བདེན་པའི་འཐབ་རྩོད་པ་མགོན་པོ་སྐྱིད་ལགས་ཀྱིས་ལྷ་ས་གྲོང་ཁྱེར་མི་དམངས་ཁྲིམས་ཁང་གི་མདུན་དུ་རྡོ་རྗེ་བཀྲ་ཤིས་ལགས་སུ་དྲང་བདེན་གྱིས་ཁྲིམས་ཞིབ་བྱེད་དགོས་པའི་ཞི་རྒོལ་ལས་འགུལ་སྤེལ་སྐབས་རྒྱ་གཞུང་ཉེན་རྟོག་པས་གཅར་རྡུང་བཏང་ནས་བཙན་གྱིས་ཕྱིར་ལོག་བཏང་ཡོད་འདུག
འདི་གའི་གསར་འགོད་པར་འབྱོར་བའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༢༨ ཉིན་བོད་ཀྱི་ཚོང་བ་རྡོ་རྗེ་བཀྲ་ཤིས་ལགས་སུ་དྲང་བདེན་གྱི་ཁྲིམས་ཆད་ཡོང་སླད། ཁོང་གི་གཅེན་མོ་བདེན་པའི་འཐབ་རྩོད་པ་མགོན་པོ་སྐྱིད་ལགས་ཀྱིས་མུ་མཐུད་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་མདུན་ནས་ཞི་རྒོལ་ལས་འགུལ་སྤེལ་སྐབས། རྒྱ་གཞུང་ཉེན་རྟོག་པས་གཅར་རྡུང་བཏང་སྟེ་བཙན་གྱིས་ཕྱིར་རང་ཁྱིམ་དུ་ལོག་བཏང་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན་ལྟར་ན། མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་མི་དམངས་ཁྲིམས་ཁང་གི་མདུན་དུ་ཞི་རྒོལ་ལས་འགུལ་སྤེལ་སྐབས། ཉེན་རྟོག་པ་སྐོར་ཞིག་ཡོང་ནས་ཁོང་མོར་གཅར་རྡུང་གཏོང་གིན་གཏོང་གིན་ཕྱིར་བཙན་གྱིས་ལོག་བཏང་ཡོད་པ་དང་། མི་དམངས་ཁྲིམས་ཁང་གིས་རྡོ་རྗེ་བཀྲ་ཤིས་ལ་དྲང་བདེན་གྱི་ཁྲིམས་ཐག་གཅོད་པའི་གནད་དོན་དང་ལེན་མ་བྱས་པར། ད་དུང་ཉེན་རྟོག་པ་བཀོལ་སྤྱོད་ཀྱིས་ཁོང་མོར་གཅར་རྡུང་བཏང་སྟེ་ལག་པ་དང་ལུས་པོར་སྔོ་སྨུག་བབ་ཡོད་སྐོར་སོགས་བརྗོད་བྱུང་།
ཞི་རྒོལ་ལས་འགུལ་སྤེལ་བཞིན་པའི་བརྙན་ཁག་ཅིག་འདི་གར་འབྱོར་བའི་ནང་། མགོན་པོ་སྐྱིད་ཀྱིས་ལག་ཏུ་ཕྱི་ལོ་ ༢༠༡༥ ཡས་མས་ལ་པེ་ཅིན་ཆེས་མཐོའི་མི་དམངས་ཉེན་རྟོག་ཁང་ནས་སྤྲད་པའི་ཡི་གེ་ཞིག་སྟོན་བཞིན། པེ་ཅིན་ཆེས་མཐོའི་ཉེན་རྟོག་ཁང་གིས་རྡོ་རྗེ་བཀྲ་ཤིས་ཀྱི་གནད་དོན་དེ་ཟླ་གསུམ་གྱི་ནང་ཐག་གཅོད་བྱེད་དགོས་ལུགས་བརྗོད་ཡོད་ཀྱང་། ད་དུང་ཐག་གཅོད་མ་བྱས་པར་ལོ་མང་པོ་འགོར་སོང་། ཚང་མས་ལྟོས་དང་། འདི་ན་ལྷ་ས་མི་དམངས་ཁྲིམས་ཁང་གིས་མི་དཀར་པོར་ཞྭ་མོ་ནག་པོ་གཡོགས་ནས་འདས་པའི་ལོ་ངོ་བདུན་བརྒྱད་རིང་ལ་རྡོ་རྗེ་བཀྲ་ཤིས་ཀྱི་གནད་དོན་ལ་དྲང་བདེན་གྱིས་ཁྲིམས་ཞིབ་མ་བྱས་པ་དང་། ནང་མིར་ཐུག་འཕྲད་བྱེད་མ་བཅུག་པར་འགོར་འགྱངས་བཏང་ནས་བཞག་ཡོད་སྐོར་འགྲེལ་བརྗོད་གནང་གི་འདུག
ད་རེས་མགོན་པོ་སྐྱིད་ཀྱི་ལག་ཏུ་བཟུང་བའི་ཡི་གེ་དེ་ནི། དེ་སྔ་རྡོ་རྗེ་བཀྲ་ཤིས་ཀྱི་ནང་མི་དང་ཁྲིམས་རྩོད་པས། རྡོ་རྗེ་བཀྲ་ཤིས་ལ་ཁྲིམས་ཆད་ལ་ཁྲིམས་ཞིབ་བྱས་ཏེ་དྲང་བདེན་གྱི་ཐག་གཅོད་དགོས་པའི་ཞུ་གཏུགས་སྐབས། པེ་ཅིན་གྱི་ཆེས་མཐོའི་ཉེན་རྟོག་ཁང་གིས་སྤྲད་པ་ཞིག་ཡིན་པ་དང་། ཡི་གེའི་ནང་རྡོ་རྗེ་བཀྲ་ཤིས་ཀྱི་གནད་དོན་དེ་དུས་ཡུན་ཟླ་གསུམ་ནང་ཐག་གཅོད་དགོས་སྐོར་བཀོད་ཡོད་ཀྱང་། བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གིས་རྡོ་རྗེ་བཀྲ་ཤིས་ཀྱི་གནད་དོན་ལ་ཁ་ཡ་བྱས་མེད་སྟབས། ད་རེས་མགོན་པོ་སྐྱིད་ལགས་ཀྱིས་ཞི་རྒོལ་ལས་འགུལ་སྤེལ་ཡོད་པ་དང་། བརྙན་ནང་། བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གིས་རྒྱལ་ཁབ་ཀྱི་རྩ་ཁྲིམས་ནང་ལྟར་རྡོ་རྗེ་བཀྲ་ཤིས་ཀྱི་གནད་དོན་ལ་དྲང་བདེན་གྱིས་ཐག་གཅོད་བླངས་ཚེ། ངས་ཀྱང་ཁྲིམས་ཁང་གི་སྒོ་འགྲམ་ནས་ཞུ་གཏུགས་བྱེད་དགོས་དོན་མེད་ཅེས་འགྲེལ་བརྗོད་གནང་གི་འདུག
ཕྱི་ལོ་ ༢༠༡༠ ཟླ་ ༦ ཚེས་ ༢༦ ཉིན་ལྷ་ས་མི་དམངས་འབྲིང་རིམ་ཁྲིམས་ཁང་གིས་གསང་བའི་ཁྲིམས་བཤེར་བྱས་ཏེ་རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཚེ་བཙོན་གྱི་ཁྲིམས་ཐག་བཅད་པ་དང་འབྲེལ། གཅེན་མོ་མགོན་པོ་སྐྱིད་དང་མོའི་ཁྱོ་ག་ཆོས་སྐྱོང་གཉིས་ལ་གཅར་རྡུང་བཏང་ནས་འཇིགས་སྐུལ་བྱས་པ་ཉུང་ཉུང་མིན་ལ། འདས་ལོའི་ཕྱི་ཟླ་ ༨ ནང་མགོན་པོ་སྐྱིད་ལགས་ཀྱིས་ལྷ་ས་ཆེས་མཐོའི་ཁྲིམས་ཁང་གི་མདུན་དུ་ཞུ་གཏུགས་ཀྱི་ལས་འགུལ་སྤེལ་སྐབས། རྒྱ་ནག་ཉེན་རྟོག་པ་སྐོར་ཞིག་ཡོང་ནས་ཁོང་མོ་ཉེན་རྟོག་ཁང་དུ་བཙན་འཁྲིད་བྱས་ཡོད་པ་དང་། དང་པོ་བཙན་འཁྲིད་བྱེད་སྐབས་བདེ་པོ་ཐང་པོ་ཡིན་ཡང་ཀློད་གྲོལ་ཐོབ་སྐབས་འགུལ་སྐྱོད་མི་ཐུབ་པར་རོ་ལྟ་དང་ལུས་ལ་གཅར་རྡུང་བཏང་ནས་སྔོ་སྨུག་གིས་ཁེངས་ཡོད་འདུག
གསར་འགོད་པ། སྐལ་བཟང་སྦྱིན་པ།
