ཧོང་ཀོང་བ་དྲུག་གིས་སྤྱི་ཚོགས་དྲ་ལམ་ཁག་ཏུ་པེ་ཅིན་གཞུང་ལ་གྱེན་ལོག་གི་གནས་ཚུལ་ཁྱབ་སྤེལ་བྱས་ལུགས་ཀྱི་ཉེས་མིང་གཡོགས་ཏེ་འཛིན་བཟུང་བྱས་ཡོད་འདུག
![](https://tibettimes.net/wp-content/uploads/2024/05/Screenshot-2024-05-29-at-4.00.01-PM.png)
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༢༨ ཉིན་ཧོང་ཀོང་གི་དམངས་གཙོ་དོན་གཉེར་བ་ལྕམ་ཁྲོ་ཧང་ཐུང་ (Chow Hang Tung) ཚུད་པའི་ཧོང་ཀོང་བ་དྲུག་གིས་སྒེར་གྱི་ངོ་དེབ་ཐོག་རྒྱ་ནག་གཞུང་ལ་སྐྱོན་བརྗོད་ཀྱི་ཡི་གེ་འགྲེམས་སྤེལ་བྱས་པ་དང་། གནམ་སྡེ་སྒོ་མོ་ཆེའི་དྲུག་བཞིའི་དོན་རྐྱེན་རྗེས་དྲན་གྱི་ལས་འགུལ་ནང་མཉམ་ཞུགས་དགོས་པའི་གསལ་བསྒྲགས་སྤེལ་བར་བརྟེན། ཧོང་ཀོང་གི་ཉེན་རྟོག་པས་མི་དྲུག་པོ་འཛིན་བཟུང་བཀག་ཉར་བྱས་ཡོད་འདུག
ཧོང་ཀོང་གཞུང་གིས་དེ་འབྲེལ་གསར་འགོད་བསྒྲགས་གཏམ་ཞིག་སྤེལ་བའི་ནང་། རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོ་མཁན་རྣམས་ལ་ཉེས་ཆད་ཚབས་ཆེན་ཕོག་ཉེན་ཡོད་པ་དང་། དྲ་ལམ་བརྒྱུད་གྱེན་ལོག་གི་བྱ་སྤྱོད་སྤེལ་མཁན་རྣམས་འཛིན་བཟུང་བྱ་ངེས་ཡིན་སྐོར་དང་། འཛིན་བཟུང་བྱས་པའི་མི་དེ་དག་ལ་ལོ་བདུན་རིང་གི་ཁྲིམས་ཐག་གཅོད་ཉེན་ཡོད་སྐོར་སོགས་བརྗོད་འདུག
དེ་འབྲེལ་རྒྱལ་སྤྱིའི་ཉེས་ཡངས་ཚོགས་པ་ (Amnesty International) ཡིས། གནམ་སྡེ་སྒོ་མོ་ཆེའི་དྲུག་བཞིའི་དོན་རྐྱེན་རྗེས་དྲན་སྲུང་གཙི་འགོག་ཐབས་སུ་དྲག་གནོན་དང་འཛིན་བཟུང་བྱས་པ་ནི་ངོ་ཚ་དགོས་པའི་བྱ་སྤྱོད་ཅིག་ཡིན་པ་དང་། འཛིན་བཟུང་བྱས་པའི་དམངས་གཙོ་དོན་གཉེར་བ་ལྕམ་ཁྲོ་ཧང་ཐུང་ཚུད་པའི་ཧོང་ཀོང་བ་དྲུག་དེ་འཕྲལ་དུ་ཀློད་གྲོལ་གཏོང་དགོས་པའི་འབོད་སྐུལ་ཞུ་ཡི་ཡོད། ཅེས་བརྗོད་འདུག
ཧོང་ཀོང་གཞུང་གིས་ད་ལན་འཛིན་བཟུང་བྱས་པའི་མི་དྲུག་དེའི་ནང་བུད་མེད་ལྔ་དང་སྐྱེས་པ་གཅིག་ཡོད་སྐོར་བརྗོད་པ་ཙམ་ལས་སུ་ཡིན་མིན་སོགས་གསལ་ཁ་བཟོས་མེད་ཀྱང་། བུད་མེད་གཅིག་ནི་ཧོང་ཀོང་གི་དམངས་གཙོ་དོན་གཉེར་བ་ལྕམ་ཁྲོ་ཧང་ཐུང་ཡིན་འདུག་ལ། ཁོང་མོས་ཕྱི་ལོ་ ༢༠༢༡ ལོར་གནམ་བདེ་སྒོ་མོ་ཆེའི་དྲུག་བཞིའི་རྗེས་དྲན་གོ་སྒྲིག་བྱས་རྐྱེན་འཛིན་བཟུང་བྱས་ནས་ལོ་གཅིག་རིང་བཙོན་འཇུག་བྱས་མྱོང་ཡོད་འདུག
རྒྱ་ནག་གཞུང་གིས་ཕྱི་ལོ་ ༢༠༢༠ ལོར་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཟེར་བ་ལག་བསྟར་བྱེད་མགོ་བཙུགས་ཡོད་པ་དང་། ཁྲིམས་གསར་དེའི་ནང་གཙོ་བོ་སྲིད་གཞུང་མགོ་རྟིང་སློག་པ་དང་། འཇིགས་སྐུལ་དྲག་སྤྱོད། གསང་བའི་ཡིག་ཆ་རྐུ་ཁྱེར། ཕྱིའི་ཤུགས་རྐྱེན་བཅས་བཀག་སྡོམ་ནན་པོ་བྱ་རྒྱུ་ཡིན་པའི་སྐོར་བཀོད་ཡོད་འདུག་ལ། ཁྲིམས་གསར་དེ་ལག་བསྟར་བྱས་རྗེས་ཧོང་ཀོང་གི་དམངས་གཙོ་དོན་གཉེར་བ་ཁྲི་སྟོང་མང་པོས་ངོ་རྒོལ་བྱས་ཏེ་འཛིན་བཟུང་བཙོན་འཇུག་དང་རྒྱལ་ཁབ་གཞན་དུ་བྲོས་བྱོལ་དུ་འགྲོ་དགོས་བྱུང་ཡོད་པ་རེད། འདི་ལོའི་ཕྱི་ཟླ་ ༣ ཚེས་ ༡༩ ཉིན་རྒྱ་ནག་གཞུང་གི་བཀོད་ཇུས་འོག་ཡོད་པའི་ཧོང་ཀོང་ཁྲིམས་བཟོ་ལྷན་ཚོགས་ཀྱིས་རྒྱལ་ཁབ་ཀྱི་བདེ་འཇགས་སྲུང་སྐྱོབ་ཀྱི་སྲོལ་ཡིག་ཅེས་པ་ཞིག་གཏན་འབེབ་བྱས་ཡོད་པ་དང་། སྲོལ་ཡིག་དེའི་ནང་དུ་རྒྱལ་ཁབ་ཀྱི་བདེ་འཇགས་སྲུང་སྐྱོབ་ཟེར་བའི་མིང་ཐོག་ནས་རང་དབང་དང་དམངས་གཙོ་དོན་གཉེར་བ་རྣམས་ལ་མཐའ་གཅིག་ཏུ་བཙན་གནོན་ཁྲིམས་ཆད་གཅོད་རྒྱུ་ཡིན་པ་གསལ་ཡོད་པར་བརྟེན། ཧོང་ཀོང་གཞུང་གིས་ཁྲིམས་གསར་དེ་གཏན་འབེབ་བྱས་རྗེས། ཨ་རི་དང་དབྱིན་ཡུལ། ཐའེ་ཝན་སོགས་འཛམ་གླིང་རྒྱལ་ཁབ་མང་པོའི་གཞུང་དང་གྲོས་ཚོགས་འཐུས་མིས་སྐྱོན་བརྗོད་ཤུགས་ཆེན་གནང་ཡོད་པ་རེད།
གནམ་སྡེ་སྒོ་མོ་ཆེའི་དྲུག་བཞིའི་དོན་རྐྱེན་རྗེས་དྲན་གྱི་ཉིན་མོ་བསླེབ་ལ་ཉེ་བ་དང་བསྟུན། རྒྱ་ནག་གཞུང་གིས་རྒྱ་ནག་ནང་ལོགས་དང་རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཡུ་གུར་སོགས་སུ་དམ་དྲག་དོགས་གཟོན་སྔར་ལྷག་བྱས་ཏེ། དམངས་གཙོ་དོན་གཉེར་ཅན་གྱི་ལས་འགུལ་བ་དང་རྩོམ་པ་པོ་སོགས་ཉིན་དེའི་སྔ་གཞུག་ཏུ་རང་ཁྱིམ་དུ་བཀག་ཉར་འོག་འཇོག་པ་དང་། པེ་ཅིན་སོགས་སུ་ཕྱི་མི་འགྲོ་སྐྱོད་བྱེད་མི་ཆོག་པ་སོགས་ཀྱི་དམ་དྲག་ཤུགས་ཆེན་བྱེད་བཞིན་ཡོད་པ་རེད། འདས་པའི་ལོ་ཤས་ནས་བཟུང་ཧོང་ཀོང་ནང་དུའང་དྲུག་བཞིའི་དོན་རྐྱེན་རྗེས་དྲན་གྱི་ཉིན་མོ་སྲུང་གཙི་བྱེད་པར་བཀག་སྡོམ་ནན་པོ་བྱས་ཏེ། དམངས་གཙོའི་ལས་འགུལ་བ་མང་པོ་འཛིན་བཟུང་བྱས་དང་བྱེད་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།