བཞུགས་སྒར་ཁུལ་གྱི་བོད་མི་ཁག་ཅིག་གིས་རྒྱ་གར་གྱི་འོས་བསྡུ་ཆེན་མོའི་ནང་མཉམ་ཞུགས་བྱེད་ཀྱི་ཡོད་འདུག
འདི་ལོའི་ཕྱི་ཟླ་ ༤ ཚེས་ ༡༩ ནས་ཟླ་འདིའི་ཕྱི་ཚེས་ ༤ བར་འཛམ་གླིང་ནང་མང་གཙོ་ཆེ་ཤོས་ཀྱི་རྒྱལ་ཁབ་རྒྱ་གར་གྱི་འོས་བསྡུ་བྱེད་བཞིན་ཡོད་པ་ལྟར། དེ་རིང་ཕྱི་ཚེས་ ༡ ཉིན་བཞུགས་སྒར་དུ་ཧི་མ་ཅལ་མངའ་སྡེའི་གཞུང་འཛིན་གསར་པའི་འོས་བསྡུ་བླུག་གིན་འདུག་ལ། དེ་རིང་གི་འོས་བསྡུའི་ནང་བཞུགས་སྒར་དུ་གནས་སྡོད་བོད་མི་ཉུང་ཤས་ཤིག་གིས་ཀྱང་མཉམ་ཞུགས་བྱེད་ཀྱི་ཡོད་འདུག
དེ་རིང་འདི་གའི་གསར་འགོད་པས་དྷ་རམ་ས་ལའི་ས་གནས་མགོ་འཛིན་དཀོན་མཆོག་མིག་དམར་ལགས་སུ་ད་ལོ་རྒྱ་གར་འོས་བསྡུའི་ནང་མཉམ་ཞུགས་བྱེད་མཁན་བོད་མི་ག་ཚོད་ཡོད་སྐོར་དྲིས་པར་ཁོང་གིས། དྷ་རམ་ས་ལའི་ཁུལ་དུ་འོས་བསྡུའི་སྡེ་ཁག་ ༡༧ ཙམ་ཡོད་པ་དང་། དྷ་ས་མེག་གྷན་དུ་སྡེ་ཁག་ ༥ ཡོད་པ་རེད། བོད་མིར་འོས་འཕེན་པའི་ཆ་རྐྱེན་ཡོད་པ་ ༦༠༠ ཙམ་ཡོད་པ་ལས། བོད་མི་ཇི་ཙམ་གྱིས་འོས་འཕེན་གྱི་ཡོད་མེད་ཁ་གསལ་ཤེས་རྟོགས་མེད་སྐོར་སོགས་བརྗོད་བྱུང་།
གསར་འགོད་པས་དཀོན་མཆོག་མིག་དམར་ལགས་སུ་བོད་མི་ཞིག་ཡིན་པའི་ཆ་ནས་རྒྱ་གར་གྱི་འོས་བསྡུའི་ལག་འཁྱེར་བཟོ་བར་ཆ་རྐྱེན་ག་རེ་ཚང་དགོས་སྐོར་དྲིས་པར་ཁོང་གིས། འོས་བསྡུའི་ལག་འཁྱེར་བཟོ་བར་གཙོ་བོ་ཨ་དྷར་ (Addar card) དང་ (Pan Card) དགོས་ཀྱི་ཡོད་པ་རེད། ཅེས་བརྗོད་བྱུང་ལ། གཞན་ཡང་འདི་གའི་གསར་འགོད་པས་ས་གནས་འོས་བསྡུའི་འབྲེལ་ཡོད་ཁག་ཅིག་ལ་བོད་མི་འོས་འཕེན་པའི་གནས་སྟངས་སྐོར་ལ་རྒྱུས་ལོན་བྱེད་ཐབས་བྱས་པ་ཡིན་ཏེ་ལན་གནང་མ་སོང་།
ཐེངས་འདིའི་རྒྱ་གར་གྱི་འོས་བསྡུ་དེ་ནི་ལོ་རྒྱུས་ཐོག་གི་འོས་བསྡུ་ཆེ་ཤོས་ཤིག་ཡིན་པ་མ་ཟད། འོས་བསྡུའི་ནང་མཉམ་ཞུགས་བྱེད་མཁན་གྱི་མི་འབོར་མང་ཤོས་ཆགས་ཀྱི་ཡོད་འདུག ད་ལན་གྱི་འོས་བསྡུ་དེ་ཉིན་གྲངས་ ༤༤ ཙམ་འགོར་གྱི་ཡོད་པས་འོས་བསྡུའི་ཉིན་གྲངས་རིང་ཤོས་ཤིག་ལའང་ངོས་འཛིན་བྱེད་ཀྱི་འདུག་ལ། རྒྱ་གར་ནང་མི་མང་ས་ཡ་ ༩༦༩ ཙམ་འོས་བསྡུའི་ནང་མཉམ་ཞུགས་བྱེད་ཆོག་གི་ཡོད་པ་རེད།
ཚེ་རིང་རྣམ་རྒྱལ། རྩོམ་སྒྲིག་པ་སྐལ་བཟང་སྦྱིན་པ།
