རྒྱུ་མཚན་ལ་བསམ་བློ་བཏང་ནས་དཔྱད་པ་བྱས་པའི་འབྲས་བུས་སེམས་ཀྱི་ཞི་བདེ་བསྐྲུན་གྱི་ཡོད།

༧གོང་ས་མཆོག་ནས་སངས་རྒྱས་བཅོམ་ལྡན་འདས་ཀྱི་ཆོས་ཀྱི་འཁོར་ལོའི་དོན་གྱི་སྙིང་བོ་ཆ་ཚང་བོད་ཀྱིས་བདག་པོ་བརྒྱབ་སྟེ་ཉམས་ལེན་བྱེད་བཞིན་ཡོད་པ་མ་ཟད། འཛམ་གླིང་གི་ས་ཁུལ་གང་སར་དོ་སྣང་གསར་བ་ཞིག་ཡོང་བཞིན་འདུག་ཅེས་གསུངས།

དེ་རིང་ཕྱི་ཚེས་ ༡༢ ཉིན་གྱི་སྔ་དྲོའི་ཆུ་ཚོད་ ༨།༣༠ ཙམ་ལ་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཤར་ཨེ་ཤ་ཡའི་དད་ལྡན་པ་རྣམས་ནས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་ནང་ཆོས་སྤྱི་བཤད་ལས་བརྩམས་པའི་བཀའ་ཆོས་བསྩལ། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ང་ཚོ་བཙན་བྱོལ་བར་གྱུར་ནས་དྷ་རམ་ས་ལར་གནས་གཞི་ཆགས་ཡོད། ས་ཆ་འདིར་རྒྱ་མི་གཙོ་བོར་གྱུར་བའི་ཆོས་དད་ཡོད་མཁན་དང་། སྔོན་མ་ནང་ཆོས་ལ་རྒྱུས་མེད་པའི་ནུབ་ཕྱོགས་པ་ཚོས་ཀྱང་དེང་སྐབས་དོ་སྣང་གསར་བ་ཞིག་བསླེབས་ཏེ་འདིར་འདུས་ཡོང་གི་ཡོད། ཆོས་ཉམས་ལེན་བྱེད་རྒྱུ་དེ་སྔོན་མ་ནས་ཤེས་མཁན་གཅིག་ཀྱང་མེད། ཆོས་ཀྱི་བསམ་བློ་གཏོང་སྟངས་ཀྱིས་སོ་སོའི་སེམས་ལ་ཞི་བདེ་བསླེབ་རྒྱུ་དང་། སེམས་ཀྱི་ཞི་བདེ་བརྒྱུད་ནས་ལུས་ཁམས་བདེ་བོ་ཡོང་བར་དོ་སྣང་བྱེད་མཁན་ཇེ་མང་དུ་འགྲོ་བཞིན་འདུག

དེང་སང་རྒྱ་ནག་ནང་ནང་ཆོས་ལ་དོ་སྣང་བྱེད་མཁན་མང་དུ་ཕྱིན་འདུག  ངོས་ནས་འདི་ལྟར་ལབ་ན་འདྲ་ཆགས་པོ་མེད་པ་མ་གཏོགས། ངོས་རང་ལ་དད་མོས་བྱེད་མཁན་ཇེ་མང་དུ་འགྲོ་བཞིན་འདུག གང་ལྟར་འཛམ་གླིང་སྟེང་དུ་ཆོས་ལུགས་མི་འདྲ་བ་མང་པོ་ཡོད་ཀྱང་། སྒོས་སུ་ནང་ཆོས་ཀྱི་སེམས་ཁམས་རིག་པ་གཙོ་བོ་བྱས་ཏེ་སེམས་ལ་ཞི་བདེ་བཟོ་བ་དང་། སེམས་ཀྱི་ཞི་བདེ་བསྐྲུན་པའི་རྒྱུ་མཚན་ཡང་དད་པ་དང་སྨོན་ལམ་རྒྱག་གི་མེད། སེམས་ཁམས་རིག་པའི་འགྲོ་སྟངས་ལ་དོ་སྣང་བྱས་པའི་ཐོག་ནས་དད་མོས་བྱེད་ཀྱི་ཡོད། ངོས་ཀྱི་ངོ་ཤེས་ཚན་རིག་པའི་ཁྲོད་ནས་ཀྱང་དམིགས་བསལ་དོ་སྣང་དང་དགའ་མོས་བྱེད་ཀྱི་འདུག སེམས་ཁམས་རིག་པའི་འགྲོ་སྟངས་ཐོག་ནང་པའི་གཞུང་ནས་གསུངས་ཡོད་པ་དང་། ང་ཚོས་ཉམས་ལེན་གང་ཐུབ་བྱས་པའི་སེམས་ཀྱི་ཞི་བདེའི་ལག་ལེན་ཐོག་དམིགས་བསལ་དོ་སྣང་བྱེད་བཞིན་འདུག སྔོན་མ་ནང་པ་སངས་རྒྱས་པའི་ཆོས་མ་དར་སའི་ལུང་པར་གཞི་ནས་ནང་ཆོས་ལ་དོ་སྣང་བྱེད་བཞིན་འདུག

ནང་པའི་ཆོས་ཞེས་པ་སྨོན་ལམ་བརྒྱབ་པ་གཅིག་པོ་མིན་པར་སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེ་བཟོ་བ་དང་། ཉོན་མོངས་ཀྱི་རིགས་ཆགས་སྡང་སོགས་སེམས་ཁམས་རིག་པའི་ཐོག་ནས་ཉུང་དུ་གཏོང་གི་ཡོད། སྤྱིར་འཛམ་གླིང་གི་ཆོས་ལུགས་ཚང་མ་ཡག་པོ་རེད། སྒོས་སུ་ནཱ་ལནྡྲའི་ཆོས་བརྒྱུད་ཀྱི་འགྲོ་སྟངས་དེ་སེམས་ཁམས་ལ་ཉམས་ཞིབ་བྱས་ཏེ། ང་རྒྱལ་དང་། ཕྲག་དོག ཞེ་སྡང་སོགས་གཉན་པོ་བརྟེན་པའི་ཐོག་ནས་ཤུགས་ཆུང་དུ་འགྲོ་བཞིན་ཡོད། དད་པ་གཅིག་པོ་མིན་པར་རྒྱུ་མཚན་གྱི་ཐོག་ཏུ་འགྲོ་རྒྱུ་གནད་འགག་ཆེན་པོ་རེད། ངོས་རང་ལ་ཚན་རིག་པ་ངོ་ཤེས་མང་པོ་ཐུག་གི་ཡོང་བཞིན་ཡོད། ཆོས་དོན་དུ་གཉེར་མཁན་དེ་འདྲ་གང་ཡང་མ་རེད། སེམས་ཁམས་རིག་པ་དང་འབྲེལ་བའི་སེམས་ཀྱི་ཞི་བདེའི་ཐོག་དམིགས་བསལ་དོ་སྣང་ཡོང་བསྡད་ཀྱི་འདུག སངས་རྒྱས་ཀྱི་ཆོས་དེ་སེམས་ཁམས་རིག་པ་དང་བསྟུན་ནས་འགྲོ་བཞིན་ཡོད་པས་དམིགས་བསལ་ཞིག་རེད། སེམས་ཁམས་རིག་པ་དང་བསྟུན་ནས་འགྲོ་དུས་ཚན་རིག་དང་མཐུན་པར་བཤད་ཐུབ་ཀྱི་ཡོད། ལམ་དང་འབྲས་བུའི་གནས་ལུགས་ཀྱི་ཡོན་ཏན་ལ་བསམ་བློ་བཏང་སྟེ། སངས་རྒྱས་བཅོམ་ལྡན་འདས་ཤེས་པའི་ཐོག་ནས་དད་པ་ཡོང་གི་ཡོད་པ་ཧ་ཅང་ཡག་པོ་རེད། ཅེས་གསུངས་སོང་།

༧མགོན་པོ་གང་ཉིད་མཆོག་ནས། དེང་སང་སངས་རྒྱས་ཀྱི་བསྟན་པ་ཉག་ཕྲ་བའི་དུས་ཤིག་ཡིན་ཡང་། དངོས་ཡོད་གནས་ཚུལ་ཐོག་བསམ་བློ་གཏོང་དུས་སངས་རྒྱས་ཀྱི་ཆོས་ལ་དམིགས་བསལ་དོ་སྣང་ཡོང་བཞིན་ཡོད། ང་ཚོས་ཆོས་ལ་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། དཀོན་མཆོག་མཁྱེན་ཟེར་བ་ཙམ་མིན་པར་སེམས་ཁམས་རིག་པ་དང་འབྲེལ་ནས་ཞེ་སྡང་སོགས་ཉུང་དུ་གཏོང་བ་དང་བྱམས་པ་སོགས་ཡར་རྒྱས་གཏོང་དགོས། དེ་ནི་སྐྱེ་བ་སྔ་ཕྱིའི་སྐད་ཆ་བཤད་ཀྱི་མེད། ཚེ་འདིར་ཆ་བཞག་ནའང་སེམས་ཁམས་རིག་པ་དང་འབྲེལ་ནས་ཡོད་དུས་སེམས་ཀྱི་ཞི་བདེ་ལ་ཕན་ཐོགས་ཡག་པོ་ཡོང་གི་ཡོད། ངོས་རང་འདིར་བཙན་བྱོལ་ཆགས་ཏེ་སྡོད་བཞིན་ཡོད། ནང་ཆོས་ཀྱི་འགྲོ་སྟངས་སྤྱི་དང་། སེམས་ཁམས་རིག་པའི་ཐོག་དོ་སྣང་བྱེད་མཁན་ཇེ་མང་ནས་ཇེ་མང་དུ་འགྲོ་བཞིན་འདུག

གང་ལྟར་ནང་པ་ཆགས་ཀྱང་མ་ཆགས་རུང་། སེམས་ཁམས་རིག་པ་ཤེས་པའི་ཐོག་སེམས་ཞི་ཞིང་དུལ་བ་ཞིག་བྱ་རྒྱུ་དེ་འཛམ་གླིང་སྤྱི་ལ་ཞབས་འདེགས་རེད། ཆོས་ཀྱི་སྐད་ཆ་མ་བཤད་པར་སེམས་ཀྱི་ཐོག་ནས་ཞི་བདེ་བསྒྲུབ་རྒྱུ་དེ་ཧ་ཅང་ཕན་ཐོགས་ཆེན་པོ་དང་གལ་ཆེན་པོ་རེད། སངས་རྒྱས་བཅོམ་ལྡན་འདས་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་རྗེས། སྔོན་ལ་འདུལ་བའི་འགྲོ་སྟངས་གསུངས་ཡོད་པ་དང་། དེ་ནས་ཤེར་ཕྱིན་གྱི་གཞུང་འཁོར་ལོ་བར་མའི་སྐབས་སུ་གསུངས་འདུག དེ་ཧ་ཅང་གཏིང་ཟབ་མོ་རེད། དེ་དེང་སང་ཚན་རིག་པ་དང་འབྲེལ་ནས་སེམས་ཁམས་རིག་པ་དང་ཀླད་པའི་འགྲོ་སྟངས་བསྡུར་བའི་བསམ་བློ་ཤུགས་ཆེན་པོ་འདུག ཅེས་གསུངས་སོང་།

ཡང་མགོན་པོ་གང་ཉིད་མཆོག་ནས། ངོས་རང་ལ་ཆ་བཞག་ན་ཞོགས་པ་ཡར་ལངས་པ་དང་། བྱང་ཆུབ་ཀྱི་སེམས་དང་སྟོང་ཉིད་ཀྱི་སྐོར་ལ་བསམ་བློ་ཉིན་ལྟར་གཏོང་བཞིན་ཡོད། སེམས་ཀྱི་ཞི་བདེ་བཟོ་བར་ཁྱད་པར་ཆེན་པོ་འདུག སྔོན་རྒྱ་གར་གྱི་མཁས་པའི་དབང་བོ་མཁན་ཆེན་ཞི་བ་འཚོ་ལྟ་བུ་བོད་དུ་ཕེབས་པ་དང་། དེ་བཞིན་བོད་ཀྱི་མཁས་པ་མང་པོ་རྒྱ་གར་དུ་ཕེབས་ཏེ་ནཱ་ལནྡྲ་ནས་སློབ་སྦྱོང་གནང་། སངས་རྒྱས་བཅོམ་ལྡན་འདས་ཀྱིས་རྒྱ་གར་དུ་ཆོས་ཀྱི་འཁོར་ལོ་བསྐོར་བའི་དོན་གྱི་སྙིང་བོ་ཆ་ཚང་བོད་ཀྱིས་བདག་པོ་བརྒྱབ་སྟེ་ཉམས་ལེན་བྱེད་བཞིན་ཡོད། བོད་རིགས་ཀྱི་ནང་ཆོས་འགྲོ་སྟངས་ལ་ཨེ་ཤ་ཡའི་ས་ཁུལ་ཙམ་མིན་པར་འཛམ་གླིང་གི་ས་ཁུལ་གང་སར་དོ་སྣང་གསར་བ་ཞིག་ཡོང་བཞིན་འདུག  སྐྱེ་བ་སྔ་ཕྱི་ཁས་ལེན་མིན་གང་ལྟར་ཡང་། ཚེ་འདིར་ཁོང་ཁྲོ་སོགས་ཉུང་དུ་གཏོང་བ་དང་། དེ་དག་ཉུང་དུ་ཕྱིན་པའི་དབང་གིས་སེམས་ལ་ཞི་བདེ་ཡོང་གི་ཡོད། དེའི་ཐོག་ནང་པའི་གཞུང་གི་དཔྱད་པ་བྱ་རྒྱུ་གལ་ཆེན་ཡིན་དུས། ཚན་རིག་པ་དང་འབྲེལ་ནས་སྐད་ཆ་བཤད་པ་གནས་ཚུལ་གསར་བ་ཞིག་ཆགས་ཡོད། སྐྱབས་སུ་མཆི་ཟེར་བ་ཙམ་མིན་པར་བོད་ལ་དཔལ་ནཱ་ལནྡྲ་ནས་བརྒྱུད་ཡོང་བའི་བསམ་བློའི་ཐོག་ནས་འགྲོ་སྟངས་ཡོད་པ་དེ་ཧ་ཅང་ཡག་པོ་རེད། རྒྱུ་མཚན་ལ་བསམ་བློ་བཏང་ནས་དཔྱད་པ་བྱས་པའི་འབྲས་བུས་སེམས་ཀྱི་ཞི་བདེ་བཟོ་ཡི་ཡོད། ཚན་རིག་པ་ཚོ་དང་མཉམ་དུ་བསམ་བློ་དེ་མཐུན་པོ་ཡོང་གི་འདུག ཅེས་གསུངས་སོང་།

དེ་བཞིན་དད་ལྡན་པ་ཁག་ཅིག་གིས་ཆོས་ཀྱི་སྙིང་པོ་དང་། བྱམས་བརྩེ། སྟོང་ཉིད་བཅས་ཀྱི་སྐོར་ལ་བཀའ་འདྲི་ཞུས་པར་༧གོང་ས་མཆོག་ནས། ཆོས་ཀྱི་སྙིང་པོ་ནི་སེམས་པ་བཟང་པོ་བྱ་རྒྱུ་དེ་རེད། ཀུན་ལ་ཕན་ཐོགས་པ་མ་གཏོགས་འཚེ་བ་བྱ་རྒྱུ་མེད། ཅེས་དང་། དཀའ་ངལ་ཆེན་པོ་འཕྲད་སར་ཆོས་ཕྱོགས་ཀྱི་བསམ་བློ་གཏོང་བའི་མཐུན་རྐྱེན་ཡོད་པ་ཞིག་རེད། ཆོས་ཀྱི་འབྲེལ་བ་མེད་ཚེ་གནས་ཚུལ་ཁ་ཁ་རེད། ཆོས་དང་འབྲེལ་ནས་བསམ་བློ་གཏོང་ཤེས་ན་དཀའ་ངལ་ཇི་ཙམ་འཕྲད་ཀྱང་། བྱམས་བརྩེའི་བློ་ཡིས་ཞེ་སྡང་སོགས་སེམས་འཁྲུག་པ་ཉུང་དུ་གཏོང་བར་གདོང་ལེན་བྱེད་ཐུབ། ཅེས་དང་། སེམས་འདུལ་བར་དད་པ་དང་ཤེས་རབ་གཉིས་ཀྱི་ཐོག་འདུལ་ཐབས་གཉིས་ཡོང་གི་ཡོད། ཤེས་རབ་ཀྱི་ཐོག་ནས་ཁོང་ཁྲོ་སོགས་མི་དགའ་བ་ཡོང་བའི་ཡུལ་དེ་དོན་དམ་གྱིས་མེད་བསམ་པའི་སྟོང་ཉིད་ཀྱི་བསམ་བློ་གཏོང་སྟངས་དེས་ཧ་ཅང་ཕན་ཐོགས་ཡོད། ངོས་རང་གིས་ཉིན་ལྟར་སྟོང་ཉིད་དང་བྱང་ཆུབ་ཀྱི་སེམས་ཐོག་བསམ་བློ་གཏོང་བཞིན་ཡོད། དངོས་ཡོད་གནས་ཚུལ་དང་ཁ་ཡོད་ལག་ཡོད་ཀྱི་ཐོག་ནས་ཕན་ཐོགས་འདུག ཅེས་གསུངས་སོང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།