རྒྱ་ནག་ནང་ནད་ཡམས་གསར་པ་ཞིག་མཆེད་བཞིན་འདུག

ཏོག་དབྱིབས་གཉན་རིམས་ཁྱབ་གདལ་ཤུགས་ཆེན་ཕྱིན་ཏེ་ལོ་ངོ་ལྔ་ཕྱིན་པའི་རྗེས་སུ་རྒྱ་ནག་ནང་གློ་བའི་གཉན་ཚད་ཀྱི་ནད་འབུ་གསར་པ་ཞིག་ཁྱབ་གདལ་ཤུགས་ཆེན་ཕྱིན་ནས་གློ་ནད་དང་ཏོག་དབྱིབས་ནད་ཡམས་ལྟ་བུའི་ནད་རྟགས་འཐོན་གྱིན་ཡོད་འདུག

དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་གློ་ཚད་ནད་ཡམས་དེ་ཁྱབ་གདལ་ཤུགས་ཆེན་འགྲོ་མུས་ཡིན་པས་རྒྱལ་ཡོངས་ཛ་དྲག་གི་ཉེན་བརྡ་བཏང་ཡོད་ཀྱང་། ད་ལྟའི་ཆར་ནད་ཡམས་དེའི་འབྱུང་ཁུངས་དང་ནད་འབུ་སོགས་ར་སྤྲོད་ཐུབ་ཀྱི་མེད་ཅིང་། ནད་གཞི་ཕོག་པའི་མིའི་ཁྲོད་ཆམ་རིམས་(rhinovirus) དང་གློ་ཚད་ (metapneumovirus) ཀྱི་ནད་རྟགས་ཡོད་པ་མ་ཟད། ཏོག་དབྱིབས་གཉན་རིམས་དང་འདྲ་མཚུངས་ཀྱི་ཁྱབ་བརྡལ་ཆེ་བའི་ནད་གཞི་ཞིག་ཡིན་པ་རེད་ལ། ད་ལྟ་རྒྱ་ནག་གི་འཕྲོད་བསྟེན་ཆེད་ལས་པ་དག་གིས་དོ་སྣང་ནན་པོ་བྱེད་མུས་ཡིན་འདུག

སྤྱི་ཚོགས་དྲ་ལམ་ཁག་ཏུ་གནས་ཚུལ་ཐོན་པའི་ནང་། རྒྱ་ནག་སྨན་ཁང་ཁག་ཏུ་ནད་པས་ཁེངས་ཡོད་པ་མ་ཟད། དྲ་ལམ་བཀོལ་སྤྱོད་བྱེད་མཁན་ཁག་ཅིག་གིས་ཚད་རིམས་ (Influenza) དང་། གློ་ཚད་ (Human Metapneumovirus)། ལོ་ན་རྒན་པར་ཕོག་སླ་བའི་གློ་བའི་གཉན་ཚད་ (Mycoplasma pneumoniae)། ཏོག་དབྱིབས་ནད་ཡམས་སོགས་ནད་འབུ་རིགས་འདྲ་མིན་ཁྱབ་གདལ་འགྲོ་མུས་ཡིན་ལུགས་རྗོད་ཀྱིན་འདུག

སྤྱི་ཚོགས་དྲ་ལམ་ཨེག་སི་ (X) སྟེང་དེ་འབྲེལ་གནས་ཚུལ་ཐོན་པའི་ནང་། ད་ལྟ་རྒྱ་ནག་ནང་ཆམ་རིམས་དང་ཚ་བ་རྒྱས་པ། དེ་བཞིན་གློ་ཚད་དང་ཏོག་དབྱིབས་ནད་ཡམས་ (Covid-19) ཀྱི་ནད་རིམས་སྣ་མང་སྔ་གཞུག་ཏུ་ཁྱབ་གདལ་ཕྱིན་ཏེ་སྨན་ཁང་དང་། རོ་ཁང་སོགས་ནད་པས་ཁེངས་ཡོད་ཅིང་། དམིགས་བསལ་གྱིས་བྱིས་པའི་སྨན་ཁང་དུ་དབུགས་འབྱིན་རྔུབ་བྱེད་པར་དཀའ་ངལ་ཆེན་པོ་འཕྲད་པའི་གློ་བའི་གཉན་ཚད་སོགས་་ནད་རྟགས་འཐོན་མཁན་ཇེ་མང་དུ་ཕྱིན་ཏེ་དཀའ་ངལ་ཚབས་ཆེན་འཕྲད་བཞིན་ཡོད་སྐོར་སོགས་བཀོད་འདུག

གཞན་ཡང་། འདས་ལོའི་ཕྱི་ཟླ་ ༡༢ ཚེས་ ༢༧ ཉིན་རོའུ་ཊར་གསར་ཁང་གིས་གནས་ཚུལ་སྤེལ་བའི་ནང་། རྒྱ་ནག་གི་ནད་རིགས་སྔོན་འགོག་ཚན་པས། དགུན་ཁའི་དུས་སུ་གློ་ཚད་དང་། དབུགས་འབྱིན་རྔུབ་བྱེད་པར་དཀའ་ངལ་ཆེ་བའི་ནད་རིགས་ཁག་ཅིག་ཁྱབ་གདལ་ཆེན་པོ་འགྲོ་ཉེན་ཡོད་པ་དང་། ད་ལྟའི་ཆར་གློ་ཚད་ཀྱི་འབྱུང་ཁུངས་གང་ཡིན་ཤེས་རྟོགས་བྱུང་མེད་པས་ལྟ་རྟོག་བྱེད་མུས་ཡིན་སྐོར་འགྲེལ་བརྗོད་བྱས་འདུག དེ་སྔ་ཏོག་དབྱིབས་གཉན་རིམས་ཁྱབ་གདལ་བྱེད་མགོ་བཙུགས་པའི་སྐབས་སུ་སྔོན་འགོག་དང་འབྲེལ་བའི་གྲ་སྒྲིག་གི་ཚད་གཞི་ཧ་ཅང་དམའ་བོ་ཡིན་ཡང་། ད་ལན་རྒྱ་ནག་གཞུང་གིས་ནད་རིགས་ལ་གདོང་ལེན་བྱེད་ཕྱོགས་ཀྱི་ལམ་སྟོན་ཡར་རྒྱས་གཏོང་བར་དམིགས་ནས་སྔོན་འགོག་ཚན་པ་ཆེད་འཛུགས་བྱས་ཡོད་ཚུལ་བསྒྲགས་འདུག

རྒྱ་ནག་རྒྱལ་ཡོངས་ནད་རིགས་སྔོན་འགོག་དང་ཚོད་འཛིན་དོ་དམ་ཚན་པས་ (The National Disease Control and Prevention Administration) ནད་རིགས་དེ་དང་འབྲེལ་ནས་བརྟག་དཔྱད་རིམ་པས་བྱས་ཏེ། དེ་འབྲེལ་སྔོན་འགོག་དང་ཚོད་འཛིན་གྱི་ཐབས་ལམ་ཇི་ཡོད་ཁུངས་སྐྱེལ་ར་སྤྲོད་བྱ་རྒྱུ་ཡིན་འདུག་ལ། རྒྱ་ནག་གཞུང་གིས་གསལ་བསྒྲགས་ཤིག་སྤེལ་བའི་ནང་། འདས་ལོའི་ཕྱི་ཟླ་ ༡༢ ཚེས་ ༡༦ ནས་ ༢༢ བར་གློ་བའི་གཉན་ཚད་དང་འབྲེལ་བའི་ནད་རིགས་འཐོན་མཁན་གྱི་གྲངས་འབོར་ཇེ་མང་དུ་ཕྱིན་ཡོད་སྐོར་བསྒྲགས་འདུག དེ་འབྲེལ་རྒྱ་ནག་གཞུང་གི་དཔོན་རིགས་ (Kan Biao) ཟེར་བས་གསར་འགོད་གསལ་བསྒྲགས་སྤེལ་བའི་ནང་། དགུན་དུས་དང་དཔྱིད་ཀའི་དུས་སུ་རྒྱ་ནག་ནང་དབུགས་འབྱིན་རྔུབ་བྱེད་པར་དཀའ་ངལ་འཕྲད་ཉེན་ཡོད་ཅིང་། ནད་རིགས་དེ་དང་འབྲེལ་ནས་ཞིབ་འཇུག་ཚད་ལྡན་བྱས་མེད་ཀྱང། འདི་ལོའི་ནད་པའི་གྲངས་འབོར་དེ་སྤྱི་ཡོངས་ནས་ན་ནིང་ལས་ཉུང་བ་ཡོད་ཚུལ་སོགས་བརྗོད་འདུག

ཉེ་ལམ་གློ་ཚད་དང་དབུགས་འབྱིན་རྔུབ་ཀྱི་ནད་རིགས་དང་འབྲེལ་ནས་རྟོག་ཞིབ་བྱས་པ་བརྒྱུད།ལོ་ ༡༤ མན་གྱི་བྱིས་པ་ཚོའི་ནང་དུ་དབུགས་འབྱིན་རྔུབ་ཀྱི་དཀའ་ངལ་འཕྲད་པ་སོགས་གློ་ཚད་དང་ནད་རྟགས་འཐོན་མཁན་གྱི་ནད་པ་ཇེ་མང་དུ་འགྲོ་བཞིན་ཡོད་འདུག་ལ། དམིགས་བསལ་གྱིས་རྒྱ་ནག་བྱང་ཕྱོགས་ཀྱི་ཞིང་ཆེན་ཁག་ཏུ་ནད་གཞི་དེ་ཁྱབ་གདལ་ཆེན་པོ་འགྲོ་བཞིན་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།