རྒྱ་ནག་གཞུང་གིས་འབྱུང་འགྱུར་ལོ་ལྔའི་ནང་བོད་མེ་ཏོག་རྫོང་ཁོངས་ཀྱི་ཡར་ཀླུང་གཙང་པོའི་བཞུར་རྒྱུན་དུ་ཆུ་རགས་ཆེ་ཤོས་དེ་གསར་རྒྱག་བྱ་རྒྱུ་ཡིན་འདུག
རྒྱ་ནག་གཞུང་གིས་བོད་ནང་གི་གཙང་པོ་ཆེ་ཁག་ལ་ཆུ་མཛོད་མང་དག་ཅིག་གསར་རྒྱག་གི་ལས་དོན་སྤེལ་མུས་ཡིན་པ་ལྟར། རྒྱ་ནག་གིས་སླར་ཡང་ཡར་ཀླུང་གཙང་པོའི་བཞུར་རྒྱུན་དུ་ཆུ་རགས་ཆེ་ཤོས་དེ་གསར་རྒྱག་གི་ལས་དོན་གཉེར་འཆར་ཡོད་པ་ནི། བོད་ཀྱི་ལྷོ་རྒྱུད་དུ་ཆགས་པའི་རྒྱལ་ཁབ་ཁག་གིས་སེམས་ཁྲལ་ཆེན་པོ་བྱ་དགོས་པའི་གནད་དོན་ཞིག་ཡིན་སྐོར་བརྗོད་འདུག
གནད་དོན་དེའི་ཐད་ཨ་རུ་ན་ཅལ་མངའ་སྡེ་ཡིན་ནས་ཡིན་རྒྱ་གར་གྱི་གྲོས་ཚོགས་འཐུས་མི་ཏཱ་པུར་གྷ་བོ་(Tapir Gao) ལགས་ཀྱིས། རྒྱ་ནག་གིས་ཡར་ཀླུང་གཙང་པོའི་བཞུར་རྒྱུན་དུ་ཆུ་རགས་གསར་རྒྱག་བྱེད་བཞིན་པའི་གནད་དོན་ནི་ཨ་རུ་ནཱ་ཅལ་མངའ་སྡེ་དང་རྒྱ་གར་གཅིག་པུར་ཉེན་ཚགས་ཅན་ཞིག་ཏུ་གྱུར་བ་གཏན་ནས་མིན་པར། བྷང་གྷ་ལའང་ཉེན་ཚབས་ཅན་ཞིག་ཏུ་གྱུར་ཡོད་པས། ངས་རྒྱ་གར་གྲོས་ཚོགས་སུ་རྒྱ་ནག་གིས་ཆུའི་འབར་མདེལ་(water bomb) བཟོ་མུས་ཡིན་པའི་གནད་དོན་དང་། དུས་ངེས་མེད་ལ་གསོག་འཇོག་བྱས་པའི་གཙང་པོ་དེ་དག་ཀློད་ཉེན་ཡོད་པའི་སྐོར་གླེང་སློང་བྱས་ཡོད། ཆུ་རགས་དེ་དག་གིས་རྒྱ་གར་ཨ་རུ་ན་ཅལ་མངའ་སྡེ་དང་། ཨ་སམ། བྷང་གྷ་ལ་སོགས་སུ་འཇིག་པ་ཆེན་པོ་གཏོང་ཉེན་ཡོད་པས། ང་ཚོས་སྲིད་བློན་མུ་དྷི་མཆོག་གི་ལམ་སྟོན་གྱི་འོག་ནས། རྒྱ་ནག་གི་དྲག་རྒོལ་ལ་གདོང་ལེན་བྱ་ཆེད་ཨ་རུ་ན་ཅལ་དུའང་ཆུ་རགས་གསར་རྒྱག་གི་ལས་གཞི་གཉེར་རྒྱུ་གྲ་སྒྲིག་བྱེད་ཀྱིན་ཡོད། ཅེས་བརྗོད་འདུག
ཡང་བོད་ཀྱི་སྲིད་ཇུས་ཉམས་ཞིབ་ཁང་གི་ཁོར་ཡུག་འབུམ་རམས་པ་བདེ་ཆེན་དཔལ་མོ་ལགས་ཀྱིས། འདི་ལོའི་རྒྱ་ནག་དམར་ཤོག་ཚོགས་པའི་ཚང་འཛོམས་གྲོས་ཚོགས་སྟེང་། རྒྱ་ནག་གཞུང་གིས་འབྱུང་འགྱུར་མི་ལོ་ལྔའི་ནང་ཚུད་བོད་མེ་ཏོག་རྫོང་གི་ཡར་ཀླུང་གཙང་པོའི་བཞུར་རྒྱུན་དུ་ཆུ་རགས་ཆེན་པོ་ཞིག་གསར་རྒྱག་བྱ་རྒྱུའི་འཆར་གཞི་ཡོད་ཅིང་། ཆུ་མཛོད་དེས་བོད་ཀྱི་རང་བྱུང་སྐྱེས་ཁམས་དང་། བོད་ཀྱི་ལྷོ་རྒྱུད་དུ་ཆགས་པའི་རྒྱ་གར། བྷང་གྷ་ལ་ཚུད་པའི་ཨེ་ཤ་ཡའི་རྒྱལ་ཁབ་ཁག་ལ་གནོད་འཚེ་ཆེན་པོ་ཐེབས་ཉེན་ཡོད་སྐོར་སོགས་བརྗོད་འདུག
བོད་ནི་འཛམ་གླིང་གི་གཙང་པོ་ཆེ་ཁག་གི་མགོ་ཁུངས་དང་སྣེ་མོ་གསུམ་པ་རུ་འབོད་ཀྱིན་ཡོད་ཀྱང་། འདས་པའི་ལོ་ཤས་རིང་རྒྱ་ནག་གཞུང་གིས་བོད་ནང་གི་ས་གནས་མང་དག་ཅིག་ཏུ་ཆུ་རགས་གསར་རྒྱག་དང་། འཛུགས་སྐྲུན་གྱི་ལས་གཞི་མང་དག་ཅིག་སྤེལ་རྐྱེན། བོད་ནང་དུ་ཚ་དྲོད་འཕེལ་ནས། གངས་རི་དང་འཁྱག་རོམ་མགྱོགས་པོ་ཞུ་ཡི་ཡོད་པ་མ་ཟད། ད་ལྟ་བོད་ནང་དུ་ཚ་ཚད་ལྡབ་འགྱུར་གྱིས་འཕར་གྱིན་ཡོད་སྟབས། བོད་ཀྱི་འཁྱག་རོམ་ཞུ་བ་དང་ཚ་ཚད་འཕར་བ་དེས། འཛམ་གླིང་ཁྱོན་ཡོངས་ཀྱི་ཚ་ཚད་འཕེལ་ཉེན་ཡོད་པ་མ་ཟད། ལྷག་པར་ཨེ་ཤ་ཡ་དང་ཁྱིམ་མཚེས་རྒྱལ་ཁབ་སོགས་སུའང་ཆུའི་གནོད་འཚེ་ཡོང་ཉེན་ཡོད་འདུག་ལ། རྒྱ་ནག་གཞུང་གིས་བོད་ཀྱི་གཙང་བོ་དང་རྒྱུག་ཆུ་ཁ་བསྒྱུར་དང་ཆུ་རགས་གསར་རྒྱག་སོགས་བྱས་པ་དེས། རྒྱ་གར་གཙོས་ཨེ་ཤ་ཡའི་ལྷོ་རྒྱུད་དུ་ཆགས་པའི་རྒྱལ་ཁབ་ཁག་གི་མི་གྲངས་དུང་ཕྱུར་ ༡།༣ གྱི་ཚེ་སྲོག་དང་འཚོ་གནས་ལ་གནོད་འཚེ་ཐེབས་ཀྱི་ཡོད་པ་རེད།
བོད་མཐོ་སྒང་ནས་བཞུར་བའི་ཡར་ཀླུང་གཙང་པོ་ནི་འཛམ་གླིང་གི་ཆེས་རིང་བའི་རྒྱུག་ཆུ་དགུ་པ་དེ་ཡིན་ལ། གཙང་པོ་དེ་བོད་ནས་རྒྱ་གར་ཨ་རུ་ན་ཅལ་མངའ་སྡེ་དང་། ཨ་སམ། དེ་བཞིན་བྷང་གྷ་ལ་སོགས་སུ་བཞུར་ནས་མཐའ་མར་མཐའ་ཡས་རྒྱ་མཚོར་འདྲེས་ཤིང་། དེའི་བཞུར་རྒྱུན་གྱི་རིང་ཚད་ལ་སྤྱི་ལེ་ ༣༠༠༠ དང་། ཟབ་ཚད་ལ་རྨི་ ༣༠ ནས་ ༡༣༥ བར་འདུག་ལ། བོད་ནས། རྒྱ་གར་དང་། བྷང་གྷ་ལར་བཞུར་བའི་གཙང་པོ་དེ་ནི་ཉུང་མཐར་ཡང་མི་གྲངས་ས་ཡ་ ༤༠༠ ལྷག་གི་འཚོ་རྟེན་དུ་གྱུར་ཡོད་པ་རེད། རྒྱ་ནག་གཞུང་གིས་ཕྱི་ལོ་ ༡༩༩༨ དང་། ༢༠༠༧། ༢༠༡༣། ༢༠༡༥། ༢༠༡༩། ༢༠༢༠ བཅས་སུ་ཡར་ཀླུང་གཙང་པོའི་བཞུར་རྒྱུན་དུ་ཆུ་རགས་བདུན་གསར་རྒྱག་བྱས་ཟིན་ཡོད་ཅིང་། འབྱུང་འགྱུར་མི་ལོ་ལྔའི་ནང་ཚུད་ཆུ་རགས་ཆེ་ཤོས་དེ་གསར་རྒྱག་བྱ་རྒྱུ་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
