བོད་ཀྱི་ལུས་རྩལ་བ་ཆོས་དབྱིངས་སྐྱིད་ཀྱིས་འདི་ལོའི་ཨོ་རྩེད་ཁྲོད་མཉམ་ཞུགས་བྱས།

འདི་ལོའི་ཨོ་ལིམ་ཕིག་གི་ཕོ་མོ་མཉམ་བསྲེས་ཀྱི་འདུར་རྒྱུག་རྩེད་འགྲན་ཁྲོད་བོད་ཀྱི་ལུས་རྩལ་བ་ཆོས་དབྱིངས་སྐྱིད་ཀྱིས་ཨང་རིམ་བཅུ་བཞི་པ་བླངས་སོང་།

Qieyang Shijie of China competes during the marathon race walk relay mixed of Athletics at the Paris 2024 Olympic Games in Paris, France, Aug. 7, 2024. (Xinhua/Li Gang)

འདི་ལོའི་ཕྱི་ཟླ་ ༧ ཚེས་ ༡༤ ནས་ཕྱི་ཟླ་ ༨ ཚེས་ ༡༡ བར་རྒྱལ་སྤྱིའི་དབྱར་དུས་ཀྱི་ཨོ་ལིམ་ཕིག་རྩེད་འགྲན་དེ་ཧྥ་རན་སིའི་རྒྱལ་ས་པེ་རི་སིར་བསྡུ་མུས་ཡིན་པ་ལྟར། དེ་རིང་འདིའི་ལོའི་ཨོ་ལིམ་ཕིག་གི་ཕོ་མོ་མཉམ་བསྲེས་ཀྱི་སྤྱི་ལེ་ ༤༥ ཡི་འདུར་རྒྱུག་ཁྲོད། བོད་ཀྱི་ལུས་རྩལ་བ་གྲགས་ཅན་ཆོས་དབྱིངས་སྐྱིད་ལགས་ཀྱིས་མཉམ་ཞུགས་བྱས་ཏེ། ཁོ་མོར་ཨང་རིམ་བཅུ་བཞི་པ་ཐོབ་སོང་ལ། རྩེད་འགྲན་སྐབས་བོད་མི་ཁག་ཅིག་གིས་བོད་ཀྱི་རྒྱལ་དར་འཕྱར་ནས་ཁོང་མོར་དགའ་བསུ་དང་། བོད་ཕྱི་ནང་གཉིས་ཀྱི་བོད་མི་ཚོས་དྲ་ལམ་ནས་ཆོས་དབྱིངས་སྐྱིད་ལ་སྨོན་ཚིག་མང་དག་ཅིག་བྲིས་སོང་།

རྩེད་འགྲན་མགོ་མ་བཙུགས་སྔོན་དུ་བོད་ནང་གི་བོད་མི་མང་དག་ཅིག་གིས་བོད་མི་ས་ཡ་དྲུག་གི་སྐུ་ཚབ་”གངས་རིའི་བུ་མོ་” མིང་ཞེས་བཏགས་ནས། ཁོང་མོར་སྨོན་ཚིག་དང་ལམ་ལྷོངས་ཡོང་བའི་སྨོན་ལམ་བཏབ་སོང་སྟེ། བོད་ནང་གི་བོད་མི་ཁག་ཅིག་གིས་ཆོས་དབྱིངས་སྐྱིད་ཀྱི་འདུར་རྒྱུག་རོགས་པ་རྒྱ་མི་དེས་སྒྲིག་འགལ་བྱས་རྐྱེན་མཇུག་འབྲས་དེ་ལྟར་ཐོན་ཡོད་པའི་བསམ་ཚུལ་གླེང་སློང་བྱས་ཏེ། མཇུག་འབྲས་ལ་འདོད་བློ་ཁེངས་མེད་པའི་རྣམ་འགྱུར་སྟོན་མཁན་ཡང་འདུག

བོད་ཀྱི་ཨོ་རྩལ་བ་ཆོས་དབྱིངས་སྐྱིད་ལགས་ཕྱི་ལོ་ ༢༠༡༢ ལོ་ནས་རྒྱལ་སྤྱིའི་ཨོ་ལིམ་པིག་རྩེད་འགྲན་ལ་ཞུགས་ཏེ། རྒྱ་ནག་དང་རྒྱལ་སྤྱིའི་འགྲན་ཚོགས་མང་པོའི་སྟེང་རིམ་པ་མི་འདྲ་བའི་བྱ་དགའ་སྣ་ཚོགས་བླངས་ཡོད་པ་དང་། ད་ལོའི་ཕྱི་ཟླ་༣ པའི་ནང་ཚོགས་པའི་རྒྱལ་སྤྱིའི་འདུར་རྒྱུག་གི་བདམས་གསེས་འགྲན་སྡུར་ཁྲོད་ཨང་དང་པོ་དང་། ཕྱི་ལོ་ ༢༠༡༨ ཟླ་ ༤ པའི་ནང་པོར་ཅི་ཀོ་རྒྱལ་ཁབ་ནས་ཚོགས་པའི་རྒྱལ་སྤྱིའི་བུད་མེད་ཀྱི་སྤྱི་ལེ་ ༢༠ འགྲན་སྡུར་ཁྲོད་ཨང་དང་པོ། ཕྱི་ལོ་ ༢༠༡༨ ནང་སི་པན་དུ་བསྡུས་པའི་སྤྱི་ལེ་ ༢༠ འདུར་རྒྱུག་ཁྲོད་ཨང་དང་པོ་བླངས།

བོད་ཀྱི་ཨོ་རྩལ་བ་ཆོས་དབྱིངས་སྐྱིད་ལགས་ནི། ཕྱི་ལོ་ ༡༩༩༠ ཟླ་ ༡༡ ཚེས་ ༡༡ ཉིན་མཚོ་སྔོན་མཚོ་བྱང་ཁུལ་མདའ་བཞི་རྫོང་ཝ་མགྱོགས་སྡེ་བ་རུ་སྐྱེས་ཤིང༌། ཆུང་དུས་ནས་ཡུལ་ཚོའི་སློབ་གྲྭར་ཞུགས་ཡོད་པ་དང་། ཕྱི་ལོ་ ༢༠༡༢ ལོར་ལོན་ཏོན་ཨོ་རྩལ་ཐོག་ཨང་དང་པོ་ཐོབ། ཕྱི་ལོ་ ༢༠༡༩ ལོ་ནས་འཛམ་གླིང་གི་བུད་མེད་འདུར་རྒྱུགས་མྱུར་ཚད་མཐོ་ཤོས་ཀྱི་ཟིན་ཐོ་གསར་པ་བསྐྲུན་ཡོད་པ་རེད། ཉེ་བའི་ལོ་ཤས་ནས་བོད་རིགས་ཨོ་རྩལ་བ་ཆོས་དབྱིངས་སྐྱིད་གཙོས་བོད་ཀྱི་ན་གཞོན་མང་དག་ཅིག་གིས་རྒྱལ་སྤྱི་དང་རྒྱལ་ནང་རང་བཞིན་གྱི་ལུས་རྩལ་འགྲན་མང་དག་ཅིག་ལ་མཉམ་ཞུགས་བྱེད་མགོ་བཙུགས་ཡོད་པ་མ་ཟད། ཁོ་ཚོས་གཟེངས་སུ་ཐོན་པའི་གྲུབ་འབྲས་ཀྱིས་བོད་ཁུལ་གྱི་ན་གཞོན་མང་པོར་ལུས་རྩལ་ཐད་རྨི་ལམ་གསར་པ་ཞིག་བསྐྲུན་ཡོད་པ་ལྟར། ད་ལྟའི་ཆར་རྒྱལ་སྤྱིའི་ལུས་རྩལ་གྱི་གར་སྟེགས་ཆེ་ཤོས་ཁག་ན་མཆོང་རྒྱུག་འཕེན་གསུམ་དང་། གངས་ཞུད། རྐང་སྤོལ་རྩེད་འགྲན། ཁུ་ཚུར་འགྲན་བསྡུར་སོགས་ལུས་རྩལ་གྱི་རྣམ་གྲངས་མང་པོ་ཞིག་ཁྲོད་གྲུབ་འབྲས་མི་དམན་པ་ཞིག་བླངས་མུས་ཡིན་པ་རེད།

རྒྱ་ནག་གཞུང་ཕྱོགས་ཀྱིས་ཕྱོགས་སྒྲིག་བྱས་པའི་རྒྱལ་སྤྱིའི་རང་བཞིན་གྱི་བོད་རིགས་ལུས་རྩལ་བའི་ལོ་རྒྱུས་ལྟར་ན། བོད་ཉིང་ཁྲི་ས་ཁུལ་ནས་ཡིན་པའི་བོད་མི་ཕུར་བུ་ཚེ་རིང་ལགས། ཕྱི་ལོ་ ༡༩༧༤ ལོར་རྒྱ་ནག་རྒྱལ་ཡོངས་སྐབས་གསུམ་པའི་ལུས་རྩལ་འགྲན་ཚོགས་ཐོག་ཞུགས་ཏེ། ལྕགས་རིལ་དང་ལག་དབྱུག་རྒྱང་འཕེན་ཁྲོད་ཨང་དང་པོ་ཐོབ་ཡོད་པ་དང་། ཕྱིས་སུ་རྒྱལ་ཡོངས་རང་བཞིན་གྱི་འགྲན་ཚོགས་ཐེངས་བཞིར་མཉམ་ཞུགས་གནང་སྟེ། ཁོང་ལ་ཨང་དང་པོ་གཅིག་དང་གཉིས་པའི་གཟེངས་རྟགས་གཉིས་ཐོབ་ཡོད་པ་མ་ཟད། སྔ་གཞུག་ཏུ་སྐབས་གཉིས་པའི་ཡ་གླིང་ལུས་རྩལ་འགྲན་ཚོགས་དང་། ཡུ་རོབ་དང་ཨ་ཧྥེ་རི་ཁ། ཨོ་གླིང་བཅས་ཀྱི་ནང་བསྡུས་པའི་རྒྱལ་སྤྱིའི་རང་བཞིན་གྱི་འགྲན་ཚོགས་ནང་དུའང་ཞུགས་ཡོད་འདུག ཁོང་ནི་རྒྱ་ནག་རྒྱལ་ཡོངས་ལུས་རྩལ་མཐུན་ཚོགས་ནང་ཚུད་པའི་བོད་རིགས་ལུས་རྩལ་བ་ཐོག་མ་དང་། རྒྱལ་སྤྱིའི་རང་བཞིན་གྱི་ལུས་རྩལ་འགྲན་ཚོགས་ནང་ཞུགས་མཁན་བོད་རིགས་ཐོག་མ་དེ་ཡིན་པའི་ངོས་འཛིན་བྱེད་ཀྱི་འདུག

གཞན་ཡང་། ཕྱི་ལོ་ ༡༩༨༧ ལོར་རྒྱ་ནག་ཀང་ཀྲུའུ་གྲོང་ཁྱེར་དུ་བསྡུས་པའི་རྒྱལ་ཡོངས་སྐབས་དྲུག་པའི་ལུས་རྩལ་འགྲན་ཚོགས་ཐོག བོད་ཀྱི་མདའ་རྩལ་བ་རྡོ་རྗེ་ཆོས་དབྱིངས་ལགས་ཀྱིས་ཨང་དང་པོ་བླངས་ཏེ། ཕྱི་ལོ་ ༡༩༨༨ ལོར་ལྷོ་ཀོ་རི་ཡའི་རྒྱལ་སར་བསྡུས་པའི་སྐབས་ ༢༤ པའི་དགུན་དུས་ཨོ་རྩལ་འགྲན་ཚོགས་ཐོག་མཉམ་ཞུགས་གནང་ཡོད་སྟབས། ཁོང་ནི་བོད་རིགས་ཨོ་རྩལ་བ་དང་པོ་དེ་ཡིན་འདུག