དེ་རིང་བོད་ཀྱི་ཞོ་སྟོན་རྒྱས་པ་ཐེངས་ ༢༨ པ་མཇུག་བསྡུས་ཡོད་པ་དང་ད་ལན་སློབ་གྲྭ་ཁག་ནས་མཉམ་ཞུགས་བྱེད་མཁན་མང་ཤོས་བྱུང་འདུག
དེ་རིང་བོད་ཀྱི་ཟློས་གར་ཁང་དུ་བོད་ཀྱི་ཞོ་སྟོན་རྒྱས་པ་ཐེངས་ ༢༨ པའི་མཇུག་སྡོམ་མཛད་སྒོ་འཚོགས་སོང་། མཇུག་སྡོམ་མཛད་སྒོའི་སྟེང་སྐུ་མགྲོན་གཙོ་བོ་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་མཆོག་སྤྲུལ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་སྲིད་ཚབ་རྒྱ་རི་སྒྲོལ་མ་མཆོག ༧སྐྱབས་རྗེ་གནས་ཆུང་སྐུ་རྟེན་རིན་པོ་ཆེ་མཆོག མཆོག་སྤྲུལ་ལྷ་རྒྱལ་རིན་པོ་ཆེ་མཆོག བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། དགའ་ལྡན་ཕོ་བྲང་གི་དྲུང་ཆེ། དྷ་ས་ཁུལ་གྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་དང་ལས་བྱེད། ཞོ་སྟོན་ནང་མཉམ་ཞུགས་གནང་བའི་སློབ་གྲྭ་ཁག་གི་སློབ་སྤྱི་དང་སློབ་ཕྲུག མི་མང་སོགས་འཛོམས་འདུག
བོད་ཀྱི་ཞོ་སྟོན་གྱི་གལ་གནད་ཆེ་བའི་སྐོར་དང་འབྲེལ་ནས་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་མཆོག་སྤྲུལ་རིན་པོ་ཆེ་མཆོག་གིས། ཞོ་སྟོན་ཟེར་བ་དེ་བོད་མི་རིགས་ལ་མཚོན་ན་ཧ་ཅང་གི་གལ་ཆེན་པོ་ཡིན་པ་མ་ཟད། ལོ་རྒྱུས་ཀྱི་རང་བཞིན་ལྡན་པ་ཞིག་རེད། དེ་ཡང་དུས་རབས་བཅུ་བཞི་ནས་བོད་ལ་ལྷ་མོ་འཚོགས་ནས་དུས་ད་ལྟ་བར་དུ་འཕེལ་རྒྱས་ཕྱིན་པ་རེད། ཞོ་སྟོན་གྱི་ཐོག་ནས་ལྷ་མོའི་སྒྱུ་རྩལ་དེ་གོང་འཕེལ་དང་རྒྱུན་གནས་ཡོང་རྒྱུའི་ཐོག་ལ་ལེགས་སྐྱེས་འབུལ་ཐུབ་པ་རེད་ལ། མ་འོངས་པར་དེ་བཞིན་དུ་འབུལ་ཐུབ་དགོས་རྒྱུ་ཡིན་པར་བརྟེན། ཞོ་སྟོན་དེ་ཧ་ཅང་གི་གལ་ཆེན་པོ་རྩིས་ཀྱི་ཡོད། ཅེས་གསུངས་བྱུང་།
རིན་པོ་ཆེ་མཆོག་གིས། ཀུན་བདེ་གླིང་རྟ་ཚག་སྐུ་གོང་མས་ལྷ་མོའི་ཐོག་ལ་ཐུགས་སྣང་ཆེན་པོ་གནང་འདུག ལྷ་མོའི་སྒྱུ་རྩལ་ཟེར་བ་དེ་རང་མི་རིགས་ཀྱི་ཐུན་མོང་མ་ཡིན་པའི་རིག་གཞུང་ཡིན་པ་ཙམ་མ་ཟད། བརྗོད་བྱའི་ཆ་ནས་བཟང་པོའི་སློབ་གསོ་རྩ་ཆེན་པོ་མང་པོ་ཡོད་པ་དང་། དེ་བཞིན་ལོ་རྒྱུས་ཀྱི་དོན་སྙིང་ཆེན་པོ་ལྡན་པར་བརྟེན། དེ་རྒྱུན་གནས་ཡོང་རྒྱུའི་ཆེད་དུ་ཐུགས་རེ་ཞེ་དྲགས་གནང་བ་རེད་ལ། ཕྱི་ལོ་ ༡༩༥༩ ལོའི་གོང་དུ་ཀུན་བདེ་གླིང་གིས་གྲྭ་གཞོན་མང་པོ་ཞིག་ལ་ལྷ་མོ་དེ་ཚོ་གལ་ཆེན་པོ་བརྩིས་ནས་སྦྱངས་བཅུག་གནང་བ་དང་། བཀའ་སློབ་གནང་བའི་སྐབས་སུ་ལྷ་མོ་སྦྱོང་བ་ཡིན་ན། མ་འོངས་པར་སོ་སོའི་མདུན་ལམ་ལ་ཕན་པ་ཙམ་མ་ཟད། ལྷ་མོ་རྒྱུན་གནས་ཀྱི་ཐོག་ལ་ཕན་ཐོགས་ཡོང་གི་རེད་ཅེས་བཀའ་ཕེབས་པ་ནང་བཞིན་གལ་ཆེན་པོ་རྩིས་གནང་འདུག ཅེས་གསུངས་བྱུང་།
རིན་པོ་ཆེ་མཆོག་གིས། བཙན་བྱོལ་དུ་ཕེབས་ནས་ལོ་ ༦༥ ཕྱིན་པ་རེད། དེའི་ནང་དུ་ཆོས་དང་རིག་གཞུང་གང་ཅིའི་ཐད་ནས་དངོས་གནས་དྲང་གནས་ཀྱིས་ཉམས་པ་མེད་པར་གནས་ཐུབ་པ་ཙམ་མ་ཟད། ལྷ་མོའི་སྒྱུ་རྩལ་ལ་སོགས་པ་གནས་ཐུབ་རྒྱུ་དེ་གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ཉག་ཅིག་དང་། མི་སྣ་གོང་མ་མང་པོ་ཞིག ད་ལྟའི་མི་སྣ་མང་པོ་ཞིག་གི་ཐུགས་རྗེ་བཀའ་དྲིན་ལ་བརྟེན་ནས་གནས་ཐུབ་པ་རེད། དེ་ནི་ང་ཚོའི་གཟི་བརྗིད་དང་རྒྱལ་ཁ་ཆགས་ཀྱི་ཡོད་པ་རེད། ལྷག་པར་དུ་ད་ལོ་༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ ལ་ཕེབས་པའི་བཀའ་དྲིན་རྗེས་དྲན་གྱི་སླད་དུ་བྱམས་བརྩེའི་ལོ་སྲུང་གཙིའི་ཆ་ཤས་ལ་ཞོ་སྟོན་རྒྱས་པ་ཐེངས་ ༢༨ པ་བཞུགས་སྒར་དུ་བསྐོང་ཚོགས་གནང་བ་ཙམ་མ་ཟད། བཙན་བྱོལ་ལོ་རྒྱུས་ནང་ད་ལྟ་བར་དུ་ཞོ་སྟོན་ཐེངས་ ༢༨ འཚོགས་པའི་ནང་ནས་མཉམ་ཞུགས་པ་མང་ཤོས་བྱུང་བ་དེ། དངོས་གནས་དྲང་གནས་ཀྱིས་རྒྱལ་ཁ་ཆེན་པོ་ཆགས་ཀྱི་ཡོད་པ་དང་། དེའི་ཐོག་ནས་མི་སྣ་གོང་མ་དང་ད་ལྟའི་མི་མང་པོ་ཞིག་དངོས་གནས་དྲང་གནས་ཀྱིས་སྐུ་ལས་ཀྱི་འབྲས་བུ་ཞིག་ཀྱང་མཚོན་ཐུབ་ཀྱི་རེད་བསམ་གྱི་འདུག ཅེས་གསུངས་བྱུང་།
མ་འོངས་པར་བཙན་བྱོལ་སྤྱི་ཚོགས་ནང་ལྷ་མོའི་རིག་གཞུང་ཐོག་དོ་སྣང་གནང་གལ་ཆེ་བ་དང་འབྲེལ་ནས་རིན་པོ་ཆེ་མཆོག་གིས། བོད་མི་རིགས་ལ་འཛམ་གླིང་སྤྱིའི་གཅེས་ནོར་གྱི་མགོན་སྐྱབས་༧གོང་ས་རྒྱལ་བ་རིན་པོ་ཆེ་མཆོག་ཡོད་པ་རེད། ད་དུང་ཐུན་མོང་མ་ཡིན་པའི་ཆོས་དང་རིག་གཞུང་། ལྷ་མོའི་སྒྱུ་རྩལ་ལ་སོགས་པ་རྩ་ཆེན་པོ་མང་པོ་ཡོད་པར་བརྟེན། ང་ཚོས་ནོར་བུའི་ནོར་ཉམས་ཆོད་པའི་ཐོག་ནས་རྒྱུན་འཛིན་གནང་དགོས་རྒྱུ་དེ་འགན་འཁྲི་ཞིག་རེད། རིག་གཞུང་དེ་དག་གི་ཐོག་ནས་བོད་མི་རིགས་ལ་རིག་གཞུང་ཕྱུག་པོ་མཚོན་པ་མ་ཟད། མི་རིགས་གཞན་ལས་ཐུན་མོང་མ་ཡིན་པ་མཚོན་ཐུབ་ཀྱི་ཡོད་པ་ལ་སོགས་པའི་ནུས་པ་གལ་ཆེན་པོ་ཡོད་པར་བརྟེན། དེ་དག་རྒྱུན་གནས་དང་གོང་འཕེལ་དགོས་རྒྱུ་ཧ་ཅང་གི་གལ་ཆེན་པོ་རེད། ཚང་མས་ཐུགས་སྣང་གནང་རོགས་གནང་ཞུ་ཡི་ཡོད། ཅེས་གསུངས་བྱུང་།
བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ཀྱིས། ད་ལོ་ཞོ་སྟོན་དེ་ཧ་ཅང་གི་གལ་ཆེན་པོ་ཆགས་ཀྱི་ཡོད་པ་རེད། དེ་ཡང་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་གོ་སྟོན་གྱི་རྟེན་འབྲེལ་དང་བཀའ་དྲིན་རྗེས་དྲན་གྱི་ཆེད་དུ་ཞོ་སྟོན་ཐེངས་ ༢༨ པ་བཞུགས་སྒར་དུ་འཚོགས་པ་རེད། ཐེངས་འདིར་ལྷ་མོ་ཚོགས་པ་ཁག་ ༡༤ མཉམ་ཞུགས་གནང་བ་དང་། ལྷ་གཞུང་ཁག་ ༡༡ གཟིགས་འབུལ་ཞུས་ཡོད་པ་རེད། ཚང་མས་གྲ་སྒྲིག་དང་འཁྲབ་སྦྱོང་ཡག་པོ་གནང་འདུག འོན་ཀྱང་ཡར་རྒྱས་ལ་མཐའ་མེད་པར་བརྟེན། རྣམ་ཐར་དང་འཁྲབ་ཆས་སོགས་ཀྱི་ཐོག་ལ་ཡར་རྒྱས་གཏོང་དགོས་པ་ཁག་ཅིག་འདུག ད་ལོའི་ཞོ་སྟོན་ཡག་པོ་ཞེ་དྲགས་བྱུང་སོང་། ལོ་རྗེས་མར་ཨོ་ཌི་ཤ་ཕུན་ཚོགས་གླིང་གཞིས་ཆགས་སུ་ཞོ་སྟོན་ཐེངས་ ༢༩ པ་འཚོག་འཆར་ཡོད་སྐོར་སོགས་འགྲེལ་བརྗོད་གནང་བྱུང་།
ཕྱོགས་མཐའི་ལྷ་མོ་ཚོགས་པར་དཀའ་ངལ་ག་རེ་འཕྲད་ཀྱི་ཡོད་པའི་ཐད་དོན་གྲུབ་ཚེ་རིང་ལགས་ཀྱིས། ཕྱོགས་མཐའི་ལྷ་མོ་ཚོགས་པར་དཀའ་ངལ་རབ་དང་རིམ་པ་ཡོད་པ་རེད། གཙོ་བོ་ལྷ་མོ་ཚོགས་པའི་སྐྱིད་སྡུག་ནང་དུ་མཉམ་ཞུགས་བྱེད་མཁན་ཧ་ཅང་གི་ཉུང་ཉུང་རེད། དེ་བཞིན་གཞོན་སྐྱེས་འཛུལ་ཞུགས་བྱེད་མཁན་ཧ་ཅང་གི་དཀོན་པོ་རེད། རེ་བ་བཟང་བ་ཞིག་ལ་ད་ལན་སློབ་གྲྭ་ཁག་ནས་མཉམ་ཞུགས་བྱེད་མཁན་མང་དུ་ཕྱིན་ཡོད་སྐོར་སོགས་བརྗོད་བྱུང་།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
