ཨ་རིའི་གྲོས་ཚོགས་གོང་མའི་འཐུས་མི་མཱར་ཁོ་རུ་བྷི་ཡོ་ལགས་ཀྱིས་རྒྱ་ནག་ནི་ཨ་རིའི་བདེ་འཇགས་ལ་ཉེན་ཁ་ཆེ་ཤོས་ཀྱི་རྒྱལ་ཁབ་ཅིག་ཡིན་སྐོར་སོགས་གསུངས་འདུག་ལ་ངེས་འཛིན་དེ་ཨ་རིའི་སྲིད་གཞུང་རིམ་པའི་ངོས་ནས་བྱུང་ཡོད་པ་རེད།
ཨ་རིའི་སྲིད་འཛིན་ཌོ་ནལ་ཊོམ་ཕུ་ (Donald Trump) མཆོག་གིས་མ་འོངས་གཞུང་འཛིན་ཁྲོད་གོ་གནས་མཐོ་གྲས་བཞེས་མཁན་གྱི་མཚན་གཞུང་ཡོངས་བསྒྲགས་གནང་བའི་ནང་། གྲོས་ཚོགས་གོང་མའི་འཐུས་མི་མཱར་ཁོ་རུ་བྷི་ཡོ་ (Marco Rubio) ལགས་རྒྱལ་ཁབ་དེའི་ཕྱི་སྲིད་བློན་ཆེན་དུ་མཚན་འདོན་གནང་ཡོད་པ་ལྟར། ཟླ་འདིའི་ཕྱི་ཚེས་ ༡༥ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཉན་ཞིབ་ལས་རིམ་སྟེང་། གྲོས་ཚོགས་གོང་མའི་འཐུས་མི་མཱར་ཁོ་ལགས་ཀྱིས། ཨི་ཛི་རལ་དང་ཧ་མ་སི་བར་གྱི་དམག་འཁྲུག་དང་། ཨུ་རུ་སུ་དང་ཡུ་ཁུ་རེན་གྱི་དམག་འཁྲུག དེ་བཞིན་དཀྱིལ་ཤར་ས་ཁུལ་དང་། ཡུ་རོབ་ཤར་ཕྱོགས་ཁུལ་གྱི་དཀའ་རྙོག གོ་ལའི་གནམ་གཤིས་འགྱུར་ལྡོག་སོགས་ཀྱི་སྐོར་གླེང་སློང་གནང་ཡོད་པ་དང་། རྒྱ་ནག་ནི་ཨ་རིའི་བདེ་འཇགས་ལ་ཉེན་ཁ་ཆེ་ཤོས་ཀྱི་རྒྱལ་ཁབ་ཅིག་ཡིན་པའི་ཉེན་བརྡ་བཏང་། གལ་ཏེ་ཨ་རིས་སྲིད་ཇུས་ལ་འགྱུར་བ་མ་གཏང་ཚེ། མ་འོངས་ལོ་བཅུའི་ནང་དུ་ང་ཚོའི་བདེ་འཇགས་དང་འཕྲོད་བསྟེན་སོགས་ཉིན་རེའི་འཚོ་བའི་དགོས་མཁོ་མཐའ་དག་རྒྱ་ནག་ལ་བརྟེན་དགོས་པ་དང་། རྒྱ་ནག་གིས་ཆོག་མཆན་སྤྲོད་མིན་ལ་རག་ལས་ཀྱི་ཡོད་པར་བརྟེན། ཨ་རིའི་གཞུང་གིས་སོ་སོའི་རྒྱལ་ཁབ་ཀྱི་གནད་དོན་གཙོ་བོར་འཛིན་དགོས་པ་དེ་གལ་ཆེ་བ་དང་། བཟོ་ལས་ཀྱི་ནུས་པ་སླར་གསོ་དགོས་པ། དེ་བཞིན་མང་ཚོགས་ཀྱི་བདེ་འཇགས་ལ་གནོད་འཚེ་བཟོ་མཁན་དང་ལྷན་དུ་འབྲེལ་ལམ་ཇེ་ཉུང་དུ་གཏོང་དགོས་སྐོར་སོགས་གསུངས་འདུག
གྲོས་ཚོགས་གོང་མའི་འཐུས་མི་མཱར་ཁོ་ལགས་ཀྱིས། རྒྱ་ནག་མི་དམངས་སྤྱི་མཐུན་རྒྱལ་ཁབ་ནི་ཨ་རིར་ཉེན་ཁ་ཆེ་ཤོས་ཀྱི་རྒྱལ་ཁབ་ཅིག་ཡིན་ཞིང་། ད་ལྟའི་ཆར་རྒྱ་ནག་ནི་ཨ་རིའི་ཆབ་སྲིད་གཙོས་འཕྲུལ་རིག་དང་། དམག་དོན་གྱི་ནུས་པ། དེ་བཞིན་དཔལ་འབྱོར་དང་ཚན་རིག་སོགས་འགྲན་ཟླ་མཚུངས་པ་ལྟ་བུ་ཆགས་ཀྱི་ཡོད་པར་བརྟེན། རྒྱ་ནག་དེ་ཨ་རིར་ཆེས་ཉེན་ཁ་ཆེ་བ་དང་། གལ་ཏེ་ཨ་རིའི་གཞུང་མང་གཉིས་ཀྱིས་མུ་མཐུད་རྒྱ་ནག་ཐོག་བཞེངས་ཕྱོགས་དང་། སྲིད་ཇུས་ཁག་ཅིག་ལ་འགྱུར་བ་མ་གཏང་ཚེ། དུས་རབས་ཉེར་གཅིག་པའི་ནང་རྒྱ་ནག་དེ་ཨ་རིའི་དཔལ་འབྱོར་ཡར་རྒྱས་ལ་འགོག་རྐྱེན་ཆེ་ཤོས་བཟོ་མཁན་གྱི་རྒྱལ་ཁབ་ཅིག་ཆགས་ཉེན་ཡོད་པའི་ཉེན་བརྡ་བཏང་འདུག་ལ། རྒྱ་ནག་གི་དཔལ་འབྱོར་ཡར་རྒྱས་ཐད་གཞུང་མང་གཉིས་ནས་མཐུན་འགྱུར་རོགས་རམ་བྱ་རྒྱུ་མེད་སྐོར་གསུངས་ལ། རྒྱ་ནག་གཞུང་གིས་རྒྱལ་སྤྱིའི་ཐོག་དབང་ཤུགས་རྒྱ་སྐྱེད་བཏང་སྟེ་འཛམ་གླིང་རྒྱལ་ཁབ་མང་པོ་ཞིག་ལ་དཀའ་ངལ་དང་ཉེན་ཁ་བཟོ་ཡི་ཡོད་པ་གསལ་པོ་ཡིན་ལ། ཨ་རིའི་སྲིད་གཞུང་རིམ་པའི་ངོས་ནས་ཀྱང་རྒྱ་ནག་ཨ་རིའི་ཉེན་ཁ་ཆེ་ཤོས་ཀྱི་རྒྱལ་ཁབ་ཅིག་ཏུ་ངོས་འཛིན་གནང་ཡོད་པ་རེད། ཡིན་ནའང་། རྒྱ་ནག་ལ་ཚོང་འབྲེལ་སོགས་གཅོད་ཐབས་བྲལ་བ་ཞིག་ཏུ་གྱུར་ཡོད་སྟབས་མུ་མཐུད་ཚོང་འབྲེལ་ཁེ་དབང་འདྲ་མཉམ་ཡོང་ཐབས་ཤིག་ལ་འབད་བརྩོན་གནང་བཞིན་ཡོད་པ་རེད།
ད་དུང་ཁོང་གིས། འདས་པའི་ལོ་འགའི་ནང་རྒྱ་ནག་གཞུང་གིས་རྒྱལ་སྤྱིའི་དཔལ་འབྱོར་དང་ཚོང་འབྲེལ་གྱི་ལམ་ལུགས་ལ་རྩིས་མེད་རྡོག་རོལ་ཚབས་ཆེན་བཏང་དང་གཏོང་མུས་ཡིན་པ་དང་། ཡུ་གུར་མི་རིགས་གཙོས་གྲངས་ཉུང་མི་རིགས་རྣམས་ཀྱི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་བཞིན་ཡོད་པའི་གནད་དོན་ཐེར་འདོན་དང་། ཨ་རི་གཙོས་པའི་ནུབ་ཕྱོགས་རྒྱལ་ཁབ་མང་པོ་ཞིག་གིས་རྒྱ་ནག་གི་དཔལ་འབྱོར་སོགས་ཡར་རྒྱས་འགྲོ་བཞིན་པའི་སྟོབས་ཆེན་རྒྱལ་ཁབ་ཅིག་ཏུ་ངོས་འཛིན་བྱས་ཏེ། རྒྱལ་སྤྱིའི་སྟེང་རྒྱ་ནག་གཞུང་གི་བྱ་སྤྱོད་མཐའ་དག་ལ་སྣང་མེད་བཏང་བ་སོགས་ལ་བརྟེན་ནས་རྒྱ་ནག་ནི་རྒྱལ་ཁབ་མང་པོ་ཞིག་གི་ཚོང་རོགས་ཆེ་ཤོས་དང་། དཔལ་འབྱོར་གྱི་དབང་ཤུགས་རྒྱ་ཆེར་སྤེལ་བཞིན་ཡོད་པ་གསལ་སྟོན་དང་། ཨ་རིའི་གཞུང་མང་གཉིས་ཀྱིས་རྒྱ་ནག་དང་མཉམ་དུ་ཕྱི་འབྲེལ་དང་ཚོང་འབྲེལ་གྱི་ཐབས་ཇུས་གསར་པ་ཞིག་དགོས་གལ་ཆེ་སྐོར་དང་། ཨ་རིའི་ངོས་ནས་རྒྱ་ནག་གི་བྱ་སྤྱོད་ངན་པ་རྣམས་ལ་གདོང་ལེན་ནན་པོ་བྱ་དགོས་གལ་ཆེ་བ་སྐོར་སོགས་གསུངས་འདུག
མཱར་ཁོ་རུ་བྷི་ཡོ་ལགས་ནི་ཕྱི་ལོ་ ༡༩༧༡ ཟླ་ ༥ ཚེས་ ༢༨ ཉིན་ཨ་རིའི་མངའ་སྡེ་ཧྥོ་ལོ་རི་ཌ་ (Florida) རུ་ཡོད་པའི་མི་ཡ་མཱི་ (Miami) གྲོང་ཁྱེར་དུ་སྐྱེས་ཤིང་། ཆུང་དུས་ནས་མི་ཡ་མཱི་མཐོ་རིམ་སློབ་གྲྭ་ (South Miami Senior High School) རུ་སློབ་སྦྱོང་བྱས། དེ་ནས་ཕྱི་ལོ་ ༡༩༩༣ ལོག་ཧྥོ་ལོ་རི་ཌ་གཙུག་ལག་སློབ་གཉེར་ཁང་དུ་ཆབ་སྲིད་ཚན་རིག་ཐོག་སློབ་སྦྱོང་བྱས་ཏེ་སྒྱུ་རྩལ་རིག་པའི་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན། ཕྱི་ལོ་ ༡༩༩༦ ལོར་མི་ཡ་མཱི་གཙུག་ལག་སློབ་གཉེར་ཁང་ནས་ཁྲིམས་ཀྱི་ཐོག་ལ་སློབ་སྦྱོང་བྱས། ཕྱི་ལོ་ ༢༠༠༠ ལོར་ཁོང་ཧྥོ་ལོ་རི་ཌ་མངའ་སྡེའི་གྲོས་ཚོགས་འོག་མའི་འཐུས་མི་དང་། ཕྱི་ལོ་ ༢༠༠༦ ནས་ ༢༠༠༨ བར་ཧྥོ་ལོ་རི་ཌ་གྲོས་ཚོགས་འོག་མའི་ཚོགས་གཙོའི་ཕྱག་ལས་གནང་མྱོང་བ་མ་ཟད། ཕྱི་ལོ་ ༢༠༡༠ ནས་བཟུང་ཨ་རིའི་གྲོས་ཚོགས་གོང་མའི་འཐུས་མིར་བདམས་ཐོན་བྱུང་ཡོད་འདུག ༢༠༡༥ ལོར་ཨ་རིའི་སྲིད་འཛིན་གྱི་འོས་མིར་ལངས། ཕྱི་ལོ་ ༢༠༡༦ ཟླ་ ༣ པའི་ནང་སྲིད་འཛིན་གྱི་སྔོན་འགྲོའི་འོས་བསྡུའི་ཁྲོད་ཌོ་ནམ་ཊོམ་ཕུ་ལས་ཕམ་ཉེས་བྱུང་རྗེས། སླར་ཡང་ཨ་རིའི་གྲོས་ཚོགས་གོང་མའི་འཐུས་མིར་བདམས་ཐོན་བྱུང་ཡོད་འདུག འདས་ལོའི་ཕྱི་ཟླ་ ༡༡ ནང་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད་ཌོ་ནལ་ཊོམ་ཕུ་མཆོག་སྐབས་ ༤༧ པའི་ཨ་རིའི་སྲིད་འཛིན་དུ་འོས་འདེམས་བྱུང་རྗེས། སྲིད་འཛིན་ཊོམ་ཕུ་མཆོག་གིས་གྲོས་ཚོགས་གོང་མའི་འཐུས་མི་མཱར་ཁོ་རུ་བྷི་ཡོ་ལགས་ཨ་རིིའི་གཞུང་འཛིན་གསར་པའི་ནང་དུ་ཕྱི་སྲིད་བློན་ཆེན་གྱི་འོས་མིར་མཚན་འདོན་གནང་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
