༧གོང་ས་མཆོག་གིས་ཇཱ་མུ་ཀ་ཤི་མུར་གྱི་སྤྱི་ཁྱབ་བློན་ཆེན་ལ་འཚམས་འདྲི་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་ཇཱ་མུ་ཀཱ་ཤི་མཱར་གྱི་དབུས་འཛིན་སྐྱོང་མངའ་ཁུལ་གྱི་སྤྱི་ཁྱབ་བློན་ཆེན་ཨོ་མཱར་ཨབ་དྷུལ་ལཱ་ཧ་ལགས་སུ་འཚམས་འཕྲིན་མཛད།

His Holiness the Dalai Lama with Chief Minister of Jammu and Kashmir Omar Abdullah on July 12, 2012. Photo by Tenzin Choejor

ཁ་སང་ཕྱི་ཚེས་ ༡༦ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་གསར་དུ་བདམས་ཐོན་བྱུང་བའི་རྒྱ་གར་གྱི་ཇཱ་མུ་ཀ་ཤི་མུར་དབུས་འཛིན་སྐྱོང་མངའ་ཁུལ་གྱི་སྤྱི་ཁྱབ་བློན་ཆེན་ཨོ་མཱར་ཨབ་དྷུལ་ལཱ་ཧ་(Omar Abdullah ) ལགས་སུ་འཚམས་འདྲིའི་གསུང་འཕྲིན་བསྩལ་ཏེ། ཁོང་གི་ཁྱིམ་རྒྱུད་ཀྱི་མི་རབས་གསུམ་བར་གྲོགས་པོའི་མཛའ་བརྩེ་ཧ་ཅང་གཙིགས་ཆེན་འཛིན་གྱི་ཡོད་སྐོར་གསུངས་འདུག

༧གོང་ས་རྒྱལ་བ་རིན་པོ་ཆེ་མཆོག་གི་འཚམས་འདྲིའི་གསུང་འཕྲིན་ནང་། ངོས་ཀྱིས་སྐུ་ཞབས་ཤེ་ཁ་ཨབ་བྷུལ་ཧ་ནས་རྩིས་པའི་ཁྱེད་ཀྱི་མི་རབས་གསུམ་གྱི་ཁྱིམ་རྒྱུད་སྐོར་ཧ་ཅང་གསལ་བོ་ངོ་ཤེས་ཀྱི་ཡོད་པ་མ་ཟད། ངོས་ཀྱིས་ང་ཚོའི་གྲོགས་པོའི་མཛའ་འབྲེལ་ཧ་ཅང་གཙིགས་ཆེན་དུ་འཛིན་གྱི་ཡོད། ཅེས་གསུངས།

༧མགོན་པོ་གང་ཉིད་མཆོག་ནས། སྐུ་ཞབས་ཨོ་མཱར་ཨབ་དྷུལ་ལཱ་ཧ་ལགས་ཀྱིས་མ་འོངས་གདོང་ལེན་གནང་དགོས་ཀྱི་རིགས་དང་གོ་སྐབས་སོགས་དམ་འཛིན་གྱིས་ཇཱ་མུ་ཀ་ཤི་མུར་གྱི་མི་མང་གི་མངོན་འདོད་ལེགས་འགྲུབ་ཡོང་བའི་ཐུགས་སྨོན་མཛད་འདུག

ཨོ་མཱར་ཨབ་དྷུལ་ལཱ་ཧ་ལགས་ནི་ཕྱི་ལོ་ ༡༩༧༠ ལོར་དབྱིན་ཡུལ་གྱི་རོ་ཆི་ཧྥོར་ཌི་སྐྱེས་ཡོད་ཅིང་། རྒྱ་གར་ཤཱི་རི་ན་གྷར་དང་ཧི་མ་ཅལ་མངའ་སྡེའི་ནང་གཞི་རིམ་གྱི་སློབ་སྦྱོང་བྱས། མ་ཧཱ་རཱ་ཤི་ཌ་མངའ་སྡེའི་མུམ་བྷི་གྲོང་ཁྱེར་གྱི་སིན་ཌིན་ཧཱམ་མཐོ་སློབ་དུ་ཚོང་ལས་རིག་པའི་ཐོག་བསླབ་པ་མཐར་སོན། སི་ཁོ་ཌི་ལན་རྒྱལ་ཁབ་ཀྱི་སི་ཌི་ཐ་ཁི་ལེ་ཌི་གཙུག་ལག་སློབ་གཉེར་ཁང་དུ་ཚོང་ལས་གཙུག་ལག་རབ་འབྱམས་པའི་ཐོག་སློབ་གཉེར་བྱས་ཡོད་པ་དང་། ཕྱི་ལོ་ ༡༩༩༨ ལོར་ཁོང་དགུང་ལོ་ ༢༨ ཐོག་རྒྱ་གར་གྲོས་ཚོགས་འོག་མའི་སྐབས་ ༡༢ པའི་འཐུས་མི་རུ་བདམས་ཐོན་བྱུང་སྟེ་ཡུལ་སྐོར་དང་གནས་སྤོ་ཚན་པ་རུ་ཕྱག་ལས་གནང་། ཕྱི་ལོ་ ༡༩༩༩ ལོའི་ཟླ་ ༡༠ པར་རྒྱ་གར་གྲོས་ཚོགས་འོག་མའི་སྐབས་ ༡༣ པའི་འཐུས་མི་རུ་བསྐྱར་དུ་བདམས་ཏེ། ཚོང་ལས་དང་འཛུགས་སྐྲུན་ཚན་པ་རུ་ཕྱག་ལས་གནང་། ཕྱི་ལོ་ ༢༠༠༡ ལོར་ཁོང་ནི་རྒྱ་གར་དབུས་ཕྱི་སྲིད་བློན་ཆེན་ལས་ཁུངས་ཀྱི་ཆེས་གཞོན་པའི་མི་སྣ་རུ་གྱུར། ཕྱི་ལོ་ ༢༠༠༢ ལོར་རྒྱ་གར་གྱི་ཇཱ་མུར་ཀ་ཤི་མར་གྱི་རྒྱལ་ཡོངས་གྲོས་གླེང་སྲིད་དོན་ཚོགས་པའི་ཚོགས་གཙོ་རུ་བདམས་ཡོད་ཅིང་། ཕྱི་ལོ་ ༢༠༠༦ ལོར་ཐེངས་གཉིས་པར་རྒྱལ་ཡོངས་གྲོས་གླེང་སྲིད་དོན་ཚོགས་པའི་ཚོགས་གཙོ་རུ་བསྐྱར་བདམས་བྱས་འདུག ལོ་དེར་ཁོང་གིས་པ་ཀི་སི་ཐན་གྱི་སྲིད་འཛིན་པེར་ཝེ་ཛི་མུ་ཤར་རཱ་ཧྥི་དང་མཉམ་དུ་ས་མཚམས་ཀྱི་རྙོག་གླེང་སྐོར་ལ་གྲོས་མོལ་བྱས། ཕྱི་ལོ་ ༢༠༡༨ ལོར་ཇཱ་མུ་ཀ་ཤི་མུར་གྱི་ས་གནས་གྲོས་ཚོགས་སུ་ཕྱག་ལས་གནང་འདུག ཕྱི་ལོ་ ༢༠༢༠ ལོ་ནས་ས་གནས་ཀྱི་སྲིད་དོན་ཚོགས་པའི་མགོ་ཁྲིད་བྱས་ཡོད་པ་མ་ཟད། ཕྱི་ལོ་ ༢༠༢༤ ཟླ་ ༡༠ ཚེས་ ༡༦ ཉིན་ནས་ཇཱ་མུ་ཀ་ཤི་མུར་དབུས་འཛིན་མངའ་ཁུལ་གྱི་ཐོག་དང་པོའི་སྤྱི་ཁྱབ་བློན་ཆེན་གྱི་ལས་འཁུར་དམ་འབུལ་ཞུས་འདུག

གསར་འགོད་པ། བྱམས་པ་ཚེ་རིང་།