གློག་བརྙན་འཁྲབ་ཁྲིད་པ་ཧྥི་ལི་ཕི་ཌེ་ལཱ་ཁི་སི་ལགས་ཀྱིས་བདེ་སྐྱིད་ལྡན་པའི་ཤེས་རབ་ཞེས་པའི་དངོས་བྱུང་གློག་བརྙན་ནང་༧གོང་ས་མཆོག་གིས་དམག་འཁྲུག་དང་གནམ་གཤིས་འགྱུར་ལྡོག་སོགས་གོ་ལའི་དཀའ་ངལ་གདོང་ལེན་བྱེད་ཕྱོགས་སོགས་གསལ་སྟོན་བྱས་སྐོར་བརྗོད་འདུག
ཉེ་ལམ་ཡུ་རོབ་སུད་སིའི་གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་( Barbara Miller)ལགས་དང་། ཧྥི་ལི་ཕི་ཌེ་ལཱ་ཁི་སི་(Philip Delaquis) ལགས་གཉིས་ཀྱིས་༧གོང་ས་མཆོག་གི་མཛད་རྣམ་བདེ་སྐྱིད་ལྡན་པའི་ཤེས་རབ་ཞེས་པའི་དངོས་བྱུང་གློག་བརྙན་གསར་བ་ཞིག་བཟོ་སྐྲུན་བྱས་ཡོད་ཅིང་། དེ་ནི་ཨ་རིའི་ཧོ་ལི་ཝིར་ཌི་གློག་བརྙན་འཁྲབ་སྟོན་པ་གྲགས་ཅན་བོད་དོན་རྒྱབ་སྐྱོར་བ་རི་ཆར་ཌི་གྷར་(Richard Gere) ལགས་དང་། གློག་བརྙན་འཁྲབ་ཁྲིད་པ་ཨོ་རེན་མོ་ཝར་མན་(Oren Moverman) ལགས་གཉིས་དང་མཉམ་ལས་བྱས་པ་ཞིག་ཡིན་འདུག་ལ། འདི་ལོའི་ཕྱི་ཟླ་ ༩ ནང་དངོས་སུ་འགྲེམས་སྤེལ་བྱ་རྒྱུ་ཡིན་འདུག
གློག་བརྙན་འཁྲབ་ཁྲིད་པ་ཨོ་རེན་མོ་ཝར་མན་ལགས་ཀྱིས། རང་ཉིད་གློག་བརྙན་བཟོ་སྐྲུན་བྱེད་མཁན་ཞིག་ཡིན་པའི་ཆ་ནས་བྱམས་བརྩེའི་མཛེས་སྡུག་གིས་ཁེངས་བའི་ཁྱད་དུ་འཕགས་པའི་གློག་བརྙན་འདིའི་ནང་དུ་མགྲོན་འབོད་བྱས་ཏེ་མཉམ་ཞུགས་ཐུབ་པར་སེམས་གཏིང་ནས་བཀའ་དྲིན་ཆེ་ཞུ་བཞིན་ཡོད། བདེ་སྐྱིད་ལྡན་པའི་ཤེས་རབ་ཞེས་པའི་གློག་བརྙན་གྱིས་ལྟད་མོ་བ་རྣམས་ལ་གཞན་དང་མི་འདྲ་བའི་གློག་བརྙན་གྱི་མྱོང་ཚོར་ཞིག་སྤྲོད་ཐུབ་པ་མ་ཟད། ང་ཚོ་འགྲོ་བ་མི་ཚང་མ་བློ་གྲོས་དང་སྤྲོ་སྣང་ལྡན་པ་གསལ་སྟོན་བྱེད་བཞིན་ཡོད། ཅེས་བརྗོད་ཡོད་པ་དང་། རི་ཆར་ཌི་གྷར་ལགས་ཀྱིས། གློག་བརྙན་ཐུང་ཐུང་འདིས་མ་འོངས་བར་ཤུགས་རྐྱེན་ཆེན་པོ་ཞིག་སྤྲོད་ཐུབ་ཀྱི་རེད། ཅེས་བརྗོད་འདུག
གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་ལགས་ཀྱིས། བདེ་སྐྱིད་ལྡན་པའི་ཤེས་རབ་ཞེས་པའི་གློག་བརྙན་དེ་ནི་དགུང་ལོ་གྱ་དགུ་བཞེས་པའི་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་དངོས་སུ་བརྙན་མིག་བརྒྱུད་འཛམ་གླིང་སྤྱི་ལ་ཁྱབ་པའི་ནང་སེམས་ཀྱི་བདེ་སྐྱིད་དང་ཞི་བདེའི་འཚོལ་སྙེག་གི་དགོས་འདུན་དང་། དུས་རབས་ཉེར་གཅིག་པར་བདེ་སྐྱིད་དང་ཞི་བདེ་ངང་གནས་ཐུབ་པའི་སྐོར་གསུངས་ཡོད་པ་མ་ཟད། འཛམ་གླིང་ནོ་བྷེལ་ཞི་བདེ་གཟེངས་རྟགས་འཐོབ་མཁན་ཁྲོད་གློག་བརྙན་ནང་མི་སྒེར་གྱི་ལོ་རྒྱུས་ཞིབ་ཚགས་གསུང་མཁན་དེ་འདྲ་ཞིག་བྱུང་མེད། ཅེས་བརྗོད་འདུག
གློག་བརྙན་འཁྲབ་ཁྲིད་པ་ཧྥི་ལི་ཕི་ཌེ་ལཱ་ཁི་སི་(Philip Delaquis) ལགས་ཀྱིས། དངོས་བྱུང་གློག་བརྙན་འདིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེའི་རིང་གི་དམག་འཁྲུག་དང་གནམ་གཤིས་འགྱུར་ལྡོག་དང་། གོ་ལའི་དཀའ་ངལ་གདོང་ལེན་བྱེད་ཕྱོགས་ཀྱི་ཐད་གསལ་སྟོན་བྱས་ཡོད། ང་ཚོས་གློག་བརྙན་འདི་བཟོ་སྐྲུན་བྱེད་དགོས་པའི་ཀུན་སློང་ཡང་འཛམ་གླིང་གི་མི་མང་གིས་དུས་རབས་ཀྱི་དཀའ་ངལ་དང་། འཇིགས་སྣང་། ལྷིང་འཇགས་མེད་པའི་ཚོར་བ་ལ་སེམས་བཟང་པོའི་ཐོག་གདོང་ལེན་བྱས་ཏེ་མཐུན་སྒྲིལ་དང་རེ་བ་གསལ་སྟོན་བྱ་རྒྱུ་དེ་ཡིན། ཅེས་བརྗོད་འདུག
བདེ་སྐྱིད་ལྡན་པའི་ཤེས་རབ་ཅེས་པའི་དངོས་བྱུང་གློག་བརྙན་འདིའི་ནང་དུ་ད་ལྟ་བར་བོད་གཞུང་ནས་པར་སྐྲུན་བྱས་མེད་པའི་ཡིག་ཆ་དང་གསར་དུ་ཉར་ཚགས་བྱས་པའི་ཡིག་ཚགས་བཀོད་དེ། ༸གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་གི་ཆོས་སྲིད་གཉིས་ཀྱི་མཛད་རྣམ་ཕབ་སྐྲུན་བྱས་ཡོད་ཅིང་། འདི་ལོའི་ཕྱི་ཟླ་དགུ་བའི་ནང་ཤར་གཏོང་བྱ་འཆར་ཡོད་པས། ཉེ་ལམ་ཡུ་རོབ་ཀྱི་ཨ་སི་ཁོ་ཌི་ཨེ་ལི་ཊི་དང་ཨེ་ཁི་སི་གློག་བརྙན་ཚོང་གཉེར་ཁང་གཉིས་ཀྱིས་འཇར་མན་སྐད་ཡིག་བེད་སྤྱོད་བྱེད་བཞིན་པའི་ས་གནས་ཁག་ཏུ་གློག་བརྙན་འགྲེམས་སྤེལ་གྱི་པར་དབང་ཐོབ་ཐང་བླངས་ཡོད་པ་མ་ཟད། གློག་བརྙན་དེ་ཨ་རི་ནང་དུའང་འགྲེམས་སྤེལ་བྱ་འཆར་ཡོད་འདུག
གསར་འགོད་པ། བྱམས་པ་ཚེ་རིང་།
