་མ་ཟད། རྩོམ་པ་པོས་བོད་དོན་ཞི་བའི་ལམ་ནས་ཐག་གཅོད་བྱས་ན་རྒྱ་གར་དང་རྒྱ་ནག་དབར་གྱི་ས་མཚམས་ཀྱི་གནད་དོན་ཡང་ཐག་གཅོད་ཐུབ་རྒྱུ་ཡིན་པའི་རྒྱུ་མཚན་བཀོད་ཡོད་འདུག
དེབ་དེའི་ནང་འཛམ་གླིང་གི་ཡང་རྩེར་གནས་པའི་བོད་མི་ཚོས་རང་སྲིད་རང་སྐྱོང་ངམ་རང་བཙན་གྱི་ཆེད་དུ་ལོ་ངོ་བདུན་ཅུའི་རིང་ལ་ཞི་བའི་འཐབ་རྩོད་བྱས་པའི་སྐོར་དང་བོད་ཀྱི་དེང་རབས་ལོ་རྒྱུས་སྐོར་ལ་འགྲེལ་བརྗོད། བོད་དེ་རྒྱ་དཀར་ནག་གཉིས་ཀྱི་ས་མཚམས་སུ་ཆགས་པའི་ཧི་མ་ལ་ཡའི་རི་རྒྱུད་དུ་ཆགས་ཡོད་ཅིང་། ཕྱི་ལོ་ ༡༩༥༠ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་བཙན་བཟུང་བྱས་པ་དང་། ལྷག་པར་དུ་རྒྱ་གར་དང་རྒྱ་ནག་ལ་མཚོན་ན་ས་ཁམས་ཐབས་ཇུས་ཀྱི་གལ་ཆེའི་གནད་དོན་དང་འབྲེལ་བའི་ཐོག་ནས་བོད་མིའི་རང་སྲིད་རང་སྐྱོང་གི་ཤུགས་རྐྱེན་ལ་དཔྱད་པ་དང་། བོད་ལ་རང་སྲིད་རང་སྐྱོང་སྤྲོད་རྒྱུ་ནི་རྒྱ་དཀར་ནག་གཉིས་བར། ཧི་མ་ལ་ཡའི་ཁུལ་གྱི་རྒྱལ་སྤྱིའི་འབྲེལ་ལམ་ཀུན་གྱི་གཞི་རྩའི་གནས་བབ་དང་འབྲེལ་འདྲིས་ཡོད་སྐོར་སོགས་གླེང་སློང་བྱས་ཡོད་འདུག
དཔེ་དེབ་དེ་ནི་རྒྱ་གར་གྱི་སི་རེ་ན་རཱ་ཡ་ནཱ་(Sree Narayana) མཐོ་སློབ་ཀྱི་འབུམ་རམས་པའི་སློབ་དཔོན་ཆེན་མོ་གཞོན་པ་ལྕམ་ར་ཀེའུ་ (Rakhee Viswambharan) ལགས་ཀྱིས་བརྩམས་ཤིང་། ཨ་རིའི་ནོ་ཝ་ (Nova) གཙུག་ལག་སློབ་ཆེན་གྱིས་པར་སྐྲུན་བྱས་ཡོད་འདུག
གསར་འགོད་པ། སྐལ་བཟང་སྦྱིན་པ།
