ཉེ་ལམ་ནས་ཡེ་ཤུའི་ཆོས་དཔོན་ཕོབ་མཆོག་སྨན་ཁང་དུ་ཟླ་གཅིག་རིང་སྨན་བཅོས་བྱས་ཏེ་ད་ལྟའི་ཆར་དྲག་སྐྱེད་འབྱུང་གི་ཡོད་ཀྱང་ཁོང་གི་འཕྲོད་བསྟེན་གྱི་གནས་སྟངས་ཞན་པོ་ཡོད་པའི་གནས་སྟངས་ཐད་མི་མང་པོས་སེམས་འཚབ་བྱེད་བཞིན་འདུག
དགུང་ལོ་ ༨༨ ལ་ཕེབས་པའི་ཆོས་དཔོན་ཕོབ་མཆོག་རོམ་ཇི་མི་ལི་སྨན་ཁང་ (Rome’s Gemelli hospital) དུ་གློ་བའི་གཉན་ཚད་གྱི་ནད་གཞི་ཕོག་སྟེ་དུས་ཡུན་རིང་པོར་སྨན་པར་བསྟེན་གཏུག་གིས་སྨན་བཅོས་གནང་ཡོད་ཅིང་། ད་ལན་ནི་ཁོང་སྨན་ཁང་དུ་བཞུགས་པའི་སྐུ་ཚེའི་ནང་གི་དུས་ཡུན་རིང་ཤོས་དང་འཇིགས་སྣང་ཆེ་ཤོས་ཤིག་ཡིན་པར་བརྟེན། འཛམ་གླིང་ནང་གི་ཡེ་ཤུའི་ཆོས་ལུགས་པ་དུང་ཕྱུར་ ༡།༤ ཙམ་ལ་ཁོང་གིས་མུ་མཐུད་སྣེ་ཁྲིད་གནང་ཐུབ་མིན་ཐད་ལ་དོགས་འདྲི་དང་སེམས་འཚབ་བྱེད་མཁན་ཇེ་མང་དུ་འགྲོ་བཞིན་འདུག
དེ་འབྲེལ་ཆེད་མཁས་པ་ཁག་ཅིག་གིས། ཁོང་གི་དགུང་ན་མཐོ་བ་དང་འཕྲོད་བསྟེན་གྱི་གནས་སྟངས་ཞན་པ། དེ་བཞིན་དགུང་ལོ་གཞོན་དུས་གློ་བ་གཅིག་གཤག་བཅོས་བྱས་པ་སོགས་ལ་བརྟེན་ནས་དྲག་སྐྱེད་བྱུང་བར་བདུན་ཕྲག་ཁ་ཤས་འགོར་སྲིད་སྐོར་བརྗོད་འདུག
ཕྱི་ལོ་ ༢༠༢༥ ལོ་ནི་ཕོབ་མཆོག་གིས་གོ་སྒྲིག་གཏན་འབེབས་བྱས་པའི་ཡེ་ཤུའི་ཆོས་ལུགས་ཀྱི་གནས་སྐོར་གྱི་ལོ་ཡིན་པས། འདས་པའི་ཟླ་གཅིག་རིང་ཕོབ་མཆོག་གིས་དུས་ཆེན་འདིར་མཉམ་ཞུགས་གནང་ཐུབ་མེད་པ་མ་ཟད། བསླེབ་ལ་ཉེ་བའི་ཡེ་ཤུའི་ཨི་སི་ཊར་ (Easter) གྱི་དུས་ཆེན་ལ་ཕེབས་ཐུབ་ཀྱི་ཡོད་མེད་རྟོགས་དཀའ་བ་ཞིག་ཆགས་ཡོད་འདུག་ལ། འདི་ལོར་འཛམ་གླིང་ཡུལ་གྲུ་གང་སར་ནས་ཡེ་ཤུའི་ཆོས་ལུགས་ཀྱི་རྗེས་འབྲང་བ་མི་གྲངས་ས་ཡ་ ༣༠ ལྷག་རོམ་ (Rome) དང་ཝེ་ཊི་ཁན་ (Vatican) ཁུལ་དུ་གནས་སྐོར་དུ་ཡོང་གི་ཡོད་པའི་ཚོད་དཔག་བྱེད་ཀྱིན་འདུག
ཕྱི་ཟླ་ ༢ ཚེས་ ༡༤ ཉིན་ཡེ་ཤུའི་ཆོས་དཔོན་ཕོབ་མཆོག་ལ་གློ་བའི་གཉན་ཚད་ཀྱི་ནད་གཞི་ཕོག་སྟེ། སྨན་ཁང་དུ་བསྟེན་གཏུག་བྱས་ཡོད་འདུག་ལ། ཁོང་ཉིད་སྨན་ཁང་དུ་བཞུགས་པའི་རིང་ཕོབ་མཆག་གིས་ཁྲིམས་ཡིག་ལ་མཚན་རྟགས་འགོད་པ་དང་། ལས་རོགས་ལ་ཐུག་འཕྲད་གནང་བ་སོགས་ཀྱི་ལས་དོན་ཁག་ཅིག་བསྒྲུབས་ཡོད་ཀྱང་། ཡེ་ཤུའི་ཆོས་དཔོན་དང་ཝེ་ཊི་ཁན་གྱི་ཉམས་ཞིབ་ཆེད་མཁས་པ་ཀུབ་ལེར་ (Michel Kubler) གྱིས། ཆོས་དཔོན་ཕོབ་མཆོག་གི་ཆོས་ཕྱོགས་ཀྱི་འགན་དབང་ལྷག་མ་དེ་སྐབས་དོན་བསྒྲུབ་ཐུབ་མིན་དྲི་བ་ཆེན་པོ་ཞིག་ཡིན་པ་དང་། ཁོང་ཉི་ཝེ་ཊི་ཁན་དུ་ཕྱིར་ལོགས་གནང་རྗེས་ཁོང་གི་མི་ཚེ་ཇི་འདྲ་ཡོང་མིན་ཤེས་ཀྱི་མེད་པ་རེད། དེར་བརྟེན། གལ་ཏེ་ཁོང་གིས་མི་ལྕོགས་ན་དགོངས་པ་ཞུ་རྒྱུའི་གདམ་ཁ་ལས་ལྷག་མེད། ཅེས་བརྗོད་འདུག
ཡེ་ཤུའི་ཆོས་དཔོན་ཕོབ་ (Pope Francis) མཆོག་ནི་ཕྱི་ལོ་ ༡༩༣༦ ཟླ་ ༡༢ ཚེས་ ༡༧ ཉིན་ལྷོ་ཨ་མི་རི་ཁའི་རྒྱལ་ཁབ་ཨར་གྷེན་ཊི་ན་རུ་འཁྲུངས་ཤིང་། ཆུང་དུས་སན་ཊོ་སི་ཨན་གྷི་ལེ་སི་སློབ་གྲྭ་ (Santos Angeles School) སློབ་གྲྭ་རུ་སློབ་སྦྱོང་གནང་། དེ་རྗེས་ (Escuela Tecnica) སློབ་གྲྭ་རུ་རྫས་འགྱུར་རིག་པའི་ཐོག་སློབ་མཐར་ཕྱིན། དགུང་ལོ་ ༢༡ ཐོག་ཁོང་ལ་གློ་བའི་གཉན་ཚད་ཀྱི་ནད་གཞི་ཕོག་སྟེ། གློ་བ་གཅིག་མེད་པར་བཟོ་དགོས་བྱུང་འདུག དེ་ནས་ཁོང་གིས་བླ་མ་གསོ་སྐྱོང་ཁང་དུ་སློབ་སྦྱོང་གནང་། ཕྱི་ལོ་ ༡༩༦༧ ལོར་ཆོས་ལུགས་རིག་པའི་སློབ་སྦྱོང་གནང་མགོ་བཙུགས། ཕྱི་ལོ་ ༡༩༦༩ ཟླ་ ༡༢ ཚེས་ ༡༣ ཉིན་ཁོང་རཱ་མོན་ཇོ་སི་ཁེ་སི་ཏེ་ལཱ་ནོ་ཡིས་བསྙེན་རྫོགས་ཀྱི་སྡོམ་པ་བསྒྲུབས། དེ་རྗེས་ས་གནས་དེར་ཆོས་ལུགས་རིག་པའི་སློབ་དཔོན་གྱི་འགན་བཞེས། ཕྱི་ལོ་ ༡༩༩༢ ལོར་བླ་ཆེན་དུ་བསྐོས་པ་དང་། ཕྱི་ལོ་ ༢༠༡༣ ལོར་ཕོབ་མཆོག་ཡེ་ཤུའི་ཆོས་དཔོན་དུ་འདེམས་ཐོན་བྱུང་སྟེ། ད་བར་ཡེ་ཤུའི་ཆོས་དཔོན་གྱི་ཕྱག་ལས་གནང་མུས་ཡིན་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
