རྔ་བ་ཁུལ་ཁྱུང་མཆུ་རྫོང་ཚ་རུ་མ་ཡུལ་ཚོའི་བོད་མི་མཚོ་སྔོན་ཚེ་རིང་ལགས་སུ་སྒེར་གྱི་འཁོན་སེམས་བཅིངས་ཏེ་སྤྱི་ཚོགས་ལ་རྙོག་ཟིང་བསླངས་བའི་ཉེས་མིང་འོག་ཟླ་བརྒྱད་ཀྱི་བཙོན་འཇུག་ཁྲིམས་ཐག་བཅད་འདུག
དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན། འདི་ལོའི་ཕྱི་ཟླ་ ༡༠ ཚེས་ ༢༧ ཉིན་རྔ་བ་ཁུལ་ཁྱུང་མཆུ་རྫོང་ཁྲིམས་ཁང་གིས་བོད་ཀྱི་ཁོར་ཡུག་སྲུང་སྐྱོབ་པ་གཞོན་ནུ་མཚོ་སྔོན་ཚེ་རིང་ལགས་སུ། སྒེར་གྱི་འཁོན་སེམས་འཁུར་ཏེ་སྤྱི་ཚོགས་ལ་རྙོག་ཟིང་བསླངས་བའི་ཉེས་མིང་འོག་ཟླ་བརྒྱད་ཀྱི་བཙོན་འཇུག་ཁྲིམས་ཐག་བཅད་དེ་ཁྱུང་མཆུ་རྫོང་བཙོན་ཁང་དུ་བཅུག་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཁྱུང་མཆུ་རྫོང་ཁྲིམས་ཁང་གིས་གྱོད་དོན་གྱི་ངོ་བོ་བསྒྱུར་ཏེ་སྒེར་གྱི་འཁོན་སེམས་འཁུར་ཏེ་སྤྱི་ཚོགས་ལ་རྙོག་ཟིང་བསླངས་བའི་ཉེས་མིང་འོག དང་ཐོག་ཚེ་རིང་ལགས་ལ་ཉུང་མཐར་ལོ་གཅིག་དང་ཕྱེ་ཀ་ལྷག་གི་ཁྲིམས་ཐག་གཅོད་རྒྱུ་ཡིན་ཚུལ་བརྗོད་ཡོད་ཀྱང་། ཁོང་ལ་ཁྲིམས་འགལ་ནག་ཉེས་གང་ཡང་མེད་པར་བརྟེན་ཟླ་ ༨ ཀྱི་ཁྲིམས་ཐག་བཅད་ཡོད་ཀྱང་། མུ་མཐུད་ནས་དོ་བདག་དང་ཁྱིམ་མིའི་རྣམ་འགྱུར་ལ་བལྟ་དགོས་པ་ལས་མཐའ་མའི་ཐག་གཅོད་མིན་ལུགས་ཀྱང་བརྗོད་ཡོད་འདུག
ཚེ་རིང་ལགས་ཀྱིས་ཁོར་ཡུག་སྲུང་སྐྱོབ་ཆེད་གོང་རིམ་ལ་ཞུ་གཏུག་བྱས་པ་དང་ཉེས་མེད་རུབ་བརྡུང་བཏང་བར་ས་གནས་མི་མང་གིས་གདུང་སེམས་མཉམ་སྐྱེད་དང་རྡོག་རྩ་གཅིག་སྒྲིལ་བྱེད་ཀྱི་ཡོད་པར་བརྟེན། ཁྲིམས་ཁང་གིས་མི་མང་ལ་གནོན་ཤུགས་སྤྲོད་ཐབས་ལྟ་བུ་བྱས་ཏེ། ཕྱི་ཟླ་ ༡༠ ཚེས་ ༢༧ ཉིན་ཁྲིམས་ར་བསྡུ་རྒྱུ་ཡིན། ཁྲིམས་རའི་ཟུར་ཉན་དུ་ཡོང་འདོད་ཡོད་མཁན་ཚོས་ཉིན་གཉིས་གསུམ་གྱི་གོང་ནས་སོ་སོའི་ཐོབ་ཐང་དཔང་ཡིག་གོང་རིམ་ལ་སྤྲོད་དགོས་སྐོར་གྱི་གསལ་བརྡ་བཏང་ཡོད་སྟབས། མི་བཅུ་གྲངས་ཤིག་མ་གཏོགས་མང་པོ་ཞིག་གིས་ཐོབ་ཐང་དཔང་ཡིག་ཡར་སྤྲོད་པར་འཛེམས་དགོས་བྱུང་ཡོད་འདུག
ཡང་གནས་ཚུལ་མཁོ་སྤྲོད་པས། མཚོ་སྔོན་ཚེ་རིང་ལགས་ཀྱི་ཞུ་གཏུག་གི་གནས་ཚུལ་སྤྱི་ཚོགས་ཐོག་ཁྱབ་རྒྱ་ཆེན་པོ་ཕྱིན་པར་བརྟེན། ད་ལྟ་ཁྱུང་མཆུ་རྫོང་སྲིད་གཞུང་གིས་ཚ་རུ་མ་ཡུལ་ཚོ་གཙོ་བོར་གྱུར་བའི་ཁྱུང་མཆུ་རྫོང་གི་སེར་སྐྱ་མང་ཚོགས་ཀྱི་འགྲོ་འདུག་ལ་དམ་དྲག་བྱེད་ཀྱི་ཡོད་པ་མ་ཟད། ཕྱི་ཟླ་ ༡༡ པའི་ནང་ནས་བཟུང་རྫོང་ཡོངས་ནང་ཤིང་རྐང་གཅིག་ཀྱང་གཅོད་གཏུབ་མི་ཆོག་པའི་བཀའ་རྒྱ་བསྒྲགས་ཡོད་སྐོར་བརྗོད་བྱུང་།
འདས་ལོར་མཚོ་སྔོན་ཚེ་རིང་ལགས་ཀྱིས་ཨན་ཧེ་འཛུགས་སྐྲུན་ཚད་ཡོད་ཚོང་གཉེར་ཁང་ (安徽先河建筑工程又很公司) གིས་ཚ་རུ་མའི་རྡང་ཆུ་གཙང་པོའི་ཆུ་གཞུང་ནས་བྱེ་མ་འབོར་ཆེན་དབོར་འདྲེན་བྱས་ཏེ་གཙང་བོར་གནོད་སྐྱོན་ཚབས་ཆེན་ཐེབས་ཀྱི་ཡོད་པའི་གནད་དོན་གོང་རིམ་ལ་ཡར་ཞུ་བྱས་པར་བརྟེན། ཚོང་གཉེར་ཁང་དེའི་གནད་ཡོད་མི་སྣས་ལས་མི་ཁག་ཅིག་འཁྲིད་ཡོང་ནས་ཚེ་རིང་ལགས་ལ་རུབ་རྡུང་བརྒྱབ་ནས་རྨས་སྐྱོན་བཟོས་ཡོད་པ་རེད། འོན་ཀྱང་། ཁྱུང་མཆུ་རྫོང་ཁྲིམས་ཁང་གིས་རྡང་ཆུ་གཙང་བོར་གནོད་སྐྱོན་ཚབས་ཆེན་ཐེབས་པའི་གྱོད་དོན་གྱི་རྩ་བ་བཞག་སྟེ་མི་སྒེར་གྱི་འཁོན་སེམས་འཁུར་ནས་སྤྱི་ཚོགས་ལ་རྙོག་ཟིང་བསླངས་ཡོད་ཚུལ་གྱི་ནག་ཉེས་གཡོགས་ཡོད་འདུག
འདི་ལོའི་ཕྱི་ཟླ་ ༡༠ ཚེས་ ༡༥ ཉིན་མཚོ་སྔོན་ཚེ་རིང་ལགས་ཀྱིས། སྒེར་གྱི་མགྱོགས་འཕྲིན་ (Kuaishou) སྟེང་སྐར་མ་ལྔ་མ་ཟིན་ཙམ་གྱི་གཏུག་བཤེར་བརྙན་ཐུང་ཞིག་སྤེལ་ཏེ། ཕྱི་ལོ ༢༠༢༣ ཟླ ༥ ནས་བཟུང་ཨན་ཧེའཛུགས་སྐྲུན་ཚད་ཡོད་ཚོང་ཉེར་ཁང་གིས། སི་ཁྲོན་ཞིང་ཆེན་རྔ་བ་ཁུལ་ཁྱུང་མཆུ་རྫོང་གི་ཚ་རུ་མ་ཡུལ་ཚོའི་གཞུང་ལམ་གསར་རྒྱག་སྐབས། ཁྲིམས་འགལ་གྱིས་ལམ་འགྲམ་རྡང་ཆུ་གཙང་པོའི་ཆུ་གཞུང་སྔོག་འདོན་བྱས་ཏེ་བྱེ་མ་འབོར་ཆེན་དབོར་འདྲེན་བྱས་རྐྱེན། གཙང་བོ་དང་སྐྱེས་ཁམས་ཁོར་ཡུག་ལ་གནོད་སྐྱོན་ཚབས་ཆེན་ཐེབས་ཡོད་པ་མ་ཟད། ས་གནས་མི་མང་དང་སྒོ་ཕྱུགས་སེམས་ཅན་གྱི་འཚོ་གནས་ལའང་ཉེན་ཁ་ཆེན་པོ་བཟོ་ཡི་ཡོད་པ་བརྙན་ལམ་ནས་ཁ་གསལ་བརྗོད་འདུག
མཚོ་སྔོན་ཚེ་རིང་ལགས་ནི་ད་ལྟ་རང་ལོ་ ༢༩ ཡིན་ཞིང་། ཕ་ཕུར་ཁོ་དང་མ་དབང་སྒྲོན་གཉིས་ཀྱི་བུ་གཅིག་པུ་དེ་ཡིན་ལ། ཕ་ཕུར་ཁོ་ནི་ལོ་ ༦༠ ཡས་མས་ཙམ་དང་མ་དབང་སྒྲོན་ནི་ལོ་ལྔ་བཅུའི་ནང་ཙམ་ཡིན། མཚོ་སྔོན་ཚེ་རིང་ནི་དུས་རྒྱུན་སྤྱི་པའི་ལས་དོན་ཐོག་འགན་འཁུར་ཆེན་པོ་ལེན་མཁན་ཞིག་ཡིན་འདུག་ཀྱང་། འདི་ལོའི་ཕྱི་ཟླ་ ༡༠ ཚེས་ ༢༢ ཉིན་འཛིན་བཟུང་བྱས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
རྩོམ་སྒྲིག་བྱེད་མཁན། པདྨ་མཚོ།
