ཨ་རིའི་གྲོས་ཚོགས་སུ་དོན་ཚན་གསུམ་ཅན་གྱི་བོད་དོན་རྒྱབ་སྐྱོར་གྱི་ཁྲིམས་འཆར་ཞིག་གཏན་འབེབ་གནང་སྟེ་ཨ་རིའི་རྒྱལ་སྲུང་ཁྲིམས་ཡིག་གི་ཁོངས་སུ་བཅུག་ཡོད་ཅིང་། སྲིད་འཛིན་བྷའེ་ཌན་མཆོག་གིས་མཚན་རྟགས་བསྐྱོན་རྗེས་ཨ་རིའི་ཁྲིམས་སུ་འགྱུར་གྱི་ཡོད་འདུག
དྲ་ལམ་གྱི་པར།
ཁ་སང་ཕྱི་ཚེས་ ༡༨ ཉིན་ཨ་རིའི་གྲོས་ཚོགས་སུ་རྒྱལ་སྲུང་ཁྲིམས་ཡིག་(National Defense Authorization Act ) གཏན་འབེབས་བྱས་པའི་ཁྲོད། རྒྱ་ནག་གཞུང་གིས་བོད་མིའི་ཐོག་སྲིད་ཇུས་མཁྲེགས་འཛིན་བྱེད་མུས་ཡིན་པ་དང་བསྟུན། བོད་མིའི་བདེ་འཇགས་དང་གཞི་རྩའི་འགྲོ་བ་མིའི་ཐོབ་ཐང་སོགས་འགེབས་སྲུང་གི་སླད་དོན་ཚན་གསུམ་ཅན་གྱི་ཁྲིམས་འཆར་ཞིག་གཏན་འབེབས་བྱུང་ཡོད་ཅིང་། ད་ལྟ་ཨ་རིའི་སྲིད་འཛིན་བྷའེ་ཌན་མཆོག་ནས་མཚན་རྟགས་བསྐྱོན་རྗེས་དངོས་སུ་ཨ་རིའི་ཁྲིམས་ཆགས་ཀྱི་ཡོད་པ་མ་ཟད། ད་ལན་གཏན་འབེབས་བྱུང་བའི་ཁྲིམས་འཆར་དེ་ཨ་རིའི་རྒྱལ་སྲུང་ཁྲིམས་ཡིག་གི་ཁོངས་སུ་བཅུག་ཡོད་སྟབས། ཨ་རིའི་རྒྱལ་སྲུང་བདེ་འཇགས་དང་འབྲེལ་བའི་ཁྲིམས་ཡིག་གལ་ཆེན་ཞིག་ཆགས་རྒྱུ་ཡིན་འདུག
གནད་དོན་དེའི་ཐད་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ཀྱིས། ཨ་རིའི་གྲོས་ཚོགས་ཀྱིས་བོད་དོན་རྒྱབ་སྐྱོར་གྱི་ཁྲིམས་ཡིག་དོན་ཚན་གསུམ་ཅན་དེ་ཕྱི་ལོ་ ༢༠༢༤ རྒྱལ་སྲུང་ཁྲིམས་ཡིག་གི་ཁོངས་སུ་བཅུག་སྟེ། བོད་དང་ཨེ་ཤ་ཡའི་རང་ཐག་རང་གཅོད་ལ་རྒྱབ་སྐྱོར་གྱི་ལངས་ཕྱོགས་བརྟན་པོ་བཟུང་ཡོད། རྒྱ་ནག་གཞུང་གིས་བོད་མི་ཚོར་གཉའ་གནོན་བྱེད་པའི་དངོས་ཡོད་གནས་སྟངས་གསལ་སྟོན་དང་། བོད་དེ་རྒྱལ་སྤྱིའི་སྤྱི་ཚོགས་ལས་ཁ་བྲལ་དུ་འཇུག་མཁན་གྱི་རྒྱ་ནག་གི་དཔོན་རིགས་ཚོ་ཨ་རིའི་ནང་འགྲོ་འོང་གི་ཐོབ་ཐང་མེད་པ་བཟོ་རྒྱུ་དང་། ཨ་རིའི་སྲིད་འཛིན་མཆོག་གིས་གང་མགྱོགས་ཁྲིམས་ཡིག་ལ་མཚན་རྟགས་དགོད་རྒྱུའི་རེ་བ་ཡོད། ཅེས་བརྗོད་འདུག
ཁྲིམས་འཆར་དེའི་དོན་ཚན་དང་པོའི་ཁྲོད། ཨ་རིའི་གཞུང་གི་དཔོན་རིགས་དང་། གསར་འགོད་པ། རང་དབང་ཉམས་ཞིབ་པ། བོད་རིགས་ཨ་རི་བ། དེ་བཞིན་ཡུལ་སྐོར་སྤྲོ་འཆམ་པ་སོགས་བོད་ནང་འགྲོ་རྒྱུར་དམ་དྲག་བྱེད་མུས་ཡིན་པར་གདོང་ལེན་གྱི་ཐོག་ནས། ཕྱི་ལོ་ ༢༠༡༨ ལོར་གཏན་འབེབས་བྱས་པའི་བོད་ནང་འགྲོ་འོང་འདྲ་མཉམ་གྱི་ཁྲིམས་ཡིག་གི་དགོངས་དོན་བཞིན། བོད་ནང་རང་དབང་གི་ཐོག་ནས་མུ་མཐུད་མི་ལོ་ལྔའི་རིང་འགྲོ་སྐྱོད་ཀྱི་རང་དབང་ཚད་ལྡན་དགོས་པ། དོན་ཚན་གཉིས་པ། ཨ་རིའི་རྒྱལ་སྲུང་ལས་ཁུངས་ཀྱི་དམག་དོན་དང་བདེ་འཇགས་ལོ་འཁོར་སྙན་ཐོའི་ནང་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དང་། རྒྱ་ནག་གཞུང་གིས་བོད་ནང་ཤུགས་རྐྱེན་ཇི་ལྟར་སྤྲོད་ཀྱིན་ཡོད་མེད་ཀྱི་ཐད་ནས་གསལ་སྟོན་རང་བཞིན་གྱི་ཐོག་ནས་ཐེར་འདོན་བྱ་དགོས་པ། དོན་ཚན་གསུམ་པ། རྒྱ་ནག་གཞུང་གིས་ཁྲིན་ཏུའུ་རྟེན་གཞི་བྱས་པའི་ཨ་རིའི་གཞུང་ཚབ་ཁང་སྒོ་བརྒྱབ་ཏུ་བཅུག་པ་དང་། དེས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ལྟ་ཞིབ་དང་འཚོལ་བསྡུ་སོགས་ཀྱི་ལས་དོན་ལ་ཤུགས་རྐྱེན་དང་འགོག་རྐྱེན་ཇི་ཙམ་བཟོས་ཡོད་མེད་ཐད་ཀྱི་སྙན་ཐོ་འདོན་རྒྱུ་བཅས་ཡིན་འདུག
ཁྲིམས་འཆར་དེའི་སླད་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་དང་། ཨ་རིའི་གྲོས་ཚོགས་འོག་མའི་འཐུས་མི་དང་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་(Marco Rubio) མཆོག་དང་སྐུ་ཞབས་ཇེ་ཧྥི་མེཀ་ལེ་(Jeff Merkley) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཇེམ་སི་(Jim Risch) སོགས་ཀྱིས་ཚད་མཐོའི་རྒྱབ་སྐྱོར་གྱིས་ཞུ་སྐུལ་གནང་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
