རྒྱ་གར་གྱི་རྒྱལ་ས་ལྡི་ལི་རུ་ཨེ་ཤ་ཡའི་ནང་པའི་ལྷན་ཚོགས་ཐེངས་དང་པོ་འཚོགས།

ཨེ་ཤ་ཡའི་ནང་པའི་ལྷན་ཚོགས་ཐོག་རྒྱ་གར་དབུས་རིག་གཞུང་ལྷན་ཁང་གི་བློན་ཆེན་མཆོག་ནས་རྒྱ་གར་གཞུང་གི་ངོས་ནས་ནང་ཆོས་ལ་དམིགས་བསལ་གྱི་ནུས་པ་ཞིག་ཡོད་པར་ངོས་འཛིན་གྱིས་ནང་པའི་གནས་ཆེན་ཁག་ལ་སྲུང་སྐྱོབ་དང་བསྐྱར་གསོ་ཡི་ལས་དོན་སྣ་མང་སྤེལ་བཞིན་ཡོད་སྐོར་གསུངས་འདུག

ཁ་སང་ཕྱི་ཚེས་ ༥ དང་ ༦ ཉིན་གཉིས་རིང་རྒྱ་གར་གྱི་རྒྱལ་ས་ལྡི་ལི་རུ་རྟེན་གཞི་བྱས་པའི་ཨ་ཤོཀ་ (Ashok) མགྲོན་ཁང་དུ། རྒྱ་གར་དབུས་རིག་གཞུང་ལྷན་ཁང་དང་རྒྱལ་སྤྱིའི་ནང་པའི་ལྷན་ཚོགས་ (International Buddhist Confederation) གཉིས་ཀྱི་གོ་སྒྲིག་འོག ཨེ་ཤ་ཡའི་ནང་པའི་ལྷན་ཚོགས་ཐེངས་དང་པོ་འཚོགས་ཡོད་པ་དང་། ནང་པའི་ལྷན་ཚོགས་འདི་རྒྱ་གར་གྱི་སྲིད་འཛིན་ལྕམ་ཌོ་རོ་པཱ་ཏི་མཆོག་གིས་དབུ་འབྱེད་གནང་ཡོད་པ་མ་ཟད། ༧གོང་ས་རྒྱལ་བ་རིན་པོ་མཆོག་ནས་ལྷན་ཚོགས་དེའི་ཐོག་དམིགས་བསལ་གྱི་གསུང་འཕྲིན་ཞིག་ཀྱང་བསྩལ་གནང་འདུག

ཨེ་ཤ་ཡའི་ནང་པའི་ལྷན་ཚོགས་ཀྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་རྒྱ་གར་གྱི་སྲིད་འཛིན་ལྕམ་ཌོ་རོ་པཱ་ཏི་མུར་མུ་ (Droupadi Murmu) མཆོག་གི་དབུས་དམིགས་བསལ་སྐུ་མགྲོན་རྒྱ་གར་དབུས་རིག་གཞུང་ལྷན་ཁང་གི་བློན་ཆེན་གྷ་རྗེན་ཌི་ར་སིང་ (Gajendra Singh Shekhawat) མཆོག་དང་། གྲངས་ཉུང་མི་རིགས་ལས་དོན་ལྷན་ཁང་གི་བློན་ཆེན་ཀི་རན་རི་ཇི་ཇུ་ (Kiren Rijiju) མཆོག་མཉམ་ཞུགས་གནང་ཡོད་པ་མ་ཟད། ༧སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་དང་། ཀུན་བདེ་གླིང་རིན་པོ་ཆེ་མཆོག ༧སྐྱབས་རྗེ་ཡོངས་དགེ་མི་འགྱུར་རིན་པོ་ཆེ་མཆོགདབུས་པའི་མཁན་པོ་དང་དགེ་བཤེས། སློབ་དཔོན་སོགས་ཚུད་པའི་ཨེ་ཤ་ཡའི་རྒྱལ་ཁབ་འདྲ་མིན་ནས་ཕེབས་པའི་ནང་བསྟན་ཆོས་བརྒྱུད་ཀྱི་བླ་ཆེན་དང་མཁས་དབང་སོགས་ཚོགས་བཅར་བ་ཁྱོན་ ༥༠༠ ཙམ་མཉམ་ཞུགས་གནང་ཡོད་འདུག་ལ། ད་ལན་གྱི་ལྷན་ཚོགས་ཐོག་བོད་བརྒྱུད་ནང་བསྟན་གྱི་མཁས་དབང་ཁག་ཅིག་གིས་བརྗོད་གཞི་འདྲ་མིན་ཐོག་གསུང་བཤད་དང་བགྲོ་གླེང་གནང་ཡོད་འདུག

༧གོང་ས་རྒྱལ་བ་རིན་པོ་ཆེ་མཆོག་ནས་གསུང་འཕྲིན་བསྩལ་བའི་ནང་། ལོ་ངོ་ ༢༥༠༠ ལྷག་ཙམ་གྱི་རིང་ལ་མི་རྣམས་ཀྱིས་ནང་ཆོས་དང་ཆོས་ལུགས་ཀྱི་སྲོལ་རྒྱུན་གཞན་དག་ལ་བརྟེན་ནས་སེམས་དང་ཕྱི་དངོས་པོའི་དཀའ་ངལ་ཐམས་ཅད་སེལ་ཐབས་བྱས་ཡོད། ཚན་རིག་དང་འཕྲུལ་རིག་ཡར་རྒྱས་ཕྱིན་པ་ལ་བརྟེན་ནས། མི་རྣམས་ཀྱིས་སྤྱི་ཚོགས་ཁྲོད་ཀྱི་ཕྱི་དངོས་པོའི་དཀའ་ངལ་སེལ་བའི་ཐབས་ལམ་འགའ་རྙེད་ཡོད། ད་ལྟ་འཛམ་གླིང་འདིའི་སྟེང་མི་འབོར་ཐེར་འབུམ་བརྒྱད་ལྷག་ཡོད་པའི་ཁྲོད་ཕྱེད་ཀ་ལྷག་ཨེ་ཤ་ཡའི་ནང་དུ་ཡོད་པ་རེད། ཨེཤ་ཡའི་མི་འབོར་འགའ་ཤས་ཆོས་ལ་དད་པ་ཡོད་ལ། འགའ་ཤས་ཆོས་ལ་དད་པ་མེད་པ་རེད། འོན་ཀྱང་། མི་ཚང་མས་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་རེད། ཡོངས་གྲགས་སུ་ཨེ་ཤ་ཡའི་འོད་སྣང་དུ་ངོས་འཛིན་བྱེད་བཞིན་པའི་སངས་རྒྱས་བཅོམ་ལྡན་འདས་ཀྱིས་མི་ཚེའི་དགོས་དམིགས་གཙོ་བོ་ནི་བདེ་བའི་ངང་འཚོ་རྒྱུ་དེ་ཡིན་པར་གཟིགས་ཤིང་། ཁོང་གིས་ད་དུང་མ་རིག་པའི་དབང་གིས་སྐྱེ་བོ་རྣམས་སྡུག་བསྔལ་གྱིས་འཆིང་ཡང་། ཤེས་རབ་ཀྱིས་ཐར་པ་འཐོབ་བྱེད་ཀྱི་ལམ་སྟོན་གནང་ཡོད་པ་རེད། ནང་པའི་རྗེས་འཇུག་པའི་གྲངས་འབོར་ཆེས་མང་པོ་ཞིག་ཨེ་ཤ་ཡའི་ནང་དུ་ཡོད། འོན་ཀྱང་། ང་ཚོ་ཚང་མས་བདེ་བ་འདོད་པ་གཅིག་མཚུངས་ཡིན་པར་བརྟེན། ང་ཚོར་འགྲོ་བ་མི་རྣམས་ལ་སོ་སོའི་མི་ཚེའི་ཁ་ཕྱོགས་དེ་སྙིང་རྗེ་དང་འཚེ་མེད་ཞི་བའི་ལམ་དུ་འཁྲིད་པར་སྐུལ་འདེད་བྱ་རྒྱུའི་ལོ་རྒྱུས་ཀྱི་འགན་འཁྲི་ཞིག་ཡོད་རེད་སྙམ་གྱི་འདུག ངོས་རང་སློབ་མ་དང་སངས་རྒྱས་ཀྱི་ཆོས་ཉམས་སུ་ལེན་མཁན་ཡིན་པའི་ཆ་ནས། རྒྱ་གར་གྱི་རྒྱལ་ས་ལྡི་ལི་གསར་པར་ཨེ་ཤ་ཡའི་ནང་པའི་ལྷན་ཚོགས་ཤིག་འཚོག་བཞིན་པ་ཤེས་རྟོགས་བྱུང་བར་དགའ་པོ་བྱུང་། ངོས་ཀྱིས་ཚོགས་འདུ་དེར་ཨེ་ཤ་ཡ་དང་འཛམ་གླིང་ཡར་རྒྱས་གོང་འཕེལ་གཏོང་བའི་ནུས་པ་ཡོད་པའི་ཡིད་ཆེས་བྱེད་ཀྱི་ཡོད། ཅེས་སོགས་གསུངས་འདུག

དབུ་འབྱེད་མཛད་སྒོའི་ཐོག་སྲིད་འཛིན་མུར་མུ་མཆོག་གིས། རྒྱལ་ཁབ་དང་སྐད་ཡིག རིག་གཞུང་སོགས་འདྲ་མིན་ལ་མ་ལྟོས་པར་ད་རེས་སྟོན་པ་གཅིག་གི་རྗེས་འཇུག་པ་མང་པོ་ཞིག་འདུ་འཛོམས་བྱུང་བར་འཚམས་འདྲི་ཞུ་ཡི་ཡོད། རྒྱ་གར་ནི་ཆོས་ལུགས་འདྲ་མིན་གྱི་བྱིན་གྱིས་རླབས་པའི་རྒྱལ་ཁབ་ཅིག་ཡིན་པ་མ་ཟད། ལྷག་པར་དུ་རྒྱ་གར་ནི་ནང་པའི་ཆོས་ཀྱི་འབྱུང་ཁུངས་ཤིག་ཡིན་པའི་ཆ་ནས། ཨེ་ཤ་ཡའི་གཙོས་འཛམ་གླིང་ཀུན་ལ་ནང་ཆོས་གོང་འཕེལ་ཡོང་ཐབས་སུ་མི་མང་ལ་གོ་རྟོགས་གང་མང་སྤེལ་དགོས་སྐོར་དང་། སྟོན་པ་བཅོམ་ལྡན་འདས་ཀྱི་མཛད་རྣམ་རྗེས་སུ་དྲན་དགོས་སྐོར་སོགས་གསུངས་སོང་།

རྒྱ་གར་དབུས་གཞུང་གི་རིག་གཞུང་བློན་ཆེན་གྷ་རྗེན་ཌི་ར་མཆོག་གིས། སྟོན་པ་བཅོམ་ལྡན་འདས་ཀྱི་ལམ་སྟོན་གཞིར་བཟུང་རྒྱ་གར་གཞུང་གི་ངོས་ནས་འཛམ་གླིང་ནང་ཞི་བདེ་མཉམ་གནས་ཡོང་ཐུབས་སུ་འབད་བརྩོན་ལྷོད་མེད་ཞུ་རྒྱུ་དང་། ནང་པའི་ལྟ་གྲུབ་ཕན་ཚུན་དབར་བགྲོ་གླེང་ལྷུག་པོ་ཡོང་བའི་འབད་བརྩོན་བྱ་རྒྱུ་ཡིན་སྐོར་སོགས་གསུངས། གཞན་ཡང་། མཛད་སྒོའི་ཐོག་གྲངས་ཉུང་མི་རིགས་ལས་དོན་ལྷན་ཁང་གི་བློན་ཆེན་ཀི་རན་མཆོག་གིས། སྲིད་བློན་མོ་དྷི་མཆོག་དང་རྒྱ་གར་གཞུང་གི་ངོས་ནས་ནང་ཆོས་ལ་དམིགས་བསལ་གྱི་ནུས་པ་ཞིག་ཡོད་པར་ངོས་འཛིན་དང་། ཉེ་བའི་ཆར་པཱ་ལིའི་སྐད་ཡིག་དེ་གཞུང་འབྲེལ་གྱི་སྲོལ་རྒྱུན་སྐད་ཡིག་ཅིག་ཏུ་ངོས་འཛིན་གནང་ཡོད་ལ། རྒྱ་གར་ནང་ཡོད་པའི་ནང་པའི་གནས་ཆེན་ཁག་སྲུང་སྐྱོབ་དང་བསྐྱར་གསོ་ཡོང་ཐབས་སུ་ལས་དོན་སྣ་མང་སྤེལ་གྱི་ཡོད། ཅེས་སོགས་གསུངས་འདུག

དེ་རིང་འདི་གའི་གསར་འགོད་པས་ཁ་པར་བརྒྱུད་རྒྱལ་སྤྱིའི་ནང་པའི་ལྷན་ཚོགས་ཀྱི་སྤྱི་ཁྱབ་དྲུང་ཆེ་ཤར་རྩེ་མཁན་ཟུར་བྱང་ཆུབ་ཆོས་ལྡན་རིན་པོ་ཆེ་ལ་ལྷན་ཚོགས་དེའི་གལ་ཆེའི་རང་བཞིན་སྐོར་བཀའ་འདྲི་ཞུས་པར་རིན་པོ་ཆེ་ལགས་ཀྱིས། ལྷན་ཚོགས་འདི་གལ་ཆེན་པོ་ཡིན་དང་ཡིན། འཛམ་གླིང་ནང་དུ་ནང་པ་ཡོད་ཚད་ཀྱི་ཕལ་ཆེར་བརྒྱ་ཆ་ ༩༠ ཨེ་ཤ་ཡའི་ནང་ཡོད་ལབ་ཆོག་གི་ཡོད་པ་རེད། ནང་པའི་ཆོས་འདི་དག་ཨེ་ཤ་ཡའི་རིག་གཞུང་དང་ཆོས། དེ་བཞིན་མི་ཚེའི་ནང་ལོགས་ལ་ནང་པའི་ཤན་ཞུགས་ཆེན་པོ་ཡོད་པར་བརྟེན། ང་ཚོས་འདིའི་ཐོག་ལ་གནས་ཚུལ་ཤེས་ཐབས་བྱེད་པར་གནས་ཚུལ་ཕན་ཚུན་བགྲོ་གླེང་བྱེད་ཀྱི་ཡོད་ལ། སྤྱི་ཚོགས་ལ་ཕན་ཐོགས་རྒྱུ་དང་འཛམ་གླིང་ཞི་བདེ་བསྐྲུན་རྒྱུའི་ལས་དོན་ཐོག་ལ་བགྲོ་གླེང་བྱེད་ཀྱི་ཡོད་པ་རེད། དེར་བརྟེན་ལྷན་ཚོགས་འདི་གལ་ཆེན་པོ་ཞེ་དྲགས་རེད། ཅེས་དང་། ལོ་ལྟར་ལྷན་ཚོགས་དེ་ཚོགས་ཐུབ་པའི་ཐུགས་རེ་གནང་གི་ཡོད་ཀྱང་ད་ལྟའི་ཆར་ངེས་གཏན་མེད་སྐོར་སོགས་གསུངས་བྱུང་།

ལྷན་ཚོགས་འདི་ནི་ཨེ་ཤ་ཡའི་ནང་པའི་རྒྱལ་ཁབ་ཁག་གི་བར་ལ་མཐུན་འབྲེལ་གཏིང་ཟབ་ཏུ་ཡོང་ཐབས་ལ་དམིགས་པ་ཞིག་ཡིན་འདུག་ལ། ལྷན་ཚོགས་དེའི་དམིགས་ཡུལ་གཙོ་བོ་ནི་ཨེ་ཤ་ཡའི་ནང་པའི་ཆོས་ལུགས་ཕན་ཚུན་གྱི་དགེ་འདུན་པ་དང་དབུ་ཁྲིད་རྣམ་པ། མཁས་དབང་། ཉམས་ལེན་པ་སོགས་ལྷན་འཛོམས་ཀྱིས་ནང་ཆོས་སྐོར་བགྲོ་གླེང་དང་། གོ་རྟོགས་སྤེལ་རེས་བྱས་པ་བརྒྱུད། སྤྱི་ཚོགས་ནང་འཕྲད་བཞིན་པའི་དེང་སྐབས་ཀྱི་དཀའ་ངལ་ཁག་ལ་གདོང་ལེན་བྱེད་ཐབས་དང་། ཨེ་ཤ་ཡའི་རྒྱལ་ཁབ་ཁག་ཏུ་དར་སྲོལ་ཆེ་བའི་སྲོལ་རྒྱུན་དང་ལག་ལེན། ཡིད་ཆེས་འདྲ་མིན་ཡོད་པའི་བར་ལ་མཐུན་སྦྱོར་གྱི་འབྲེལ་བ་འཛུགས་ཐབས་སོགས་ཡིན་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།