དབུས་གཙང་སྤྱི་འཐུས་བསམ་གཏན་ཆོས་སྒྲོན་ལགས་ཀྱིས་ལས་འཁུར་དམ་འབུལ་ཞུས་སོང་།

བཅའ་ཁྲིམས་དོན་ཚན་ཞེ་བདུན་པའི་དགོངས་དོན་ལྟར་དབུས་གཙང་སྤྱི་འཐུས་ཀྱི་སྒུག་ཐོ་ཨང་གཉིས་པ་བསམ་གཏན་ཆོས་སྒྲོན་ལགས་ནས་ལས་འཁུར་དམ་འབུལ་ཞུས་སོང་།

དེ་རིང་སྔ་དྲོ་ཆུ་ཚོད་ ༡༠ སྟེང་སྤྱི་འཐུས་ཚོགས་ཁང་དུ་བཅའ་ཁྲིམས་དོན་ཚན་ཞེ་བདུན་པའི་དགོངས་དོན་ལྟར།  བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་མདུན་དུ། དབུས་གཙང་སྤྱི་འཐུས་ཀྱི་སྒུག་ཐོ་ཨང་གཉིས་པ་བསམ་གཏན་ཆོས་སྒྲོན་ལགས་ཀྱིས་སྐབས་བཅུ་བདུན་པའི་བོད་མི་མང་སྤྱི་འཐུས་ཀྱི་ལས་འཁུར་དམ་འབུལ་ཞུས་སོང་བ་དང་། ཁོང་མོས་ཉེ་ལམ་གྲོས་ཚོགས་ཚོགས་དུས་དགུ་བའི་སྟེང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་བདམས་པའི་དབུས་གཙང་སྤྱི་འཐུས་ཟླ་བ་ཕུན་སྐྱིད་མཆོག་གི་ཚབ་ཏུ་ལས་འཁུར་དམ་འབུལ་ཞུས་པ་རེད་ལ། དབུས་གཙང་སྤྱི་འཐུས་ཀྱི་སྒུག་ཐོ་ཨང་གསུམ་པ་དེ་བཅོ་ལྔ་ཚེ་རིང་ལགས་ཡིན་འདུག

སྐབས་དེར་འདི་གའི་གསར་འགོད་པས་འཚམས་འདྲི་དང་སྦྲགས། ད་ལན་བསམ་གཏན་ཆོས་སྒྲོན་ལགས་ནས་བོད་མི་མང་སྤྱི་འཐུས་ཀྱི་ལས་འཁུར་དམ་འབུལ་ཞུས་པ་ཐེངས་གཉིས་པ་ཆགས་ཡོད་སྟབས། དམིགས་བསལ་གྱི་དམ་བཅའ་དང་དགོངས་འཆར་གསར་པ་གང་ཡོད་སྐོར་དྲིས་པར་ཁོང་གིས། ང་རང་མི་མང་གིས་གོ་སྐབས་གནང་བའི་སྐབས་བཅུ་དྲུག་པ་དང་ད་ལན་སྐབས་བཅུ་བདུན་པའི་སྤྱི་འཐུས་ཤིག་ཆགས་ཡོད།  དམིགས་བསལ་གྱི་ཁས་ལེན་དམ་བཅའ་མེད་ནའང་། རང་ཉིད་ཀྱིས་ནམ་རྒྱུན་ནས་ལྷག་བསམ་རྣམ་དག་གིས་བོད་སྤྱི་པའི་ལས་དོན་ཐོག་ཞབས་ཕྱི་ཞུ་ཡི་ཡོད། སྤྱིར་བཏང་བོད་པའི་སྤྱི་ཚོགས་ནང་དཀའ་ངལ་གང་འདྲ་ཞིག་ཡོད་ཀྱང་རང་ནུས་གང་ཡོད་ཀྱིས་ཧུར་ཐག་བྱེད་བཞིན་ཡོད། ཅེས་གསུངས་བྱུང་།

བཙན་བྱོལ་བོད་མིའི་བཅའ་ཁྲིམས་དོན་ཚན་ཞེ་བདུན་པའི་ནང་། འདེམས་ཐོན་སྤྱི་འཐུས་ཁོངས་ནས་སྤྱི་འཐུས་ལས་རྒྱུན་རིང་ཤོས་དེར་སྤྱི་འཐུས་རྒྱུན་ལས་ཀྱིས་བར་བརྒལ་ཚོགས་གཙོར་བསྐོ་གཞག་བྱེད་དགོས། གལ་ཏེ་ལས་རྒྱུན་འདྲ་མཉམ་བྱུང་ཚེ་དེའི་ཁོངས་ནས་རང་ལོ་བགྲེས་ཤོས་དེར་བསྐོ་གཞག་བྱེད་དགོས། བར་བརྒལ་ཚོགས་གཙོས་ཆེས་མཐོའི་ཁྲིམས་ཞིབ་པ་ཆེ་བའི་མདུན་སར་དམ་འབུལ་ཞུས་རྗེས། སྤྱི་འཐུས་རེ་རེས་རང་ཉིད་སྤྱི་འཐུས་ཀྱི་ལས་འཁུར་དུ་མ་ཞུགས་གོང་བར་བརྒལ་ཚོགས་གཙོའི་མདུན་སར་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ། ཁས་ལེན་བྱེད་དགོས། ཚོགས་གཙོ་དང་ཚོགས་གཞོན་འདེམས་ཐོན་བྱུང་རྗེས་ཚོགས་གཙོའི་མདུན་སར་དམ་འབུལ་ཞུ་དགོས་པ་དང༌། ཚོགས་གཙོ་ས་གནས་སུ་མེད་སྐབས་ཚོགས་གཞོན་མདུན་སར་དམ་འབུལ་ཞུ་དགོས། ཞེས་གསལ་ཡོད་པ་ལྟར། བོད་མི་མང་སྤྱི་འཐུས་རྣམས་ཀྱིས་ཚོགས་གཙོའི་མདུན་སར་དམ་འབུལ་ཞུ་དགོས་པ་དང་། ཚོགས་གཙོ་ས་གནས་སུ་མེད་ཚེ་ཚོགས་གཞོན་གྱི་མདུན་དུ་དམ་འབུལ་ཞུ་དགོས་པ་རེད།

བསམ་གཏན་ཆོས་སྒྲོན་ལགས་ནི། ཕྱི་ལོ་ ༡༩༦༨ ཟླ་ ༡༢ ཚེས་ ༢༠ ཉིན་སྐྱེས་ཤིང་། ཚོང་རིག་ཐོག་རབ་འབྱམས་པའི་གནས་ཚད་ཀྱི་ལག་འཁྱེར་ཡོད་ཅིང་། འདས་པའི་མི་ལོ་ཉེར་བདུན་ལྷག་གི་རིང་བོད་མིའི་སྒྲིག་འཛུགས་ཀྱི་རྩིས་ཞིབ་པའི་ལས་འགན་དང་། སྦེལ་ཀོབ་དཔལ་འབྱོར་ལས་ཁུངས་ཀྱི་རྩིས་དྲུང་གཅིག་ལྕོགས། སྤྲེལ་ཀོབ་མཉམ་སྦྲེལ་བཟོ་གྲྭའི་རྩིས་པ་དང་འགན་འཛིན། སྦེལ་ཀོབ་ས་གནས་བུད་མེད་ལྷན་ཚོགས་ཀྱི་ཚོགས་གཙོ། དབུས་བུད་མེད་ལྷན་ཚོགས་ཀྱི་ཚོགས་གཞོན་སོགས་གཞུང་དང་གཞུང་འབྲེལ་མིན་པའི་སྒྲིག་འཛུགས་ཁག་གི་ནང་ཕྱག་ལས་གནང་མྱོང་འདུག

གསར་འགོད་པ། སྐལ་བཟང་སྦྱིན་པ།