རྒྱ་ནག་གཞུང་གིས་ཆེད་འཛུགས་བྱས་པའི་བོད་མགོ་ལོག་གཅིག་སྒྲིལ་རྫོང་ཁོངས་ཀྱི་དགོན་པ་དོ་དམ་ཁང་དང་དམངས་དམ་ཁང་ཟེར་བ་གཉིས་ཀྱིས་“དགོན་པའི་དགེ་འདུན་པར་དོ་དམ་ཤུགས་སྣོན”རྒྱག་དགོས་པའི་བཀའ་རྒྱ་བསྒྲགས་འདུག
མགོ་ལོག་གཅིག་སྒྲིལ་རྫོང་སྨིན་ཐང་ཡུལ་ཚོའི་དྲིལ་བསྒྲགས་ཚན་པས་སྨིན་ཐང་དགོན་དུ་རྒྱལ་གཅེས་ཆོས་གཅེས། ཁྲིམས་སྦྱོང་ཁྲིམས་སྲུང་། དོ་དམ་ཚད་ལྡན། འཆམ་མཐུན་བརྟན་བརླིང་ཞེས་པའི་དྲིལ་བསྒྲགས་ཚོགས་འདུ་བསྡུས་པ། ༢༠༡༩།༠༤།༠༣
རྒྱ་གཞུང་གིས་བོད་ཁུལ་གྱི་དགོན་པ་ཁག་གི་ནང་དགོན་པ་དོ་དམ་ཁང་དང་དམངས་དམ་ཁང་ཟེར་བ་སོགས་ཆེད་འཛུགས་བྱས་ཏེ་དམ་དྲག་སྔར་ལྷག་བྱེད་བཞིན་ཡོད་པ་དང་། བོད་མགོ་ལོག་ཁུལ་གྱི་དགོན་པ་ཁག་གི་ནང་དགེ་འདུན་པར་དོ་དམ་ཤུགས་སྣོན་ཞེས་པའི་དམ་དྲག་སྲིད་ཇུས་ལ་སྔར་ལས་ཤུགས་སྣོན་རྒྱག་དགོས་པ་མ་ཟད། ལྷག་པར་དུ་སྤྱི་ཚོགས་དྲ་ལམ་ནས་རྒྱ་ནག་དམར་ཤོག་གཞུང་གི་ཆབ་སྲིད་ལངས་ཕྱོགས་དང་འགལ་བའི་སྐད་ཆ་དང་ཡི་གེ་རིགས་སྤེལ་བར་བཀག་སྡོམ་ནན་པོ་དགོས་སྐོར་བསྒྲགས་འདུག
ཕྱི་ཟླ་ ༥ པའི་ཟླ་མཇུག་ཙམ་ལ། བོད་མགོ་ལོག་ཁུལ་གཅིག་སྒྲིལ་རྫོང་ཁོངས་ཀྱི་དགོན་པ་ཞིག་གི་དགེ་འདུན་པ་རང་ལོ་ ༢༦ ཅན་ཞིག་གིས། རྒྱ་ནག་དམར་གཞུང་གི་ཆབ་སྲིད་དང་འགལ་བའི་གསལ་བསྒྲགས་ཤིག་ལ་དཔྱད་མཆན་བཀོད་དེ་ཁ་བྲལ་བའི་བྱ་སྤྱོད་སྤེལ་བའི་ཉེས་མིང་འོག་འཛིན་བཟུང་བྱས་ཡོད་པ་མ་ཟད། གཅིག་སྒྲིལ་རྫོང་གི་རྫོང་དཔོན་དང་རྫོང་འཐབ་ཕྱོགས་གཅིག་གྱུར་ཁང་གི་མགོ་འཁྲིད་སོགས་དགོན་པར་ཡོང་སྟེ་དགོན་པའི་བླ་སྤྲུལ་དང་དམངས་དམ་ཁང་ཟེར་བའི་ལས་བྱེད་ཚོར་སྐྱོན་བརྗོད་བྱས་ཡོད་འདུག་ལ། དགོན་པར་བསྡད་ཡོད་པའི་དགེ་འདུན་པ་ ༡༠༠ ཙམ་ལ་ཉིན་གྲངས་ ༡༠ ཡས་མས་རིང་ཆབ་སྲིད་སློབ་གསོ་སྤྲད་ཡོད་འདུག
ཕྱིས་སུ་ཁུལ་མི་མང་སྲིད་གཞུང་གིས་ལས་བྱེད་ཆེད་མངགས་ཀྱིས་དགོན་པར་ཡོང་ཡོད་སྟབས། དགོན་པ་དོ་དམ་ཨུ་ཡོན་ལྷན་ཁང་ཟེར་བའི་འབྲེལ་ཡོད་ལས་བྱེད་ཅིག་གིས་དོན་ཚན་བཞི་ཅན་གྱི་བརྡ་ཁྱབ་ཅིག་སྤེལ་བའི་ནང་། དགོན་པའི་དོ་དམ་གྱི་བྱ་བར་སྔར་ལྷག་ཤུགས་སྣོན་དགོས་པ་དང་། ལྷག་པར་དུ་དྲ་ལམ་བདེ་འཇགས་ཐད་གཟབ་ནན་བྱས་ཏེ། རྒྱ་ནག་གཞུང་གི་ཆབ་སྲིད་དང་འགལ་བའི་སྐད་ཆ་མི་བཤད་པ་དང་། ཡི་གེ་མི་བསྐུར་བ། མི་རིགས་མཐུན་སྒྲིལ་གྱི་ཕྱོགས་ལ་གནོད་འཚེ་གཏོང་བའི་སྐད་ཆ་དང་ཡི་གེ་མི་བསྐུར་བའི་ཐད་ངེས་པར་དུ་སྤྱི་ཚོགས་དྲ་ལམ་གྱི་ཚོགས་པ་ཁག་གི་ནང་བརྡ་ཁྱབ་བཏང་སྟེ་སྟངས་འཛིན་ནན་པོ་དགོས་ཀྱི་འདུག་ཅེས་བཀའ་རྒྱ་བཏང་ཡོད་པ་ལྟར། དགོན་པ་ཙམ་མ་ཟད་ཁོང་ཚོའི་ནང་མི་དང་ཁྱིམ་མཚེས་སོགས་ལའང་དེ་ལྟར་བཀོད་མངགས་ནན་པོ་དགོས་སྐོར་བརྗོད་འདུག
དགོན་པ་དོ་དམ་ཁང་གི་འབྲེལ་ཡོད་ནས་ཡུན་རིང་དགོན་གཞུང་གི་རྩིས་བཤེར་དང་། ཉིན་རེའི་བྱེད་སྒོ། དགེ་འདུན་པ་དོ་དམ་བྱེད་ཕྱོགས་སོགས་ལ་བྱ་བ་མང་པོ་བསྒྲུབས་ཡོད་ཀྱང་། ད་དུང་མགོ་ཚགས་དམ་པོ་ཞིག་ཡོང་གི་མེད་སྟབས། འབྲེལ་ཡོད་ཚང་མས་དོ་ནན་དགོས་སྐོར་དང་། དགོན་པ་རང་གི་ས་ཆ་ས་སྟོང་དུ་ལུས་ཡོད་པ་རྣམས་མྱུར་ཏུ་གཙང་བཟོ་དང་བེད་སྤྱོད་མ་བྱས་ན། རྒྱ་ནག་གཞུང་གིས་གཞུང་བཞེས་བྱ་རྒྱུ་ཡིན་སྐོར་ཀྱི་ཉེན་བརྡ་བཏང་འདུག
མཆན། གནས་ཚུལ་མཁོ་སྤྲོད་པའི་རེ་སྐུལ་ལྟར་དགོན་པ་དང་དགེ་འདུན་པའི་མཚན་བྲིས་མེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
