དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་བོད་དོན་རྒྱབ་སྐྱོར་བ་སྐུ་ཞབས་ཌེན་སི་མི་ཐི་མཆོག་ཨོ་གླིང་གི་ཕྱི་སྲིད་ལས་ཁུངས་ཀྱི་ཚོང་དོན་གྱི་བློན་ཆེན་གཞོན་པར་བསྐོ་གཞག་བྱུང་བར་འཚམས་འདྲི་གནང་།
བོད་དོན་རྒྱབ་སྐྱོར་བ་སྐུ་ཞབས་ཌེན་སི་མི་ཐི་མཆོག་ཨོ་གླིང་གི་ཕྱི་སྲིད་ལས་ཁུངས་ཀྱི་ཚོང་དོན་གྱི་བློན་ཆེན་གཞོན་པར་བསྐོས། པར་བོད་ཀྱི་དུས་བབ་ཀྱིས་བསྒྲིགས། ༢༠༢༥།༦།༡༦
ཉེ་ལམ་ཨོ་གླིང་གི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་ཌེན་སི་མི་ཐི་ (Dean Smith) མཆོག་ཨོ་གླིང་ཕྱི་སྲིད་ལས་ཁུངས་ཀྱི་ཚོང་དོན་གྱི་བློན་ཆེན་གཞོན་པར་(Shadow Assistant Minister for Foreign Affairs and Trade) བསྐོས་ཡོད་པ་ལྟར། ཟླ་འདིའི་ཕྱི་ཚེས་ ༡༣ ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་འཚམས་འདྲིའི་འཕྲིན་ཡིག་ཅིག་ཕུལ་འདུག
སྲིད་སྐྱོང་སྤེན་པ་ཚེ་རིང་མཆོག་གི་འཕྲིན་ཡིག་ཁྲོད། ཨོ་གླིང་གཞུང་གིས་མུ་མཐུད་དུ་མངོན་གསལ་མེད་པའི་ཐོག་ནས་སྐྱབས་བཅོལ་བོད་མི་རྣམས་སྲ་བརྟན་དང་། བོད་ཀྱི་རིག་གཞུང་སྲུང་སྐྱོབ་ཀྱི་ཐད་ལ་རྒྱབ་སྐྱོར་གནང་མུས་ཡིན་པ་རེད། ཨོ་གླིང་གཞུང་དམངས་གཉིས་ཀྱིས་གཡོ་མེད་ཀྱི་རྒྱབ་སྐྱོར་འོག བོད་མི་རྣམས་ཀྱིས་རང་དབང་གི་ཐོག་ནས་བོད་ཀྱི་སྐད་ཡིག་དང་། ཆོས་ལུགས། རིག་གཞུང་བཅས་བདག་གཅེས་བྱ་ཐུབ་པ་ནི་ཆེས་བསྔགས་འོས་པ་ཞིག་ཡིན། སྐུ་ཉིད་ཀྱིས་བོད་མི་དང་བོད་དོན་ཞུ་གཏུགས་ཀྱི་ལས་དོན་གཉེར་བ་དེ་དག་བོད་མི་རྣམས་ཀྱི་དྲན་ངོས་སུ་གནས་ཡོད། ཅེས་སོགས་གསལ་འདུག
བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གི་གསུང་འཕྲིན་ནང་། ངས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱིས་ཚབ་ཞུས་ཏེ། སྐུ་ཉིད་ཨོ་གླིང་ཕྱི་སྲིད་ལས་ཁུངས་ཀྱི་ཚོང་དོན་གྱི་བློན་ཆེན་གཞོན་པར་བསྐོ་གཞག་བྱུང་བར་འཚམས་འདྲི་ཞུ་ཡི་ཡོད། སྐུ་ཉིད་ཀྱིས་ཡུན་རིང་བོད་དོན་ཐོག་རྒྱབ་སྐྱོར་གནང་སྟེ་བོད་ཀྱི་མཛའ་བརྩེའི་གྲོགས་པོ་ཞིག་ཏུ་གྱུར་བ་དང་། རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་དགུ་པའི་ཐོག་སྐུ་ཉིད་ནས་བརྙན་ལམ་བརྒྱུད་གསུང་བཤད་གནང་བ་བཅས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། མུ་མཐུད་བོད་དོན་ཞུ་སྐུལ་གནང་བ་བརྒྱུད་ཨོ་གླིང་དང་། རྒྱལ་སྤྱིའི་ནང་བོད་དོན་གོ་རྟོགས་སྤེལ་རྒྱུར་ཕན་ཐོགས་ཆེན་པོ་ཡོང་ངེས་རེད། ཅེས་གསུངས་འདུག
ད་ལྟ་རང་ལོ་ ༥༦ ཡིན་པའི་སྐུ་ཞབས་ཌེན་སི་མི་ཐི་ལགས་ནི་ཕྱི་ལོ་ ༡༩༦༩ ལོར་ཨོ་གླིང་ནུབ་རྒྱུད་ཀྱི་པར་ཐི་ཁུལ་དུ་སྐྱེས་ཤིང་། ཕྱི་ལོ་ ༢༠༡༢ ལོ་ནས་ཨོ་གླིང་གི་གྲོས་ཚོགས་འཐུས་མིར་བདམས། ཁོང་ནི་མཚན་མཐུན་གཉེན་སྒྲིག་དང་། མཚན་མཐུན་དགའ་རོགས་ཀྱི་ཐོབ་ཐང་རྩོད་ལེན་གནང་མཁན་ཞིག་ཡིན་པའི་མུར། བོད་དོན་རྒྱབ་སྐྱོར་བ་ཞིག་ཀྱང་ཡིན་པས། འདས་པའི་ལོ་ཤས་རིང་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དང་། རྒྱ་ནག་གཞུང་གིས་བོད་ནང་བཅའ་སྡོད་སློབ་གྲྭ་བཙུགས་ནས་བོད་མིའི་རིག་གཞུང་ཤུལ་མེད་བཟོ་ཐབས་ཀྱི་སྲིད་ཇུས་སོགས་ཀྱི་ཐད་ལ་གླེང་སློང་གནང་མཁན་ཞིག་ཡིན་པ་མ་ཟད། འདས་ལོའི་བཞུགས་སྒར་དུ་གསུམ་བཅུ་དུས་དྲན་གྱི་མཛད་སྒོར་ཞུགས་ནས། བོད་དོན་གཏམ་བཤད་དང་། རྒྱ་ནག་གཞུང་གིས་བོད་ནང་དྲག་གནོན་བྱེད་བཞིན་པ་དང་འབྲེལ་བའི་གསར་འགོད་བསྒྲགས་གཏམ་ཞིག་ཀྱང་སྤེལ་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
