བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གཞུང་གིས་འགྲོ་བ་མིའི་ཐོབ་ཐང་གི་ལས་འགུལ་སྤེལ་མཁན་རྣམས་ལ་རྒྱལ་མཚམས་ལས་བརྒལ་བའི་དྲག་གནོན་བྱ་རྒྱུ་མཚམས་འཇོག་ངེས་པར་དུ་བྱེད་དགོས་པའི་སྐྱོན་བརྗོད་བྱས་འདུག
ཉེ་ལམ་རྒྱ་ནག་གཞུང་གིས་ཁེ་ན་ཌའི་བོད་དོན་ཚོགས་པ་དང་ཡུ་གུར་འགྲོ་བ་མིའི་ཐོབ་ཐང་དོན་གཉེར་ཚོགས་པ་གཉིས་ཀྱི་ཚོགས་མི་དང་འབྲེལ་ཡོད་མི་སྣ་ ༢༠ ལ་དཔལ་འབྱོར་གྱི་ཉེས་ཆད་དང་རྒྱ་ནག་ཏུ་འགྲོ་འོང་བཀག་སྡོམ་བྱ་རྒྱུའི་གསལ་བསྒྲགས་བྱས་པར་བརྟེན། དེ་རིང་བོད་མི་མང་སྤྱི་འཐུས་ལྷན་ཚོགས་ནས་གསར་འགོད་བསྒྲགས་གཏམ་ཞིག་སྤེལ་ཡོད་པའི་ནང་། བོད་མི་མང་སྤྱི་འཐུས་ལྷན་ཚོགས་ནས་ཁེ་ན་ཌ་བོད་དོན་ལྷན་ཚོགས་དང་། ཁེ་ན་ཌ་ཡུ་གུར་ཐོབ་ཐང་རྩོད་ལེན་ཚོགས་པ་གཉིས་ཀྱི་ཚོགས་མི་རྣམས་ལ་གདུང་སེམས་མཉམ་སྐྱེད་ཞུ་རྒྱུ་དང་། རྒྱ་ནག་དམར་གཞུང་གིས་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་བཏང་དང་གཏོང་བཞིན་པ་རྣམས་ཐེར་འདོན་གནང་བར་ཁྱེད་རྣམ་པའི་བློ་སྟོབས་ལ་བསྔགས་བརྗོད་ཞུ་རྒྱུ་ཡིན། རྒྱ་ནག་དམར་གཞུང་གིས་ཚོགས་སྡེ་དང་། མི་སྒེར་བཅས་ལ་དེ་འདྲའི་སྲིད་དོན་ཉེས་ཆད་བཀལ་བར་སྐྱོན་བརྗོད་ཤུགས་ཆེན་བྱ་རྒྱུ་མ་ཟད། རྒྱ་ནག་དམར་གཞུང་གིས་འགྲོ་བ་མིའི་ཐོབ་ཐང་གི་ལས་འགུལ་སྤེལ་མཁན་རྣམས་ལ་དེ་འདྲའི་རྒྱལ་མཚམས་ལས་བརྒལ་བའི་དྲག་གནོན་བྱ་རྒྱུ་ངེས་པར་དུ་མཚམས་འཇོག་དགོས་པའི་ནན་སྐུལ་བྱ་རྒྱུ་ཡིན། ཞེས་གསལ་འདུག
དེ་འབྲེལ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་། ཐེངས་འདིའི་གནད་དོན་བརྒྱུད་རྒྱ་ནག་གཞུང་གིས་བོད་ནང་དཀའ་ངལ་ཡོད་པར་ངོས་ལེན་བྱས་ཡོད་པ་མ་ཟད། བོད་ཀྱི་གནད་དོན་ཐོག་ཞེད་སྣང་བྱེད་བཞིན་པ་གསལ་སྟོན་བྱས་ཡོད་པས། ཁེ་ན་ཌ་བོད་དོན་ལྷན་ཚོགས་ལ་བསྔགས་བརྗོད་དང་། ཁེ་ན་ཌའི་གཞུང་གིས་བོད་དོན་ཐོག་མུ་མཐུད་དུ་རྒྱབ་སྐྱོར་གནང་དགོས་སྐོར་བརྗོད་འདུག
ཁ་སང་ཕྱི་ཚེས་ ༢༤ ཉིན་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཇེ་མེ་སི་མཱེ་ལོ་ནི་ (James Maloney) ལགས་ཀྱིས་བསྒྲགས་གཏམ་ཞིག་སྤེལ་བའི་ནང་། རང་ཉིད་ཁེ་ན་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་ཞིག་ཡིན་པའི་ཐོག་ནས་ཁེ་ན་ཌའི་བོད་དོན་ཚོགས་པ་དང་ཁེ་ན་ཌའི་ཡུ་གུར་འགྲོ་བ་མིའི་ཐོབ་ཐང་དོན་གཉེར་ཚོགས་པ་གཉིས་ལ་རྒྱབ་སྐྱོར་བརྟན་པོ་ཡོད་པ་མ་ཟད། རྒྱ་གཞུང་གིས་སྲིད་དོན་ཉེས་ཆད་བཀལ་བར་མཐའ་གཅིག་ཏུ་ངོ་རྒོལ་བྱེད་བཞིན་ཡོད། ཁེ་ན་ཌའི་གཞུང་དང་ཁེ་ན་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གཉིས་ཀྱིས་གནད་དོན་དེ་དང་འབྲེལ་ནས་དོ་ཕོག་བྱུང་བའི་མི་རྣམས་ཀྱི་བདེ་འཇགས་ལ་སྲུང་སྐྱོབ་བྱ་རྒྱུ་ཡིན། ཞེས་བརྗོད་འདུག
རྒྱ་ནག་གིས་དཔལ་འབྱོར་ཉེས་ཆད་བཅད་པའི་ཚོགས་མི་ ༢༠ ལས་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཚོགས་མི་ ༥ དང་ཁེ་ན་ཌའི་ནང་ཡོད་པའི་ཡུ་གུར་བའི་འགྲོ་བ་མིའི་ཐོབ་ཐང་དོན་གཉེར་ཚོགས་པའི་ཚོགས་མི་ ༡༥ ཡོད་འདུག དེ་ཡང་། རྒྱ་ནག་གིས་ཉེས་ཆད་བཅད་པའི་ཚོགས་མི་ནི། ཁེ་ན་ཌའི་བོད་དོན་ཚོགས་པའི་སྤྱི་ཁྱབ་འགན་འཛིན་ཤེས་རབ་མཐར་ཕྱིན་ལགས་དང་། ལྷ་ལུང་པ་བསམ་འཕེལ་རྡོ་རྗེ་ (Samphel Dorjee Lhalungpa)། དེ་བཞིན་ཚོགས་མི་གཞན་གསུམ་དང་། ཁེ་ན་ཌའི་ནང་ཡོད་པའི་ཡུ་གུར་བའི་འགྲོ་བ་མིའི་ཐོབ་ཐང་དོན་གཉེར་ཚོགས་པའི་སྤྱི་ཁྱབ་འགན་འཛིན་མཱེ་མེ་ཊི་ (Mehmet Tohti) ལགས་དང་། འགན་འཛིན་ལྷན་ཚོགས་ཀྱི་ཚོགས་མི་ཨོ་ཊ་ཝ་གཙུག་ལག་སློབ་གཉེར་ཁང་གི་སློབ་དཔོན་སི་ཁོ་ཊི་ (Scott Simon) ལགས། སློབ་དཔོན་ཇོན་ (John Packer) ལགས། ཁྲིམས་རྩོད་པ་སཱ་རཱ་ (Sarah Teich) ལགས། ཁྲིམས་རྩོད་པ་ཌེ་ཝི་ཌི་ (David Matas) ལགས། འགྲོ་བ་མིའི་ཐོབ་ཐང་དོན་གཉེར་བ་མར་ཁ་སི་ (Marcus Kolga)། ཚོགས་པ་དེའི་སྲིད་ཇུས་སློབ་སྟོན་པ་ཆར་ལེ་སི་བྷར་ཊོན་ (Charles Burton) ལགས་དང་། ཁེ་ན་ཌའི་དཔལ་འབྱོར་ལྷན་ཁང་གི་བློན་ཆེན་གཞོན་པའི་ཕྱག་རོགས་ཇོན་སི་ཊོན་ (Margaret McCuaig-Johnston) ལགས་སོགས་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། བསྟན་འཛིན་ཕུར་བུ།
