རྒྱ་ནག་ཅི་ལིན་གྱི་བྷེ་ཧྭ་མཐོ་རིམ་སློབ་གཉེར་ཁང་གི་སློབ་དཔོན་བཞི་ལ་གྲི་བཙུགས་ཏེ་རྨས་སྐྱོན་ཚབས་ཆེན་ཕོག་ནས་སྨན་བཅོས་བྱེད་མུས་ཡིན་འདུག
དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་ཅི་ལིན་ཞིང་ཆེན་གྱི་བྷེ་ཧྭ་མཐོ་རིམ་སློབ་གཉེར་ཁང་ (Beihua University) གི་སློབ་དཔོན་བཞི་ཉེ་འགྲམ་སྐྱེད་ཚལ་དུ་འགྲོ་བཞིན་པའི་སྐབས་སུ། རྒྱ་མི་ཞིག་གིས་གློ་བུར་དུ་གྲིས་བརྒྱབ་སྟེ་ས་ལ་འགྱེལ་ཡོད་པ་དང་། ཡུལ་དངོས་ཀྱི་བརྙན་ཐུང་ནང་དུ་ཁོང་རྣམས་ས་ལ་འགྱེལ་ནས་རྒྱབ་སོགས་ནས་ཁྲག་ཐོན་བཞིན་ཡོད་ཀྱང་། ཡུལ་མི་མང་པོས་མཐའ་སྐོར་ནས་བལྟས་བསྡད་འདུག
སློབ་དཔོན་བཞི་དེ་ཨ་རིའི་ཁོར་ནལ་མཐོ་རིམ་སློབ་གཉེར་ཁང་ནས་ཡིན་ཞིང་། མཐོ་སློབ་དེས་དེ་འབྲེལ་བསྒྲགས་གཏམ་ཞིག་སྤེལ་ཡོད་པའི་ནང་། སློབ་དཔོན་བཞི་དེར་རྨས་སྐྱོན་ཚབས་ཆེན་ཕོག་སྟེ་སྨན་བཅོས་བྱེད་བཞིན་པའི་སྒང་ཡིན་སྐོར་བརྗོད་འདུག ཕྱི་ལོོ་ ༢༠༡༨ ལོར་ཁོར་ནལ་མཐོ་རིམ་སློབ་གཉེར་ཁང་ (Cornell College) དང་བྷེ་ཧྭ་མཐོ་རིམ་སློབ་གཉེར་ཁང་ (Beihua University) གཉིས་མཉམ་འབྲེལ་མགོ་འཛུགས་བྱས་ཡོད་པ་དང་། སློབ་དཔོན་བཞི་ཡིས་རྒྱ་ནག་གི་མཐོ་སློབ་དེར་ཚན་རིག་དང་ཨང་རྩིས་སོགས་སློབ་འཁྲིད་གནང་གི་ཡོད་འདུག
ཨ་རིའི་གཞུང་གི་མགྲིན་ཚབ་པ་མེ་ཐེའུ་མི་ལར་ (Mathew Miller) ལགས་ཀྱིས། རྒྱ་ནག་ནང་གྲི་བཙུགས་པའི་དོན་རྐྱེན་དེར་རྒྱུས་ལོན་དང་རྩད་གཅོད་གནང་བཞིན་ཡོད་སྐོར་བརྗོད་འདུག
ད་ལྟའི་ཆར་རྒྱ་ནག་གཞུང་ཕྱོགས་ནས་དེའི་སྐོར་ལ་གསལ་བཤད་གང་ཡང་བྱས་མི་འདུག་ལ། སྤྱི་ཚོགས་དྲ་ལམ་དུ་ཁྱབ་པའི་བརྙན་རྣམས་ཁྱབ་སྤེལ་གཏོང་བར་བཀག་འགོག་དང་ནག་གསུབ་གཏོང་གི་ཡོད་འདུག་ལ། ད་ལྟའི་ཆར་ཉེན་རྟོག་པས་མི་དེ་འཛིན་བཟུང་བྱས་ཏེ་ཞིབ་བཤེར་ཡིག་ཆ་ལྟར་ན། མི་དེའི་མིང་ལ་ཚའེ་ཏ་ཕོང་ཟེར་ཞིང་། ཅི་ལིན་གྲོང་ཁྱེར་གནས་སྡོད་བྱེད་མཁན་ཞིག་ཡིན་འདུག
རྒྱ་ནག་གཞུང་གིས་ཨ་རིའི་མཐོ་སློབ་ཁག་དང་མཉམ་འབྲེལ་གྱིས་ཤེས་ཡོན་བརྗེ་རེས་བྱེད་བཞིན་ཡོད་ཀྱང་། ཏོག་དབྱིབས་གཉན་རིམས་དང་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པའི་རྐྱེན་གྱིས་དཀའ་ངལ་མང་པོ་འབྱུང་བཞིན་འདུག འདས་ལོའི་ཕྱི་ཟླ་ ༡༡ ནང་རྒྱ་ནག་གི་མགོ་ཁྲིད་ཞི་ཅིན་ཕིན་ཨ་རིར་ཕྱིན་ཏེ། འབྱུང་འགྱུར་ལོ་ལྔའི་རིང་ཤེས་ཡོན་བརྗེ་ལེན་གྱི་ཆེད་དུ་རྒྱ་ནག་ནང་ཨ་རིའི་གཞོན་སྐྱེས་གྲངས་ ༥༠,༠༠༠ ཙམ་གདན་འདྲེན་བྱ་རྒྱུ་ཡིན་སྐོར་བརྗོད་ཡོད་འདུག
རྒྱ་ནག་ནང་སློབ་ཆུང་དང་ཁྲོམ་ར། མེ་འཁོར་འབབ་ཚིགས་སོགས་སུ་གང་བྱུང་གྲིས་བརྒྱབ་པའི་དོན་རྐྱེན་བསྟུད་མར་འབྱུང་བཞིན་ཡོད་པ་རེད། འདི་ལོའི་ཕྱི་ཟླ་ ༥ པའི་ནང་རྒྱ་ནག་ཡུན་ནན་ཞིང་ཆེན་གྱི་ཀྲན་ཞོང་སྨན་ཁང་དུ་གནས་སུ་གྲི་བཙུགས་པའི་དོན་རྐྱེན་ཞིག་བྱུང་སྟེ། མི་གྲངས་ ༢ རྐྱེན་འདས་དང་མི་གྲངས་ ༢༡ ལ་རྨས་སྐྱོན་ཕོག་ཡོད་པ་རེད། དེ་བཞིན་འདས་ལོའི་ཀོང་ཏུང་ཞིང་ཆེན་དུ་མི་ ༦ རྐྱེན་འདས་དང་མི་གྲངས་ ༡ ལ་རྨས་སྐྱོན་ཕོག ་། ཕྱི་ལོ་ ༢༠༢༢ ལོའི་ནང་སྔོན་འགྲོའི་སློབ་གྲྭར་གྲི་བཙུགས་པའི་དོན་རྐྱེན་བྱུང་སྟེ་མི་གྲངས་ ༣ རྐྱེན་འདས་དང་མི་གྲངས་ ༦ ལ་རྨས་སྐྱོན་ཕོག་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
