རྩོམ་ཁུངས། བོད་ཀྱི་དུས་བབ།
རྩོམ་པ་པོ། རྫ་ཚེ་རིང་བཀྲ་ཤིས།
ངས་ཉེ་ཆར་རང་མཁན་ཆེན་ཚུལ་ཁྲིམས་བློ་གྲོས་ཀྱིས་བོད་སྐད་ཀྱི་མིང་མཛོད་རྩོམ་བསྒྲིགས་ཀྱི་ཕྱག་ལས་གནང་ནས་ལོ་ཧྲིལ་པོ་ཉི་ཤུ་ཕྱིན་པ་དང་། གནམ་ལོ་ཉེར་གཅིག་པའི་ལས་ཀའི་དབུ་འཛུགས་ཀྱི་ཚོགས་འདུའི་ཐོག་ཏུ་གསུངས་པའི་བཀའ་སློབ་ཅིག་ལ་མཉན།
སྤྱིར་བཀའ་སློབ་དེའི་ནང་དོན་ནི་མིང་མཛོད་རྩོམ་སྒྲིག་དང་འབྲེལ་བའི་ལས་དོན་སྙན་ཞུ་ལྟ་བུ་ཞིག་རེད། བཀའ་སློབ་དེ་ལྟ་ཉན་ཞུ་མཁན་དང་བརྒྱུད་འགོད་བྱེད་མཁན་ནི་དྲ་སྒང་ཧྲིལ་པོར་ཁྱབ་པ་ལྟར་བྱུང་། མང་པོ་ཞིག་གིས་སེམས་འགུལ་ཐེབས་པའི་ཚོར་བ་གྲོགས་ཚོམས་སུ་བྲིས་པ་དག་མཇལ། ང་ལ་ཡང་ཚོར་སྣང་ཤིན་ཏུ་ཆེན་པོ་བྱུང་། ཡིན་ན་ཡང་། ཚོར་བ་དེ་ནི་དགའ་སྐྱོ་འདྲེས་མ་དང་། སྔངས་སྐྲག་དང་སེམས་ཁྲལ་གྱི་ཚོར་བ་འཇིགས་ཡེ་རེ་བ་ཞིག་ལས་རེ་བས་ཁེངས་པའི་ཚོར་བ་སྤྲོ་ལྷང་ངེ་བ་ཞིག་མ་རེད།
ཁོང་རྣམ་པའི་ཕྱག་ལས་དེ་ནི་ཧ་ཅང་རླབས་ཆེན་ཡིན་ན་ཡང་། ཕྱོགས་གཞན་ཞིག་ནས་ཧ་ཅང་ཉོབ་ཏོ་དང་ཁེར་རྐྱང་། ཚར་རྒྱུ་དང་རྫོགས་རྒྱུ་མེད་པ་ཞིག་དང་། ངང་རྒྱུད་རིང་པོས་ཕྱག་ལས་གནང་ཐུབ་པའི་སྙིང་སྟོབས་ཤིན་ཏུ་བརྟན་པོ་ཕ་བོང་ལྟ་བུ་ཞིག་མེད་ན་འཁྱོངས་དཀའ་བ་ཞིག་རེད། ད་དུང་དྲིན་ལན་ལོག་འཇལ་དང་བཀའ་དྲིན་ལ་བསམ་ཤེས་མེད་པའི་སྨྲ་བ་ཁྲི་སྟོང་གི་ཁྲོད་ནས་མཚམས་མཚམས་བློ་ཕམ་དང་ཡི་ཆད་ཀྱི་ཚོར་བའང་སྐྱེ་སྲིད་མོད། ཁོང་རྣམ་པས་དེ་ལས་ལྡོག་སྟེ། བླུན་པོ་རང་གི་རྗེས་སུ་མི་འབྲང་ཡང་། རང་ཉིད་བླུན་པོའི་རྗེས་སུ་མི་འབྲངས་པའི་བསམ་སྤྱོད་དང་དུ་བླངས་ཏེ་མི་ལོ་ཉི་ཤུའི་དུས་ཀྱི་རབ་ཁ་འཕྲེད་དུ་བཅད་པ་ནི་ཅི་འདྲའི་ངོ་མཚར་ཅན་ཞིག་རེད་ཨང་།
ཤེས་རབ་དང་སྤོབས་པས་དཔལ་དུ་འབར་ཞིང་། ལྷག་བསམ་དང་སྙིང་སྟོབས་ཀྱིས་གཞན་དབང་དུ་གྱུར་པའི་མཁན་ཆེན་ཚུལ་ཁྲིམས་བློ་གྲོས་དང་ཁོང་གི་དཔུང་སྡེ་དེས། འདས་པའི་མི་ལོ་ཉི་ཤུའི་རྩ་ཆེ་བའི་མི་ཚེའི་དུས་ཚོད་དེ་འདི་ལྟར་བསྐྱལ་བ་ནི། ཁ་བའི་ལོ་རྒྱུས་ཀྱི་ཁྲོད་ནུབ་པ་མེད་པའི་གསེར་གྱི་རྡོ་རིང་ལྟ་བུའི་ལོ་རྒྱུས་ཤིག་ཏུ་གནས་ངེས་ཡིན་པ་དེར་ངེས་ཤེས་ཆེ་རུ་ཕྱིན།
ད་དུང་མིང་མཛོད་དང་འབྲེལ་བའི་ལས་དོན་དེ་ནི་རང་དགར་གྱིས་མིས་འགྲུབ་པ་ཞིག་མིན་པས། གྲངས་དང་གྲབ། ཕེབས་ཁུངས་ཐོབ་ཐང་སོགས་གང་གི་ངོས་ནས་བསམ་ན་ཡང་། གནད་ཆེ་བའི་དུས་ཚོད་དང་། རྒྱུན་རིང་བའི་ཕྱག་ལས་ཀྱི་ཆ་ཤས་རེ་རེ་ལ་གཞན་གྱིས་ཚབ་བྱེད་ཐབས་བྲལ་བའི་རིན་ཐང་ཆེན་པོ་ལྡན་པ་དེ་ལྷག་ཏུ་རྟོགས་མགོ་འཚུགས། དེ་དང་མཉམ་དུ་བག་ལ་ཉལ་བའི་སྐྱོ་བའི་སྣང་ཤེས་དེའང་མངོན་གསལ་ཆེ་རུ་ཕྱིན།
དེ་ཡང་ལོ་འདི་གའི་རིང་མཁས་ཆེན་རྒན་པ་ནོར་བྲང་ཨོ་རྒྱན་དང་། རྡོ་དགོན་གསང་བདག་རྡོ་རྗེ་ལྟ་བུ་སྔ་གཞུག་ཏུ་འདས་གྲོངས་སུ་ཕྱིན། ད་ལྟ་བཞུགས་བཞིན་པ་དག་ཀྱང་། གཞོན་པ་ནས་དར་མ་དང་དར་མ་ནས་རྒས་པའི་གོ་རིམ་དུ་རིམ་གྱིས་འཕོ་བཞིན་པ་ནི་ཟློག་ཏུ་མེད་པའི་ཆོས་ཉིད་དུ་སྣང་ལ། མིང་མཛོད་རྩོམ་སྒྲིག་འདུ་འཛོམས་ཀྱི་སྐུ་པར་ལ་རྒྱང་མཇལ་ཞུ་སྐབས་སུའང་། མཁས་པའི་གྲལ་ར་གཉན་པོ་དེ་ལོ་རེ་བཞིན་མངོན་གསལ་དོད་པོས་ཉུང་དུ་འགྲོ་བཞིན་པ་མཐོང་དུ་ཡོད་པས། ཁོང་རྣམ་པའི་ཚོགས་འདུའི་སྐུ་པར་མཇལ་རྒྱུར་དགའ་བའི་གུས་པར་མཚོན་ན། འགྱུར་བའི་ཆོས་ཉིད་འདི་དག་གིས་སེམས་ལ་ཕངས་སེམས་དང་བློས་མི་ཐོངས་པའི་སྐྱོ་གདུང་གི་ཚོར་བ་ནར་མར་སྦྱིན་གྱི་ཡོད། ཡིན་ན་ཡང་། འཇིག་རྟེན་གྱི་ཆོས་ཉིད་འདི་ལ་སུས་ཀྱང་བཅོས་སུ་མེད།
ཉེ་ཆར་མཁན་ཆེན་མཆོག་གིས་འབྱུང་འགྱུར་རྩོམ་སྒྲིག་གི་ཚོགས་མིའི་སྤུས་ཚད་དེ་འདས་པའི་ལོ་ཉི་ཤུ་ནང་བཞིན་ཡོང་རྒྱུ་ཁག་པོ་ཡིན་ཚུལ་གསུངས་པའི་སྐབས་སུ་རང་ངོས་ནས་ཁོང་རྣམ་པའི་ཤེས་ཡོན་གྱི་རྒྱབ་ལྗོངས་སྤྱི་དང་བྱེ་བྲག་ལ་བསྐྱར་དུ་བསམ་བློ་བཏང་བ་ཡིན།
ཁྱད་པར་དུ་སྤྱི་ཚོགས་རྙིང་པའི་དུས་རབས་ནས་སྲོལ་རྒྱུན་ཤེས་ཡོན་གྱི་དབུ་ཚུགས་ཤིང་། ལོ་རབས་ལྔ་བཅུ་དང་དྲུག་བཅུའི་ནང་དུ་བློ་ཡུལ་ལས་འདས་པའི་མི་ཚེའི་ཉམས་སད་བརྒྱུད་མཐར། ལོ་རབས་བདུན་ཅུ་བརྒྱད་ཅུ་ནས་མི་རིགས་གཅིག་གི་རིག་གཞུང་དང་རྩོམ་རིག་གི་བསྐྱར་དར་ལ་སྣེ་ཁྲིད་པའི་མཁས་པ་དག་འདི་ལྟར། གཞོན་པས་སྣེ་ཁྲིད། རྒན་པས་གཏིང་མནན་ནས་མཉམ་དུ་ཕྱག་ལས་གནང་བ་དང་། དེ་ཡང་སྐྱ་སེར་གཉིས་ཀ །མདོ་དབུས་ཁམས་གསུམ་སོགས་ཁྱོན་ཡོངས་ཀྱི་གྲུབ་ཆ་ཚང་བའི་དཔུང་སྡེ་ཞིག་གྲུབ་པ་ནི་ཅི་འདྲའི་ཡ་མཚན་དངོས་བྱུང་ལྟ་བུ་ཞིག་ཡིན་པ་དེར་དཀའ་བ་དང་དཀོན་པའི་འདུ་ཤེས་སྐྱེས། སྙིང་ཁོང་རུས་པའི་གཏིང་ནས་རྩ་ཆེན་དུ་ཚོར།
མདོར་ན། མིང་མཛོད་རིན་པོ་ཆེ་འདི་ནི་བློ་གྲོས་མཆོག་ཏུ་ལྡན་ཞིང་། རིག་པ་མང་དུ་ཐོས་པ། ལྷག་བསམ་དང་བརྩོན་པས་ཕྱུག་པའི་མཁས་པ་ཁོང་དག་གིས་རིག་རྩལ་ཆོས་སྐུའི་གཏེར་སྟོན་གྱིས་ཤེས་རབ་དང་ཐོས་པའི་ཀློང་ནས་གཏེར་དུ་བླངས་པའི་སྙན་བརྒྱུད་སྤྲུལ་པའི་གླེགས་བམ་མཐར་ཐུག་པ་ཞིག་ཏུ་གྲུབ་ཡོད།
དེ་ལྟ་བུའི་དཔུང་སྡེ་ཞིག་ལ། རྒྱུ་དང་དཔལ་འབྱོར་གྱི་རྒྱབ་བསྟེན། ཤུགས་དང་ནུས་པའི་སྣེ་ཁྲིད་བཅས་གནང་མཁན་མཁན་ཆེན་མཆོག་གི་གཟིགས་རྒྱང་དང་བློས་བཏོང་དེ་དག་ཀྱང་ཡིད་ལ་བསམ་གྱིས་མི་ཁྱབ་པའི་ཆོས་ཉིད་ཀྱི་ཚུལ་དུ་འཁོར།
ད་དུང་སྤྱིར་འཛམ་གླིང་དུ་ནི། གསར་འགྱུར་དང་ཚགས་པར་ཚང་མ་མ་རྩ་རིང་ལུགས་ཀྱི་བྲན་གཡོག་ཏུ་གྱུར་ནས་ཕྱུག་པོ་དང་རྒྱུ་ཆེན་དག་གི་བསམ་ཚུལ་དང་དགོས་འདུན་འགོད་ཡུལ་ཞིག་ཏུ་གྱུར། སྒོས་ས་ཆ་དེར་ནི་ཚིག་མཛོད་དང་རྩོམ་རིག་ཡོངས་སུ་རྫོགས་པ་ཚོགས་སྡེ་དང་མི་སྣ་བྱེ་བྲག་པའི་ལྟ་བ་དང་ལངས་ཕྱོགས་ལ་བསྟོད་གླུ་འབུལ་མཁན་འབའ་ཞིག་ཏུ་གྱུར་ཡོད་པའི་དུས་འདིར། མི་མང་གི་ཁྲོད་རང་ནས་ཡར་བཞེངས་ཏེ། མི་རིགས་ཤིག་གི་རིན་ཐང་གི་ལྟ་བ། སྐད་ཡིག་གི་ཆོས་ཉིད། དུས་ཀྱི་དགོས་མཁོ་བཅས་ཟུང་དུ་འབྲེལ་བའི་སྒོ་ནས་རང་དོན་རང་གཅེས་ཀྱིས་སྒེར་སེམས་མེད་པའི་ཕྱག་ལས་གནང་བའི་ཁོང་རྣམ་པའི་མཁྱེན་བརྩེ་ནུས་པ་དང་ཐབས་མཁས་བཅས་ལ་སེམས་གཏིང་ནས་དགའ་དད་སྐྱེས།
མཁན་ཆེན་རིན་པོ་ཆེ་ཁོང་ཉིད་ལ་མཚོན་ན། ཞབས་གདན་ཐོག་ཏུ་བཞུགས། ཕྱག་སྡེར་ཐོག་ཏུ་བསྐྱངས་ནས་བཞུགས་པ་ཡིན་ན། དད་ལྡན་བརྒྱ་སྟོང་མང་པོས་གཡས་འདེགས་གཡོན་སྐྱོར་གྱིས་སུ་ལས་ཀྱང་མི་ཞན་པའི་མངའ་ཐང་ཞིག་བསྐྱེད་ཐུབ་པ་ལྟ་བུ་ཡོད་ན་ཡང་། དགུང་ལོ་བཞི་བཅུ་ཞེ་སྟོད་ནས་དྲུག་བཅུའི་ལ་མོ་བརྒལ་བའི་བར་གྱི་གསེར་གྱི་དུས་ཚོད་དེ་ཉིད་བོད་ཀྱི་སྐད་ཡིག་གི་ལས་དབང་ལ་ཞབས་ཏོག་ཏུ་ཕུལ་བ་ནི་བསམ་གྱིས་མི་ཁྱབ་པ་ཞིག་རེད། དེའི་ཆ་ནས་བོད་ཀྱི་སྐད་ཡིག་གི་ལུག་ཁྱུ་འཚོ་བའི་བཀའ་དྲིན་ཅན་གྱི་ལུག་རྫི་རྒན་པོ་ཁོང་ལ་ལྷག་ཏུ་གུས་པར་གྱུར།
ཁོང་གི་དཔུང་སྡེ་གཞན་དག་ཀྱང་དེ་དང་འདྲ་སྟེ། རང་འདུན་པ་ཕལ་མོ་ཆེ་སློབ་ཆེན་གྱི་སློབ་དཔོན། ཞིབ་འཇུག་གི་འགན་འཛིན། བརྙན་འཕྲིན་གྱི་མདོ་འཛིན་སོགས་ལོ་རེ་བཞིན་ཞག་པོ་སུམ་བརྒྱ་དྲུག་ཅུ་རེ་ལྔ་དེ་ལས་ཀའི་ཐོག་ལ་གཏོང་དགོས་མཁན་འབའ་ཞིག་ཡིན་པ་དང་། མིས་སྨོན་རང་སྐྱིད་ཀྱི་ཕྱག་ལས་ལྕགས་ཀྱི་ཕོར་བ་དང་གསེར་གྱི་ཕོར་བ་ཚང་མ་ཡོད་ན་ཡང་། སོ་སོ་དང་ནང་མི་ལ་དབང་བའི་གཞུང་འབྲེལ་གྱི་ལས་ཀའི་གུང་གསེང་ཐུང་ཐུང་དེ་དག་ཀྱང་ཆད་ལྷག་མེད་པར་མིང་མཛོད་ཀྱི་ཕྱག་ལས་འདིར་ཞལ་འདེབས་སུ་ཕུལ་བ་གཅིག་པུའང་བློ་ཡུལ་ལས་འདས་པ་ཞིག་རེད། འདི་ཚང་མ་བསམ་ཡུལ་ལས་འདས་པའི་ལྷག་བསམ་དང་སྙིང་སྟོབས་ཀྱི་འབྲས་རྟགས་བླ་ན་མེད་པ་ཞིག་ཅི་ལ་མིན།
ཕྱག་ལས་འདི་ནི་མཁན་ཆེན་མཆོག་གཅིག་པུས་ཞུ་བ་འཐེན་པ་དང་བཀའ་བཏང་བ་ལྟ་བུས་ཡོང་བ་ཞིག་མིན་ལ། འབྱོར་བ་དང་ཆ་རྐྱེན་ཡོད་མཁན་གྱིས་ཕོགས་དང་གླ་རྔན་སྤྲད་པས་ཡིད་འགུག་ཐུབ་པ་ཞིག་ཀྱང་མིན་པར། རྩོམ་སྒྲིག་པ་མི་རེ་ངོ་རེས་བླ་ན་མེད་པའི་ལྷག་བསམ་དང་། བོད་ཀྱི་སྐད་ཡིག་རིག་གནས་ལ་བཅངས་པའི་ཆ་རྐྱེན་མེད་པའི་བརྩེ་ཞེན་འབའ་ཞིག་གིས་མངོན་གྱུར་ཐུབ་པ་ཞིག་ཡིན།
དེ་རིང་ཡང་བསྐྱར། ཤར་རྒྱལ་མོ་རོང་གི་རིག་པའི་སོ་ཁ་སྲུང་བའི་དཔའ་བོ་ལྟ་བུར་ངོས་འཛིན་ཞུ་བཞིན་པའི་མཁས་དབང་ཆེན་པོ་བཙན་ལྷ་ངག་དབང་ཚུལ་ཁྲིམས་མཆོག་ང་ཚོ་དང་གཏན་དུ་ཞལ་གྱེས་པ་ནི། སྤྱིར་བོད་ཀྱི་རིག་གཞུང་དང་། དགོས་མིང་མཛོད་ཆེན་མོའི་རྩོམ་སྒྲིག་པའི་གདན་གྲལ་ནས་སྐར་ཆེན་འོད་པོ་ཆེ་ཞིག་མི་མངོན་གྱི་དབྱིངས་སུ་ཡལ་བ་ཡིན་པས་ཤིན་ཏུ་ཕངས། ཁོང་དགུང་ལོ་དགུ་བཅུ་གོ་དྲུག་གི་ཐོག་སྐུ་གཤེགས་པ་རེད་འདུག་ལ། ད་ཁོང་གི་སྐུ་ཚེ་ཧྲིལ་པོ་བོད་ཀྱི་རིག་གཞུང་ཆེད་བཏང་བར་མ་ཟད། ཁོང་གིས་མིང་མཛོད་རྩོམ་སྒྲིག་གི་ཕྱག་ལས་གནང་སྐབས་དགུང་ལོ་བརྒྱད་ཅུ་དང་དགུ་བཅུར་ཕེབས་བཞིན་ཡོད། དེ་ལྟ་བུའི་བགྲེས་སོང་ཞིག་གིས་ད་དུང་ཡང་འབད་པ་ཆེན་པོས་མི་རབས་ཕྱི་མ་དག་དང་མཉམ་དུ་ཐུགས་རིག་བསྒྲིམས་ཡོད། ཁོང་དག་གི་ཐུགས་ལ་བོད་ཀྱི་རིག་གཞུང་དང་སྐད་ཡིག་ཡོད་པ་ལས། ལས་ཀ་བྱེད་མཁན་དེ་ས་ཆ་གང་གི་ཡིན་དང་ཆོས་བརྒྱུད་སོགས་གང་ལ་གཏོགས་པའི་ཕྱོགས་ལ་བསམ་བློ་གཏོང་གིན་མེད། མདོར་ན། ཁོང་རྣམ་པའི་ཕྱག་ལས་དེ་དག་ང་ཚོའི་མིག་དཔེ་བླ་ན་མེད་པ་དང་རྟག་ཏུ་སློབ་སྦྱོང་ཞུ་ཡུལ་དུ་གྱུར་ཡོད།
མཚམས་འདིར་ཐོན་དུས་ངས་འདི་ལྟར་བསམ། གལ་ཏེ་ང་ཡང་ཁོང་ཚོ་དང་མཉམ་དུ་མི་ལོ་ཉི་ཤུ་ཐམ་པར་སྒེར་སེམས་མེད་པའི་རིག་གནས་ཀྱི་ལས་གཞི་ཆེན་པོ་འདིར་མཉམ་ཞུགས་ཞུ་མཁན་གྱི་མཆེད་གྲོགས་སུ་གྱུར་ཡོད་ན། ང་ཡང་དེ་རིང་ལྷག་ཏུ་ཡིད་སྐྱོ་བར་ངེས།
གལ་ཏེ་ང་ཡང་ཁོང་ཚོའི་མཆེད་གྲོགས་ཡིན་ན། དབུས་ཇོ་བོ་མཇལ་བའི་དབུས་རོགས་ཟེར་བ་ལྟར། ཉག་ཕྲ་བའི་མི་རིགས་ཀྱི་ལས་དབང་གི་ཆེད་དུ་མིང་མཛོད་ཆེན་མོའི་རྩོམ་སྒྲིག་གི་ཆེད་རྩ་ཆེ་བའི་བློ་གྲོས་དང་ནུས་པ་བཏང་བའི་ཆོས་གྲོགས་དང་འཐབ་གྲོགས་སུ་གྱུར་པའི་ལོ་ཟླའི་ནང་། ཐ་སྙད་གསར་པ་རེ་རེའི་ཆེད། ཚིག་འབྲུ་རེ་རེའི་གོ་རིམ་གྱི་ཆེད། བྱ་ཚིག་དང་རྒྱན་ཚིག་རེ་རེའི་ཐོབ་ཐང་གི་ཆེད། སྒྲ་བསྒྱུར་དང་དོན་འགྱུར་གྱི་སྙན་ཆ་རེ་རེའི་གདམ་ངའི་ཆེད། ཕན་ཚུན་ཤེས་རབ་དང་ཤེས་རབ་ཀྱི་རལ་ཁ་འགྲན་བཞིན་འཁྲུགས་ཆ་དོད་པའི་དཔྱད་གླེང་གནང་བ་དེ་དག་ཀྱང་ཡང་ཡང་དྲན་པར་ངེས།
གལ་ཏེ་ང་ཡང་ཁོང་ཚོའི་འཐབ་གྲོགས་ཡིན་ན། ནང་མི་དང་ལས་ཀའི་སྙོམ་བསྒྲིགས། དུས་རབས་དང་དཔལ་འབྱོར་གྱི་བསླུ་བྲིད། རང་རིགས་སྤུན་ཟླས་དགོས་ངེས་ཀྱི་གདེང་འཇོག་དང་བཀོལ་སྤྱོད་ཀྱི་རྒྱབ་སྐྱོར་ཐོབ་མིན་གྱི་མགུ་འཁང་། དངོས་ཤུགས་ཀྱིས་གདོང་ལེན་དགོས་པའི་དུས་ཀྱི་རྒྱུ་རྐྱེན་གཞན་དག་བཅས་ལ་མཉམ་དུ་གདོང་བཏད་ནས་ཡོང་བའི་དགའ་སྐྱོའི་གཏམ་རྒྱུད་དེ་དག་བློ་ཡུལ་དུ་འཆར་ངེས།
དེ་ཡང་ཉེ་ཆར་མཁན་རིན་པོ་ཆེས་བཙན་ལྷ་ངག་ཚུལ་ཁྲིམས་ལྟ་བུ་ནི་ད་ལྟ་དངོས་སུ་བཞུགས་ན་ཡང་། ད་ཕྱིན་ལས་དོན་ལ་དངོས་སུ་མཉམ་ཞུགས་ཐུབ་པ་དཀའ་མོ་ཡིན་ཚུལ་གསུངས་པའི་བཀའ་མོལ་དེའང་ད་ལྟ་གློ་བུར་དུ་སེམས་ལ་འཁོར།
ཡིན་ན་ཡང་། ང་ཚོར་ད་དུང་ཡང་མཁན་ཆེན་ཚུལ་ཁྲིམས་བློ་གྲོས་ལྟ་བུ་མཁས་པ་རྒན་པ་རྣམས་ཀྱིས་ཀྱང་ཐུགས་ཡིད་ཆེས་པའི་སྣེ་ཁྲིད་མཁན་ཞིག་ཡོད་བཞིན་དུ། ཉམས་མྱོང་ཕུན་སུམ་ཚོགས་པའི་རྩོམ་སྒྲིག་པའི་དཔུང་སྡེ་དེ་ཉིད་སྔར་མུས་བཞིན་གནས་བཞིན་དུ། ཛ་དྲག་པའི་དུས་ཀྱི་དགོས་མཁོ་དང་བོད་ཀྱི་ཕ་སྐད་མ་ཡིག་འདི་ཉིད་ཉེན་ཁའི་གནས་སུ་གྱར་བཞིན་དུ། འབྱུང་འགྱུར་གྱི་དུས་ཀྱི་དགོས་མཁོ་བསྐོང་བའི་གཞོན་སྐྱེས་ལྷག་བསམ་དང་ཤེས་རབ་ལྡན་པ་དུ་མ་ཞིག་ངེས་པར་དུ་འབྱུང་ངེས་ཡིན། མདོར་ན། ང་ཚོས་ལག་ལེན་གྱི་ཐོག་ནས་མཁས་པ་གོང་མ་དག་གི་ཕྱག་ལས་ཀྱི་མཇུག་སྐྱོང་མཁན་གྱི་གཞོན་པའི་དཔུང་སྡེ་ཞིག་མདུན་དུ་ཐོན་ངེས་ཡིན་པ་དེར་ཡིད་ཆེས་བྱ་དགོས།
མཚམས་འདིར་ཐོན་དུས། གུས་པ་རང་ཉིད་ལ་མཚོན་ན། ད་བར་ཁོང་རྣམ་པའི་མིང་མཛོད་ཀྱི་བཀོལ་སྤྱོད་སོགས་ལ་དགོས་ངེས་ཀྱི་ཞབས་ཏོག་གང་ཡང་མ་འགྲུབ་པ་ནི་ངོ་གནོང་དགོས་པ་ཞིག་ཡིན་ལ། མ་འོངས་པར་གང་ཐུབ་ཅི་ཐུབ་ཀྱིས་ཁོང་རྣམ་པས་གཏན་འབེབས་གནང་བའི་བརྡ་ཆད་དང་ཐ་སྙད་དག་བཀོལ་སྤྱོད་སྔར་ལས་མང་བ་བྱ་རྒྱུའི་དམ་བཅའ་འབུལ་རྒྱུ་ཡིན།
ཕྱོགས་གཞན་ཞིག་ནས་ནི། ཕྱི་ནང་གི་རྒྱུ་རྐྱེན་གང་ཡིན་མ་ཤེས་མོད་སྔར་ཡོད་མིང་མཛོད་ཀྱི་བུམ་མཛོད་app ཕབ་ལེན་དང་བཀོལ་སྤྱོད་ལ་དཀའ་ལས་ངེས་ཅན་བྱུང་བ་དང་། ཐོན་རིམ་གསར་པ་ཡིན་པའི་ཚིག་མཛོད་དག་དུས་ཐོག་ཏུ་གསར་བསྒྱུར་གནང་ཡོད་མེད་ཁ་གསལ་མ་ཤེས་པ། དེབ་གསར་པ་དག་ཀྱང་དུས་ཐོག་ཏུ་ལག་ཏུ་ཐོན་དཀའ་བ་སོགས་ཀྱིས། བརྡ་དང་ཐ་སྙད་གང་ཞིག་གསར་ཤོས་དང་དག་ཤོས་ཡིན་པའི་ཐད་གདེང་ཁེལ་བའི་ཁ་གསལ་མ་བྱུང་བ་སོགས་ཕྱིའི་རྒྱུ་རྐྱེན་ཡང་འདུས་སྟེ། མ་འོངས་པར་དྲ་ལམ་ནས་མིང་མཛོད་བཀོལ་སྤྱོད་དེ་ཉིད་སྔར་ལས་ཁ་གསལ་དང་སྟབས་བདེ་ཡོང་བའི་རེ་བ་ཡང་ཞུ་བཞིན་ཡོད།
