རྒྱ་ནག་གཞུང་གིས་ཧོང་ཀོང་ནང་དྲུག་བཞིའི་དོན་རྐྱེན་ལ་རྗེས་དྲན་ཞུ་མི་ཆོག་པའི་ཁར་ཧོང་ཀོང་གི་བདེ་འཇགས་ཟེར་བར་གནོད་པའི་བྱ་སྤྱོད་རིགས་སྤེལ་མི་ཆོག་པའི་ཉེན་བརྡ་བཏང་འདུག
དེ་རིང་ནི་དྲུག་བཞིའི་དོན་རྐྱེན་བྱུང་ནས་མི་ལོ་ཧྲིལ་པོ་ ༣༦ ལོན་ཡོད་སྟབས། དེ་རིང་ཕྱི་ལོ་ ༡༩༨༩ ལོར་རྒྱ་ནག་གི་དྲུག་བཞི་དམར་གསོད་ཀྱི་ཁྲོད་ནས་ཤི་རྨས་འབྱུང་མཁན་རྣམས་ཀྱི་ནང་མི་གཙོས། རྒྱ་རིགས་དམངས་གཙོ་དོན་གཉེར་བ་རྣམས་ཀྱིས་འཛམ་གླིང་ས་ཕྱོགས་གང་སར་དུས་དྲན་སྲུང་གཙི་ཞུ་ཡི་ཡོད་ཀྱང་། རྒྱ་ནག་གཞུང་གིས་ཧོང་ཀོང་ནང་དམ་དྲག་ཆེན་པོ་བྱེད་ཀྱི་ཡོད་འདུག
དེའི་ཐད་ཐའེ་ཝན་གྱི་སྲིད་འཛིན་སྐུ་ཞབས་ལེ་ཆིན་ཏི་ (賴清德) ལགས་ཀྱིས། དམར་ཤོག་རིང་ལུགས་ཀྱིས་ལོ་རྒྱུས་ནག་གསུབ་ཏུ་བཏང་ནའང་། དམངས་གཙོ་དོན་གཉེར་བ་རྣམས་ཀྱིས་ལོ་རྒྱུས་སྲུང་སྐྱོབ་བྱ་རྒྱུ་ནི་ལྡོག་མེད་ཀྱི་འགན་འཁྲི་ཞིག་རེད། དེ་རིང་ང་ཚོས་གནམ་སྡེ་སྒོ་མོ་ཆེའི་ཐང་ཆེན་དུ་གོམ་འགྲོས་གནང་མཁན་རྣམས་ལ་རྗེས་དྲན་ཞུ་ཡི་ཡོད། ཐའེ་ཝན་གཞུང་གིས་མ་འོངས་པའི་མི་རབས་གསར་པ་དག་གི་སླད་དུ། དམངས་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཐད་ལ་རང་ཚུགས་བརྟན་པོས་འགྲེང་རྒྱུ་ཡིན། ཞེས་གསུངས་འདུག
དེ་བཞིན་ཨ་རིའི་ཕྱི་སྲིད་བློན་ཆེན་ལས་ཁུངས་ཀྱི་བློན་ཆེན་མཱར་ཁོ་རོ་བྷའོ་ (Marco Rubio) མཆོག་གིས་བསྒྲགས་གཏམ་ཞིག་སྤེལ་བའི་ཁྲོད། དྲུག་བཞིའི་དོན་རྐྱེན་སྐབས་དམངས་གཙོ་དང་རང་དབང་གི་སླད་ཁྲག་དྲི་བྲོ་བའི་དམར་གསོད་ཀྱི་དོན་རྐྱེན་ཁྲོད་ཚེ་སྲོག་ཤོར་མཁན་གྱི་མི་བུ་རྣམས་ཀྱི་སེམས་ཤུགས་དང་ཆོད་སེམས་ལ་བསྔགས་བརྗོད་ཞུས་པ་དང་སྦྲགས། དེ་རིང་ང་ཚོས་ཕྱི་ལོ་ ༡༩༨༩ ལོར་གཞི་རྩའི་འགྲོ་བ་མིའི་ཐོབ་ཐང་དང་དྲང་བདེན་གྱི་སླད་དུ་རྩོད་ལེན་བྱས་ནས། རྐྱེན་འདས་སུ་འགྱུར་མཁན་གྱི་བློ་སྤོབས་ལྡན་པའི་རྒྱ་རིགས་རྣམས་ལ་རྗེས་དྲན་ཞུ་ཡི་ཡོད། ཅེས་གསུངས་འདུག
འདས་པའི་ལོ་ཤས་གོང་ནས་རྒྱ་ནག་གཞུང་གིས་ཧོང་ཀོང་ནང་དམ་དྲག་དང་སྟངས་འཛིན་ནན་མོ་བྱས་ཏེ། རྒྱ་ནག་དམར་ཤོག་གཞུང་ལ་ངོ་རྒོལ་དང་མི་མཐུན་པ་ཤོད་མཁན་རྣམས་ལ་གང་བྱུང་ནག་ཉེས་གཡོགས་ནས་འཛིན་བཟུང་བཀག་ཉར་དང་། གཅར་རྡུང་སོགས་བྱེད་ཀྱི་ཡོད་ཅིང་། ཁ་སང་ཕྱི་ཚེས་ ༣ ཉིན་ཧོང་ཀོང་སྲིད་གཞུང་གིས་གནམ་སྡེ་སྒོ་མོ་ཆེའི་དོན་རྐྱེན་བྱུང་ནས་མི་ལོ་ ༣༦ འཁོར་བའི་དུས་དྲན་གྱི་ཉིན། ཧོང་ཀོང་གི་བདེ་འཇགས་ཟེར་བར་གནོད་པའི་དྲག་སྤྱོད་ཟེར་བ་ཞིག་སྤེལ་མི་ཆོག་ལུགས་ཀྱི་ཉེན་བརྡ་བཏང་ཡོད་པ་མ་ཟད། ཁྲིམས་སྒྲིག་དང་བདེ་འཇགས་ཟེར་བར་གནོད་འཚེ་གཏོང་མཁན་རིགས་ལ་ཉེས་ཆད་དགལ་རྒྱུ་ཡིན་པའི་ཉེན་བརྡའང་བཏང་འདུག
དེ་བཞིན་གནམ་སྡེ་སྒོ་མོ་ཆེའི་དོན་རྐྱེན་བྱུང་ནས་མི་ལོ་ ༣༦ འཁོར་བ་དང་བསྟུན། རྒྱ་ནག་གི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་(CHRD) གིས། རྒྱ་ནག་གཞུང་གིས་མ་ཉེས་ཁ་གཡོག་གི་འོག་ནས་འཛིན་བཟུང་བཀག་ཉར་དང་བཙོན་འཇུག་ཁྲིམས་ཐག་བཅད་པའི་ཧོང་ཀོང་གི་དམངས་གཙོ་དོན་གཉེར་བ་གྲགས་ཅན་གཞོན་ནུ་ཇོ་ཧྲ་ཝང་ལགས། གསར་འགོད་པ་དང་ཕྱི་ལོ་ ༢༠༡༩ ལོར་ཧོང་ཀོང་ནང་ཡར་ལངས་སྐབས་ཐད་གཏོང་མཁན་གྷན་ནེ་ཧོ་ (Gwyneth Ho) ལགས། ཧོང་ཀོང་སྤྱི་དམངས་ཐོབ་ཐང་ལས་འགུལ་བ་ཆོའོ་ཧུང་ཏོང་( chow hang tung) ལགས་སོགས་གཙོས་རྒྱ་ནག་གཞུང་གིས་དོན་མེད་ནག་ཉེས་གཡོགས་པའི་མི་གྲངས་ ༣༢ གང་མགྱོགས་ཀློད་གྲོལ་གཏང་དགོས་པའི་ནན་སྐུལ་བྱས་འདུག
དྲུག་བཞིའི་དོན་རྐྱེན་ནི་ཕྱི་ལོ་ ༡༩༨༩ ལོའི་ཟླ་ ༦ ཚེས་ ༤ ཉིན་གནམ་བདེ་སྒོ་མོ་ཆེའི་ཐང་ཆེན་དུ་སློབ་ཕྲུག་སྟོང་ཕྲག་མང་པོའི་དམངས་གཙོའི་ལས་འགུལ་ལ་རྒྱ་ནག་གཞུང་གིས་དྲག་གནོན་བྱས་ཏེ། སློབ་ཕྲུག་དང་ལས་འགུལ་བ་སྟོང་ཕྲག་མང་པོ་སྡེབ་གསོད་བྱས་པའི་དོན་རྐྱེན་ཡ་ང་བ་བྱུང་ཡོད་པ་དང་། དུས་ད་ལྟའང་སྐབས་དེར་དམར་གསོད་ཐེབས་མཁན་ཚོའི་ནང་མི་འབྲེལ་ཡོད་སོགས་ནས་ལོ་ལྟར་རྗེས་དྲན་ཞུ་ཡི་ཡོད་ཀྱང་། རྒྱ་ནག་ནང་ལོགས་ཙམ་མ་ཟད་ཉེ་བའི་ལོ་ཤས་ནས་བཟུང་ཧོང་ཀོང་ནང་དུའང་རྗེས་དྲན་ཞུ་རུ་འཇུག་གི་མེད་པ་རེད།
གསར་འགོད་པ། དཔལ་ལྡན།
