ཁ་སང་ཕྱི་ཚེས་ ༢༦ ཉིན་རྒྱ་གར་གྲོས་ཚོགས་འོག་མའི་ཚོགས་གཙོ་སྐུ་ཞབས་ཨོཾ་བྷིར་ལཱ་ (Shri. Om Birla) མཆོག་བསྐྱར་དུ་ཚོགས་གཙོར་བདམས་ཐོན་བྱུང་ཡོད་པས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་ནས་འཚམས་འདྲི་གནང་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་འཚམས་འདྲི་གནང་བའི་ནང་། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་གནང་སྟེ་སྐུ་ཞབས་ཨོཾ་བྷིར་ལཱ་མཆོག་གྲོས་ཚོགས་འོག་མའི་ཚོགས་གཙོ་སྐབས་ ༡༨ པར་འདེམས་ཐོན་བྱུང་བར་འཚམས་འདྲི་ཞུ་ཡི་ཡོད་ལ། འདས་པའི་མི་ལོ་མང་པོར་རྒྱ་གར་གྲོས་ཚོགས་ནང་གི་བོད་ཀྱི་གྲོགས་པོ་དང་དམིགས་བསལ་གྱིས་་བོད་དོན་རྒྱབ་སྐྱོར་ཚོགས་པའི་དབུ་འཁྲིད་འོག་བོད་དོན་ལ་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་ཆེ་ཞེས་གསུངས་འདུག་ལ། དེ་བཞིན་གྲོས་ཚོགས་འོག་མས་གཞི་རྒྱ་ཆེ་བའི་འཐུས་ཚབ་རང་བཞིན་གྱིས་རྒྱ་གར་གྱི་དམངས་གཙོའི་སྟོབས་ཤུགས་དང་སྣ་མང་རང་བཞིན་གྱི་འཕེལ་རྒྱས་མངོན་པར་བྱེད་ཀྱི་ཡོད་ལ། སྐུ་ཞབས་ཨོཾ་བྷིར་ལཱ་མཆོག་གི་དབུ་འཁྲིད་འོག་སྣ་མང་རང་བཞིན་ལ་ཐུན་མོང་ངོས་འཛིན་ཐོབ་པ་དང་འཕེལ་རྒྱས་ཀྱི་སྣེ་འཁྲིད་ཀྱིས་རྒྱ་གར་གྱི་མ་འོངས་པ་དང་འཛམ་གླིང་གི་དམངས་གཙོའི་རྩ་དོན་ལ་སྐུལ་འདེད་ཡོང་རྒྱུ་ཡིན་སྐོར་གསུངས་ཏེ། སྐུ་ཞབས་ཨོཾ་བྷིར་ལཱ་མཆོག་གི་ལས་ཡུན་འདིའི་ནང་རྒྱ་གར་གྱི་མི་མང་ལ་ཞབས་ཕྱི་ལམ་ལྷོངས་ཡོང་བའི་སྨོན་འདུན་ཞུས་གནང་འདུག
དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་འཚམས་འདྲི་གནང་བའི་ནང་། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་བསྐྱར་དུ་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་བཀྲ་ཤིས་བདེ་ལེགས་ཀྱི་འཚམས་འདྲི་ཞུ་རྒྱུ་ཡིན་ཞེས་དང་། ད་ལན་སྐུ་ཉིད་གྲོས་ཚོགས་འོག་མའི་ཚོགས་གཙོར་འོས་འདེམས་བྱུང་བ་དེས། སྐུ་ཉིད་ཀྱི་དབུ་ཁྲིད་གནང་ཕྱོགས་ཀྱི་ནུས་པར་ཡིད་ཆེས་ཆེན་པོ་ཡོད་པ་གསལ་པོར་མཚོན་གྱི་ཡོད། སྐུ་ཉིད་ཀྱིས་རྒྱ་གར་གཞུང་མང་གཉིས་ལ་ལོ་མང་ཞབས་ཕྱི་ཧུར་ཐག་ཞུས་པ་མ་ཟད། གཟེངས་སུ་ཐོན་པའི་གྲུབ་འབྲས་བྱུང་ཡོད་པ་ནི་བསྔགས་འོས་སུ་གྱུར་བ་ཞིག་ཆགས་ཀྱི་ཡོད། ཅེས་གསུངས་འདུག
ཡང་ཁོང་གིས། རྒྱ་གར་གཞུང་མང་གཉིས་ནས་ལོ་ངོ་དྲུག་ཅུ་ལྷག་གི་རིང་༧གོང་ས་རྒྱལ་བ་རིན་པོ་ཆེ་མཆོག་དང་། བོད་མི་རྣམས་ལ་མཐུན་འགྱུར་དང་། བོད་ཀྱི་བདེན་པའི་རྩ་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། འབྱུང་འགྱུར་མུ་མཐུད་གཉིས་སྨན་དབུ་མའི་ལམ་གྱི་སྲིད་ཇུས་བརྒྱུད་བོད་རྒྱའི་དཀའ་རྙོག་སེལ་ཐབས་སུ་སྐུ་ཉིད་ནས་རྒྱབ་སྐྱོར་གནང་རྒྱུའི་རེ་བ་ཞུ་རྒྱུ་ཡིན། ངས་སླར་ཡང་སྐུ་ཉིད་ལ་འཚམས་འདྲི་ཞུ་རྒྱུ་དང་། སྐུ་ཉིད་ཀྱི་ལས་ཡུན་རིང་རྒྱ་གར་གྲོས་ཚོགས་འོག་མའི་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས་འདུག
སྐུ་ཞབས་ཨོཾ་བྷིར་ལཱ་མཆོག་ནི་ཕྱི་ལོ་ ༡༩༦༢ ལོར་རཱ་ཇི་སི་ཐན་མངའ་སྡེའི་ཧིན་དྷུའི་ཁྱིམ་ཚང་ཞིག་ཏུ་སྐྱེས་ཡོད་ཅིང་། མཱ་ཧཱར་ཤི་ཧ་དྷ་ཡཱན་དྷི་སཱ་རཱ་ཝ་ཏི་(Maharshi Dayanand Saraswati University) གཙུག་ལག་སློབ་གཉེར་ཁང་ནས་ཚོང་རིག་སྡེ་ཚན་ཐོག་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༢༠༠༣ ནས་ ༢༠༠༨ བར་ཁོང་ཐེངས་གསུམ་རཱ་ཇི་སི་ཐིན་མངའ་སྡེའི་ནང་བྷི་ཇི་པི་སྲིད་དོན་ཚོགས་པའི་གྲོས་ཚོགས་འཐུས་མིར་བདམས་ཐོན་བྱུང་། ཕྱི་ལོ་ ༢༠༡༤ ལོ་ནས་རཱ་ཇི་སི་ཐན་མངའ་སྡེའི་གྲོས་ཚོགས་འོག་མའི་ནང་ཕྱག་ལས་གནང་། ཕྱི་ལོ་ ༢༠༡༩ ལོ་ནས་བཟུང་རྒྱ་གར་གྲོས་ཚོགས་འོག་མའི་ཚོགས་གཙོའི་ལས་འགན་བཞེས་འདུག་ལ། ཁོང་ནི་ལོ་ངོ་ ༢༠ ནང་གྲོས་ཚོགས་འོག་མའི་ཚོགས་གཙོ་གནང་རྗེས་བསྐྱར་དུ་གྲོས་ཚོགས་འོག་མའི་འཐུས་མིར་བདམས་ཐོན་བྱུང་བའི་འཐུས་མི་དང་པོ་དང་། བསྟུད་མར་ཐེངས་གཉིས་ལ་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བའི་འཐུས་མི་གཉིས་པ་དེ་ཡིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན་པདྨ་མཚོ།
