དེ་རིང་ཝེ་ཐི་ནམ་དང་ཐའེ་ཝན་སོགས་ནས་ཆེད་དུ་བཅར་བའི་དད་ལྡན་དོན་གཉེར་ཅན་ ༣༠༠ ལྷག་གིས་བཞུགས་སྒར་རྒྱལ་བའི་ཕོ་བྲང་དུ་༧གོང་ས་མཆོག་ལ་མཇལ་བཅར་ཞུས་སོང་།
དེ་རིང་བཞུགས་སྒར་༧རྒྱལ་བའི་ཕོ་བྲང་དུ་ཝི་ཐི་ནམ་དང་ཐའེ་ཝན། ཐའེ་ལན་ཌི། དེ་བཞིན་ཁེ་ན་ཌ་སོགས་ནས་མི་གྲངས་ ༣༠༠ ལྷག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་སོང་བ་དང་། ཐའེ་ཝན་དཔལ་འབྱོར་དང་རིག་གཞུང་ལྟེ་གནས་ཀྱི་སྐུ་ཚབ་ (Representative Taipei Economic and Cultural Center in India) (TECC) བྷོ་ཤོན་གྷར་ (Bau Shaun Ger) ཀྱིས་འདི་གའི་གསར་འགོད་པར། བོད་དང་ཐའེེ་ཝན་བར་ཆོས་དང་རིག་གཞུང་སོགས་ཀྱི་འབྲེལ་བ་སྔར་ལས་འཕེལ་རྒྱས་སུ་གཏོང་རེ་ཆེ་དགོས་སྐོར་བརྗོད་བྱུང་།
དེ་རིང་གི་མཇལ་བཅར་བའི་ཁྲོད་ཝེ་ཐི་ནམ་དང་ཐའེ་ལན་ཌི་སོགས་ནས་མཇལ་བཅར་བ་ ༢༡༠ ལྷག་འདུག་ལ། མཇལ་བཅར་གོ་སྒྲིག་གནང་མཁན་༧སྐུ་བཅར་རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག་གིས་འདི་གའི་གསར་འགོད་པར། དེ་རིང་མཇལ་བཅར་བ་མི་གྲངས་ ༢༡༠ ལྷག་ཡོད་པའི་ཁྲོད་ཕལ་ཆེ་བ་ཝི་ཐི་ནམ་ནས་ཡིན་པ་དང་། ཁོང་ཚོ་ཕ་མའི་རིང་ནས་ནང་པ་ཆགས་ཡོད་པ་རེད། ཕྱི་ལོ་ ༢༠༡༥ ལོར་༧གོང་ས་མཆོག་ནས་ཁོང་ཝེ་ཐི་ནམ་དུ་ཆེད་གཏོང་མཛད་པ་མ་ཟད། ༧གོང་ས་༧རྒྱལ་བ་རིན་པོ་ཆེ་མཆོག་གི་བཀའ་འབྲེལ་གྱི་ཐོག་ནས་ཤེས་ཡོན་གྱི་བསྟི་གནས་ཤིག་འཛུགས་དགོས་སྐོར་གསུངས་བ་བཞིན། ཕྱི་ལོ་ ༢༠༡༧ ལོར་སློབ་གྲྭ་ཐོག་རྩེག་ལྔ་ཅན་ཞིག་གསར་རྒྱག་གནང་ནས་དེང་དུས་ཀྱི་སློབ་སྦྱོང་དང་བོད་ཡིག་སོགས་བསླབ་ཀྱི་ཡོད་པ་སོགས་ཝེ་ཐི་ནམ་དང་བོད་ཀྱི་བར་འབྲེལ་བ་དཔེ་ཡག་པོ་འཛུགས་ཐུབ་ཡོད་སྐོར་དང་། ༧གོང་ས་མཆོག་ནས་ཡང་ནས་ཡང་དུ་ང་ཚོས་ནང་པའི་ལུང་པ་དེ་ཚོར་འབྲེལ་བ་འཛིན་དགོས་པ་དེ་གལ་ཆེན་པོ་རེད་གསུང་གི་ཡོད་པ་ལྟར། དེ་རིང་ཝེེ་ཐི་ནམ་གྱི་སློབ་ཕྲུག་ཆུང་ཆུང་ ༢༨ ཙམ་ཆེད་དུ་བཅར་ཡོད་པ་དེར་༧གོང་ས་མཆོག་ནས་ཐུགས་མཉེས་པོ་ཞེ་དྲག་གནང་སོང་སྐོར་གསུངས་བྱུང་།
དེ་རིང་མཇལ་བཅར་ཞུ་མཁན་ཐའེ་ཝན་དཔལ་འབྱོར་དང་རིག་གཞུང་ལྟེ་གནས་ཀྱི་སྐུ་ཚབ་བྷོ་ཤོན་གྷར་ལགས་ཀྱིས་འདི་གའི་གསར་འགོད་པར། ད་ལྟ་ཐའེ་ཝན་ནང་བོད་བརྒྱུད་ནང་བསྟན་གྱི་རྗེས་འཇུག་པ་ཧ་ཅང་ཇེ་མང་དུ་འགྲོ་བཞིན་ཡོད་ལ། ཐའེ་ཝན་ནང་བོད་ཀྱི་ཆོས་ད་རིག་གཞུང་དར་ཁྱབ་ཆེད་མི་གྲངས་ ༣༠༠༠ ཙམ་རེར་ཐོངས་མཆན་སྤྲོད་ཀྱི་ཡོད་པ་སོགས་མུ་མཐུད་ནས་ཐའེ་ཝན་དང་བོད་ཀྱི་འབྲེལ་བ་ཡར་རྒྱས་གོང་འཕེལ་དུ་གཏོང་བར་འབད་བརྩོན་གནང་གི་ཡོད་སྐོར་དང་། བོད་པའི་སློབ་ཕྲུག་མང་པོ་ཐའེ་ཝན་དུ་ཡོང་ནས་རྒྱ་ཡིག་རྒྱ་སྐད་སྦྱོང་ཐུབ་པའི་རེ་བ་བྱེེད་ཀྱི་ཡོད་ལ། དེ་ནི་བོད་དང་ཐའེ་ཝན་བར་གྱི་འབྲེལ་ལམ་མུ་མཐུད་ནས་ཡར་རྒྱས་སུ་གཏོང་བའི་ཟམ་པ་ལྟ་བུ་ཆགས་ཡོད་སྐོར་དང་། མ་འོངས་པར་ཕྱོགས་གང་ས་ནས་བོད་དང་ཐའེ་ཝན་བར་གྱི་འབྲེལ་བ་དང་། ལྷག་པར་དུ་བོད་བརྒྱུད་ནང་བསྟན་དང་རིག་གཞུང་ཐོག་ནས་འབྲེལ་ལམ་སྔར་ལས་ལྷག་ཡར་རྒྱས་སུ་འགྲོ་ཐུབ་པར་རེ་བ་རྒྱག་བཞིན་ཡོད་སྐོར་དང་། ཁོང་ཐེངས་དང་པོར་དྷ་རམ་ས་ལར་ཡོང་ནས་༧གོང་ས་མཆོག་ལ་མཇལ་བཅར་་ཞུས་པ་ཡིན་ལ། སེམས་ལ་ཧ་ཅང་གིས་དགའ་ཚོར་ཆེན་པོ་བྱུང་སྐོར་བརྗོད་བྱུང་།
ཡིག་འབྲི་བ། བསྟན་འཛིན་ཉི་སྒྲོན། རྩོམ་སྒྲིག་བྱེད་མཁན། པདྨ་མཚོ།
