འདི་ལོའི་ཕྱི་ཟླ་ ༦ ཚེས་ ༡༤ ནས་ཟླ་ ༧ ཚེས ༡༤ བར་ཟླ་བ་གཅིག་རིང་རྒྱལ་སྤྱིའི་ཡུ་རོབ་སྐྱེས་པའི་རྐང་རྩེད་སྤོ་ལོའི་འགྲན་ཚོགས་(UEFA Euro 2024)དེ་འཇར་མན་རྒྱལ་ཁབ་ཏུ་བསྡུ་འཆར་ཡོད་པས། དེང་སང་འཛམ་གླིང་ས་ཕྱོགས་གང་སར་ཡོད་པའི་རྐང་སྤོལ་ལ་དགའ་བའི་མི་གྲངས་ས་ཡ་མང་པོས་རེ་སྒུག་བྱེད་ཀྱི་ཡོད་འདུག་ལ། འདི་ལོའི་རྩེད་འགྲན་ཁྲོད་རྒྱལ་ཁབ་ཁག་ནས་དྲག་འདེམས་བྱུང་བའི་རུ་ཁག་ ༢༤ ཡིས་མཉམ་ཞུགས་བྱ་རྒྱུ་ཡིན་འདུག
ཡུ་རོབ་རྐང་སྤོལ་འགྲན་ཚོགས་ཀྱི་ཁྱབ་བསྒྲགས། དྲ་ལམ་གྱི་པར།
འདི་ལོར་འཇར་མན་དུ་བསྡུ་འཆར་ཡོད་པའི་ཡུ་རོབ་རྐང་སྤོལ་འགྲན་ཚོགས་ཆེད། རྒྱལ་ས་བྷིར་ལན་དང་། མུ་ནིག་(Munich)། ཌོར་ཊི་མོན་(Dormund)སོགས་རྐང་སྤོལ་རྩེད་ར་ཆེན་པོ་བཅུ་གོ་སྒྲིག་བྱས་ཡོད་པའི་ཁྲོད། མི་གྲངས་ས་ཡ་ ༣།༥ ལྷག་གནས་སྡོད་བྱེད་མུས་ཡིན་པའི་འཇར་མན་གྱི་རྒྱལ་ས་བྷར་ལིན་དུ་རྟེན་གཞི་བྱས་པའི་ཨོ་ལོམ་པི་ཡ་(Olympia) ནི་རྩེད་ར་ཆེ་ཤོས་དེ་ཡིན་ཞིང་། རྩེད་ར་དེའི་ནང་ལྟད་མོ་བ་མི་གྲངས་ ༧༠༠༣༣ ཤོང་གི་ཡོད་པས། འདི་ལོའི་ཡུ་རོབ་རྐང་སྤོལ་འགྲན་ཚོགས་ཀྱི་རྟིང་རྩོད་རྩེད་ར་དེ་རུ་འཚོག་རྒྱུ་ཡོད་འདུག
ཁ་སང་ཕྱི་ཚེས་ ༤ ཉིན་འཛམ་གླིང་རྩེད་རིགས་དཔྱད་བརྗོད་སྤེལ་ས་ (Opta Analyst) ཟེར་བ་ཞིག་གིས་འདི་ལོའི་ཡུ་རོབ་རྐང་སྤོལ་ཐད་ལ་དཔྱད་བརྗོད་ཅིག་བྱས་པའི་ནང་། ཐོག་མའི་རྩེད་འགྲན་གྱི་རིམ་པ་དང་། རྩེད་འགྲན་པ་རྣམས་ཀྱི་ནུས་རྩལ་དང་དྲག་འདེམས་ཀྱི་རིམ་པ། རུ་ཁག་སྤྱི་ཡོངས་ཀྱི་རྩེད་འགྲན་པ་རྣམས་ལ་གཞིགས་ནས། འདི་ལོའི་འགྲན་ཚོགས་དེ་དབྱིན་ཡུལ་བརྒྱ་ཆ་ ༡༩།༩ དང་ཧྥ་རན་སི་ལ་ ༡༩།༡ འཇར་མན་ལ་ ༡༢།༤ སི་པན་ལ་ ༩།༦ པོ་ཇི་གྷལ་ལ་ ༩།༢ འཐོབ་རྒྱུར་རེ་བ་ཡོད་སྐོར་སོགས་གསལ་འདུག
ད་ལྟ་ཡུ་རོབ་རྐང་སྤོལ་འཚོག་པར་ཉིན་གྲངས་ཁ་ཤས་ལས་མེད་པས། རྩེད་རིགས་ཆེད་མཁས་པ་རྣམས་ཀྱིས། དྲ་ཐོག་སོགས་སུ་རྐང་རྩེད་དང་འབྲེལ་བའི་གནད་དོན་མང་པོ་ཞིག་དབྱེ་ཞིབ་དང་ཚ་གླེང་བྱེད་མུས་རེད། འོན་ཀྱང་། མཚམས་ལན་རེར་བསམ་པའི་ཡུལ་ལས་འདས་པའི་དོན་དངོས་རེའང་འབྱུང་གི་ཡོད་པ་རེད། དཔེར་ན། ཕྱི་ལོ་ ༢༠༢༢ ལོའི་ཁ་ཊར་དུ་འཚོགས་པའི་འཛམ་གླིང་རྐང་སྤོལ་འགྲན་ཚོགས་སྟེང་ཉི་ཧོང་དང་། འཇར་མན་བར་གྱི་རྩེད་འགྲན་ལས་ཉི་ཧོང་རྣམ་པར་རྒྱལ་བ་དེས། ལྟད་མོ་བ་དང་རྩེད་རིགས་ཆེད་མཁས་པ་རྣམས་ཀྱིས་ཚོད་དཔག་གི་མཚམས་ལས་བརྒལ་ཏེ། ཚང་མའི་བློ་ཡུལ་དུ་ཤོང་དཀའ་བའི་གྲུབ་འབྲས་ཤིག་ཐོན་ཡོད་པ་རེད། དེ་བཞིན་འདི་ལོའི་ཡུ་རོབ་ཀྱི་རྐང་སྤོལ་འགྲན་ཚོགས་དེའི་སྡེ་ཚན་ཁ་པའི་ཁྲོད། སི་པན་དང་། ཁོ་རོ་ཤི་ཡ། ཨི་ཊ་ལི། ཨེལ་བྷེ་ནི་ཡ་བཅས་ཁེལ་ཡོད་པས། སྡེ་ཚན་དེ་ནི་ཆེས་འགྲན་རྩོད་ཆེ་བའི་སྡེ་ཚན་ནམ་(Group of Death)ལ་ངོས་འཛིན་བྱེད་ཀྱི་ཡོད་ཀྱང་། སྡེ་ཁག་དེ་ལས་རུ་ཁག་གཉིས་མ་གཏོགས་བསྐྱར་འགྲན་རིམ་པའི་ནང་འདེམས་ཀྱི་མེད་པ་རེད།
རྐང་སྤོལ་དབྱེ་ཞིབ་པ་མང་པོ་ཞིག་གིས། ཡུ་རོབ་རྐང་སྤོལ་འགྲན་ཚོགས་ནི་འཛམ་གླིང་རྐང་སྤོལ་འགྲན་ཚོགས་ལས་འགྲན་རྩོད་ཀྱི་རྣོ་ངར་ཆེ་བ་ཡོད་པའི་ངོས་འཛིན་བྱེད་ཀྱི་ཡོད་ཀྱང་། རོ་ནལ་ཌོ་ ( Cristiano Ronaldo) ལོ་ཚད་ཀྱི་དབང་གིས་མཐའ་མའི་རྩེད་འགྲན་དེ་ཡིན་པའི་ཚོད་དཔག་བྱེད་ཀྱིན་འདུག་སྟབས། འཛམ་གླིང་རྐང་སྤོལ་གྱི་རྒྱལ་སྲས་མེ་སི་དང་རོ་ནལ་ཌོ་གཉིས་ཚོགས་ར་གཅིག་ལ་མཉམ་དུ་འཛོམས་ཏེ་གསར་འགོད་པའི་དྲི་བར་ལན་འདེབས་བྱེད་སྐབས་ཤིག་ལ། རོ་ནལ་ཌོ་ཡིས་མེ་སི་ཡི་གདོང་ལ་ལྟ་བཞིན། ང་ཁོང་ལས་ལོ་ཆེ་བ་ཡིན་ཡང་། བལྟས་ཚོད་ལ་ང་གཞོན་ཉམས་ཆེ་བ་ཡོད་པ་མ་ཟད། ངའི་ལུས་སེམས་གཉིས་སྟོབས་ཤུགས་ཀྱིས་ཁེངས་ཡོད། ཅེས་སོགས་བཤད་ཡོད་པས། རོ་ནལ་ཌོ་ཡིས་ད་དུང་ཡང་ཧྥི་ཧྥ་དང་ཡུ་རོབ་རྩེད་འགྲན་ཁག་ཏུ་རྩེད་འགྲན་དུ་མ་ཞིག་ལ་མཉམ་ཞུགས་བྱ་རྒྱུའི་རྨི་ལམ་གཏོང་བཞིན་ཡོད་པ་འདྲ་ནའང་། འདི་ལོའི་ཕྱི་ཟླ་ ༥ ཚེས་ ༧ ཉིན་འཇར་མན་གྱི་རྒྱལ་ས་བྷར་ལིན་དུ་རྟེན་གཞི་བྱས་པའི་རྩེད་རིགས་དུས་དེབ་ (The Game Magazine) གྱིས། འདི་ལོའི་ཡུ་རོབ་རྐང་སྤོལ་འགྲན་ཚོགས་ནི་རོ་ནལ་ཌོ་ཡི་ཡུ་རོབ་རྐང་སྤོལ་གྱི་རྩེད་འགྲན་མཐའ་མར་འགྱུར་སྲིད་པའི་ཚོད་དཔག་ཀྱང་བྱས་འདུག རོ་ནལ་ཌོས་ད་བར་ཡུ་རོབ་རྐང་སྤོལ་འགྲན་ཚོགས་ཐེངས་ ༥ ལ་མཉམ་ཞུགས་བྱས་ཏེ། ཕྱི་ལོ་ ༢༠༡༦ ལོར་ཁོས་སྣེ་ཁྲིད་པའི་པོ་ཇི་གྷལ་རུ་ཁག་གིས་ཡུ་རོབ་རྐང་སྤོལ་གྱི་གསེར་བུམ་དེ་བཀྱགས་ཡོད་པ་རེད།
ཕྱི་ལོ་ ༢༠༢༤ ལོའི་འགྲན་ཚོགས་དེའི་ཁྲོད། འདས་ལོའི་རྒྱལ་སྤྱིའི་རྐང་སྤོལ་འགྲན་ཚོགས་ནང་སྤོ་ལོ་མང་ཤོས་ལྡུག་མཁན་གྱི་ལོ་ཆུང་སྐར་ཆེན་ཧྥ་རན་སིའི་རྐང་སྤོལ་བ་ཨེམ་བྷ་པེ་ (Kylian Mbappé) དང་། དབྱིན་ཡུལ་གྱི་ཇུ་ཌི་བྷེ་ལིམ་གྷམ་ (Jude Bellingham)། ས་ཀ་ (Bukayo Saka)། ཧྥིལ་ཧྥོ་ཌན་ (Phil Foden) སོགས་ཀྱིས་མཉམ་ཞུགས་བྱེད་ཀྱི་ཡོད་ཀྱང་། འདི་ལོར་ཡུ་རོབ་རྐང་སྤོལ་ཁྲོད་ནོར་ཝེ་ཡི་ལོ་ཆུང་ཕུལ་བྱུང་རྩེད་མོ་བ་གྲགས་ཅན་ (Erling Haaland) དང་། སི་པན་གྱི་གྷ་ཝི་ (Gavi)། སྦེལ་ཇམ་གྱི་སྒོ་སྲུང་བ་ཁོ་ཌ་ཝ་ (Thibaut Courtois) སོགས་མཉམ་ཞུགས་ཐུབ་མེད་པ་རེད།
ཕྱི་ལོ་ ༡༩༢༨ ལོར་ཡུ་རོབ་འཛམ་གླིང་རྐང་སྤོལ་འགྲན་ཚོགས་ཀྱི་མྱུ་གུ་ཐོག་མར་འབུས་ཡོད་ཀྱང་། ཕྱི་ལོ་ ༡༩༦༠ ལོར་རྩེད་འགྲན་ཐོག་མ་བྱེད་མགོ་བཙུགས། དེ་ནས་བཟུང་ལོ་བཞི་རེའི་མཚམས་སུ་ལོ་ལྟར་རྩེད་འགྲན་དེ་བསྡུ་ཡི་ཡོད་ལ། ཡུ་རོབ་ཀྱི་རྒྱལ་ཁབ་འཇར་མན་ལ་ཐེངས་གསུམ་དང་། སི་པན་ལ་ཐེངས་གསུམ། ཧྥ་རན་སི་ལ་ཐེངས་གཉིས། ཨི་ཊ་ལི་ཐེངས་གཉིས་བཅས་ཀྱི་རྒྱལ་ཁ་ཐོབ་འདུག དེ་བཞིན་ཕྱི་ལོ་ ༢༠༢༨ ལོའི་ཡུ་རོབ་ཀྱི་རྐང་སྤོལ་འགྲན་ཚོགས་དེ་དབྱིན་ཡུལ་དང་། ཨ་རི་ལེན་ཌི་དང་། ཕྱི་ལོ་ ༢༠༣༢ ལོར་ཨི་ཊ་ལི་དང་། ཏུར་ཀི་བཅས་ཀྱིས་གོ་སྒྲིག་བྱ་རྒྱུ་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
