ཚ་རུ་མ་སྡེ་བའི་རྡོ་བྱེ་སྔོག་འདོན་དང་འབྲེལ་རྒྱ་ནག་གིས་མཚོ་སྔོན་ཚེ་རིང་ལགས་འབོད་འགུག་བྱས་ཏེ་འདྲི་རྩད་བྱས་པ་མ་ཟད། ཁོང་གི་སྐད་འཕྲིན་སོགས་སྤྱི་ཚོགས་བརྒྱུད་ལམ་ཚང་མ་བཀག་སྡོམ་བྱས་ཡོད་འདུག
འདི་གའི་གསར་འགོད་པར་ཚ་རུ་མ་སྡེ་བའི་བྱེ་རྡོ་སྔོག་འདོན་དང་འབྲེལ་མཚོ་སྔོན་ཚེ་རིང་ལགས་ཀྱི་གནས་སྟངས་ཇི་ཆགས་སྐོར་ལ་འབྲེལ་ཡོད་ཅིག་གིས། ཟླ་འདིའི་ཕྱི་ཚེས་ ༢༢ ཉིན་མཚོ་སྔོན་ཚེ་རིང་ལགས་འབྲེལ་ཡོད་རྒྱ་གཞུང་ལས་བྱེད་པས་འབོད་འགུག་བྱས་ཏེ་འདྲི་རྩད་བྱས་ཡོད་པ་དང་། ད་ལྟའི་ཆར་ཚེ་རིང་ལགས་ཀྱི་སྤྱི་ཚོགས་བརྒྱུད་ལམ་ཡོངས་རྫོགས་བཀག་སྡོམ་བྱས་ཡོད་པ་མ་ཟད། ཁོང་གི་གནས་སྟངས་ཇི་ཆགས་སྐོར་གསལ་ཁ་མེད་ཅིང་། ཚ་རུ་མ་སྡེ་བའི་བྱེ་རྡོ་སྔོག་འདོན་བྱེད་མཁན་ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་ (安徽先河建筑工程又很公司) གིས་རྔ་བ་ཁུལ་རིམ་པའི་ལས་འཆར་ཁྲོད་ལམ་བཟོའི་མིང་འོག་ནས་བྱེ་རྡོའི་གཏེར་ཁ་སྔོན་འདོན་བྱེད་བཞིན་ཡོད་སྟབས། ཚ་རུ་མ་སྡེ་བའི་ཞུ་གཏུགས་ལ་གྲུབ་འབྲས་གང་ཡང་ཐོན་མེད་སྐོར་བརྗོད་བྱུང་།
ཟླ་འདིའི་ཕྱི་ཚེས་ ༡༥ ཉིན་སི་ཁྲོན་ཞིང་ཆེན་རྔ་བ་ཁུལ་ཁྱུང་མཆུ་རྫོང་གི་ཚ་རུ་མའི་སྡེ་མི་ན་གཞོན་མཚོ་སྔོན་ཚེ་རིང་ལགས་ཀྱིས། རྒྱ་ནག་གི་སྤྱི་ཚོགས་བརྒྱུད་ལམ་ (Kuaishou) སྟེང་སྐར་མ་ལྔ་ཟིན་ལ་ཉེ་བ་ཙམ་གྱི་བརྙན་ཐུང་ཞིག་སྤེལ་ཏེ། ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་ 安徽先河建筑工程又很公司གིས། ཚ་རུ་མ་སྡེ་བའི་གཞུང་ལམ་གསར་བཟོའི་སྐབས་སུ་ཁྲིམས་འགལ་གྱི་བྱ་སྤྱོད་ཐོག་ཆུ་འགྲམ་སྔོག་འདོན་བྱས་ཏེ་རྡོ་བྱེ་དབོར་འདྲེན་བྱས་ཡོད་པ་ཞུ་གཏུགས་བྱས་ཡོད་ལ། ཚ་རུ་མ་སྡེ་བའི་རྡང་ཆུ་གཙང་པོའི་ཁུལ་སྔོག་འདོན་བྱས་པར་བལྟས་ན། རྒྱ་ནག་གིས་ཁུལ་དེར་རྡོ་བྱེ་ཙམ་མིན་པར་གཏེར་ཁ་གཞན་རིགས་སྔོག་འདོན་བྱེད་བཞིན་ཡོད་སྲིད་སྐོར་ཉམས་ཞིབ་པས་བརྗོད་བྱུང་།
གསར་འགོད་པས་ཤེས་རྟོགས་བྱུང་བའི་གནས་ཚུལ་ལྟར་ན། ཕྱི་ལོ ༢༠༢༣ ཟླ ༥ ནས་བཟུང་ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་ 安徽先河建筑工程又很公司གིས། སི་ཁྲོན་ཞིང་ཆེན་རྔ་བ་ཁུལ་ཁྱུང་མཆུ་རྫོང་གི་ཚ་རུ་མ་སྡེ་བའི་གཞུང་ལམ་གསར་བཟོའི་སྐབས་སུ། ཁྲིམས་འགལ་གྱིས་ལམ་འགྲམ་གྱི་ཆུ་གཞུང་སྔོག་འདོན་བྱས་ཏེ་རྡོ་བྱེ་དབོར་འདྲེན་བྱས་ཡོད་སྟབས། དེས་ཡུལ་དངོས་སྐྱེ་ཁམས་ཁོར་ཡུག་ལ་གནོད་སྐྱོན་ཚབས་ཆེན་ཐེབས་ཡོད་པ་མ་ཟད། རྡོ་བྱེ་ཤུགས་ཆེན་སྔོག་འདོན་བྱས་རྐྱེན་ཉེ་འཁོར་གྱི་རྒྱུགས་ཆུར་གནོད་སྐྱོན་དང་ཡུལ་མིའི་སྡོད་གནས་ལ་ཉེན་ཁ་བཟོས་ཡོད་འདུག
ད་ལྟའི་ཆར་ཚ་རུ་མ་སྡེ་བའི་ཁོར་ཡུག་འབག་བརྩོག་བཟོས་པའི་ཤུགས་རྐྱེན་དེ། སྡེ་བ་དེའི་སྐྱེ་ཁམས་ཁོར་ཡུག་དང་མ་འོངས་པའི་མི་རབས་ཚོའི་འཚོ་གནས་ལ་ཐད་ཀར་འབྲེལ་བ་ཡོད་སྟབས། སྡེ་བའི་ཡུལ་མི་ཚོས། འབྲེལ་ཡོད་ས་གནས་དང་ཁུལ་སྲིད་གཞུང་སོགས་ནས་ཐག་གཅོད་ཡག་པོ་ཞིག་ཡོང་བར་ངང་སྒུག་བྱེད་བཞིན་ཡོད་ཀྱང་། ད་ལྟའི་ཆར་གཞུང་ཕྱོགས་ནས་བརྡ་ལན་གང་ཡང་སྤྲད་མེད་ཅིང་། དམིགས་བསལ་ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་ནི་གཞུང་འབྲེལ་གྱི་ལས་དོན་གཉེར་མཁན་ཞིག་ཡིན་པས། རྒྱ་ནག་དབུས་ནས་ཐག་གཅོད་ཅིག་མ་བླངས་ཚེ་གྲུབ་འབྲས་ཐོན་ཁག་པོ་ཡིན་སྐོར་འབྲེལ་ཡོད་ཅིག་གིས་བརྗོད་བྱུང་།
འདས་ལོར་ཚ་རུ་མ་སྡེ་བའི་རྡོ་བྱེ་སྔོག་འདོན་བྱས་པའི་གནད་དོན་དང་འབྲེལ་ནས། སྡེ་བའི་ཡུལ་མི་སྐོར་ཅིག་གིས་རང་མོས་ཐོག་ཚ་རུ་མའི་སྲིད་གཞུང་དང་། ཁྱུང་མཆུ་རྫོང་སྒྲིག་ཁྲིམས་ལྷན་ཁང་། ཁྱུང་མཆུ་རྫོང་གི་སྐྱེ་ཁམས་ཁོར་ཁུག་ལྷན་ཁང་། ཁྱུང་མཆུ་རྫོང་གི་ཆུ་དོན་ལྷན་ཁང་། རྔ་བ་ཁུལ་གྱི་ཆུ་དོན་ལྷན་ཁང་། རྔ་བ་ཁུལ་གྱི་སྐྱེ་ཁམས་ཁོར་ཡུག་དང་འབྲེལ་ཡོད་ཀྱི་ལྷན་ཁང་རྣམས་ལ་གཏུག་བཤེར་བྱས་ཡོད་པ་མ་ཟད། ས་ཁུལ་དུ་གནོད་སྐྱོན་ཐེབས་པའི་འདྲ་པར་དང་། གློག་བརྙན་སོགས་མཁོ་སྤྲོད་བྱས་ཡོད་ནའང་། འབྲེལ་ཡོད་ལས་ཁུངས་གཅིག་གིས་ཀྱང་ལན་འདེབས་བྱས་མེད་པ་རེད་ལ། འདི་ལོའི་ཕྱི་ཟླ་ ༤ བར་སི་ཁྲོན་རྔ་བ་ཁུལ་ཁྱུང་མཆུ་རྫོང་གི་སྐྱེ་ཁམས་ཁོར་ཡུག་སྲུང་སྐྱོབ་ལྷན་ཁང་གིས། ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་ 安徽先河建筑工程又很公司 གིས་ཁྲིམས་འགལ་གྱི་བྱ་སྤྱོད་སྤེལ་ནས་རྡོ་བྱེ་སྔོག་འདོན་བྱས་པ་དངོས་བྱུང་ཡིན་པ་དང་། དོ་བདག་ལ་ཉེས་ཆད་བཅད་ཟིན་པ་མ་ཟད་གནད་དོན་མཇུག་སྒྲིལ་ཟིན་ཡིན་ཞེས་ལན་འདེབས་བྱས་ཡོད་མོད། ཚ་རུ་མའི་སྡེ་བའི་རྡོ་བྱེ་མུ་མཐུད་དུ་སྔོག་འདོན་བྱེད་བཞིན་ཡོད་སྟབས། ཚེ་རིང་ལགས་ཀྱིས་དེ་ནི་འབྲེལ་ཡོད་ཀྱི་ཁེ་ལས་ལ་སྲུང་སྐྱོབ་བྱས་པ་དང་། ཉེས་པ་སྦས་གསང་བྱས་པ། དོན་གལ་སྣང་ཆུང་བྱས་པ་རེད་ཅེས་བརྗོད་འདུག
མཚོ་སྔོན་ཚེ་རིང་ལགས་ཀྱི་ཞུ་གཏུགས་བརྙན་དེའི་ནང་། རྡོ་བྱེ་སྔོག་འདོན་བྱེད་ཡུལ་ཚ་རུ་མའི་རྡང་ཆུ་གཙང་བོ་ནི་རྨ་ཆུ་དང་འབྲི་ཆུ་གཉིས་ལ་ཡོད་པ་དང་། ཁྲིམས་མེད་ལུགས་མེད་ཀྱི་བྱ་སྤྱོད་དེས་རྨ་ཆུ་དང་འབྲི་ཆུའི་ཆུར་འབག་བཙོག་བཟོ་བ། ཡུལ་དངོས་ཀྱི་སྐྱེ་ཁམས་ཁོར་ཡུག སྐྱེ་དངོས་སྣ་ཚོགས་སྲུང་སྐྱོབ་ལ་གནོད་སྐྱོན་ཐེབས་སྲིད། ད་དུང་ཨེ་ཤ་ཡའི་སྐྱེ་ཁམས་དང་། མཐོ་སྒང་གི་གཤེར་ས་ལ་ཐད་གར་དུ་ཤུགས་རྐྱེན་ངན་པ་འགྲོ་བཞིན་ཡོད། དེར་བརྟེན། རྒྱལ་ཁབ་ཀྱི་གལ་ཆེའི་རང་བཞིན་དང་། སྐྱེ་ཁམས་ཁོར་ཡུག་སྲུང་སྐྱོབ་ཆེད་འདི་ལྟ་བའི་ཚབས་ཆེན་གྱི་སྐྱེ་ཁམས་གཏོར་སྐྱོན་དང་། ཡུལ་མི་རྣམས་ལ་བཟོད་ཐབས་བྲལ་བའི་ཤུགས་རྐྱེན་ངན་པ་འཕྲད་བཞིན་ཡོད་པས། བརྒྱུད་རིམ་འདིའི་ཁྲོད་དུ་འབྲེལ་ཡོད་ལས་བྱེད་ཚོས་རང་གི་ལས་ཀ་འགན་ལེན་མི་བྱེད་པ་དང་། སྐྱེ་ཁམས་ཁོར་ཡུག་གི་གནད་དོན་ལ་སྲིད་གཞུང་གིས་ཁ་ཡ་མ་བྱས་པ་དང་། ཡུལ་མི་རྒན་གཞོན་རྣམས་ལ་གནོད་སྐྱོན་གྱི་སྡུག་བསྔལ་སྔར་བཞིན་ཡོད། གཏུག་བཤེར་བྱེད་མཁན་རྣམས་ལ་ཞུ་ས་བཤད་ས་མེད་པ་དང་། གྱོད་དོན་ལ་བདག་པོ་བརྒྱག་མཁན་མི་འདུག ཅེས་བརྗོད་ཡོད།
རྒྱ་ནག་གི་ཁོར་ཡུག་སྲུང་སྐྱོབ་རྩ་ཁྲིམས་ཟེར་བ་ལྟར་ན་སྐྱེ་ཁམས་ཁོར་ཡུག་གཏོར་སྐྱོན་གཏོང་མཁན་ལ་འོས་འཚམ་གྱི་ཐག་གཅོད་བྱེད་པ་དང་། གཏོར་སྐྱོན་བྱས་པའི་སྐྱེ་ཁམས་ཁོར་ཡུག་ལ་གུན་གསབ་སྤྲོད་དགོས་ཞེས་བཤད་ཡོད་ཀྱང་། ཁྱུང་མཆུ་རྫོང་གི་སྐྱེ་ཁམས་ཁོར་ཁུག་ལྷན་ཁང་གིས་སྐྱེ་ཁམས་ཁོར་ཡུག་གཏོར་སྐྱོན་ཐད་འགན་ལེན་གཙང་མ་བྱས་མེད་ཁར། སྐྱེ་ཁམས་ཁོར་ཡུག་གཏོར་སྐྱོན་བྱེད་པའི་བྱ་སྤྱོད་ལ་བཀག་འགོག་དང་འགན་ལེན་བྱས་མེད་པ་མ་ཟད། ཕྱི་ལོ ༢༠༢༣ ལོའི་ཟླ ༩ ནང་ཐོག་མར་གཏུག་བཤེར་སྐབས་ཁྱུང་མཆུ་རྫོང་གི་སྐྱེ་ཁམས་ཁོར་ཡུག་ལྷན་ཁང་གིས་ཡིག་ཐོག་ནས་བརྡ་ལན་འབྱོར་བའི་ནང་དུ་ཁྱུང་མཆུ་རྫོང་གི་སྒྲིག་ཁྲིམས་ལྷན་ཁང་དང་ཁྱུང་མཆུ་རྫོང་མི་དམངས་སྲིད་གཞུང་ཁང་གིས་འགོ་ཁྲིད་གཙོ་བོ་དང་འབྲེལ་ཡོད་འགན་འཁུར་མགོ་ཁྲིད་ཀྱིས་ཐེངས་མང་པོར་མི་སྣ་ཁྲིད་དེ་འབྲེལ་ཡོད་གནད་དོན་ལ་བདེན་དཔྱད་བྱས། ཁྱུང་མཆུ་རྫོང་གི་ཆུ་དོན་ལྷན་ཁང་། ཁྱུང་མཆུ་རྫོང་གི་འགྲིམ་འགྲུལ་ལས་ཁུངས། རྔ་བ་ཁུལ་ཁྱུང་མཆུ་རྫོང་སྐྱེ་ཁམས་ཁོར་ཡུག་ལྷན་ཁང་། ཚ་རུ་མ་ཡུལ་ཚོ་སོགས་འབྲེལ་ཡོད་སྡེ་ཚན་དང་ཡུལ་ཚོས་འབྲེལ་ཡོད་གནད་དོན་ལ་བརྟག་དཔྱད་བྱས། ཚ་རུ་མ་ཡུལ་ཚོའི་འབྲོག་པ་མང་ཚོགས་ཀྱིས་གཞུང་ངོས་ནས་བརྟག་དཔྱད་བྱས་པའི་གྲུབ་འབྲས་དང་། ཐག་གཅོད་བྱས་པའི་མཇུག་འབྲས་ལ་ཐེངས་མང་པོར་ཡིག་ཐོག་གམ་ངག་ཐོག་གཉིས་ནས་བསམ་འཆར་བཏོན་ཡོད། དེ་དང་དུས་མཚུངས་སུ། གནད་དོན་འདི་ ༢༠༢༣ ལོའི་ཟླ་ ༡༠ ནས་ ༡༢ བར་རྔ་བ་ཁུལ་ཆུ་དོན་ལས་ཁུངས་སྡེ་ཚན་ལ་ཐག་གཅོད་མཇུག་འབྲས་སྐོར་ནས་ཐེངས་མང་པོར་བསྐྱར་ཞིབ་ནན་སྐུལ་བྱས་ཀྱང་འབྲས་བུ་གང་ཡང་བྱུང་མེད། ཕྱི་ལོ ༢༠༢༤ ལོའི་ལོ་མགོར། ཁྱུང་མཆུ་རྫོང་ལྟ་ཞིབ་ཨུ་ཡོན་ལྷན་ཁང་གིས་འབྲེལ་ཡོད་གནད་དོན་དང་ཐག་གཅོད་བྱས་པའི་གནས་སྟངས་ལ་བསྐྱར་ཞིབ་བྱས་ཀྱང་དམིགས་བསལ་གྲུབ་འབྲས་གང་ཡང་བྱུང་མེད་པ་རེད།
གསར་འགོད་པ། སྐལ་བཟང་སྦྱིན་པ།
