བོད་རེབ་གོང་ནས་དགེ་འདུན་པ་བྱམས་པ་ཆོས་འཕེལ་ལགས་ཀྱིས་འདི་ལོའི་གསུམ་བཅུ་དུས་དྲན་སྐབས་སུ་སྐད་འཕྲིན་རྒྱབ་ངོས་སུ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་བརྒྱུད་འགོད་བྱས་པའི་ཉེས་མིང་འོག་ལོ་གཅིག་དང་ཕྱེད་ཀའི་བཙོན་འཇུག་ཁྲིམས་ཐག་བཅད་འདུག
འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན། གསུམ་བཅུ་དུས་དྲན་ཉིན་མོ་རྗེས་དྲན་གྱི་ཚུལ་དུ་གནས་ཚུལ་སྤེལ་བ་དང་འབྲེལ་ཏེ། འདི་ལོའི་ཕྱི་ཟླ་ ༣ པའི་ཟླ་དཀྱིལ་དུ་བོད་མདོ་སྨད་རེབ་གོང་ནས་ཡིན་པའི་དགེ་འདུན་པ་བྱམས་པ་ཆོས་འཕེལ་ལགས་རང་ཤག་ནས་འཛིན་བཟུང་བྱས་ཡོད་ཅིང་། ཕྱི་ལོ་ ༢༠༢༤ ཟླ་ ༣ ཚེས་ ༢༢ ཉིན་ནས་བཟུང་རེབ་གོང་སྨད་པའི་གུ་ར་ཐང་ན་ཡོད་པའི་རྒྱ་གཞུང་བཙོན་ཁང་དུ་བཀག་ཉར་བྱས་ཡོད་པ་དང་། འདི་ལོའི་ཕྱི་ཟླ་བརྒྱད་པའི་ནང་དུ་བཀག་ཉར་དུས་ཡུན་དང་བསྡོམས་ནས་ལོ་གཅིག་ཕྱེད་ཀའི་བཙོན་འཇུག་ཉེས་འགེལ་བྱས་འདུག
གནས་ཚུལ་མཁོ་སྤྲོད་པས། ཟླ་འདིའི་ཕྱི་ཚེས་ ༢༢ ཉིན་ནས་བཟུང་། རྒྱ་གཞུང་གིས་དགེ་འདུན་པ་བྱམས་པ་ཆོས་འཕེལ་ལགས་ཟི་ལིང་གྲོང་ཁྱེར་དུ་ཡོད་པའི་མཚོ་སྔོན་ཞིང་ཆེན་གྱི་བཙོན་ཁང་ཞིག་ཏུ་གནས་སྤར་ཏེ་ལོ་གཅིག་རིང་བཙོན་འཇུག་ཁྲིམས་ཆད་ཁུར་ནས་སྡོད་དགོས་ཀྱི་ཡོད་ཅིང་། ཁོང་ས་གནས་རེབ་གོང་གྲོང་ཁྱེར་(同仁市)རྒྱ་གཞུང་གི་ཉེན་རྟོག་ལས་ཁུངས་ཀྱིས་འཛིན་བཟུང་བཀག་ཉར་བྱས་ཏེ། རེབ་གོང་གྲོང་ཁྱེར་མི་དམངས་ཞིབ་དཔྱོད་ཁང་གིས་ཁྲིམས་ཆད་ཉེས་འགེལ་བྱས་པ་དང་། རེབ་གོང་གྲོང་ཁྱེར་མི་དམངས་ཁྲིམས་ཁང་གིས་ཁྲིམས་ཐག་བཅད་པ་སོགས་འགྲོ་ལུགས་གང་གི་སྐབས་སུའང་། དགེ་འདུན་པ་བྱམས་པ་ཆོས་འཕེལ་ལགས་ཀྱི་ནང་མི་ཉེ་འབྲེལ་ལ་བརྡ་ལན་ཅི་ཡང་སྤྲད་མེད་པ་མ་ཟད། ཁོང་གི་ཤ་ཉེ་སྤུན་མཆེད་རྣམས་ལ་ཉེས་ཆད་གཅོད་སྲིད་པའི་འཇིགས་སྐུལ་བྱས་ཡོད་པ་དང་། འབྲེལ་ཡོད་ལས་ཁུངས་སུ་བཅར་ཏེ་ཁོང་གི་གནས་སྟངས་གང་ཡིན་འདྲི་རྒྱུ་དེའང་ཉེན་ཁ་ཚབས་ཆེན་ཏུ་གྱུར་ཡོད་པ་འགྲེལ་བརྗོད་གནང་བྱུང་།
གནས་ཚུལ་མཁོ་སྤྲོད་པས་འགྲེལ་བརྗོད་གནང་བ་ལྟར་ན། ཕྱི་ལོ་ ༢༠༢༤ ལོའི་ཟླ་ ༣ པའི་ཚེས་ ༡༠ ཉིན་དགེ་འདུན་པ་བྱམས་པ་ཆོས་འཕེལ་ལགས་ཀྱིས་སྐད་འཕྲིན་རྒྱབ་ངོས་སུ་༧གོང་ས་མཆོག་གི་བཀའ་སློབ་ཚན་པ་ཞིག་བརྒྱུད་འགོད་བྱས་པ་དེ་ཁྲིམས་འགལ་ཡིན་པར་བསྙད་ནས་འཛིན་བཟུང་བྱས་ཡོད་པ་དང་། རྒྱ་གཞུང་གིས་དེ་སྔ་ནས་འཆར་ཅན་ཁོང་ལ་དོགས་ཟོན་ནན་མོ་བྱེད་བཞིན་ཡོད་པ་མ་ཟད། བོད་ཀྱི་དུས་ཆེན་གང་ཞིག་སླེབས་པའི་ཚེ། ཁོང་གི་བཞུགས་ཤག་གི་ཀླད་དང་གྱང་ཁ་སོགས་ནས་གསང་ཉུལ་དང་སོ་ལྟ་བྱེད་བཞིན་ཡོད་འདུག
དགེ་འདུན་པ་བྱམས་པ་ཆོས་འཕེལ་ལགས་ནི་ཕྱི་ལོ་ ༡༩༨༦ ལོར་རྒྱ་གར་དུ་བཙན་བྱོལ་ལ་འབྱོར་རྗེས། དྷ་རམ་ས་ལའི་མཚན་ཉིད་གྲྭ་ཚང་དུ་ལོ་བཅུའི་རིང་སློབ་གཉེར་བྱས་ཏེ་ཕར་ཕྱིན་གྲུབ་པ་དང་། ཕྱི་ལོ་ ༡༩༩༦ ལོར་བོད་ལ་ཕྱིར་ལོག་འདུག དུས་རྒྱུན་རེབ་གོང་སྨད་པའི་སྤེན་དཀར་ཐང་དགོན་པར་མཚམས་བསྙེན་སྒྲུབ་དང་ཉམས་ལེན་ལ་འབད་བཞིན་ཡོད་ཅིང་། སྐབས་རེར་གནས་ཆེན་ཁག་ཏུ་ཉམས་ལེན་གནང་གིན་ཡོད་འདུག ཁོང་ནི་བོད་ཀྱི་ཡིག་གཟུགས་ལེགས་བྲིས་ལ་མཁས་པ་དང་དབྱིན་ཡིག་མཁྱེན་གྱི་ཡོད་པས། དོན་གཉེར་ཅན་རྣམས་ལ་ཡིག་གཟུགས་དང་དབྱིན་ཡིག་སློབ་ཁྲིད་གནང་བཞིན་ཡོད་འདུག
