རྒྱ་གར་ཀོང་རི་སི་སྲིད་དོན་ཚོགས་པའི་གྲོས་ཚོགས་འཐུས་མི་ཤཱ་ཤི་ཐ་རུར་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་འདུག
དེ་རིང་ཞོགས་པར་བཞུགས་སྒར་༧རྒྱལ་བའི་ཕོ་བྲང་དུ། རྒྱ་གར་གྱི་ཀོང་རེ་སི་སྲིད་དོན་ཚོགས་པའི་ (Congress) གྲོས་ཚོགས་འཐུས་མི་དང་རྩོམ་པ་པོ་གྲགས་ཅན་ཤཱ་ཤི་ཐ་རུར་ (Shashi Tharoor) ལགས་ཀྱིས་་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་པ་དང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་མཇལ་མོལ་གནང་ཡོད་འདུག
རྩོམ་པ་པོ་གྲགས་ཅན་ཤཱ་ཤི་ཐ་རུར་ལགས་ཀྱིས། དེ་རིང་བསྐྱར་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་རྒྱུ་བྱུང་བར་དགའ་པོ་ཞེ་དྲགས་བྱུང་། དེ་སྔ་ཕྱི་ལོ་ ༡༩༧༩ ཡང་ན་ ༡༩༨༠ ལོར་༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་འཇུ་རྒྱུའི་གོ་སྐབས་ཐེངས་དང་པོ་བྱུང་། དུས་དེ་ནས་བཟུང་ང་རང་༧མགོན་པོ་གང་ཉིད་མཆོག་ལ་མཇལ་ཁ་ཞུ་རྒྱུའི་གོ་སྐབས་ཐེངས་གསུམ་ཡང་ན་བཞི་ཙམ་བྱུང་། དེ་རིང་ཁོང་གིས་བྱམས་སྙིང་རྗེ་དང་ཤེས་རབ། ཆོས་ལུགས་ཕན་ཚུན་འཆམ་མཐུན་དགོས་པའི་སྐོར་དང་། རྒྱ་གར་དུ་ལོ་ངོ་ ༥༠ ལྷག་བཞུགས་པ་དང་རྒྱ་གར་ལ་བརྩི་མཐོང་ཆེན་པོ་གནང་གི་ཡོད་པ། ཚན་རིག་པ་དང་ལྷན་དུ་གྲོས་མོལ་གནང་རྒྱུའི་ཡིད་ཆེས་ཡོད་སྐོར་སོགས་གསུངས་སོང་། ༧མགོན་པོ་གང་ཉིད་མཆོག་སྐུ་ཚེ་ཡུན་དུ་བརྟན་ཞིང་། བྱམས་སྙིང་རྗེ་དང་ཤེས་རབ་ཀྱི་སྐོར་ལ་བཀའ་སློབ་མང་པོ་གནང་རྒྱུའི་གསོལ་འདེབས་ཞུ་ཡི་ཡོད། ཁོང་ཉིད་ཀྱི་བྱིན་རླབས་ཡོད་པའི་ཁ་བཏགས་འདི་གནང་བྱུང་། ངའི་སེམས་པ་ཞེ་དྲགས་ཚིམས་སོང་། ཞེས་གསུངས་འདུག
ད་དུང་ཁོང་གིས། ༧གོང་ས་རྒྱལ་བ་རིན་པོ་མཆོག་ལ་མཇལ་ཁ་ཞུ་སྐབས་ཁོང་ཉིད་ཀྱིས་སྒྲོན་མེ་སྤར་བ་ལྟ་བུའི་ཚོར་སྣང་བྱུང་། ངས་ཁོང་ཉིད་ལ་ང་ཚོའི་ཚོགས་པའི་ནང་ཁ་ཆེ་བ་གཉིས་དང་ཡི་ཤུ་བ་ ༡། ཧིན་རྡུ་ ༢ ཡོད་ཅེས་ཞུས་པ་ཡིན། ང་ཚོས་ཀྱང་བྱམས་སྙིང་རྗེ་དགོས་པ་དང་ང་ཚོའི་སྤྱི་ཚོགས་ནང་ཆོས་ལུགས་མཐུན་འབྲེལ་དགོས་པའི་ཡིད་ཆེས་བྱེད་ཀྱི་ཡོད། ཁོང་ཉིད་ཀྱིས་ང་ཚོར་བྱིན་རླབས་གནང་བར་དགའ་པོ་ཞེ་དྲགས་བྱུང་། ཞེས་གསུངས་འདུག
མཇལ་ཁར་བཅར་བའི་སྐོར་ལ་ཁོང་གིས་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་གི་བྱིན་རླབས་འཐོབ་རྒྱུ་དང་། ཁོང་ཉིད་མཇལ་ཁ་ཞུ་རྒྱུའི་ཆེད་དུ་ཡིན། འདས་པའི་ལོ་ཁ་ཤས་ནང་ང་རང་ལ་༧མགོན་པོ་གང་ཉིད་མཆོག་ཐེངས་བཞི་ཡང་ན་ལྔ་ཙམ་མཇལ་ཁ་ཞུ་རྒྱུའི་གོ་སྐབས་བྱུང་། ལོ་མང་པོ་ཕྱིན་པའི་རྗེས་སུ་སླར་ཡང་དེ་འདྲའི་གོ་སྐབས་བྱུང་བར་རྩ་ཆེན་པོ་ཞེ་དྲགས་ཆགས་ཀྱི་ཡོད་པ་རེད། ཁོང་ཉིད་ཀྱིས་འཛམ་བུ་གླིང་ལ་མང་པོ་ཞིག་གནང་ཡོད་པ་རེད། ཅེས་བརྗོད་འདུག
རྩོམ་པ་པོ་གྲགས་ཅན་ཤཱ་ཤི་ཐ་རུར་ལགས་ནི་ཕྱི་ལོ་ ༡༩༥༦ ཟླ་ ༣ ཚེས་ ༩ ཉིན་དབྱིན་ཡུལ་གྱི་རྒྱལ་ས་ལོན་ཌོན་ (London) དུ་སྐྱེས། རྒྱ་གར་ཏ་མིལ་ན་ཌུ་ (Tamil Nadu) ཡི་གྲོང་སྡེ་ཡར་ཁོ་ཌི་ (Yercaud) རུ་ཡོད་པའི་མོན་ཧྥོར་ཌི་སློབ་གྲྭ་ (Monfort School) རུ་སློབ་སྦྱོང་བྱས། ཕྱི་ལོ་ ༡༩༦༢ ལོར་མོམ་བྷེ་རུ་རྟེན་གཞི་བྱས་པའི་ཀེམ་པི་ཡོན་སློབ་གྲྭ་རུ་སློབ་སྦྱོང་བྱས་རྗེས། ལྡི་ལི་མཐོ་རིམ་སློབ་གཉེར་ཁང་དུ་ལོ་རྒྱུས་ཀྱི་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན། དེ་ནས་ཨ་རིར་ཡོད་པའི་ (Tufts University) མཐོ་སློབ་ཏུ་རྒྱལ་སྤྱིའི་འབྲེལ་ལམ་དང་། ཁྲིམས་ལུགས་དང་ཕྱི་སྲིད་ལས་དོན་གྱི་གཙུག་ལག་རབ་འབྱམས་པའི་སློབ་མཐར་ཕྱིན། དེ་བཞིན་རྒྱལ་སྤྱིའི་འབྲེལ་ལམ་དང་ལས་དོན་གྱི་འབུམ་རམས་པ་དང་སྨན་པའི་ལག་འཁྱེར་ཐོབ།
ཕྱི་ལོ་ ༡༩༧༨ ལོར་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་སྐྱབས་བཅོལ་རྟོག་ཞིབ་ཚོགས་པའི་ (UN High Commissioner for Refugees) ཚོགས་མིའི་ནང་ཕྱག་ལས་གནང་། དེ་ནས་ཕྱི་ལོ་ ༡༩༨༩ ལོར་ཆབ་སྲིད་ལས་དོན་གྱི་སྤྱི་ཁྱབ་དྲུང་ཆེ་གཞོན་པའི་ལས་རོགས་དང་། ༢༠༠༢ ལོར་མཉམ་འབྲེལ་རྒྱལ་ཚོགས་ཀྱི་དྲུང་ཆེ་གཞོན་པའི་ཕྱག་ལས་གནང་། ཕྱི་ལོ་ ༢༠༠༩ ལོར་རྒྱ་གར་ཀོང་རེ་སི་ཚོགས་པའི་གྲོས་ཚོགས་འཐུས་མི་དང་། ཕྱི་ལོ་ ༢༠༠༩ ལོར་རྒྱ་གར་དབུས་ཕྱི་སྲིད་དང་ཤེས་རིག་བློན་ཆེན་ཟུར་པའི་ཕྱག་ལས་གནང་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
