དེ་རིང་ཆུ་ཚོད་བཅུ་གཅིག་ཙམ་ལ་མོན་གྷོ་འདོད་རྒུ་གླིང་རུ་ཁག་དང་། གྷོ་ལ་ཐ་ལ་རུ་ཁག་གཉིས་བར་རྩེད་འགྲན་བྱས་པའི་ཁྲོད་མོན་གྷོ་རུ་ཁག་གིས་སྤོ་ལོ་གསུམ་བླུགས་ནས་འདི་ལོའི་རྒྱལ་ཡུམ་ཆེན་མོའི་རྗེས་དྲན་གྱི་གསེར་གྱི་རྟགས་མ་བཀྱགས་སོང་།
ཕྱི་ལོ་ ༢༠༢༤ ལོའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་གྱི་རྒྱལ་ཁ་མོན་གྷོར་འདོད་རྒུ་གླིང་རུ་ཁག་ལ་ཐོབ་སོང་། ༢༠༢༤།༠༥།༣༠ དུས་བབ་ཀྱི་པར།
འདི་ལོའི་རྐང་སྤོལ་རྩེད་འགྲན་གྱི་གོ་རིམ་ཁྲོད། གོ་ལ་ཐ་ལ་རུ་ཁག་གི་རུ་དཔོན་བསྟན་འཛིན་རྣམ་རྒྱལ་ལགས་སུ་སྤོ་ལོ་མང་ཤོས་བླུག་མཁན་གྱི་བྱ་དགའ་དང་། བསྟན་འཛིན་ཆོས་རབ་ལགས་སུ་སྒོ་ར་བ་ཡག་ཤོས། མོན་གྷོ་རུ་ཁག་གི་རྩེད་འགྲན་པ་ཉི་མ་དོན་འགྲུབ་ལགས་སུ་རྩེད་འགྲན་པ་ལེགས་ཤོས། བོད་ཁྱིམ་རུ་ཁག་གི་བསྟན་འཛིན་ཚེ་རིང་དོན་འགྲུབ་རྩེད་འགྲན་པ་ལོ་ཆུང་ཤོས་དང་། དེ་བཞིན་ཀོ་ལི་གྷལ་རུ་ཁག་ལ་བཟང་སྤྱོད་ཡག་ཤོས་ཀྱི་རུ་ཁག་བཅས་ཀྱི་བྱ་དགའ་ཐོབ་སོང་།
བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བྱང་ཆུབ་རྒྱལ་མཚན་ལགས་ཀྱིས། ཁ་སང་ང་ཚོར་ཁུངས་དག་རག་ནས་སྒྲིག་གཞིའི་ནང་དོན་ལྟར་ཐག་གཅོད་བྱས་པ་ཡིན། དྷ་རམ་ས་ལའི་སྒོ་ར་བ་བསྟན་འཛིན་དོན་ལྡན་ལགས་ཀྱིས་ས་གནས་མགོ་འཛིན་གྱི་མཚན་རྟགས་ཡོད་པའི་ཡིག་ཆ་ཞིག་གནང་སོང་། དེ་ང་ཚོས་ངོས་ལེན་བྱས་ཡོད། དེ་ནས་རུ་ཁག་གཞན་གྱིས་དགག་པ་རྒྱག་དུས་ང་ཚོས་ཞིབ་འཇུག་བྱས་ཏེ། ཁོང་གི་རང་བཙན་ལག་དེབ་རྩིས་སྤྲོད་བྱས་པ་དེ་ཁོ་རང་གི་མིན་པ་ཤེས་རྟོགས་བྱུང་། ང་ཚོའི་སྒྲིག་གཞིའི་ནང་གལ་ཏེ་རུ་ཁག་ཅིག་གིས་ཡིག་ཆ་རྫུན་མ་རྩིས་སྤྲོད་བྱས་ན་ཐག་གཅོད་གང་ཡོད་གཞིར་བཟུང་། དྷ་ས་རུ་ཁག་ཕྱིར་ཕུད་བྱ་རྒྱུ་དང་། མཐའ་མའི་རྩེད་འགྲན་དུ་གྷོ་ལ་ཐ་ལ་རུ་ཁག་བསླེབ་ཀྱི་ཡོད་པ་ཐག་གཅོད་བྱས་པ་རེད། རྒྱལ་ཡུམ་ཆེན་མོའི་རྩེད་འགྲན་དུས་ཐོག་ཏུ་རྩེ་མ་ཐུབ་པར་མི་མང་རྣམས་ལ་བརྡབ་གསིག་ཐེབས་པར་བརྟེན། བོད་རྒྱལ་ཡོངས་རྩེད་རིགས་ཚོགས་པའི་ངོས་ནས་དགོངས་དག་ཞུ་ཡི་ཡོད། ཧོན་སུར་རབ་རྒྱས་གླིང་གི་རྩེད་རིགས་ཚོགས་པ་དང་ཧོན་སུར་མི་མང་གི་རྒྱབ་སྐྱོར་ཡག་པོ་གནང་བར་ཐུགས་རྗེ་གནང་ཞུ་ཡི་ཡིན། ཞེས་བརྗོད་སོང་།
གོ་ལ་ཐ་ལ་རུ་ཁག་ལ་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་གྱི་ཨང་གཉིས་པའི་བྱ་དགའ་ཐོབ། ༢༠༢༤།༠༥།༣༠ དུས་བབ་ཀྱི་པར།
བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་གནང་བཞིན་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་ནི། ཕྱི་ལོ་ ༡༩༨༡ ལོར་བོད་ཕྲུག་ཁྱིམ་སྡེའི་རྩིས་དཔོན་ཟུར་པ་ཇོ་བོ་ཚེ་རིང་ལགས་ཀྱིས་གསར་འཛུགས་གནང་ཡོད་པ་དང་། རྩེད་འགྲན་འདི་ལོ་ལྟར་ཚོགས་ཀྱི་ཡོད་པ་རེད། འོན་ཀྱང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་འཚོགས་ཐུབ་མི་འདུག
རྒྱལ་ཡུམ་ཆེན་མོའི་རྩེད་འགྲན་དེ་ཕྱི་ལོ་ ༢༠༡༢ ལོར་དྷ་རམ་ས་ལ་དང་ ༢༠༡༣ ལོར་ཧོན་སུར་རབ་རྒྱས་གླིང་། ༢༠༡༤ ལོར་དོན་གྲུབ་གླིང་(Clementown)། ༢༠༡༥ ལོར་དྷ་རམ་ས་ལ། ༢༠༡༦ ལོར་མོན་གྷོ། ༢༠༡༧ ལོར་ཀོ་ལི་གྷལ་དོན་ལྡན་གླིང་། ༢༠༡༨ ལོར་སྦེལ་ཀོབ་བདེ་སླར་གཞིས་ཆགས། ༢༠༡༩ ལོར་དྷ་རམ་ས་ལ། ༢༠༢༡ ལོར་དོན་གྲུབ་གླིང་དང་། ཕྱི་ལོ་ ༢༠༢༢ ལོར་སྤོན་ཊ་ཆོལ་གསུམ་གཞིས་ཆགས་སུ་འཚོགས་ཡོད་ཅིང་། འདས་ལོའི་རྒྱལ་ཡུམ་ཆེན་མོའི་རྗེས་དྲན་གསེར་གྱི་རྟགས་མའི་རྩེད་འགྲན་དེ་དྷ་སར་འཚོགས་ཡོད་པ་རེད།
བོད་རྒྱལ་ཡོངས་རྩེད་རིགས་ཚོགས་པའི་དྲ་རྒྱར་གཞིགས་ན། ད་བར་རྒྱལ་ཡུམ་ཆེན་མོའི་རྩེད་འགྲན་ཐེངས ༢༩ ལ་རྩེད་འགྲན་བྱས་པའི་ཁྲོད། ཕྱི་ལོ་ ༢༠༡༥ ལོར་མོན་གྷོ་འདོད་རྒུ་གླིང་རུ་ཁག་དང་། ༢༠༡༦ ལོར་ཊི་ཌི་ཨེལ་སྦེལ་ཀོབ་རུ་ཁག ༢༠༡༧ ལོར་བཀྲིས་གླིང་ཧི་མ་ལ་ཡ་རུ་ཁག ༢༠༡༨ དང་ ༢༠༡༩ ལོར་མོན་གྷོ་འདོད་རྒུ་གླིང་རུ་ཁག ༢༠༢༡ ལོར་སིམ་ལ་རུ་ཁག ༢༠༢༢ ལོར་དོན་གྲུབ་གླིང་རུ་ཁག ༢༠༢༣ ལོར་དྷ་ས་གཅིག་སྒྲིལ་རུ་ཁག་བཅས་ལ་རྒྱལ་ཁ་ཐོབ་ཡོད་འདུག
གསར་འགོད་པ། དཔལ་ལྡན། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
