དེ་རིང་ཧྥ་རན་སི་བོད་རིགས་ཚོགས་པ་དྲུག་གིས་ཧྥ་རན་སིའི་བྷེ་རན་ལི་འགྲེམས་སྟོན་ཁང་གི་ངོས་ནས་བོད་ཅེས་པའི་ཚབ་ཏུ་རྒྱ་ནག་གི་ཐ་སྙད་བེད་སྤྱོད་བྱས་པར་དགོངས་སེལ་དང་སྦྲགས་གང་མགྱོགས་ལེགས་བཅོས་བྱ་རྒྱུའི་ཁས་ལེན་གནང་ཡོད་སྐོར་བརྗོད་འདུག
ཁ་སང་ཕྱི་ཚེས་ ༢༥ ཉིན་གྱི་ཕྱི་དྲོའི་ཆུ་ཚོད་ ༢ པའི་སྟེང་ཧྥ་རན་སིའི་རྒྱལ་ས་པེ་རི་སི་རུ་རྟེན་གཞི་བྱས་པའི་བྷེ་རན་ལི་ (Branly) འགྲེམས་སྟོན་ཁང་གི་རྒྱལ་སྤྱིའི་གནད་དོན་སློབ་སྟོན་པ་ཁི་ལེ་མེན་ཊི་ (Clément Tougeron) ལགས་ཀྱིས་ཧྥ་རན་སིར་གནས་འཁོད་བོད་ཀྱི་ཚོགས་པ་ཁག་དྲུག་གི་སྐུ་ཚབ་འགྲེམས་སྟོན་ཁང་དུ་སྣེ་ལེན་གྱིས་བོད་ཅེས་པའི་ཚབ་ཏུ་རྒྱ་ནག་གི་ཐ་སྙད་ཞི་ཙང་བེད་སྤྱོད་བྱས་པའི་གནད་དོན་དང་འབྲེལ་ནས་གལ་ཆེན་ཚོགས་འདུ་ཞིག་འཚོགས་ཡོད་འདུག
ཚོགས་འདུའི་ཐོག་འགྲེམས་སྟོན་ཁང་གི་སྐུ་ཚབ་ཁི་ལེ་མེན་ཊི་ལགས་དང་བོད་རིགས་ཚོགས་པའི་ཚོགས་གཙོ་པདྨ་རིན་ཆེན་མཆོག་གིས་སྣེ་འཁྲིད་པའི་ཧྥ་རན་སིར་གནད་འཁོད་ཚོགས་པ་ཁག་དྲུག་གི་སྐུ་ཚབ། དེ་བཞིན་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས། ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས། པེ་རི་སི་འབྲེལ་མཐུད་ལས་ཁུངས་ཀྱི་དྲུང་ཆེ་ཐུབ་བསྟན་ཚེ་རིང་ལགས་དང་ལས་བྱེད་འཇིགས་མེད་ལགས་བཅས་མཉམ་ཞུགས་གནང་འདུག
དེ་རིང་ཕྱི་ཚེས ༢༦ ཉིན་ཧྥ་རན་སི་བོད་རིགས་ཚོགས་པས་གསར་འགོད་བསྒྲགས་གཏམ་སྤེལ་བའི་ནང་། བྷེ་རན་ལི་འགྲེམས་སྟོན་ཁང་གི་སྐུ་ཚབ་ཁེ་ལི་མེན་ཊི་ལགས་ཀྱིས། འགྲེམས་སྟོན་ཁང་གི་ངོས་ནས་ད་ལྟའི་གནས་བབ་ཐད་ཁ་ཞེ་གཉིས་མེད་ཐོག་དགོངས་སེལ་ཞུ་བ་དང་། དེ་སྔ་ནོར་འཁྲུལ་གང་ཤོར་བ་རྣམས་ལ་ངོས་ལེན་བྱས་ཏེ་འགྲེམས་སྟོན་ཁང་ནང་གི་བོད་དང་འབྲེལ་བའི་དཀར་ཆག་དང་ནང་གསེས་དབྱེ་བ་གང་ཡོད་ལ་བོད་ཅེས་པའི་ཐ་སྙད་སྔར་ལྟར་འཇོག་རྒྱུའི་ཁས་ལེན་གནང་ཞིང་། བོད་ཅེས་པའི་ཐ་སྙད་ཀྱི་ཚབ་ཏུ་རྒྱ་ཡིག་ཞི་ཙང་བེད་སྤྱོད་བྱས་པའི་གནད་དོན་འདི་ཆབ་སྲིད་ཀྱི་ཚོར་བ་སྐྱེན་པོ་ཞིག་ཡིན་པ་ངོས་འཛིན་གསལ་པོ་བྱུང་ཡོད་སྐོར་དང་། གང་མགྱོགས་ནོར་འཁྲུལ་དེ་ལེགས་བཅོས་བྱ་རྒྱུའི་ཞལ་བཞེས་གནང་ནས་གཟའ་འཁོར་གསུམ་གྱི་ནང་ཚུད་དུ་འགྲེམས་སྟོན་ཁང་ནང་གཟིགས་མོ་བ་ཕེབས་མཁན་ཚོའི་སྤྱན་ལམ་དུ་བོད་ཅེས་པའི་མིང་འདི་ཁྲ་ལམ་མེར་མཇལ་རྒྱུ་ཡོད་ཞིག་བཟོ་རྒྱུ་ཡིན་ཟེར། གཞན་ཡང་། འགྲེམས་སྟོན་ཁང་གི་ངོས་ནས་མུ་མཐུད་དུ་བོད་མིའི་སྒྲིག་འཛུགས་དང་ལྷན་དུ་གླེང་སློང་བྱ་རྒྱུའི་ཆོད་སེམས་ཡོད་ལུགས་དང་། མ་འོངས་པར་བོད་དང་འབྲེལ་བའི་གནད་དོན་ཐོག་ལ་གུས་བརྩི་དང་ཁ་དན་ཚིག་ལ་གནས་པའི་ཐོག་ནས་གླེང་མོལ་རབ་དང་རིམ་པ་བྱ་རྒྱུའི་ཁས་ལེན་གནང་ཡོད་སྐོར་གསལ་བ་དང་། བོད་པའི་ཚོགས་པ་ཁག་དྲུག་ཐུན་མོང་ནས་གྷུའི་མེ་ཟི་ (Guimet) འགྲེམས་སྟོན་ཁང་གིས་བོད་ཀྱི་ཚབ་ཏུ་ཧི་མ་ལ་ཡའི་འཇིག་རྟེན་ཞེས་མིང་བསྒྱུར་བྱས་ཡོད་པར་བཟང་ཕྱོགས་ཀྱི་ཡ་ལན་ཞིག་མ་སྤྲད་བར་དུ་ཞི་བའི་ཞུ་གཏུག་གི་ལས་འགུལ་སྤེལ་རྒྱུའི་ཐག་གཅོད་གནང་ཡོད་སྐོར་སོགས་གསལ་འདུག
གསར་འགོད་པ། བསྟན་འཛིན་ཕུར་བུ།
