བོད་མིའི་སྒྲིག་འཛུགས་ཀྱིས་རྒྱ་གར་རང་བཙན་ཉིན་མོ་སྲུང་གཙི་གནང་།

སྲིད་སྐྱོང་སྤེན་པ་ཚེ་རིང་མཆོག་གིས་བོད་ཕྱི་ནང་གཉིས་ཀྱི་ཚབ་བྱས་ནས་རྒྱ་གར་རང་བཙན་ཉིན་མོར་འཚམས་འདྲི་གནང་སོང་།

དེ་རིང་སྔ་དྲོའི་ཆུ་ཚོད་ ༩ དང་ ༣༠  ཙམ་ཐོག་གངས་ཅན་སྐྱིད་གཤོངས་ཀྱི་སྲི་ཟློག་མཆོད་རྟེན་མདུན་ཐང་དུ། རྒྱ་གར་དབྱིན་ཇིའི་དབང་བསྒྱུར་འོག་རང་བཙན་ཐོབ་ནས་ལོ་ངོ་ ༧༨ འཁོར་བའི་ཉིན་མོ་སྲུང་གཙི་གནང་སོང་བ་དང་། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བདེ་སྲུང་དང་ཤེས་རིག་གི་བཀའ་བློན་རྣམ་པ་གཉིས། དེ་བཞིན་ལྷན་ཁང་ཁག་གི་དྲུང་ཆེ་ཆུང་རྣམ་པའི་དབུས་དྲུང་ལས་ཡན་གྱི་ལས་བྱེད་རྣམ་པ་བཅས་འཛོམས་ཏེ། རྒྱ་གར་གྱི་རྒྱལ་གླུ་གྱེར་ཏེ་རྒྱལ་དར་སྒྲེང་འཛུགས་གནང་སོང་།

སྲིད་སྐྱིང་སྤེན་པ་ཚེ་རིང་མཆོག་གིས་གསར་འགོད་པར། དེ་རིང་རྒྱ་གར་རང་བཙན་ཐོབ་ནས་མི་ལོ་ ༧༨ འཁོར་བའི་དུས་དྲན་དེ་རྒྱ་གར་རྒྱལ་ཡོངས་དང་རྒྱ་གར་གྱི་ཡུལ་མི་ཡོད་པའི་རྒྱལ་ཁབ་མང་པོ་ཞིག་ཏུ་སྲུང་གཙི་ཞུ་ཡི་ཡོད་པ་རེད། བོད་ཀྱི་ལོ་རྒྱུས་ཀྱི་ཉམས་དམའ་བའི་དུས་སྐབས་ཤིག་ལ་རྒྱ་གར་གཞུང་དང་མང་ཚོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གཙོས་བཙན་བྱོལ་བོད་མི་ཚང་མར་སྡོད་ས་དང་།  ཟ་འཐུང་། སློབ་སྦྱོང་སྤྲོད་རྒྱུས་མཚོན་པའི་བོད་མི་རིགས་ཀྱི་ངོ་བོ་མཚོན་པའི་སྐད་ཡིག་དང་། ཆོས་རིག་སོགས་སློབ་སྦྱོང་བྱེད་པའི་གོ་སྐབས་དང་། བོད་ནང་གཏོར་བཅོམ་ཤུགས་ཆེན་བྱུང་ཟིན་པའི་དགོན་སྡེ་ཁག་དེ་དག་བཙན་བྱོལ་དུ་ཉམས་གསོ་བྱས་ཐུབ་པ་ནི་རྒྱ་གར་གཞུང་དང་མི་དམངས་ཀྱི་བཀའ་དྲིན་ལ་བརྟེན་ནས་བྱུང་ཡོད་ཙང་། རྒྱ་གར་ཕྱི་ལོ་ ༡༩༤༧ ལོར་དབྱིན་ཇི་བཙན་རྒྱལ་རིང་ལུགས་ཀྱི་བཙན་འོག་ནས་ཐར་ཏེ་རང་བཙན་ཐོབ་པ་དེ་ལོ་རྒྱུས་ཀྱི་ཐོག་ནས་གལ་ཆེན་ཞིག་ཏུ་གྱུར་ཡོད་ལ།  རྒྱ་གར་རང་བཙན་ཐོབ་ནས་ཆབ་སྲིད་ཚོགས་པ་སྣ་ཚོགས་ཀྱིས་དབུ་འཁྲིད་ནས་འགན་བཞེས་ཡོད་རེད། ད་ལྟའི་དུས་ཚོད་ལ་རྒྱ་གར་དེ་འཛམ་གླིང་སྟོབས་ཆེན་ལྔ་པ་ཆགས་ཡོད་པས། དེ་རིང་གི་ཉིན་མོ་དང་བསྟུན་བོད་ཕྱི་ནང་གཉིས་ཀྱི་བོད་མི་རྣམས་ཀྱི་ཚབ་བྱས་ཏེ། རྒྱ་གར་གཞུང་དམངས་གཉིས་ལ་འཚམས་འདྲི་ཞུ་རྒྱུ་ཡིན། ཞེས་གསུངས་སོང་།

ཡང་སྲིད་སྐྱོང་མཆོག་གིས། རྒྱ་གར་རང་བཙན་ཐོབ་ནས་ལོ་གསུམ་གྱི་རྗེས། བོད་དེ་རྒྱ་ནག་དམར་གཞུང་གི་བཙན་འོག་ལ་ཚུད་ནས་བཙན་བྱོལ་དུ་གྱར་ཏེ་མི་ལོ་ ༦༥ ཙམ་འགོར་གྱི་ཡོད་པ་རེད། ལོ་རྒྱུས་ཀྱི་གནས་བབ་དང་དངོས་ཡོད་ཀྱི་གནས་སྟངས་ཀྱི་ཐོག་ནས་ང་ཚོ་ནང་པ་སངས་རྒྱས་པ་ཡིན་དུས་རྟག་པ་དང་བརྟན་པ་ལ་ཁས་ལེན་བྱེད་ཀྱི་མེད་པས་འགྱུར་བ་འགྲོ་ཡི་རེད་ལ་འགྲོའང་དགོས་པའི་ཀུན་སློང་ཞིག་གི་འོག་ནས། དེང་སྐབས་རྒྱལ་སྤྱིའི་ནང་བོད་དོན་གོ་རྟོགས་སྤེལ་རྒྱུ་དང་བོད་དོན་རྒྱབ་སྐྱོར་འཚོལ་ནས་བོད་རྒྱའི་དཀའ་རྙོག་སེལ་རྒྱུའི་གནས་བབ་ཐད་གང་ཐུབ་ཐུབ་ཀྱིས་འབད་བརྩོན་ཞུ་ཡི་ཡོད། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་གྱི་བྱིན་རླབས་དང་མི་ཐོག་རྒན་པ་རྣམས་ཀྱིས་སྐུ་ལས་སྐྱོན་བཞག་པ་དེ་དག་མུ་མཐུད་ནས་བོད་མི་ཚང་མ་མཉམ་རུབ་ཀྱི་ཐོག་ནས་འགྲོ་ཐུབ་སླད། བོད་ཕྱི་ནང་གཉིས་ཀྱི་བོད་མི་ཚོས་རིག་པ་བསྒྲིམ་དགོས་པས། བོད་མིའི་སྒྲིག་འཛུགས་ཀྱིས་༧གོང་ས་རྒྱལ་བ་རིན་པོ་མཆོག་གི་དགོངས་གཞི་གཞིར་བཟུང་འཇོན་ཚོད་དཔང་ཚོད་ཀྱིས་ཤར་སྐྱོད་བྱ་རྒྱུར་འབད་བརྩོན་ཞུ་ཡི་ཡོད། ཚང་མས་མཉམ་རུབ་ཀྱིས་ཧུར་ཐག་འབད་ཐག་བྱས་ན་ནུས་པ་ཐོན་གྱི་རེད། ཅེས་གསུངས་སོང་།

རྒྱ་གར་རང་བཙན་ཉིན་མོ་ནི་ལོ་ལྟར་རྒྱ་གར་རྒྱལ་ཡོངས་སུ་ཟླ་བརྒྱད་པའི་ཚེས་བཅོ་ལྔར་སྲུང་གཙི་བྱེད་ཀྱི་ཡོད་ཅིང་། ལོ་ངོ་ཉིས་བརྒྱ་ལྷག་གི་དབྱིན་ཇིའི་མི་སེར་སྤེལ་ཡུལ་གྱི་བཙན་དབང་ལས་ཐར་བའི་དུས་རབས་གསར་པ་ཞིག་བཞད་པའི་ཉིན་མོར་གཙི།  ཕྱི་ལོ ༡༩༤༧ ལོའི་ཟླ་བ་བརྒྱད་པའི་ཚེས་བཅོ་ལྔར་རྒྱ་གར་ལ་རང་བཙན་ཐོབ་པ་ཡོངས་བསྒྲགས་བྱས་ཡོད་ཅིང་། རྒྱལ་ཁབ་ཀྱི་དབང་ཆ་རྣམས་རྒྱ་གར་གྱི་དབུ་ཁྲིད་ཚོར་སྤྲད། དུས་དེ་ནས་བཟུང་ལོ་ལྟར་ཕྱི་ཟླ་ ༨ ཚེས་ ༡༥ ཉིན་རྒྱ་གར་རང་བཙན་འཐབ་རྩོད་སླད་དུ་རང་སྲོག་བློས་བཏང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་ཞུ་ཡི་ཡོད་པ་རེད།

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།