ནེའུ་ཛེ་ལན་གྱི་ནང་ཡོད་པའི་ཨོག་ལན་བོད་རིགས་མཐུན་ཚོགས་ཀྱིས་ཡུལ་དེའི་སྲིད་བློན་ཁུར་སི་ཊོ་ཧྥུར་ལུག་སོན་(Christopher Luxon)ལགས་སུ་བོད་དོན་སྐོར་གྱི་དོན་ཚན་དྲུག་རྒྱ་ནག་གི་སྲིད་བློན་ལི་ཆང་ལ་ཐུག་འཕྲད་གནང་སྐབས་གླེང་སློང་དགོས་པའི་འབོད་སྐུལ་ཞུས་འདུག
བདུན་ཕྲག་འདིའི་གཟའ་མཇུག་ཏུ་རྒྱ་ནག་གི་སྲིད་བློན་ལི་ཆང་ནེའུ་ཛི་ལན་དུ་རྒྱལ་དོན་སྐོར་སྐྱོད་དུ་ཕྱིན་ཏེ་ཡུལ་དེའི་སྲིད་བློན་ཁུར་སི་ཊོ་ཧྤུར་ལུག་སོན་ལགས་སུ་མཇལ་འཆར་ཡོད་སྟབས། ཡུལ་དེའི་ནང་ཡོད་པའི་ཨོག་ལན་བོད་རིགས་མཐུན་ཚོགས་(Auckland Tibetan Association)ཀྱིས་དོན་ཚན་དྲུག་ཅན་གྱི་བོད་དོན་གླེང་སློང་དགོས་པའི་རེ་སྐུལ་ཞུ་ཡིག་ཅིག་ཕུལ་ཡོད་འདུག་ལ། རེ་སྐུལ་ཞུ་ཡིག་དེའི་ནང་དུ་བོད་ནང་ཆབ་སྲིད་ཀྱི་དྲག་གནོན་དང་། སྤྱི་ཚོགས་དབྱེ་འབྱེད། དཔལ་འབྱོར་ཟུར་བཅད། ཁོར་ཡུག་གཏོར་བཤིག རིག་གཞུང་གཅིག་གྱུར་གྱི་བཙན་གནོན་སྲིད་ཇུས་ནི་ད་ལྟའི་བོད་ཀྱི་ཛ་དྲག་གནས་སྟངས་ཤིག་ཆགས་ཡོད་སྐོར་བཀོད་འདུག
འདི་ལོའི་ལོ་མགོ་རྒྱ་ནག་གཞུང་གིས་འབྲི་ཆུའི་རྒྱུད་དུ་ཆུ་མཛོད་གསར་རྒྱག་བྱས་ཏེ་བོད་སྡེ་དགེ་ཕྱོགས་ཀྱི་དགོན་གྲོང་གཉིས་ལ་དཀའ་ངལ་ཆེན་པོ་འཕྲད་པ་མ་ཟད། སེར་སྐྱ་མང་པོ་འཛིན་བཟུང་བཀག་ཉར་བྱས་པའི་སྐོར་དང་། རྒྱ་ནག་གཞུང་གིས་བོད་ཀྱི་སྐད་ཡིག་རིག་གཞུང་དང་བཅས་པ་རྩ་མེད་གཏོང་ཆེད་བོད་ཕྲུག་ས་ཡ་ ༡ ལྷག་བཙན་གྱིས་གཏན་སྡོད་སློབ་གྲྭར་བཅུག་ཡོད་པ། ཁ་ན་ཌའི་ཊོ་རོན་ཊོ་ལ་ཡོད་པའི་སྤྱི་དམངས་ཚོད་ལྟ་ཁང་གི་ཕྱི་ལོ་ ༢༠༡༦ ནས་ ༢༠༢༢ བར་གྱི་ཞིབ་འཇུག་སྙན་ཐོའི་ནང་དུ་རྒྱ་ནག་གཞུང་གིས་བཙན་གྱིས་བོད་ཀྱི་བྱིས་པ་ལོ་ལྔ་ཅན་ཚུད་པའི་མི་གྲངས་ས་ཡ་ ༡༢ ལྷག་གི་རིགས་རྫས་བརྟག་དཔྱད་བྱས་ཏེ་ཁྲ་རིགས་བསྡུ་རུབ་བྱས་པ། དེ་བཞིན་ཕྱི་ལོ་ ༢༠༠༩ ལོ་ནས་ད་ལྟའི་བར་དུ་ཉུང་མཐར་བོད་སེར་སྐྱ་གྲངས་ ༡༥༩ ཡིས་རྒྱ་གཞུང་གི་བཙན་གནོན་སྲིད་ཇུས་ལ་ངོ་རྒོལ་བྱས་ཏེ་རང་ལུས་མེར་བསྲེགས་ཡོད་པ་སོགས་བཀོད་འདུག
དེ་བཞིན་རེ་སྐུལ་ནང་། ཆོས་ལུགས་ནི་བོད་མིའི་འཚོ་བ་སྐྱེལ་སྟངས་ཀྱི་གཞི་རྩ་དང་གཙོ་བོ་བོད་རྒྱལ་ཁབ་ཀྱི་ངོ་བོ་མཚོན་གྱི་ཡོད། བོད་མི་རྣམས་ཀྱིས་དད་གུས་ཆེན་པོ་ཞུ་སའི་ནོ་སྦེལ་ཞི་བདེ་གཟེངས་རྟགས་བཞེས་མྱོང་བའི་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་ལ་རྒྱ་ནག་གཞུང་གིས་ཁ་བྲལ་རིང་ལུགས་པ་དང་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོ་མཁན་ཞིག་ཏུ་ངོས་འཛིན་བྱེད་ཀྱི་ཡོད་པ་རེད། དེའི་རྐྱེན་པས་བོད་ཀྱི་དགོན་སྡེ་ཁག་དང་ཆོས་དད་རང་དབང་ལ་མུ་མཐུད་ནས་དྲག་གནོན་བྱེད་བཞིན་ཡོད་སྐོར་སོགས་བྲིས་འདུག
ཨོག་ལན་བོད་རིགས་མཐུན་ཚོགས་ཀྱི་འབོད་སྐུལ་དོན་མཚན་དྲུག་ནི། གཅིག རྒྱ་ནག་ལ་བོད་རྒྱའི་དཀའ་རྙོག་སེལ་ཐབས་སུ་༧གོང་ས་རྒྱལ་བ་རིན་པོ་ཆེ་དང་བོད་མིའི་སྒྲིག་འཛུགས་ལྷན་དུ་འབྲེལ་མོལ་བསྐྱར་མཐུན་དགོས་པ།
གཉིས། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་མཐོ་རིམ་སྐུ་ཚབ་ཀྱི་ལས་ཁུངས་ཐེ་བའི་རང་དབང་ལྡན་པའི་ཞིབ་འཇུག་པ་ཚོ་བོད་དུ་བཀག་སྡོམ་མེད་པར་འཕྲལ་དུ་གཏོང་ཐབས་དགོས་པ།
གསུམ། རྒྱ་ནག་གིས་བོད་ཕྲུག་ཚོར་དམིགས་སུ་བཀར་བའི་བཙན་གནོན་སྲིད་ཇུས་མཚམས་འཇོག་དགོས་པ་དང་། བོད་ཕྲུག་ས་ཡ་གཅིག་ཙམ་རང་གི་ཁྱིམ་ཚང་དང་ཁ་བྲལ་དུ་བཏང་སྟེ་ཁོ་ཚོའི་རིག་གཞུང་དང་། ཆོས་ལུགས། སྐད་ཡིག་གི་ཐོབ་ཐང་བཙན་འཕྲོག་བྱེད་མཁན་གྱི་གཏན་སློབ་དང་སློབ་གྲྭའི་ལམ་ལུགས་མཚམས་འཇོག་དགོས་པ།
བཞི། མ་འོངས་པར་༸གོང་ས་རྒྱལ་བ་རིན་པོ་ཆེ་མཆོག་གི་དབུས་བོད་ཀྱི་ཆོས་བརྒྱུད་ཁག་གི་དབུ་འཁྲིད་རྣམས་ངོས་འཛིན་དང་བསྐོ་གཞག་ཞུ་རྒྱུར་རྒྱ་ནག་གིས་ཐེ་བྱུས་རྩ་བ་ནས་མཚམས་བཞག་སྟེ། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལུགས་གཞིར་བཟུང་བོད་མི་མང་ཁོ་ནས་ཐག་གཅོད་བྱེད་དགོས་པ།
ལྔ། རྒྱ་ནག་གཞུང་གིས་འཛམ་གླིང་གི་ཆབ་སྲིད་བཙོན་པ་ཆུང་ཤོས་༧པཎ་ཆེན་སྐུ་ཕྲེང་ ༡༡ པ་ཆེན་པོ་མཆོག་གི་དབུས་དཔྱོད་ཤེས་ཀྱི་བཙོན་པ་ཚང་མ་འཕྲལ་དུ་ཀློད་གྲོལ་གཏོང་དགོས།
དྲུག རྒྱ་ནག་གི་གཏུག་བཤེར་གྱི་ཁྲིམས་ནང་བཀག་ཉར་བྱས་པའི་དོགས་ཡོད་རྣམས་ལ་དྲང་བདེན་གྱི་ཁྲིམས་བཤེར་བཅད་ཁྲ་གཏོང་ཕྱོགས་ཕྱིར་བསྡུའམ་ལེགས་བཅོས་གཏོང་དགོས། བཅད་ཁྲ་དེ་དག་གི་ཐོག་ནས་དུས་རྒྱུན་རྒྱལ་ཁབ་ཁ་བྲལ་དང་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོས་པའི་ཉེས་མིང་གཡོགས་ཏེ་ཉེས་མེད་བོད་མི་འཛིན་བཟུང་བྱེད་ཀྱི་ཡོད་སྐོར་བཅས་བཀོད་འདུག
ནེའུ་ཛི་ལན་གྱིས་སློབ་ཆེན་ཁག་གི་ནང་དུ་ཡོད་པའི་རྒྱ་ནག་གི་ཁུང་ཙི་སློབ་གླིང་རྣམས་ངེས་པར་དུ་སྒོ་རྒྱག་དགོས་པ་དང་། ནེའུ་ཛི་ལན་གཞུང་གིས་བོད་ལ་འགྲོ་འོང་གི་ཁྲིམས་དང་མེག་ནི་ཊི་སི་ཀི་ཁྲིམས་གཏན་འབེབ་ལག་བསྟར་བྱས་ཏེ་རྒྱ་ནག་གཞུང་གི་རྒྱུད་གཅིག་ལམ་གཅིག་གི་སྲིད་ཇུས་ལ་ཁ་གཏད་གཅོག་དགོས་པ། གལ་སྲིད་ནེའུ་ཛི་ལན་གཞུང་གིས་རྒྱ་ནག་གཞུང་གིས་བོད་ཀྱི་འགྲོ་བ་མིའི་ཐོབ་ཐང་ཐོག་མུ་མཐུད་དྲག་གནོན་བྱེད་པར་ཉེས་ཆད་མ་བཅད་ཚེ། ནེའུ་ཛི་ལན་ཡང་བོད་མིར་བཙན་གནོན་བྱེད་མཁན་ངན་རོགས་ཤིག་ཆགས་པ་ཡིན་སྐོར་སོགས་བཀོད་འདུག
མཇུག་ཏུ་སྲིད་བློན་མཆོག་ལ་རྒྱ་ནག་གི་སྲིད་བློན་ལི་ཆིང་གི་སྐོར་སྐྱོད་ཀྱི་གོ་སྐབས་དང་བསྟུན་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ཐོག་བཙན་གནོན་གཏོང་བཞིན་པའི་གནད་དོན་གླེང་སློང་གནང་སྟེ་བོད་དོན་ལ་རྒྱབ་སྐྱོར་གནང་དགོས་པའི་རེ་སྐུལ་ཞུས་འདུག
གནས་ཚུལ་ཕྱོགས་སྒྲིག་པ། ཚེ་རིང་རྣམ་རྒྱལ།
རྩོམ་སྒྲིག་བྱེད་མཁན། པདྨ་མཚོ།
