རྒྱ་ནག་གཞུང་གིས་བལ་ཡུལ་གྱི་ཡུལ་མི་ན་གཞོན་གཉིས་ཀྱིས་བོད་མི་བཙན་བྱོལ་དུ་ཡོང་མཁན་ལ་ལམ་རོགས་བྱས་པའི་ཉེས་མིང་གཡོགས་ཏེ་འཛིན་བཟུང་བྱས་ཡོད་ཀྱང་བལ་གཞུང་གིས་ཤེས་རྟོགས་བྱུང་མེད་སྐོར་བརྗོད་འདུག
ཟླ་འདིའི་ཕྱི་ཚེས་ ༡༡ ཉིན་བལ་ཡུལ་གྱི་གྲོས་ཚོགས་འཐུས་མི་རཱ་ཇིན་ཌིརཱ་བྷ་ཇི་གྷན་(Rajendra Bajgain)ཞེས་པ་ཞིག་གིས་ཡུལ་དེེའི་གྲོས་ཚོགས་ནང་དུ། བལ་ཡུལ་གྱི་ནུབ་ཕྱོགས་སུ་ཡོད་པའི་གོར་ཁ་རྫོང་(Gorkha District)ནས་ཡིན་པའི་རབ་རྒྱས་བླ་མ་(Rapke Lama)དང་ཀརྨ་ཆོས་ལྡན་བླ་མ་(Karma cheden Lama)ཞེས་པའི་ན་གཞོན་གཉིས་རྒྱ་ནག་གཞུང་གིས་འཛིན་བཟུང་བྱས་ཡོད་པ་དང་། ཁོང་གཉིས་ལ་བོད་མི་བཙན་བྱོལ་བར་ལམ་ཀ་ནས་རོགས་རམ་བྱས་ཡོད་པའི་ཉེས་མིང་གཡོགས་ཡོད་སྐོར་བརྗོད་འདུག
གྲོས་ཚོགས་འཐུས་མི་ཁོང་གིས། ཟླ་གཅིག་དང་ཟླ་ཕྱེད་ཀྱི་གོང་དུ་བོད་རང་སྐྱོང་ལྗོངས་ཟེར་བ་ནས་བལ་པོའི་ཡུལ་མི་དེ་གཉིས་ལ་ཁ་པར་འབྱོར་ཏེ་བོད་ནང་དུ་ཡོང་དགོས་ལུགས་བཤད་ཡོད་པ་དང་། ཁ་པར་གཏོང་མཁན་ནི་རྒྱ་གཞུང་ཉེན་རྟོག་པས་འཛིན་བཟུང་བྱས་ཟིན་པའི་བོད་མི་ཡིན་འདུག་ལ། བལ་པོའི་ཡུལ་མི་གཉིས་བོད་རང་སྐྱོང་ལྗོངས་ནང་འབྱོར་སྐབས་འཛིན་བཟུང་བྱས་འདུག ཅེས་དང་། བལ་ཡུལ་གཞུང་གིས་ད་ལྟ་ཁོང་གཉིས་གསོན་པོར་གནས་ཡོད་མེད་ཀྱི་གནས་ཚུལ་ཤེས་རྟོགས་ཕར་ཞོག ཁོང་གཉིས་ཀྱི་གནད་དོན་སྐོར་ལ་མཁྱེན་རྟོགས་ཙམ་ཡང་བྱུང་མེད་པས། བལ་གཞུང་གིས་གནད་དོན་དེའི་ཐོག་འཆར་གཞི་གང་ཡོད་པ་དང་། ངེས་པར་དུ་བལ་གཞུང་གིས་རྒྱ་ནག་གཞུང་ལ་གནད་དོན་དེའི་ཐད་སྐད་ཆ་བཤད་དགོས་པའི་འབོད་སྐུལ་གནང་འདུག
གྲོས་ཚོགས་འཐུས་མི་རཱ་ཇིན་ཌིརཱ་བྷ་ཇི་གྷན་ལགས་སྒེར་གྱི་སྤྱི་ཚོགས་དྲ་གནས་(X)ཐོག བལ་པོའི་མི་དེ་གཉིས་ཀྱིས་རྒྱལ་མཚམས་བརྒལ་བའི་ཁ་པར་ལ་ལན་འདེབས་བྱེད་སྐབས། རྒྱ་གཞུང་གི་དཔོན་རིགས་ཚོས་ཁོང་གཉིས་འཛིན་བཟུང་བྱེད་སྲིད་པའི་བློ་དོགས་གང་ཡང་བྱུང་མེད། གང་ཡིན་ཟེར་ན། ཁོང་ཚོས་བོད་མི་བཙན་བྱོལ་བར་རོགས་རམ་བྱས་པ་ཙམ་ལས་ང་ཚོས་རྒྱ་ནག་ལ་ཁ་གཏད་གཅོག་གི་མེད་པ་ངེས་གཏན་ཡིན་ལ། ང་ཚོས་ཉེ་འགྲམ་ཁྱིམ་མཚེས་ལ་གུས་བརྩི་བྱས་ཏེ་ཧི་མ་ལ་ཡའི་རྒྱལ་མཚམས་ཁུལ་དུ་ཁོར་ཡུག་ལེགས་པོ་ཞིག་བསྐྲུན་ཐབས་སུ་སྐད་ཆ་བཤད་ཀྱི་ཡོད་སྐོར་དང་། གནད་དོན་དེའི་ཐོག་བལ་གཞུང་ཕྱི་སྲིད་ལས་ཁུངས་དང་འབྲེལ་ཡོད་གྲོང་སྡེ་ལས་ཁུངས་གཉིས་ནས་ལན་འདེབས་གང་ཡང་སྤྲོད་ཀྱི་མེད་སྐོར་བརྗོད་འདུག
ད་དུང་གྲོས་ཚོགས་འཐུས་མི་ཁོང་གིས། གླེང་རྙོག་ཆེ་བའི་རི་འཛེགས་པ་ནཱི་མཱལ་པུར་ཇ་ (Nirmal Purja)ཡི་གནད་དོན་གླེང་སློང་གིས། ནཱི་མཱལ་པུར་ཇ་བལ་ཡུལ་གྱི་མི་སེར་ཡིན་པའི་ཐོག་ནས་རི་བོ་མཐོ་ཤོས་བརྒྱད་ལ་འཛེགས་པ་དང་། ད་ལྟ་ཁོས་བལ་གཞུང་ནས་རི་འཛེགས་བྱེད་ཀྱི་ཐག་པ་གཅོད་ཀྱི་ཡོད་པའི་སྐྱོན་འཛུགས་བྱས་ཏེ། ཕྱི་མི་ཞིག་གི་ཆེད་དུ་བལ་ཡུལ་གྱི་མི་སེར་ཐོབ་ཐང་བློས་བཏང་ཡོད། འདི་ལྟ་བུའི་བྱ་སྤྱོད་ཀྱིས་བལ་ཡུལ་གཞུང་དང་བལ་ཡུལ་གྱི་གཅིག་སྒྲིལ་ལ་དམའ་འབེབས་བྱས་འདུག མི་འདི་འདྲ་ཞིག་གིས་བལ་ཡུལ་ལ་དམའ་འབེབས་བྱེད་བཞིན་པ་དེ་སྲིད་གཞུང་གིས་སྣང་མེད་དུ་གཏོང་མི་ཉན་པའི་གནད་དོན་ཚབས་ཆེན་ཞིག་ཡིན་སོགས་བརྗོད་འདུག
ཚེ་རིང་རྣམ་རྒྱལ། སྐལ་བཟང་སྦྱིན་པས་རྩོམ་སྒྲིག་བྱས།
