སྲིད་སྐྱོང་མཆོག་གི་ལ་དྭགས་གླེ་བྱང་གཉིས་ཀྱི་གཞུང་འབྲེལ་འཚམས་གཟིགས་ཐེངས་གཉིས་པ་ལེགས་པར་གྲུབ།

 དེ་རིང་ཕྱི་ཚེས་ ༡༧ ཉིན་སྲིད་སྐྱོང་མཆོག་ལ་དྭགས་ཀྱི་རྒྱལ་ས་སླེ་ནས་མཁའ་ལམ་བརྒྱུད་ལྡི་ལིར་ཕེབས་འབྱོར་བྱུང་ཡོད་པ་དང་ཟླ་འདིའི་ཕྱི་ཚེས་ ༡༨ ནས་ཟླ་ ༨ པའི་ཚེས་ ༤ བར་ཨ་རིར་ཕེབས་ཏེ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་བ་སོགས་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༨ ནས་ ༡༦ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་བྱང་རྒྱུད་དུ་ཆགས་པའི་ལ་དྭགས་གླེ་བྱང་གཉིས་ཀྱི་གཞིས་ཆགས་ཁག་ནང་གཞུང་འབྲེལ་འཚམས་གཟིགས་ཐེངས་གཉིས་པ་གནང་ཡོད་པ་ལྟར། ཁ་སང་ཕྱི་ཚེས་ ༡༦ ཉིན་གྱི་སྔ་དྲོར་སྲིད་སྐྱོང་མཆོག་གིས་ལ་དྭགས་དབུས་གཞུང་མངའ་སྡེའི་སྤྱི་ཁྱབ་གཞོན་པ་བྷི་ཌི་མི་ཤ་རཱ་(Brigadier Dr BD Mishra)མཆོག་དང་། ལ་དྭགས་ཉེན་རྟོག་པའི་སྤྱི་ཁྱབ་འགན་འཛིན་གཞོན་པ་སེང་ཧ་ཇཱམ་ཝཱལ་(Dr SD Singh Jamwal) ལགས་རྣམ་གཉིས་ལ་མཇལ་འཕྲད་གནང་སྟེ། ལ་དྭགས་ཁུལ་གྱི་བཙན་བྱོལ་བོད་མིའི་སྤྱི་ཚོགས་ཀྱི་བདེ་དོན་སྐོར་ལ་བཀའ་མོལ་གནང་ཡོད་འདུག ཉིན་རྒྱབ་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་ཚོགས་ཁང་དུ། སྲིད་སྐྱོང་མཆོག་ནས་ལ་དྭགས་དབུས་གཞུང་གི་གནད་ཡོད་མི་སྣར་མཇལ་འཕྲད་ཀྱིས་བོད་མིའི་བདེ་སྡུག་སྙན་སེང་ཞུས་ཡོད་པའི་སྐོར་དང་།  བོད་མི་རྣམས་ཀྱིས་ས་གནས་མི་མང་དང་མཉམ་དུ་ཞི་བདེ་མཉམ་གནས་ཡོང་བར་འབད་བརྩོན་བྱེད་པའི་ལམ་སྟོན་གནང་འདུག

དེ་བཞིན་རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་བཙན་གྱིས་སྒོ་བརྒྱབ་པའི་སྐོར་ལ་སྲིད་སྐྱོང་མཆོག་གིས། རྭ་རྒྱ་འཇིགས་མེད་རྒྱལ་མཚན་གྱི་སློབ་གྲྭ་དེ་ཧ་ཅང་ཕན་ཐོགས་ཆེན་པོ་བྱུང་ཡོད། སློབ་གྲྭ་དེའི་ནང་ད་ལྟ་བར་དུ་སློབ་ཕྲུག་བརྒྱ་ཕྲག་མང་པོ་སློབ་མཐར་ཕྱིན་ཡོད། བསླབ་གཞི་བོད་ཡིག་གཙོ་བོ་བྱས་པའི་ཐོག་ཚོང་ལས་སྡེ་ཚན་སོགས་ཀྱི་སློབ་ཁྲིད་བྱེད་ཀྱི་ཡོད། རྒྱ་ནག་གཞུང་གིས་སློབ་གྲྭ་འདིའི་ཕན་ཐོགས་ཀྱི་ཡོད་པ་ཤེས་ཡོད། ད་ལྟའི་རྒྱ་ནག་གཞུང་གི་སྲིད་ཇུས་ནི་བོད་མི་རིགས་རྩ་མེད་གཏོང་བའི་སྲིད་ཇུས་འཛིན་གྱི་ཡོད་པས། གངས་ལྗོངས་ཤེས་རིག་ནོར་བུའི་སློབ་གླིང་ཡང་སྒོ་བརྒྱབ་ཡོད། རྒྱ་ནག་གཞུང་གིས་བོད་ནང་གི་གནས་སྟངས་ཡག་ཏུ་གཏོང་བའི་ཚབ་དུ་སྡུག་ཏུ་གཏོང་བཞིན་ཡོད་པ་ཉིན་རེ་བཞིན་གསལ་རུ་འགྲོ་བཞིན་ཡོད། དེ་བཞིན་བཙན་བྱོལ་དུ་བོད་མི་ཚོ་བོད་ནང་གི་མགྲིན་ཚབ་པ་ཡིན་ཟེར་བ་བཞིན་ལས་ཀ་བྱེད་རྒྱུ་གལ་ཆེན་པོ་རེད། བོད་མིའི་སྒྲིག་འཛུགས་ལ་ཧ་ཅང་བློ་ཕམ་བྱུང་ཡོད། ཅེས་གསུངས་འདུག

ཕྱི་ཚེས་ ༡༥ ཉིན་གྱི་སྔ་དྲོར་སྲིད་སྐྱོང་མཆོག་ནས་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་ལགས་དང་མཇལ་འཕྲད་གནང་སྟེ། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་ལ་དྭགས་བོད་མིའི་བདེ་དོན་ཡར་རྒྱས་ཐད་རོགས་སྐྱོར་གང་ཐུབ་གནང་བར་ཐུགས་རྗེ་ལེགས་འབུལ་ཞུས་ཡོད་ཅིང་། མ་འོངས་པར་བོད་མིའི་སློབ་གྲྭ་དང་དགོན་སྡེ་གྲྭ་ཚང་ལ་རོགས་སྐྱོར་དང་། མཉམ་རུབ་ཀྱིས་སྨན་རྩ་འདེབས་ལས་གནང་ཕྱོགས། བོད་མིར་ས་ཁང་ཐོག་རོགས་སྐྱོར་གནང་ཐབས་སོགས་ཀྱི་སྐོར་ལ་བཀའ་མོལ་ལྷུག་པོ་གནང་ཡོད་འདུག  དེ་བཞིན་སྲིད་སྐྱོང་མཆོག་ལ་དྭགས་ནང་ཚོགས་ཀྱི་ལས་ཁུངས་སུ་ཕེབས་ཏེ་ལ་དྭགས་ནང་ཚོགས་དང་དགོན་པ་ཚོགས་པའི་ཚོགས་གཙོ་རྣམ་གཉིས་ལ་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་ནས་བོད་མིའི་རང་དབང་འཐབ་རྩོད་ཀྱི་སྐོར་དང་།  ༸གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་འཕྲོད་བཞེས་སྐོར། ཨ་རིའི་གཞུང་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བའི་སྐོར་སོགས་ངོ་སྤྲོད་གནང་ཡོད་འདུག

ཉིན་དེའི་ཉིན་གུང་ལ་དྭགས་བསོད་ནམས་གླིང་གཞིས་ཆགས་ཚོགས་ཁང་དུ། ལ་སྤྱི་ལས་ཁུངས་ཀྱི་གོ་སྒྲིག་འོག ལ་དྭགས་དབུས་གཞུང་མང་གཉིས་ལ་བཀའ་དྲིན་རྗེས་དྲན་མཚོན་ཆེད་གསོལ་ཚིགས་འདེགས་འབུལ་ཞུས་ཡོད་པའི་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་ལ་དྭགས་དབུས་གཞུང་གི་གནད་ཡོད་མི་སྣ་རྣམས་ཕེབས་ཡོད་ཅིང་། སྲིད་སྐྱོང་མཆོག་ནས་ལ་དྭགས་རི་ལྗོངས་ཡར་རྒྱས་ལྷན་ཚོགས་གཙོས་ལ་དྭགས་དབུས་གཞུང་ནས་བོད་མིའི་ཐོག་ཡུལ་མི་དང་གཅིག་མཚུངས་ཀྱི་མཐུན་རྐྱེན་སྦྱོར་བར་ཐུགས་རྗེ་ཆེ་ཞུས་ཡོད་འདུག

ཕྱི་ཚེས་ ༡༤ ཉིན་སྲིད་སྐྱོང་སྤེན་པ་ཚེ་རིང་མཆོག་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་གཞིས་གྲོང་ཁག་བཅུ་གཉིས་སུ་ཕེབས་ཏེ་ནང་སྲིད་ལས་ཁུངས་ཀྱི་ལས་འཆར་ཁག་ལ་གཟིགས་ཞིབ་དང་། ས་གནས་མི་མང་རྣམས་ཀྱི་དཀའ་སྡུག་ལ་གསན་ཞིབ་གནང་ཡོད་པ་མ་ཟད། གླེའི་སྨན་རྩིས་ཁང་དང་། བོད་མིའི་ཚོང་ཁང་ཁག་དུ་གཟིགས་སྐོར་གནང་ཡོད།

ཕྱི་ཚེས་ ༡༣ ཉིན་གྱི་སྔ་དྲོར་ལ་དྭགས་བྱང་ཐང་སུམ་མདོ་རུ། སྲིད་སྐྱོང་མཆོག་ནས། བོད་ཕྱི་ནང་གཉིས་ཀྱི་བོད་མི་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཨ་རིའི་སྲིད་འཛིན་རྗོ་བྷའི་ཌེན་མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་དེ་ཁྲིམས་སུ་གྱུར་ཡོད་པའི་གཏམ་བཟང་གི་གནས་ཚུལ་རེད། སྐབས་བཅུ་དྲུག་པའི་བཀའ་ཤག་གིས་ལོ་གཉིས་དང་ཟླ་བ་གཉིས་རིང་སྲིད་བྱུས་དེ་དབུ་མའི་ལམ་ཡིན་པ་གང་ཞིག་ལ་ཐབས་བྱུས་ལ་འགྱུར་བ་བཏང་སྟེ་དབུ་མའི་མཐའ་གཅིག་ནི་བོད་དེ་ལོ་རྒྱུས་ཐོག་རང་བཙན་ཡིན་པའི་གནས་བབ་ཐོག་ཤུགས་རྒྱག་རྒྱུ་བྱེད་པ་ནང་བཞིན་ཁ་ནས་བཤད་པ་ཙམ་མ་ཡིན་པར་ཁ་ཡོད་ལག་ཡོད་ཀྱིས་ཨ་རིའི་གྲོས་ཚོགས་མཉམ་དཀའ་ལས་བརྒྱབ་པའི་རྒྱུ་མཚན་ལ་བརྟེན་ནས་ཡོང་གི་ཡོད་པ་རེད། དེའི་ནང་དཀའ་ལས་རྒྱག་མཁན་མང་པོ་ཡོད། དངོས་སུ་ཕྱག་ལས་གནང་མཁན་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་གཙོས་ལས་བྱེད་རྣམ་པ་དང་། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་རི་ཅཊ་གྷེ་རི་ (Richard Gere) ལགས། རྒྱལ་སྤྱིའི་བོད་དོན་ལས་འགུལ་ཁང་གི་བསྟན་ཆོས་རྒྱ་མཚོ་ལགས། བུ་ཆུང་ཚེ་རིང་ལགས། ཕེ་རན་ཇི་ (Franz) ལགས་བཅས་ཀྱི་ཧུར་ཐག་གནང་ཡོད། དེ་བཞིན་འདི་ལོའི་ཕྱི་ཟླ ༣ ཚེས ༡༡ དང་ ༡༢ ལ་ཨ་རི་ནང་ཡོད་པའི་བོད་པའི་ཞུ་གཏུག་པ་མི་གྲངས་ཉིས་བརྒྱ་ལྷག་ཙམ་ཞིག་ཝ་ཤིང་ཊོན་ཌི་སིར་ཕེབས་ནས་ཁྲིམས་འཆར་འདི་དང་འབྲེལ་བའི་ཐོག་ནས་ཞུ་བསྐུལ་བྱས་ཡོད། བོད་རིགས་སྤྱི་མཐུན་ཚོགས་པ་དང་བོད་དོན་རྒྱབ་སྐྱོར་ཚོགས་པས་དེའི་ཐོག་སྐུ་ལས་ཧ་ཅང་བསྐྱོན་ཡོད། ཚང་མས་སྐུ་ལས་བསྐྱོན་པའི་ཉེར་ལེན་ལ་བརྟེན་ནས་ང་ཚོ་ད་ལྟ་གནས་སྟངས་འདི་འདྲ་ཞིག་ལ་བསླེབས་ཐུབ་ཡོད། དེར་བརྟེན། ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། མ་འོངས་པ་ཡིན་ནའང་འདི་ལྟ་བུའི་ལས་ཀ་མང་པོ་ཞིག་བྱེད་དགོས་ཐུག་གི་རེད། ཚང་མས་མཉམ་རུབ་ཀྱི་ཐོག་ནས་ནུས་པ་མཉམ་སྤུངས་བྱས་པ་ཡིན་ན་དོན་དག་སྒྲུབ་རྒྱུ་ཡོད་པ་འདི་ནས་ཁུངས་སྐྱེལ་ཐུབ་པའི་གནས་སྟངས་ཆགས་ཡོད། ཅེས་གསུངས་འདུག

ཉིན་དེར་སྲིད་སྐྱོང་མཆོག་ནས་བྱང་ཐང་སུམ་མདོ་དང་ས་སྨད་གཞིས་ཆགས་སུ་འཚམས་གཟིགས་གནང་སྟེ་ས་གནས་མི་མང་ལ་གསུང་བཤད་དང་། ས་གནས་ཀྱི་ལས་གཞི་ཁག་ལ་རྟོག་ཞིབ་གནང་གྲུབ་རྗེས། ཕྱི་ཚེས་ ༡༢ ཉིན་སྲིད་སྐྱོང་མཆོག་ནས་ལ་དྭགས་ཧན་ལེ་བོད་མིའི་གཞིས་ཆགས་སུ་འཚམས་གཟིགས་གནང་ཡོད་ཅིང་། སྐབས་དེར་མི་མང་ལ་བཀའ་ཤག་སྐབས་བཅུ་དྲུག་པའི་ལས་དོན་བྱེད་ཕྱོགས་དང་། རྒྱལ་སྤྱིའི་བོད་དོན་འཐབ་རྩོད་ཀྱི་གནས་བབ་སྐོར་གསུང་གནང་གྲུབ་རྗེས། ས་གནས་བོད་ཁྱིམ་ཡན་ལག་སློབ་གྲྭར་འཚམས་གཟིགས་དང་། ས་གནས་ཀྱི་དཔོན་རིགས་མཇལ་འཕྲད་ཀྱིས་ས་གནས་བོད་མིའི་བདེ་དོན་སྐོར་ཞུ་སྐུལ། དེ་བཞིན་བྱང་ཐང་ཆུ་དམར་འབྲོག་ཁུལ་གྱི་བོད་མིའི་འབྲོག་པའི་བདེ་སྡུག་རྒྱུས་ལོན་ཞུས་ཡོད་འདུག

ཟླ་འདིའི་ཕྱི་ཚེས་ ༡༡ ཉིན་ནས་ལ་དྭགས་བྱང་ཐང་ཁུལ་དུ་ཕེབས་ཐོན་གནང་སྟེ།  བྱང་ཐང་ནུ་མ་དང་། བཀག་གཞུང་། རྒོད་ཡུལ། ཧན་ལེ། ས་སྨད་སོགས་ཀྱི་སློབ་གྲྭ་དང་སྨན་ཁང་། དགོན་པ་སོགས་ལ་གཟིགས་སྐོར་དང་། ཞིང་འབྲོག་མང་ཚོགས་ཀྱི་འཚོ་བའི་གནས་བབ་ལ་གཟིགས་ཞིབ་གནང་ཡོད་འདུག ཕྱི་ཚེས་ ༩ ཉིན་ཕོ་བྲང་དགེ་འཕེལ་གླིང་དང་། ཀརྨ་སྒྲུབ་རྒྱུད་ཆིས་གླིང་དགོན། སྨན་ལྷ་སློབ་གྲྭ། ལ་དྭགས་བོད་ཁྱིམ། བོད་ཁྱིམ་རྒན་གསོ་ཁང་། ཨག་གླིང་བོད་ཁྱིམ་སློབ་གྲྭ་སོགས་སུ་འཚམས་གཟིགས་དང་གསུང་བཤད་གནང་བ་དང་། དེ་བཞིན་ཕྱི་ཚེས་ ༨ ཉིན་ལ་སྤྱི་ལས་ཁུངས་དང་། ས་གནས་འཕྲོད་བསྟེན་སྨན་ཁང་། གླེ་བྱང་གཉིས་ཀྱི་རང་བདེན་ཚོསག་ཆུང་ལས་ཁུངས། ལ་དྭགས་མཉམ་འབྲེལ་ལས་ཁུངས། ས་གནས་ཁྲིམས་ཞིབ་ཁང་། ལ་དྭགས་ལྕོང་ལམ་ས་འགྲོ་ཕན་སྨན་རྩིས་ཁང་སོགས་སུ་འཚམས་གཟིགས་གནང་ཡོད་འདུག