ཨ་རྒྱ་ར་གསུམ་གྱི་ཆབ་སྲིད་འགལ་འབྲེལ་བདེན་གཏམ་གཅེར་བུ་མ།

རྡོ་རྗེ་ཚེ་སྲུང་།

ར་ཤེ་ཡ་དང་། རྒྱ་ནག ཨ་རི་གསུམ་པོའི་བར་གྱི་འགལ་འབྲེལ་གྱི་གདོང་རིས་ངོ་མ་དེ་མཐོང་ཐུབ་མཁན་ང་གཅིག་པོ་ཡིན་ནམ་སྙམ་པའི་དོགས་པ་སྐྱེས་དགོས་ཐུག་བྱུང་། གཅིག་བྱས་ན། ང་རང་དྲ་ཐོག་གི་དཀྲོག་གཏམ་སྤེལ་མཁན་ཚོའི་ནང་དུ་འཛུལ་ཆེ་སོང་བས་ཡིན་སྲིད། ཡུལ་སྡེ་ཆེན་པོ་འདི་གསུམ་གྱི་འགལ་འབྲེལ་ནི་ཕྱོགས་གཉིས་ནས་མི་ལྟ་བར་ཟུར་གསུམ་ནས་ལྟ་ཐུབ་དགོས། མི་མང་པོའི་སེམས་ལ་ར་ཤེ་ཡ་དང་རྒྱ་ནག་གཉིས་པོའི་བར་ན་མཛའ་འབྲེལ་བརྟན་པོ་ཞིག་ཡོད་པར་ངོས་འཛིན་མཁན་མང་། དེ་བཞིན་དུ་ཨ་རི་དང་རྒྱ་ནག ཨ་རི་དང་ར་ཤེ་ཡའི་བར་ན་མི་མཐུན་པ་ཆེན་པོ་ཞིག་ཡོད་སྣང་ཤར་མཁན་ཡང་མི་ཉུང་བ་ཞིག་ཡོད།

འོན་ཀྱང་། དོན་དངོས་ཡོད་ཀྱི་གནས་སྟངས་ནི་དེ་ལྟ་བུ་ཞིག་གཏན་ནས་མིན། ཨ་རི་དང་ར་ཤེ་ཡའི་བར་ན་དེ་ཙམ་འགལ་བ་ཆེན་པོ་མེད་ཐོག་ཨ་རི་དང་རྒྱ་ནག་གི་བར་ན་དེ་བས་ཀྱང་མི་མཐུན་པ་ཆེན་པོ་གཏན་ནས་མེད། ཕན་ཚུན་བར་ལ་དོགས་པ་རྣམ་རྟོག་ཆེས་ཆེན་པོ་ཡོད་ས་དེ་ནི་རྒྱ་ནག་དང་ར་ཤེ་ཡའི་བར་ཡིན་པར་འདོད། ཨ་རི་སྟོབས་ཤུགས་ཆེན་པོ་ཆགས་ན་རྒྱ་ནག་དང་ར་ཤེ་ཡའི་གཉིས་ཀའི་སེམས་གཏིང་ན་དེ་ཙམ་མི་བཟོད་པ་མེད་མོད། གལ་སྲིད་ར་ཤེ་ཡ་སྟོབས་ཆེན་རྒྱལ་ཁབ་ཨང་དང་པོ་ཆགས་ཡོང་ན་དེ་ནི་རྒྱ་ནག་ལ་མཚོན་ན་ཆེས་མི་དགའ་ས་དེ་རེད། དེ་བཞིན་དུ་རྒྱ་ནག་སྟོབས་ཤུགས་ཆེན་པོ་ཆགས་ཡོང་ན་ར་ཤེ་ཡ་ཡང་མི་དགའ་བ་གསལ་པོ་རེད།

ཡ་མཚན་པ་ཞིག་ནི། ར་ཤེ་ཡས་ཡུ་ཁུ་རེན་ལ་དཔུང་འཇུག་བྱས་པ་དེས་ནི་རྒྱ་ནག་རེ་དོགས་གཉིས་ཆར་གྱི་ཀློང་དུ་ཚུད་བཅུག་ཡོད། ཕྱོགས་གཅིག་ནས་ར་ཤེ་ཡས་ཡུ་ཁུ་རེན་དབང་དུ་བསྡུ་བ་ལམ་ལྷོངས་བྱུང་སོང་ན་དེས་ནི་རྒྱ་ནག་གིས་ཐའེ་ཝན་ལ་བཙན་འཛུལ་བྱས་ན་ཡང་ཁྲིམས་མཐུན་དུ་འགྱུར་བར་ཕན་པ་དང་། ཕྱོགས་གཞན་ཞིག་ནས་ར་ཤེ་ཡའི་སྟོབས་ཤུགས་དང་རྒྱ་སྐྱེད་ཧམ་ཤེད་ཇེ་ཆེར་སོང་ན་རྒྱ་ནག་གི་ས་མཚམས་ན་ཡང་ལོ་རྒྱུས་སྟེང་དུ་རྩོད་རྙོག་ཡོད་སའི་ས་ཆ་མི་ཉུང་བ་ཞིག་ཡོད་པས་ར་ཤེ་ཡས་རྙོག་དྲ་སློང་སྲིད་པས་མགོ་རྙོག་ཅིག་ཏུ་ཡང་འགྱུར་སྲིད་པ་རེད།

རྒྱུ་མཚན་གཙོ་བོ་ནི། རྒྱ་ནག་དང་ར་ཤེ་ཡའི་བར་ན་ས་མཚམས་ཀི་ལོ་མི་ཊར་ ༤༢༠༩ ཡོད་ཅིང་། འཛམ་གླིང་སྟེང་གི་རྒྱལ་མཚམས་རིང་ཤོས་ཨང་དྲུག་པ་རེད། ༡༩༦༩ ལོ་ནས་ཨུ་རུ་སུ་སོ་ཝིད་མཉམ་འབྲེལ་དང་རྒྱ་ནག་བར་ལ་ས་མཚམས་རྩོད་རྙོག་གི་དམག་འཁྲུགས་དངོས་སུ་ལངས། ཕྱོགས་གཉིས་ཀས་ཕྱིར་བསྒྲགས་བྱས་པའི་གྲངས་འབོར་མི་འདྲ་ཡང་ལུས་སྲོག་དང་རྒྱུ་ནོར་གྱོང་གུད་ཀྱང་ཚབས་ཆེན་བྱུང་། ས་མཚམས་སྐོར་ལ་གྲོས་མོལ་མུ་མཐུད་ནས་བྱས་ཀྱང་བརྟན་ལྷིང་ཡོང་མ་ཐུབ་པར་ལུས་པ་ ༡༩༩༡  ལོར་གཞི་ནས་ས་མཚམས་སྐོར་གྲོས་མཐུན་བྱུང་ཐུབ་ཙམ་བྱུང་ཡོད།

 ར་ཤེ་ཡ་དང་། རྒྱ་ནག་བར་གྱི་རྩོད་རྙོག་དེ་ལ་བརྟེན་ནས་ཨ་རི་དང་རྒྱ་ནག་བར་ལ་འབྲེལ་བ་ཡག་པོ་ཡོང་མགོ་ཚུགས། ༡༩༧༡ ལོར་ཨ་རིའི་རྒྱལ་སྲུང་དྲུང་ཆེ་ཧེན་རིས་ཁེ་སིན་ཇུར་(Henry Kissinger) གྱིས་གསང་བའི་ལྟ་སྐོར་དང་གྲོས་མོལ་བྱེད་དུ་རྒྱ་ནག་ལ་སོང་། དེ་ལ་བརྟེན་ནས་ ༡༩༧༢ ལོར་ཨ་རིའི་སྲིད་འཛིན་རི་ཆར་ཌི་ནིག་སོན་(Richard Nixon) རྒྱ་ནག་ཏུ་མགྲོན་འབོད་བྱས།  ལྷག་པར་ཡང་། ༡༩༧༠ སྨད་ཙམ་ནས་རྒྱ་ནག་གི་མགོ་ཁྲིད་ཏུན་ཞའོ་ཕིང་གིས་ ‘ཨ་རི་དང་སུ་ཞིག་ཐག་ཉེ་ན་དེ་ཕྱུག་པོ་ཆགས་པ་དངོས་ཡོད་གནས་ཚུལ་རེད་’ ཅེས་བཤད་ནས་ཁོ་རང་ཡང་ཨ་རིས་མགྲོན་འབོད་བྱས། ཨ་རིས་ཕྱོགས་ནས་ཡུན་རིང་པོར་འབད་བརྩོན་བྱས་ནས་རྒྱ་ནག་གི་དཔལ་འབྱོར་མ་རྩ་རིང་ལུགས་སུ་བསྒྱུར་ནས་ཨ་རི་དང་མཉམ་ལས་བྱེད་བཅུག་པ་དེ་ནི་ཨ་རི་ཕྱོགས་ཀྱི་རྒྱལ་ཁ་ཆེན་པོ་ཞིག་ལ་བརྩི་བ་རེད། རྒྱ་ནག་དང་ར་ཤེ་ཡའི་བར་གྱི་འབྲེལ་བ་ནི་འཁྲབ་སྟོན་ཙམ་ཁོ་ན་ལས་གཅིག་ཕན་གཅིག་གྲོགས་སུ་འགྱུར་བའི་འབྲེལ་བ་ཞིག་བྱུང་མེད་ཅེས་བརྗོད་ཆོག