རྒྱ་ནག་དམངས་གཙོ་དོན་གཉེར་བའི་མཐུན་ཚོགས་ཀྱིས་བཙུགས་པའི་འོད་སྣང་ཉིན་རེའི་ཚགས་པར་ཁང་གི་རྩོམ་སྒྲིག་པ་ཟུར་པ་དོང་ཡུ་ཡུ་ལགས་ཀྱིས་གསང་ཉུལ་བྱས་པའི་ཉེས་མིང་འོག་ལོ་བདུན་གྱི་བཙོན་འཇུག་ཁྲིམས་ཐག་བཅད་འདུག
Dong Yuyu, a former editor of Guangming Daily sentences to jail on spy charges. photo :Reuters
དེ་རིང་རྒྱ་ནག་པེ་ཅིན་ཁྲིམས་ཁང་གིས་ཕྱི་ལོ་ ༢༠༢༢ ཟླ་ ༢ ནང་རྒྱ་ནག་ཉེན་རྟོག་པས་པེ་ཅིན་ནས་གསང་བའི་བཙན་འཁྲིད་བྱས་པའི་འོད་སྣང་ཉིན་རེའི་ཚགས་པར་ཁང་(Guangming Daily) གི་རྩོམ་སྒྲིག་པ་ཟུར་པ་སྐུ་ཞབས་དོང་ཡུ་ཡུ་ལགས་ལ་ལོ་བདུན་གྱི་ཁྲིམས་ཐག་བཅད་ཡོད་པ་དང་། ཁོང་གིས་གསང་ཉུལ་བའི་ལས་ཀ་བྱས་ཡོད་པའི་ནག་ཉེས་གཡོགས་འདུག
གནད་དོན་དེའི་ཐད་ཨེ་ཤ་ཡའི་གསར་འགོད་པ་སྲུང་སྐྱོབ་ཚོགས་པ་(Committee to Protect Journalists) འཆར་འགོད་འགན་འཛིན་གསར་འགོད་པ་བྷེ་ལི་ཡི་(Beh Lih Yi) ལགས་ཀྱིས། ཕྱི་འབྲེལ་དཔོན་རིགས་དང་ཐུག་འཕྲད་བྱེད་པ་ནི་གསར་འགོད་པའི་ལས་ཀའི་ཆ་ཤས་ཤིག་ཡིན། རྫུན་དང་དྲང་བདེན་མིན་པའི་ཉེས་འཛུགས་བྱས་ཏེ་གསར་འགོད་པ་རྣམས་བཙོན་དུ་འཇུག་པ་ནི་དྲང་བདེན་ལ་རྡོག་རོལ་བཏང་བ་ཡིན་པས། རྒྱ་ནག་ནང་གསར་འགོད་པ་རྣམས་ལ་རང་དབང་དང་བདེ་འཇགས་ངང་ལས་དོན་སྒྲུབ་པའི་གོ་སྐབས་སྤྲད་དགོས། ཞེས་བརྗོད་འདུག
སྐུ་ཞབས་དོང་ཡུ་ཡུ་ལགས་ཀྱི་ནང་མིས་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། ད་ལན་ཁྲིམས་མཐུན་མིན་པའི་ཐག་གཅོད་དེ་ནི་སྐུ་ཞབས་དོང་ཡུ་ཡུ་དང་ནང་མི་གཅིག་པུ་མིན་པར། དེ་ནི་རང་དབང་གི་བསམ་བློ་ཡོད་པའི་གསར་འགོད་པ་དང་འཛམ་གླིང་མཛའ་མཐུན་འདོད་པའི་རྒྱ་རིགས་དཀྱུས་མ་ཚོར་དྲང་བདེན་མིན་པའི་ཐག་གཅོད་ཅིག་རེད། ཅེས་བརྗོད་འདུག་ལ། ཁོང་གི་ནང་མི་དང་འགྲོ་བ་མིའི་ཐོབ་ཐང་རྩོད་ལེན་པ་ཁག་ཅིག་གིས་ཁོང་ཉིད་ཀློད་གྲོལ་གཏང་དགོས་པའི་དགོས་འདུན་བཏོན་འདུག
སྐུ་ཞབས་དོང་ཡུ་ཡུ་ལགས་ཀྱིས་རྒྱུན་དུ་གསར་འགོད་པ་དང་ཕྱིའི་རྒྱལ་ཁབ་ཁག་གི་སྐུ་ཚབ་ཚོགས་ཆུང་ཁག་ལ་ཐུག་འཕྲད་མང་པོ་བྱེད་ཀྱི་ཡོད་ཅིང་། ཕྱི་ལོ་ ༢༠༢༢ ཟླ ༢ ནང་པེ་ཅིན་གྱི་དགུན་དུས་པོ་ལིམ་ཕིག་གི་རྩེད་འགྲན་ཚར་བའི་ཕྱི་ཉིན་དེར། རྒྱལ་ས་པེ་ཅིན་དུ་ཉི་ཧོང་གི་སྐུ་ཚབ་ཚོགས་ཆུང་ཞིག་དང་ཐུག་འཕྲད་ཀྱིས་གུང་ཟས་ལ་རོལ་བཞིན་པའི་སྐབས་སུ་གློ་བུར་དུ་ཉེན་རྟོག་པས་ཚང་མ་བཙན་འཁྲིད་བྱས་འདུག་ལ། ཁོང་ལ་ཁྲིམས་ཐག་གཅོད་སྐབས་ཀྱང་ཉེན་རྟོག་པས་དམ་དྲག་ཆེན་པོས་གསར་འགོད་པ་དང་ཟུར་ཉན་པ་སོགས་ཁྲིམས་ཁང་དུ་བཅར་བཅུག་མེད་པའི་གནས་ཚུལ་ཐོན་ཡོད་པའི་ཁར། འདས་ལོའི་ཕྱི་ཟླ་ ༧ པ་ནས་ཁོང་ལ་ཁྲིམས་བཤེར་རིགས་ཚང་མ་ཚར་ཡོད་ནའང་། ད་བར་ཁྲིམས་ཐག་མ་བཅད་པར་བཞག་ཡོད་པ་རེད།
འོད་སྣང་ཉིན་རེའི་ཚགས་པར་ཁང་ནི་ཕྱི་ལོ་ ༡༩༤༩ ལོར་རྒྱ་ནག་དམངས་གཙོ་དོན་གཉེར་བའི་མཐུན་ཚོགས་ཀྱིས་གཞུང་འབྲེལ་ཐོག་གསར་འཛུགས་བྱས་ཏེ། ཕྱི་ལོ་ ༡༩༨༢ ལོ་ནས་བཟུང་རྒྱ་ནག་དམར་གཞུང་གིས་འཛིན་སྐྱོང་བྱས་ཏེ་རིག་གསར་སྐབས་སུ་ཚགས་པར་ཁང་ཆེན་པོ་གསུམ་གྱི་ནང་ནས་གཅིག་ཡིན་པ་མ་ཟད། ཕྱི་ལོ་ ༡༩༧༦ ལོར་དམར་ཤོག་ཚོགས་པའི་ཆབ་སྲིད་འཐབ་རྩོད་ཁྲོད་དུ་དམར་ཤོག་ཚོགས་པའི་ཚོགས་གཙོ་ཧྭ་གོ་ཧྥུང་དང་མི་བཞི་ཤོག་ཁག་བར། དེ་བཞིན་ཕྱི་ལོ་ ༡༩༧༨ ལོར་ཧྭ་གོ་ཧྥུང་དང་ཏུན་ཞོ་ཕིན་བར་གྱི་འཐབ་རྩོད་ཁྲོད་ཚགས་པར་གལ་ཆེན་ཞིག་ཏུ་གྱུར་ཡོད་འདུག
ད་ལྟ་རང་ལོ་ ༦༢ ཡིན་པའི་སྐུབས་ཞབས་དོང་ཡུ་ཡུ་ལགས་ནི་ཕྱི་ལོ་ ༡༩༦༢ ལོར་རྒྱ་ནག་ཧྥུ་ཧྲན་དུ་སྐྱེས་ཤིང་། ཕྱི་ལོ་ ༡༩༨༧ ལོར་པེ་ཅིན་གཙུག་ལག་སློབ་གཉེར་ཁང་གི་ཁྲིམས་ལུགས་སློབ་ཆེན་(Peking University Law School) ནས་སློབ་མཐར་ཕྱིན། ཁོང་ཕྱི་ལོ་ ༡༩༨༧ ལོ་ནས་རྒྱ་ནག་འོད་སྣང་ཉིན་རེའི་ཚགས་པར་ཁང་དུ་ཞུགས། ཕྱི་ལོ ༡༩༨༩ ལོར་གནམ་སྡེ་སྒོ་མོ་ཆེའི་སློབ་ཕྲུག་ཡར་ལང་གི་ལས་འགུལ་ཁྲོད་དུའང་ཁོང་མཉམ་ཞུགས་གནང་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
