རྒྱ་ནག་འཐབ་ཕྱོགས་གཅིག་གྱུར་ཁང་གི་མགོ་ཁྲིད་གཞོན་པ་ཟུར་བ་ཚུའེ་མའོ་ཧུའུ་ཡིས་རྒྱ་སྒོར་ཁྲི་ ༡༠༤༣ ལྷག་གི་ལྐོག་རྔན་བླངས་བའི་ནག་ཉེས་འོག་ལོ་ ༡༡ རིང་བཙོན་འཇུག་ཁྲིམས་ཐག་བཅད་ཡོད་འདུག
![](https://tibettimes.net/wp-content/uploads/2024/07/w1200.jpeg)
ཉེ་ལམ་རྒྱ་ནག་ལིའོ་ཉིང་ཞིང་ཆེན་ཧྲེན་དབྱང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། རྒྱ་ནག་འཐབ་ཕྱོགས་གཅིག་གྱུར་ཁང་གི་མགོ་ཁྲིད་གཞོན་པ་དང་། རྒྱ་ནག་རྒྱལ་ཡོངས་ཆོས་ལུགས་ལས་དོན་ཁང་གི་མགོ་ཁྲིད་ཟུར་བ་ཚུའེ་མའོ་ཧུའུ་ (崔茂虎) ཡིས་ལྐོག་རྔན་རྒྱ་སྒོར་ཁྲི་ ༡༠༤༣ བླངས་བའི་ནག་ཉེས་བཙུགས་ཏེ་ལོ་ ༡༡ རིང་བཙོན་འཇུག་ཁྲིམས་ཆད་དང་། རྒྱ་སྒོར་ཁྲི་ ༡༥༠ ཡིས་ཁྲིམས་ཆད། དེ་བཞིན་མི་སྒེར་གྱི་རྒྱུ་ནོར་གཞུང་བཞེས་བཏང་ཡོད་འདུག
ཧྲེན་དབྱང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། ཚུའེ་མའོ་ཧུའུ་ཡིས་ཕྱི་ལོ་ ༢༠༠༧ ལོ་ནས་ ༢༠༢༣ ལོའི་བར་ཡུན་ནན་ཞིང་ཆེན་རྩ་འཛུགས་ཁང་གི་མགོ་ཁྲིད་གཞོན་པ་དང་། ལི་ཅང་གྲོང་ཁྱེར་གྱི་དམར་ཤོག་དྲུང་ཡིག ཡུན་ནན་ཞིང་ཆེན་གྱི་མགོ་ཁྲིད་གཞོན་པ་སོགས་ཀྱི་གཞུང་འབྲེལ་གོ་གནས་བེད་སྤྱོད་ལོག་པར་བཏང་སྟེ་མི་སྒེར་གྱི་ཁེ་ལས། ལས་གྲྭ་འགན་ལེན། གོ་གནས་སྤར་བ། ཁེ་ཕན་དོན་གཉེར་ཟེར་བ་སོགས་བྱས་ནས་ལྐོག་རྔན་ཁྱོན་རྒྱ་སྒོར་ཁྲི་ ༡༠༤༣ བླངས་ཡོད་པའི་ནག་ཉེས་བཙུགས་འདུག
ཚུའེ་མའོ་ཧུའུ་ནི་ཕྱི་ལོ་ ༡༩༦༥ ལོར་ཡུན་ནན་ཞིང་ཆེན་ཞོན་ཝེ་གྲོང་ཁྱེར་དུ་སྐྱེས་ཡོད་ཅིང་། ཕྱི་ལོ་ ༡༩༨༧ ལོར་ཡུན་ནན་མཐོ་སློབ་ཀྱི་ཆབ་སྲིད་རིག་པའི་སྡེ་ཁག་ཏུ་མཚན་ཉིད་རིག་པར་ཆེད་སྦྱོང་བྱས་འདུག ཕྱི་ལོ་ ༢༠༠༧ ནས་ ༢༠༡༤ བར་ཡུན་ནན་ཞིང་ཆེན་རྩ་འཛུགས་སྡེ་ཁག་གི་མགོ་ཁྲིད་གཞོན་པ་དང་། མི་ཤུགས་ཐོན་ཁུངས་དང་སྤྱི་ཚོགས་བདེ་འཇགས་ཀྱི་མགོ་ཁྲིད་བྱས། ཕྱི་ལོ་ ༢༠༡༧ ལོར་ཡུན་ནན་ཞིང་ཆེན་ལི་ཅིང་གྲོང་ཁྱེར་གྱི་དམར་ཤོག་ཚོགས་པའི་དྲུང་ཡིག ཕྱི་ལོ་ ༢༠༢༡ ནས་ ༢༠༢༢ བར་ཡུན་ནན་ཞིང་ཆེན་གྱི་མགོ་ཁྲིད་གཞོན་པ་དང་། རྒྱ་ནག་འཐབ་ཕྱོགས་གཅིག་གྱུར་ཁང་གི་མགོ་ཁྲིད་གཞོན་པ། རྒྱ་ནག་རྒྱལ་ཡོངས་ཆོས་ལུགས་ལས་དོན་ཁང་གི་མགོ་ཁྲིད་བཅས་བྱས་ཡོད་འདུག ཕྱི་ལོ་ ༢༠༢༣ ཟླ་ ༣ ཚེས་ ༡༨ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས་ཞིབ་བཤེར་བྱས་ཏེ་རྒྱ་ནག་རྒྱལ་ཡོངས་ཆོས་ལུགས་ལས་དོན་ཁང་ནས་ཕྱིར་ཕུད་བཏང་ཡོད་པ་མ་ཟད། ལོ་དེའི་ཕྱི་ཟླ་ ༨ པ་ནས་བཟུང་ལིའོ་ཉིན་ཞིང་ཆེན་ཧྲིན་དབྱང་གྲོང་ཁྱེར་མི་མང་ཞིབ་དཔྱོད་ཁང་གིས་ཚུའེ་མའོ་ཧུའུ་རྒྱ་ནག་དམར་ཤོག་ཚོགས་པའི་ཁོངས་ནས་ཕྱིར་ཕུད་བཏང་བ་དང་འཛིན་བཟུང་བྱས་པ་བསྒྲགས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།