སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་ཞལ་ཙམ་མཇལ་དུ་བཅུག་རྗེས་སྐུ་ཕུང་རྩིས་སྤྲད་མི་འདུག  

ཕྱི་ཟླ་ ༤ ཚེས་ ༡༠ ཉིན་གྱི་ཕྱི་དྲོར་མགོ་ལོག་དགའ་བདེ་རྫོང་ལུང་སྔོན་དགོན་པའི་སྐུ་ཚབ་དགེ་འདུན་པ་ལྔ་ལ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་ཞལ་གཅིག་པུ་བསྟན་ཙམ་བྱས་པ་ལས་སྐུ་ཕུང་ཡོངས་རྫོགས་བསྟན་མི་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་གྲོངས་རྐྱེན་ཁ་གསལ་དགོས་པའི་རེ་འདུན་ཤུགས་ཆེན་འདོན་གྱི་ཡོད་པ་ལྟར། ཟླ་འདིའི་ཚེས་ ༡༠ ཉིན་གྱི་ཕྱི་དྲོར་ཝེ་ཐི་ནམ་རྒྱལ་སྤྱིའི་སྨན་ཁང་(Vinmec Central Park International Hospital )དུ། ལུང་སྔོན་དགོན་པའི་སྐུ་ཚབ་དགེ་འདུན་པ་ལྔ་ལ་རིན་པོ་ཆེ་མཆོག་གི་ཞལ་སྐར་མ་གཉིས་གསུམ་ཙམ་ལ་མཇལ་བཅུག་ཡོད་ཀྱང་། སྐུ་ཕུང་ཡོངས་རྫོགས་མཇལ་དུ་བཅུག་མི་འདུག་ལ། དགོན་པ་དང་ནང་མི་སྐུ་ཕུང་རྩིས་སྤྲད་མེད་པ་མ་ཟད། ལུང་སྔོན་དགོན་པར་མཆོད་འབུལ་སྨོན་ལམ་དང་འདུ་འཛོམས་རིགས་བྱེད་པར་དམ་དྲག་ཤུགས་ཆེན་བྱེད་མུས་ཡིན་འདུག 

གནད་དོན་དེའི་ཐད་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས་འདི་གའི་གསར་འགོད་པར། ཕྱི་ཚེས་ ༡༠ ཉིན་ཝི་ཐི་ནམ་ནང་ཡོད་པའི་རྒྱ་ནག་གཞུང་ཚབ་གི་མི་སྣ་དང་ལུང་སྔོན་དགོན་པའི་གྲྭ་བ་ལྔ་སོགས་ལ་མི་གསུམ་རེ་གསུམ་རེ་བྱས་ནས་སྐར་མ་གཉིས་གསུམ་ཙམ་ལ་རིན་པོ་ཆེ་མཆོག་གི་ཞལ་རས་བསྟན་ཡོད་ཀྱང་།  དེའི་རྗེས་ནས་འབྲེལ་ཡོད་སོགས་དང་འབྲེལ་ལམ་ཆད་དེ་ད་ལྟའི་གནས་སྟངས་ཐད་གསལ་ཁ་གང་ཡང་མེད་སྐོར་བརྗོད་བྱུང་ལ། ཡང་བོད་ནང་གི་འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས། ཉེ་ལམ་རྒྱ་ནག་གཞུང་གིས་ཁྲི་པ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་དགོངས་པ་རྫོགས་པ་རེད་ཅེས་ཟེར་གྱི་འདུག་ལ། དགོན་པར་འདུ་འཛོམས་དང་མཆོད་འབུལ་ཞུ་བར་དམ་དྲག་བྱེད་མུས་ཡིན་སྐོར་བརྗོད་བྱུང་། 

ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཇིམ་མེག་གྷ་ཝན་(Jim McGovern)མཆོག་གིས་སྒེར་གྱི་ཨེག་སི་(X) དྲ་ལམ་སྟེང་། བོད་ཀྱི་ཆོས་དཔོན་སྤྲུལ་སྐུ་ཧུྃ་ཀར་རྡོ་རྗེ་ཝི་ཐི་ནམ་དུ་སྐུ་གྲོངས་པ་དེར་ཧ་ཅང་བློ་ཕམ་བྱུང་། རྒྱ་ནག་གཞུང་གིས་ཁོང་གིས་དགོན་པ་དང་སློབ་གྲྭ་འཛིན་སྐྱོང་གནང་བར་གདུག་རྩུབ་དང་མནར་གཅོད་བཏང་ཡོད། ཨ་རིའི་རྒྱལ་སྲིད་ལས་ཁུངས་ཀྱིས་ངེས་པར་དུ་ཝི་ཐི་ནམ་ལ་ཞིབ་ཕྲ་དང་ཕྱི་གསལ་ནང་གསལ་གྱི་རྟོག་ཞིབ་བྱ་དགོས་པའི་སྐུལ་མ་གཏང་དགོས། ཞེས་གསུངས་འདུག 

དེ་བཞིན་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས། ཧཱུྃ་ཀར་རྡོ་རྗེ་རིན་པོ་ཆེ་ཝེ་ཐི་ནམ་ནང་དོགས་གཞི་ཅན་གྱི་གནས་སྟངས་འོག་སྐུ་གྲོངས་པ་རེད། བོད་མིའི་ངོ་བོའི་ཆེད་དུ་སྐུ་ལས་སྐྱོན་མཁན་ཞིག་སྐུ་གྲོངས་པ་རེད། ཁོང་སྐུ་གྲོངས་པ་དེ་ནི་རྒྱ་ནག་གི་ཤུགས་རྐྱེན་རྒྱ་བསྐྱེད་དང་། ཁ་ཁུ་སིམ་པོའི་ངང་རྒྱལ་མཚམས་ལས་བརྒལ་ནས་འབུར་འཇོམས་གཏོང་བར་སེམས་འདུན་བཅངས་ཀྱིན་ཡོད་པའི་དྲན་སྐུལ་ཞིག་ཀྱང་རེད། དེར་འཛམ་གླིང་གིས་ཁ་བཙུམས་ནས་སྡོད་མི་ཉན། ཞེས་གསུངས་འདུག 

ཟླ་འདིའི་ཕྱི་ཚེས་ ༡༡ ཉིན་ཝེ་ཐི་ནམ་བྷི་བྷི་སི་གསར་ཁང་གིས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་གྲོངས་ཟིན་སྐོར་གྱི་གནས་ཚུལ་ཞིག་སྤེལ་བའི་ཁྲོད། དབུས་བོད་མིའི་སྒྲིག་འཛུགས་ཀྱིས་གནས་ཚུལ་དེའི་སྐོར་ནས་གནས་ཚུལ་འཕར་མ་མཁོ་སྤྲོད་བྱས་མེད་སྐོར་གསལ་ཡོད་པའི་ཐད། དབུས་བོད་མིའི་སྒྲིག་འཛུགས་ཀྱི་མགྲིན་ཚབ་བསྟན་འཛིན་ལེགས་བཤད་ལགས་ཀྱིས་འདི་གའི་གསར་འགོད་པར། ཁོང་ཚོས་གནས་ཚུལ་འདི་མཁོ་སྤྲོད་གནང་མཁན་གྱི་འབྲེལ་གཏུག་ཁ་བྱང་སོགས་སྤྲད་རོགས་ལབ་ཀྱི་འདུག གནས་ཚུལ་མཁོ་སྤྲོད་པའི་ཁ་བྱང་དེ་དག་སྤྲད་རྒྱུ་ཁག་པོ་རེད། གང་ཟག་དེ་ལའང་དཀའ་ངལ་ཞིག་ཆགས་བསྡད་ཀྱི་ཡོད་རེད། དེ་མིན་དབུས་བོད་མིའི་སྒྲིག་འཛུགས་ཀྱིས་ཝེ་ཐི་ནམ་བྷི་བྷི་གསར་ཁང་ལྷན། དུས་ནས་དུས་སུ་འབྲེལ་ལམ་བཟུང་ནས་སྐད་ཆ་བཤད་དང་ཤོད་མུས་ཡིན་ལ། ད་བར་རྒྱུས་ལོན་བྱུང་བའི་གནས་ཚུལ་ཚང་མ་ཕུལ་ཡོད། ཞེས་གསུངས་བྱུང་། 

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་བོད་ནང་སྙན་གྲགས་ཡོད་པའི་ལུང་སྔོན་དགོན་ཕྱག་འདེབས་མཁན་སྤྲུལ་སྐུ་པདྨ་གཏུམ་པོ་མཆོག་གི་སྲས་ཡིན་ཞིང་། ཕྱི་ལོ་ ༢༠༠༤ ལོར་ཁོང་གིས་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་།  ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་སྦྱོང་གི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་པ། པདྨ་མཚོ།