༧སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་གིས་དལ་འབྱོར་གྱི་ལུས་འདི་དོན་དང་ལྡན་པ་ཞིག་ཡོང་བར་དུས་རྒྱུན་༧གོང་ས་མཆོག་གི་བཀའ་སློབ་རྣམས་ལ་སློབ་སྦྱོང་དང་ལག་བསྟར་བྱེད་དགོས་གལ་ཆེན་པོ་རེད་ཅེས་གསུངས།
དེ་རིང་སྔ་དྲོའི་ཆུ་ཚོད་ ༩ པར་མོན་ཡུལ་འབུམ་སྡེ་ལ་རུ་དགོན་ཐུབ་མཆོག་དགའ་ཚལ་གྲྭ་ཚང་གི་གཙུག་ལག་ཁང་གསར་བཞེངས་དབུ་འབྱེད་གནང་ཡོད་པ་དང་། མཛད་སྒོའི་ཐོག་དགའ་ལྡན་ཁྲི་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་འདུག དབུ་འབྱེད་སྐབས་འཇམ་མགོན་༧རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གི་དབུས་༧སྐྱབས་རྗེ་མེ་རག་བླ་མ་གུ་རུ་མཆོག་སྤྲུལ་རིན་པོ་ཆེ་མཆོག་དང་དགེ་འདུན་གྱི་སྡེ། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་རྒྱ་གར་གྲོས་ཚོགས་འོག་མའི་འཐུས་མི་ཏ་པིར་གྷའོ་ (Tapir Gao) ལགས་དང་། རྒྱ་གར་དབུས་གཞུང་དང་ས་གནས་ཀྱི་གནད་ཡོད་མི་སྣ་ཁག་ཅིག སྤྱི་འཐུས་དགེ་བཤེས་ཨ་ཀྲུག་ཚེ་བརྟན་ལགས། དད་ལྡན་སེར་སྐྱ་མི་མང་ཕོན་ཆེན་འཛོམས་ཡོད་འདུག
མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས་གསུང་འཕྲིན་བསྩལ་བའི་ནང་། མེ་རག་བླ་མའི་སྐུ་སྐྱེ་གུ་རུ་སྤྲུལ་སྐུ་རིམ་པ་ནས་༧རྒྱལ་མཆོག་ལྔ་པ་ཆེན་པོ་ནས་བཟུང་༧རྒྱལ་བ་རིམ་བྱོན་གྱིས་བཀའ་འབྲེལ་ལྷོ་མོན་ཁུལ་དུ་རྒྱལ་བའི་བསྟན་པ་རིན་པོ་ཆེར་ཞབས་འདེགས་རིམ་པར་ཞུས། སྐྱེ་ཕྲེང་འདི་པ་ངོས་འཛིན་དང་དགེ་ཚུལ་སློང་གི་སྡོམ་འབོགས་རྣམས་ངོས་ཀྱིས་བྱས་པར་མ་ཟད། ཆུང་དུས་ནས་ངོས་ཀྱི་ཉེ་འགྲམ་མཚན་ཉིད་གྲྭ་ཚང་དུ་གཞུང་ཆེན་སློབ་གཉེར་དང་། དབང་ལུང་ཁྲིད་སོགས་ཞུས་ཤིང་། ངོས་ཀྱི་གམ་བཅར་ཡང་ལོ་མང་བགྱིས་པས་འབྲེལ་འདྲིས་ཆེ། སྐབས་བབ་མོན་འབུམ་སྡེ་ལར་སྐྱེ་ཕྲེང་གོང་མའི་གདན་ས་འབུམ་དགོན་ཐུབ་མཆོག་དགའ་ཚལ་གླིང་གི་འདུ་ཁང་རྙིང་པ་ལོ་མང་སོང་སྟབས་གཙུག་ལག་ཁང་ཞིག་གསར་བཞེངས་བགྱིད་འཆར་གྱིས། ཕྱི་ལོ་ ༢༠༡༧ ངོས་མོན་ཡུལ་དུ་བསྐྱོད་སྐབས་རེ་བསྐུལ་ལྟར་གཙུག་ལག་ཁང་གསར་བསྐྲུན་གྱི་རྨང་རྡོ་བཏིང་། ད་ཆར་ལེགས་གྲུབ་ཀྱིས་རབ་གནས་དབུ་འབྱེད་སླད་ གདན་ཞུ་རིམ་པར་བྱུང་བས་ཡོང་འདུན་ནར་མར་ཡོད་ནའང་། ད་ལན་དགའ་ལྡན་ཁྲི་རིན་པོ་ཆེ་དེ་གར་གདན་ཞུས་ཀྱིས་དབུ་འབྱེད་བགྱིས་ན་ལེགས་ཚོགས་ཆེ་ཞིང་། འདི་ནས་བསྟན་པ་རྒྱས་པ་དང་འགྲོ་བའི་བདེ་བ། ལྷག་པར་འདུས་སྡེར་བཤད་སྒྲུབ་ཆོས་སྤྱོད་གོང་འཕེལ་ཡོང་བའི་སྨོན་ལམ་དང་ཚེ་རབས་རྗེས་འཛིན་གྱི་སྐྱབས་སྨོན་བཅས་གནང་འདུག
སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། གཙུག་ལག་ཁང་འདི་ལྟ་བུ་བཞེངས་པར་མཐུན་འགྱུར་མང་པོ་དགོས་ཀྱི་ཡོད། གཙུག་ལག་ཁང་འདི་རྟེན་དང་བརྟེན་པ་རྒྱས་པའི་ཐོག་ནས་བསྟན་འགྲོ་ལ་ཕན་ཐོགས་རྒྱུའི་ཐད་ཚང་མས་ཐུགས་སྨོན་མཚམས་སྦྱོར་གནང་ཐུབ་དགོས་གལ་ཆེ་བ་དང་། ང་ཚོ་འགྲོ་བའི་བདེ་བ་ཐམས་ཅད་ཀྱི་འབྱུང་གནས་ལྟ་བུ་དེ་༧རྒྱལ་བའི་བསྟན་པ་རིན་པོ་ཆེ་ཆགས་ཀྱི་ཡོད་པས། རྒྱལ་བའི་བསྟན་པ་ལ་སོ་སོས་འདོད་འདུན་ཡོད་པ་ཙམ་མ་ཟད། སློབ་སྦྱོང་གནང་རྒྱུ་དང་སེམས་གཏིང་ནས་དད་བཀུར། དེ་བཞིན་སོ་སོའི་ངོས་ནས་ཞབས་འདེགས་གང་ཐུབ་ཞུ་རྒྱུའི་འདུན་པ་དགོས་གལ་ཆེན་པོ་རེད། དེ་བས་རིན་པོ་ཆེ་མཆོག་གི་ཐུགས་སྐྱེད་མཛད་འཕྲིན་ལ་བརྟེན་ནས་གཙུག་ལག་ཁང་ཆེན་པོ་འདི་ལྟ་བུ་ཕྱི་ནང་རྟེན་དང་བརྟེན་པ་རྒྱས་པ་ཞིག་བྱུང་བ་རེད། དེར་བརྟེན་གཙུག་ལག་ཁང་འདིའི་ནང་བཞུགས་མཁན་གྱི་དགེ་འདུན་པ་དང་གྲྭ་ཚང་གི་ཐོག་ནས་༧རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་འདི་བཤད་སྒྲུབ་གཉིས་ལྡན་གྱི་ཐོག་ནས་འཛིན་སྐྱོང་ཡ་མ་བྲལ་་བ་བྱེད་ཐུབ་དགོས་པ་ནི་གལ་ཆེ་ཤོས་ཤིག་ཆགས་ཀྱི་ཡོད། དེ་བཞིན། དེང་སང་འཛམ་གླིང་སྤྱི་ཡོངས་ནས་ལྟ་དུས་ནང་ཆོས་ཟེར་བ་དེ་འགྲོ་བའི་སྡུག་བསྔལ་འཇོམས་པའི་གཞི་གཅིག་པོ་དང་ཞི་བདེ་ལའང་ཕན་ཐོགས་རྒྱུའི་རིག་གཞུང་དང་ལྟ་གྲུབ་གལ་ཆེན་པོ་ཞིག་ཆགས་ཀྱི་ཡོད་པ་རེད། དུས་རྒྱུན་དུ་ནས་༧གོང་ས་རྒྱལ་བ་རིན་པོ་ཆེ་མཆོག་གིས། ང་ཚོའི་བོད་ཀྱི་ནང་ཆོས་ཀྱི་རིག་གཞུང་འདི་འཛམ་གླིང་གི་གཅེས་ནོར་ཡིན་གདའ། འཛམ་གླིང་སྤྱི་ལ་ཕན་ཐོགས་པའི་རིན་ཐང་ཆེ་བའི་རིག་གཞུང་ཞིག་ཆགས་ཀྱི་ཡོད་སྐོར་སོགས་གསུང་གི་ཡོད་པ་རེད། དེ་ཡང་བོད་སྐད་ཡིག་ཐོག་ལ་བཀའ་བསྟན་འགྱུར་ ༣༠༠ ལྷག་དང་། ད་ལྟའི་དུས་སུ་འདུལ་བ་ཆ་ཚང་བ་ཞིག་ལ་ཞིབ་འཇུག་བྱེད་སྐབས་སྐད་ཡིག་འདི་བོད་སྐད་ཡིག་གཅིག་པོ་ལ་མ་གཏོགས་མེད་པའི་གནས་སྟངས་ཆགས་ཀྱི་ཡོད། དེར་བརྟེན་བོད་ཀྱི་སྐད་ཡིག་གི་ཐོག་ནས་སངས་རྒྱས་ཀྱི་བསྟན་པ་ལུང་རྟོགས་གཉིས་ཀྱི་ཐོག་ནས་འཛིན་སྐྱོང་སྤེལ་གསུམ་གནང་ཐུབ་དགོས་གལ་ཆེན་པོ་རེད་ལ། འབྲེལ་ཡོད་རིན་པོ་ཆེ་མཆོག་དང་གྲྭ་ཚང་གི་འབྲེལ་ཡོད་ཚང་མས་འགན་ཁུར་བཞེས་ཐུབ་དགོས་གལ་ཆེ། ཞེས་སོགས་གསུངས་སོང་།
སྲིད་སྐྱོང་སྤེན་པ་ཚེ་རིང་མཆོག་གིས། ཐུབ་མཆོག་དགའ་ཚལ་གླིང་དགོན་འདི་ཕྱི་ལོ་ ༡༩༥༩ དང་ ༡༩༦༠ ཙམ་ལ་ས་གནས་མང་ཚོགས་ཀྱིས་འཛུགས་སྐྲུན་གནང་སྟེ། གུ་རུ་རིན་པོ་ཆེ་སྐུ་གོང་མ་མཆོག་ལ་དགོན་པ་ཕུལ་བ་ཞིག་རེད་འདུག་ཅིང་། ད་ཆ་གུ་རུ་མཆོག་སྤྲུལ་རིན་པོ་ཆེ་མཆོག་གིས་འཛིན་སྐྱོང་གནང་བཞིན་པ་རེད། ཐུབ་མཆོག་དགའ་ཚལ་གླིང་གི་ཡན་ལག་ཏུ་ཤེས་ཡོན་བསྟི་གནས་གུ་རུ་བསྟན་པའི་སྒྲོན་མེ་སློབ་གྲྭ་ཟུར་འཛུགས་བསྐྱངས་འདུག་པ་དེས་སྤྱི་ཚོགས་ལ་ཕན་རླབས་རྒྱ་ཆེ་འགྲོ་ཡི་ཡོད་པ་དེ་ལ་རྗེས་སུ་ཡི་རངས་དང་བསྔགས་བརྗོད་ཞུ་རྒྱུ་བྱུང་། དྲ་རྒྱའི་ཐོག་ནས་ཐུབ་མཆོག་དགའ་ཚལ་གླིང་གི་ངོ་དེབ་ (Facebook) མཇལ་བའི་སྐབས་སུ། དེ་རིང་དབུ་འབྱེད་གནང་བའི་དགོན་པའི་འདུ་ཁང་གསར་བཞེངས་ཐོག ཉེ་འཁོར་གྱི་གྲོང་སྡེ་དང་ཚོགས་པ། ཕྲུ་གུ་མང་པོ་ཞིག་དང་བླངས་ཀྱི་སྒོ་ནས་ཕྱར་གྲུ་མཉམ་འདེགས་ཞུ་བཞིན་པ་མཐོང་བས། མོན་ཡུལ་འདིར་ད་དུང་ནང་པའི་བྱམས་བརྩེའི་རིག་གཞུང་རྨང་མཐུག་པོ་ཞིག་ཡོད་པ་ཚོར་གྱི་འདུག འདུ་ཁང་འདིའི་རྨང་སྒོ་༧གོང་ས་རྒྱལ་བ་རིན་པོ་ཆེ་མཆོག་གིས་འཇོག་གནང་མཛད་འདུག་པས་བྱིན་རླབས་ཀྱི་ཚན་ཁ་རབ་ཏུ་འབར་བ་སྨྲོས་མ་དགོས་ཤིང་། བཤད་སྒྲུབ་ཀྱི་བསྟན་པ་དར་ཞིང་རྒྱས་པའི་སྨོན་འདུན་ཞུ་ཡི་ཡོད། མེ་རག་བླ་མ་སྐུ་ཕྲེང་རིམ་བྱོན་རྣམས་རྒྱལ་སྲིད་སྐྱོང་མཁན་དང་། སྤྲུལ་པའི་རིགས་རྒྱུད། བོད་བཙན་པོའི་གདུང་རྒྱུད་སོགས་སྤྲུལ་པའི་རོལ་གར་སྣ་ཚོགས་ཤིག་བཞེས་འདུག་ཅིང་། མེ་རག་བླ་མ་སྐུ་ཕྲེང་དྲུག་པ་ནི་༧རྒྱལ་དབང་སྐུ་ཕྲེང་དྲུག་པ་རིག་འཛིན་ཚངས་དབྱངས་རྒྱ་མཚོའི་གཅུང་པོར་འཁྲུངས་ཡོད་ལ། སྐུ་ཕྲེང་བཅུ་པ་༧གོང་ས་བཅུ་པའི་སྐུ་ཚབ་ཏུ་མཛངས་ཏེ་མོན་དང་འབྲུག་གི་ས་མཚམས་སུ་ཆིབས་བསྒྱུར་གནང་བ་སོགས་ཀྱི་་རྣམ་ཐར་མང་པོ་ཡོད། མེ་རག་བླ་མ་སྐུ་ཕྲེང་བཅུ་གཉིས་པ་༧སྐྱབས་རྗེ་བསྟན་འཛིན་འཕྲིན་ལས་རྣམ་རྒྱལ་རིན་པོ་ཆེ་མཆོག་གིས་ཀྱང་བཞུགས་སྒར་མཚན་ཉིད་གྲ་ཚང་ནས་ལོ་ངོ་བཅུ་ཕྲག་གཅིག་དང་ཕྱེད་ཀ་ཙམ་ལ་སློབ་གཉེར་མཛད་དེ། འབྲས་སྤུངས་སྒོ་མང་དུ་དགེ་བཤེས་ལྷ་རམས་པ་དང་། རྒྱུད་སྨད་དུ་སྔགས་རིམ་པའི་དམ་འཇོག་མཛད་པ་མ་ཟད་སྨད་རྒྱུད་པའི་དགེ་བསྐོས་བཞེངས་ཤིང་། བཞུགས་སྒར་དགའ་ལྡན་ཕོ་བྲང་ཡིག་ཚང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་ལོ་མང་སྲི་ཞུ་ཧུར་བསྐྱེད་བསྒྲུབས་གནང་ཡོད་པས་མཚོན། བསྟན་འགྲོའི་མཛད་འཕྲིན་སྤྱི་དང་། ཡང་སྒོས་མོན་ཡུལ་དུ་ཆོས་དང་རིག་གཞུང་། ཤེས་ཡོན། སྤྱི་ཚོགས་ཞབས་ཞུའི་ཕྱག་ལས་གཟེངས་ཐོན་གནང་བར་རྒྱ་གར་དབུས་གཞུང་ནས་ངོས་འཛིན་ཆེ་བསྟོད་ཀྱི་པད་མ་ཤྲིའི་གཟེངས་རྟགས་འབུལ་བཞེས་མཛད་པ་སོགས་མཛད་འཕྲིན་ཡར་ངོའི་ཟླ་ལྟར་རྒྱས་བཞིན་པར་རྗེས་སུ་ཡི་རང་ཞུ། ཞེས་སོགས་གསུངས་སོང་།
ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། དེ་རིང་འབུམ་སྡེ་ལ་རུ་དགོན་ཐུབ་མཆོག་དགའ་ཚལ་གྲྭ་ཚང་གི་གཙུག་ལག་ཁང་དབུ་འབྱེད་ཀྱི་མཛད་སྒོའི་སྟེང་དགའ་ལྡན་ཁྲི་རིན་པོ་ཆེ་མཆོག་དངོས་སུ་ཆིབས་བསྒྱུར་བསྐྱངས་པ་ནི་སྐལ་བ་བཟང་པོ་ཞིག་ཡིན་པ་མ་ཟད། ལོ་ངོ་གཉིས་ཀྱི་གོང་ལ་བསྟན་འཛིན་སྒང་དུ་ཡོད་པའི་བོད་པའི་སློབ་གྲྭའི་ལས་རིམ་ཞིག་གི་སྐབས་དགའ་ལྡན་ཁྲི་རིན་པོ་ཆེ་མཆོག་དང་མཇལ་ཁ་ཞུ་བའི་གོ་སྐབས་བྱུང་། ལོ་ངོ་སྟོང་ཕྲག་མང་པོའི་སྔོན་ནས་བོད་དང་རྒྱ་གར་གཉིས་ཀྱི་དབར་ལ་ཆོས་ཕྱོགས་ཀྱི་འབྲེལ་བ་ཡོད་ལ། དམིགས་བསལ་གྱིས་དེ་སྔ་རྒྱ་གར་ནང་ཡོད་པའི་ན་ལེནྜའི་ཆོས་ལུགས་ཉམས་རྒུད་དུ་ཕྱིན་ནས་བོད་ནང་དུ་ན་ལེནྜའི་་ནང་བསྟན་དར་ཁྱབ་བྱུང་ཡོད་ལ། རིམ་གྱིས་རྒྱ་གར་ཧི་མ་ལ་ཡའི་རི་རྒྱུད་དང་ཨ་རུ་ན་ཅལ་སོགས་ལ་བོད་བརྒྱུད་ནང་བསྟན་ཁྱབ་མགོ་བཙུགས་པ་མ་ཟད། རྒྱལ་སྤྱིའི་རྒྱལ་ཁབ་ཁག་མང་པོའི་ནང་དུ་ནང་ཆོས་དར་ཁྱབ་ཕྱིན་ཡོད་པར་བརྟེན། ང་ཚོ་ཚང་མར་འཕགས་བོད་གཉིས་ཀྱི་ཆོས་ལུགས་ཀྱི་འབྲེལ་ལམ་གཙོས་པའི་འབྲེལ་ལམ་མུ་མཐུད་རྒྱུན་སྐྱོང་བྱ་རྒྱུའི་འགན་ཡོད་པ་རེད། ཚང་མས་མཁྱེན་གསལ་ལྟར་ད་ལྟའི་ཆར་རྒྱ་ནག་གཞུང་གིས་བོད་ནང་གི་བོད་མིའི་འགྲོ་འདུག་སྤྱོད་གསུམ་ལ་དམ་དྲག་ཤུགས་ཆེན་བྱས་དང་བྱེད་མུས་ཡིན་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་སོགས་རྩིས་མེད་རྡོག་རོལ་གཏོང་བཞིན་པའི་ཛ་དྲག་གི་གནས་སྟངས་ཐེར་འདོན་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་སློབ་བསྩལ་བ་བཞིན་བོད་བརྒྱུད་ནང་བསྟན་སློབ་གཉེར་བྱེད་མཁན་ཡོངས་དང་དམིགས་བསལ་གྱིས་ཧི་མ་ལ་ཡའི་རི་རྒྱུད་ཁུལ་དུ་ནང་ཆོས་སློབ་གཉེར་བྱེད་མཁན་རྣམས་ཀྱིས་ནང་ཆོས་མི་ཉམས་རྒྱུན་འཛིན་བྱ་རྒྱུ་གལ་ཆེན་པོ་རེད། ཅེས་དང་། ད་ལྟའི་ཆར་སེ་ར་དང་འབྲས་སྤུངས་སོགས་བོད་ཀྱི་དགོན་སྡེ་ཁག་གི་ནང་དུ་ཡོད་པའི་གྲྭ་བཙུན་མང་ཆེ་བ་ཧི་མ་ལ་ཡའི་རི་རྒྱུད་ནས་རེད་འདུག མ་འོངས་པར་བོད་ཀྱི་ནང་ཆོས་འདི་ཧི་མ་ལ་ཡའི་རི་རྒྱུད་ཀྱི་གྲྭ་བཙུན་ཁོ་ནས་ཉམས་ལེན་བྱེད་ཀྱི་ཡོད་པ་ཙམ་མིན་པར་མང་ཚོགས་ནང་དུའང་ཁྱབ་སྤེལ་བྱ་དགོས་གལ་ཆེ་བ་ཡིན་པ་མ་ཟད། བོད་བརྒྱུད་ནང་བསྟན་སློབ་གཉེར་དང་། ནང་ཆོས་ཀྱི་ནང་དོན་གཏིང་ཟབ་པོ་དང་ཁ་གསལ་པོའི་ཐོག་ནས་ཤེས་རྟོགས་ཐུབ་པར་བོད་ཀྱི་སྐད་ཡིག་ངེས་པར་དུ་ཤེས་དགོས་གལ་ཆེ་བར་བརྟེན། ཉེ་ལམ་མོན་ཡུལ་དུ་ཡོད་པའི་གཞུང་གི་སློབ་གྲྭ་ཁག་ཏུ་བོད་ཀྱི་སྐད་ཡིག་གི་སློབ་ཁྲིད་བྱེད་མགོ་བཙུགས་ཡོད་ལ། ད་ལྟའི་ཆར་མོན་ཡུལ་གྱི་ན་གཞོན་ཕོ་མོ་ཡོངས་ཀྱིས་བོད་ཀྱི་སྐད་ཡིག་ཀློག་ཤེས་ཀྱི་ཡོད་སྐོར་སོགས་གསུངས་ཡོད་འདུག
དགའ་ལྡན་ཁྲི་ཐོག་ ༡༠༤ རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་གིས། དེ་རིང་འདིར་བསྟན་དང་བསྟན་པའི་ཞིང་ས་བཞེངས་ཐུབ་པར་དགའ་པོ་བྱུང་། བསྟན་པའི་ཞིང་ས་བཞེངས་དགོས་དོན་ནི། དགེ་འདུན་པ་རྣམ་པ་གཙོས་མི་མང་ཚང་མས་སྐྱེ་བ་འདི་དང་ཕྱི་མའི་ལེགས་ཚོགས་བསྐྲུན་པར་བྱེད་པའི་སློབ་སྦྱོང་བྱ་རྒྱུ་གལ་ཆེན་པོ་རེད། སློབ་སྦྱོང་བྱེད་པར་གལ་ཆེ་ཤོས་ནི་འཕྲོད་བསྟེན་ཡག་པོ་དགོས། གཟུགས་པོའི་འཕྲོད་བསྟེན་ཡག་པོ་བྱུང་ན་དོན་དག་ག་རེ་ཡིན་ཡང་བསྒྲུབ་ཐུབ། གཟུགས་པོ་བདེ་ཐང་ཡིན་དུས་ལུས་འདི་འཕྲོ་བརླག་ཏུ་མ་ཕྱིན་པ་བྱ་དགོས། ང་ཚོའི་སྨོན་ལམ་ནང་ཡོད་པ་ནང་བཞིན་དལ་འབྱོར་གྱི་ལུས་འདི་དོན་དང་ལྡན་པ་ཞིག་བྱ་རྒྱུ་གལ་ཆེ་ཤོས་རེད། དོན་དང་ལྡན་པ་ཡོང་བར་བླང་དོར་ཉམས་སུ་བླང་དགོས། དུས་རྒྱུན་དུ་ནས་སློབ་གཉེར་གནང་རྒྱུ་དང་དམིགས་བསལ་༧གོང་ས་མཆོག་ནས་བསྩལ་བའི་བཀའ་སློབ་རིམ་པ་རྣམས་སློབ་སྦྱོང་བྱ་རྒྱུ་གལ་ཆེན་རེད། དེ་ཚོ་ཀློག་པ་དང་འཆད་པ། ཤེས་པ་ཙམ་མིན་པར་ལག་ལེན་བསྟར་ནས་མི་ཚེ་དོན་དང་ལྡན་པ་ཡོང་བ་བྱ་རྒྱུ་གལ་ཆེན་པོ་རེད། ཅེས་བཀའ་སློབ་བསྩལ་གནང་འདུག
གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།
རྩོམ་སྒྲིག་པ། པདྨ་མཚོ།
