རྒྱ་ནག་གིས་རིག་དངོས་ཞིབ་འཇུག་ལམ་ནས་བོད་རྒྱ་ཁོངས་སུ་འཇུག་ཐབས་བྱེད་བཞིན་འདུག

བོད་གཞིས་ཀ་རྩེ་ཁུལ་དུ་བོད་ཀྱི་གནའ་བོའི་རིག་གནས་ཀྱི་རྗེས་ཤུལ་སོགས་སྤོ་མི་རུང་བའི་རིག་དངོས་ ༣༠༡ གསར་དུ་རྙེད་ཡོད་ཟེར།

ཉེ་ལམ་རྒྱ་ནག་གཞུང་འབྲེལ་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གི་གནའ་དངོས་ཤུལ་རྫས་དཔྱད་རིག་པ་ཁག་ཅིག་ལ་བོད་ཀྱི་གཞིས་ཀ་རྩེ་ཁུལ་དུ་གནའ་བོའི་རིག་གནས་ཀྱི་རྗེས་ཤུལ་དང་། གནའ་བོའི་བང་སོ། གནའ་བོའི་སྐྲུན་དངོས། བྲག་ཕུག་དང་རྡོ་བརྐོས། ཉེ་རབས་དང་དེང་རབས་ཀྱི་ལོ་རྒྱུས་རྗེས་ཤུལ་གལ་ཆེན་སོགས་སྤོ་མི་རུང་བའི་རིག་དངོས་ཁག་ ༣༠༡ གསར་དུ་རྙེད་སོན་བྱུང་ཡོད་འདུག

འདི་གའི་གསར་འགོད་པས་བོད་ཀྱི་ཁོར་ཡུག་ཉམས་ཞིབ་པ་ཞིག་ལ་བཀའ་འདྲི་ཞུས་སྐབས། རྒྱ་ནག་གིས་བོད་ནང་དུ་རྟོག་ཞིབ་བྱས་པ་བརྒྱུད། བོད་ཀྱི་གཏེར་རིགས་དང་དངོས་རྫས་རིགས་ལ་དོ་སྣང་ཤུགས་ཆེན་བྱེད་བཞིན་ཡོད་པ་དང་། ཉེ་ཆར་བོད་ཀྱི་ཁམས་ཁུལ་དུ་གཏེར་ཁ་གསར་པ་རྙེད་པའི་གནས་ཚུལ་ཁྱབ་སྤེལ་ཤུགས་ཆེན་འགྲོ་བཞིན་འདུག་ལ། དོན་དངོས་སུ་བོད་ནང་དུ་གཏེར་ཁ་སྔོག་འདོན་ཤུགས་ཆེ་རུ་འགྲོ་མུས་ཡིན་པ་མ་ཟད། ཟངས་དང་ (Lithium) སོགས་མང་པོ་ཞིག་རྙེད་ཡོད་སྐོར་སོགས་བརྗོད་བྱུང་།

དེ་འབྲེལ་བོད་གནས་བསྐྱར་ཞིབ་དྲ་ཚིགས་སུ་སྤེལ་བའི་གནས་ཚུལ་་ནང་། རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་ཁུལ་དུ་གནའ་དངོས་ཤུལ་རྫས་དཔྱད་རིག་པ་ཁག་ཅིག་ལ་རིག་དངོས་རྙེད་པ་རྣམས་རྒྱ་ནག་རྒྱལ་རྒྱུད་ཀྱི་ཁོངས་སུ་ཡོད་པར་རྫུན་བཟོ་བྱས་ཡོད་པ་མ་ཟད། གནས་ཚུལ་འཁྱོག་བཤད་ཁྱབ་སྤེལ་གྱིས་གནའ་སྔ་མོ་ནས་བོད་དང་ཤར་ཊུར་ཀི་སི་ཐན་གཉིས་རྒྱ་ནག་གི་དབང་སྒྱུར་འོག་ཡོད་ཚུལ་ཁུངས་སྐྱེལ་བྱེད་ཀྱི་ཡོད་སྐོར་སོགས་གསལ་འདུག

རྒྱ་ནག་གི་གཞུང་འབྲེལ་དྲ་རྒྱའི་སྟེང་། བོད་རང་སྐྱོང་ལྗོངས་ཀྱི་རྒྱལ་ཡོངས་རིག་དངོས་ཞིབ་བཤེར་ལས་དོན་ཐེངས་བཞི་པའི་དུས་མཚམས་གཉིས་པའི་ལས་དོན་དང་འབྲེལ་ནས་འདས་པའི་ཟླ་ཁ་ཤས་རིང་གཞིས་རྩེའི་རྫོང་དང་རྫོང་ཁག་ ༡༨ ནང་རིག་དངོས་སྔོག་བཤེར་བྱས་ཡོད་སྐོར་སོགས་གསལ་བ་ལས། རྒྱ་ནག་གི་གནའ་རྫས་དཔྱད་རིག་པས་རིག་དངོས་ག་རེ་རྙེད་སོན་བྱུང་ཡོད་མེད་སོགས་གསལ་ཁ་གང་ཡང་མེད་འདུག

གཞིས་རྩེ་རིག་གནས་དང་ཡུལ་སྐོར་ལས་ཁུངས་ཀྱི་རིག་དངོས་སྲུང་སྐྱོབ་དང་གནའ་རྫས་རྟོག་ཞིབ་ཞིབ་འཇུག་ལྟེ་གནས་ཀྱི་འགན་འཛིན་གཞོན་པ་ཕུན་ཚོགས་དར་རྒྱས་ཀྱིས། གཞིས་ཀ་རྩེའི་རིག་གནས་ཀྱི་ནང་དོན་གཏིང་ཟབ་པ་དང་། སྤོ་མི་རུང་བའི་རིག་དངོས་ཐོན་ཁུངས་ཕུན་སུམ་ཚོགས་ཤིང་། རིག་དངོས་རིགས་སྣ་ཚོགས་ཡོད་པའི་ཐོག ཐེངས་འདིའི་ཞིབ་བཤེར་ལས་དོན་ལས་གཞི་རིམ་གྱི་རིག་དངོས་གྲངས་འབོར་དང་ཉར་ཚགས་གནས་ཚུལ་སོགས་ཤེས་རྟོགས་བྱུང་ཡོད་ཚུལ་སོགས་བརྗོད་འདུག

གཞིས་ཀ་རྩེ་རིག་གནས་དང་ཡུལ་སྐོར་ལས་ཁུངས་ཀྱི་ཡིག་ཆ་ཞིག་ལ་ལུང་འདྲེན་བྱས་ཡོད་པའི་ནང་། ད་བར་གཞིས་རྩེ་གྲོང་ཁྱེར་གྱིས་རིག་དངོས་ས་ཚིགས་ ༡༠༨༨ ལ་ཞིབ་བཤེར་དང་དེ་འབྲེལ་ཡིག་ཆ་ཁག་བསྡུ་རུབ་བྱས་ཡོད་ཚུལ་སོགས་བསྒྲགས་འདུག་ལ། ད་ལྟ་བོད་རང་སྐྱོང་ལྗོངས་ཟེར་བའི་ནང་རྒྱུན་སྐྱོང་བཞིན་པའི་རིག་གཞུང་གི་དངོས་རྫས་ཐོ་འགོད་ཞིབ་བཤེར་ཐེངས་གསུམ་པའི་སྐབས་སུ་ངོས་འཛིན་དང་ཐོ་འགོད་བྱས་པའི་སྤོ་མི་རུང་བའི་རིག་དངོས་ ༤༢༧༧ ལ་བསྐྱར་ཞིབ་ཆ་ཚང་བ་བྱ་རྒྱུ་ཡིན་འདུག

གསར་འགོད་པ། བསྟན་འཛིན་ཕུར་བུ།