རྒྱ་གཞུང་གིས་བོད་མཚོ་སྔོན་ཞིང་ཆེན་གྱི་མར་སྟེང་ཆུ་གློག་ས་ཚིགས་དང་གཡང་འཁྱིལ་ཆུ་གློག་ས་ཚིགས་གཉིས་ཀྱི་གློག་འདོན་མགོ་བཙུགས་འདུག
ཕྱི་ལོ་ ༢༠༢༤ ཟླ་ ༡༢ ཚེས་ ༣༡ ཉིན་རྒྱ་ནག་གཞུང་གིས་བོད་མཚོ་སྔོན་ཞིང་ཆེན་མགོ་ལོག་ཁུལ་རྨ་ཆེན་རྫོང་ར་རྒྱ་གྲོང་རྡལ་དུ་གསར་རྒྱག་བྱས་ཡོད་པའི་མར་སྟེང་ཆུ་གློག་ས་ཚིགས་ཟེར་བ་དེ་དངོས་སུ་གཏོང་མགོ་བཙུགས་ཡོད་ཅིང་། ཆུ་གློག་ས་ཚིགས་དེའི་སྤྱིའི་གློག་འདོན་ཚད་གཞི་སྟོང་ཝ་ཊ་ཁྲི་ ༢༣༢ ཡིན་པ་དང་། ལོ་རེའི་ཆ་སྙོམས་གློག་འདོན་ཚད་ཆུ་ཚོད་རེར་སྟོང་ཝ་ཊ་དུང་ཕྱུར ༧༣།༠༤ ཡིན་འདུག ལོ་རེའི་གློག་སྤྱོད་ཚད་ཆུ་ཚོད་རེར་སྟོང་ཝ་ཊ་ ༤༠༠༠ ཡིན་པའི་ཁྱིམ་ཚང་ཁྲི་ ༡༨༢།༥ ལ་གློག་སྤྱོད་མཁོ་སྤྲོད་ཐུབ་པ། ལོ་རེར་ཚད་ལྡན་རྡོ་སོལ་ཏུན་ཁྲི་ ༢༢༠ གྲོན་ཆུང་ཐུབ་པ་དང་། དབྱང་གཉིས་ཐཱན་འགྱུར་(Carbide Oxide)འབུད་ཚད་ཏུན་ཁྲི་ ༨༡༦ དང་དབྱང་གཉིས་མུ་ཟི་འགྱུར་རྫས་ (sulphur dioxide) ཕྱིར་འབུད་བྱེད་ཚད་ཏུན་ཁྲི ༣།༠༤ ཉུང་དུ་གཏོང་ཐུབ་སྐོར་བསྒྲགས་འདུག ཕྱི་ཟླ་ ༡༢ ཚེས་ ༢༦ ཉིན་རྒྱ་ནག་གཞུང་གིས་བོད་མཚོ་ལྷོ་ཁུལ་བྲག་དཀར་རྫོང་ཁོངས་ཀྱི་དཀར་མོ་གཡས་འཁྱིལ་རྨ་ཆུའི་འགྲམ་བརྒྱུད་དུ་གཡང་འཁྱིལ་ཆུ་གློག་ས་ཚིགས་ཟེར་བ་ཡོངས་སུ་འགྲུབ་སྟེ། ཆུ་གློག་ས་ཚིགས་དེའི་ཤོངས་ཚད་ས་ཡ་ཝ་ཊ་ ༡༢༠༠ གློག་འདོན་མགོ་བཙུགས་འདུག
མར་སྟེང་ཆུ་གློག་ས་ཚིགས་ནི་རྨ་ཆུའི་སྟོད་རྒྱུད་ཀྱི་ས་བབ་ཆེས་མཐོ་བའི་ཁུལ་གྱི་ཤོངས་ཚད་ཆེས་ཆེ་བའི་ཆུ་གློག་ས་ཚིགས་ཤིག་ཡིན་པ་དང་། སྤྱིའི་རིང་ཚད་ལ་རྨིད་ ༢༤༢།༦ ཡོད་པ་དང་། ཞེང་ཚད་རྨིད་ ༢༩།༣། མཐོ་ཚད་ལ་རྨིད་༧༤།༨། གཞི་རྒྱ་ཆེ་བའི་ས་འོག་གི་གློག་འདོན་བཟོ་ཁང་ཆེ་ཤོས་ཡིན་པ་མ་ཟད། ཆུ་གློག་ས་ཚིགས་དེར་ཁྱོན་འཕྲུལ་ཚན་ ༥ ཡོད་པ་ལས། སྔ་ལོའི་ཕྱི་ཟླ་ ༤ ཚེས་ ༡ ཉིན་འཕྲུལ་ཚན་གཅིག་ནས་གློག་གཏོང་མགོ་བཙུགས་ཡོད་ཅིང་། ཕྱི་ཟླ་ ༦ དང་ ༩ བརའཕྲུལ་ཚན་གཉིས་ནས་གློག་བཏང་ཡོད་པ་དང་། ཕྱི་ཟླ་ ༡༢ པའི་ཟླ་མཇུག་བར་འཕྲུལ་ཚན་ཡོངས་ནས་གློག་བཏང་ཡོད་འདུག རྒྱ་ནག་གཞུང་གིས་ནུབ་གློག་ཤར་སྐྱེལ་ཟེར་བའི་ལས་གཞི་དང་། མཚོ་སྔོན་གྱི་གློག་ནི་རྒྱ་ནག་གི་ཧི་ནན་ཞིང་ཆེན་དུ་གཏོང་བའི་གློག་ཁུངས་གལ་གནད་ཅན་ཞིག་ཡིན་འདུག
དེ་བཞིན་བོད་མཚོ་སྔོན་ཞིང་ཆེན་མཚོ་ལྷོ་ཁུལ་གསེར་ཆེན་རྫོང་བཏུལ་ཐང་དུ། རྒྱ་ནག་གི་ཧི་ནན་ཞིང་ཆེན་ནང་ཐད་ཀར་གཏོང་བཞིན་པའི་གློག་གི་ཚད་རིམ་གཉིས་པའི་སྟོང་ཝཊ་ཁྲི་ ༡༠ ཅན་གྱི་འོད་དྲོད་ལས་གཞི་ཞིག་བཙུགས་ཡོད་པ་དེས། མཚོ་སྔོན་གྱི་གློག་རྒྱ་ནག་ཧི་ནན་ཞིང་ཆེན་ནང་སྟོང་ཝཊ་ཁྲི་ ༣༤༠ ཕྱིར་གཏོང་བྱེད་བཞིན་ཡོད་འདུག
རྒྱ་ནག་གཞུང་གིས་མར་སྟེང་ཆུ་གློག་ས་ཚིགས་གསར་རྒྱག་བྱེད་སྐབས། ཁུལ་དེའི་ཁྱིམ་ཚང་བརྒྱ་ལྷག་ལ་དངུལ་འབོར་ཆེན་སྤྲད་ནས་གནས་སྤོར་བྱེད་བཅུག་ཡོད་པ་མ་ཟད། ཆུ་མཛོད་གསར་རྒྱག་བྱས་པ་ལ་བརྟེན་ནས་༧རྒྱལ་བ་ཀརྨ་པ་སྐུ་ཕྲེང་བཞི་པའི་སྐབས་ཀྱི་བཀའ་བརྒྱུད་པའི་དགོན་ཤུལ་ཞིག་དང་། ཨ་མ་མ་ལྕམ་ལྷ་མོ་ཞེས་པའི་གཞི་བདག་ཅིག དེ་བཞིན། རྭ་རྒྱའི་གདོད་མའི་ནགས་ཚལ་སོགས་ཆུའི་འོག་ཏུ་ནུབ་ཡོད་འདུག དེ་བཞིན་རྒྱ་ནག་གཞུང་གིས་གཡང་འཁྱིལ་ཆུ་གློག་ས་ཚིགས་གསར་རྒྱག་བྱས་པའི་རྐྱེན་གྱིས། ཉེ་འགྲམ་དུ་ཆགས་པའི་ཨ་ཚོགས་དགོན་བདེ་ཆེན་ཆོས་འཁོར་གླིང་དཔལ་ཁ་གྲོང་རྡལ་ནས་སྤྱི་ལེ་གསུམ་བཞི་ཙམ་གྱི་མཚམས་སུ་ཡོད་པའི་ཁྱོ་དཀར་ནག་ལོ་ཞེས་པའི་རི་སྣ་ཞིག་ཡོད་པ་དེར་གནས་སྤོར་བཏང་ཡོད་འདུག ཆུ་གློག་ས་ཚིགས་འཛུགས་སྐྲུན་དང་འབྲེལ་ནས་ཉེ་འཁྲིས་ཀྱི་ཐང་ནག་སྟོད་སྨད་བར་གསུམ་གྱི་ཁྱིམ་ཚང་ ༡༠༨༥ ཡི་མི་གྲངས་ ༤༥༥༤ གནས་སྤོར་བྱེད་དགོས་པའི་བཀའ་བཏང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
