ཨ་རིའི་ཆབ་སྲིད་ཚོགས་པ་གཉིས་ཀྱི་མི་སྣ་ལས་གྲུབ་པའི་གྲོས་ཚོགས་འཐུས་ཁག་ཅིག་གིས་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པའི་འཁྲུངས་སྐར་ཉིན་མོ་དེ་བྱམས་བརྩེའི་ཉིན་མོར་སྲུང་གཙི་ཞུ་རྒྱུའི་གྲོས་ཆོད་བཏོན་འདུག
ཟླ་འདིའི་ཕྱི་ཚེས་ ༡༦ ཉིན་ཨ་རིའི་གྲོས་ཚོགས་ནང་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པའི་འཁྲུངས་སྐར་ཉིན་མོ་དེ་བྱམས་བརྩེའི་ཉིན་མོར་སྲུང་གཙི་ཞུ་རྒྱུའི་གྲོས་ཆོད་ཅིག་བཏོན་ཡོད་ཅིང་། གྲོས་ཆོད་དེ་འདོན་གནང་མཁན་ནི་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་མཱ་ཡེ་ཀལ་མེ་ཁོལ་ (Michael McCaul) མཆོག་དང་། དམངས་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཇེམ་མེག་གྷ་ཝིན་( (Jim McGovern) མཆོག་རྣམ་གཉིས་ཡིན་འདུག
སྐབས་དེར་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་མཱའེ་ཁེལ་མཆོག་གིས། རྒྱ་ནག་དམར་ཤོག་ཚོགས་པས་སྡུག་སྦྱོང་དང་། དྲག་གནོན། འགྲེལ་བརྗོད་བྱེད་དཀའ་བའི་མནར་གཅོད་བཏང་ཡོད་ཀྱང། ༧གོང་ས་རྒྱལ་བ་རིན་པོ་ཆེ་མཆོག་ནས་སེམས་ཀྱི་ཞི་བདེ་རྒྱུན་འཛིན་གནང་སྟེ་བྱམས་བརྩེ་གོང་སྤེལ་གཏོང་བཞིན་ཡོད། དེ་ཡང་རང་ཉིད་ཀྱི་མི་མང་ཙམ་དུ་མ་ཟད་འཛམ་གླིང་ཡོངས་ཀྱི་ཆེད་དུ་ཡིན་འདུག ཅེས་དང་། འདས་ལོར་དྷ་རམ་ས་ལར་ང་རང་༧གོང་ས་མཆོག་དང་མཇལ་འཕྲད་ཀྱིས་ཨ་རིའི་གཞུང་གིས་བོད་མི་རྣམས་ལ་རྒྱབ་སྐྱོར་ཡོད་པ་གསལ་སྟོན་དང་། ང་ཚོའི་མི་མང་གཉིས་བར་གྱི་མཛའ་འབྲེལ་ནན་བརྗོད་ཞུས་ཡོད། དེ་བཞིན་༧གོང་ས་མཆོག་གི་བླ་མེད་ཀྱི་དབུ་ཁྲིད་དང་། ཞི་བདེ། སྙིང་སྟོབས་སོགས་ཤེས་རྟོགས་བྱུང་། ༧གོང་ས་མཆོག་གི་དགུང་གྲངས་ ༩༠ འཁྲུངས་སྐར་དང་བསྟུན་ནས། ངས་བྱམས་བརྩེ་ཉིན་མོ་ཞེས་པའི་གྲོས་ཆོད་འདི་ངོ་སྤྲོད་བྱེད་རྒྱུར་སྤོབས་པ་ཆེན་པོ་བྱུང་། ང་ཚོས་༧གོང་ས་མཆོག་དང་ཁོང་གི་མི་མང་ཞི་བདེའི་ཐོག་ནས་རང་ཡུལ་ཏུ་ལོག་ཐུབ་པའི་རེ་སྨོན་ཞུ་བཞིན་ཡོད། ཅེས་བརྗོད་འདུག
དམངས་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཇེམ་མེག་གྷ་ཝིན་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནི་ང་རང་ཉིད་ཚུད་པའི་འཛམ་གླིང་གི་མི་མང་དུང་ཕྱུར་མང་པོའི་ཡིད་སྨོན་བྱེད་ས་ཡིན། ༧གོང་ས་མཆོག་གིས་ཆོས་ལུགས་མཐུན་འགྲིག་དང་། འཁྲུག་རྩོད་དང་རྩོད་རྙོག་འཚེ་མེད་ཞི་བའི་ལམ་ནས་འདུམ་སྒྲིག ཞི་བདེ་འཛུགས་སྐྲུན་བཅས་ཀྱི་ཐོག་སློབ་སྟོན་གནང་བཞིན་ཡོད། ད་ལྟའི་དུས་སྐབས་འདིར་༧གོང་ས་མཆོག་ནི་ང་ཚོར་དགོས་མཁོ་ཧ་ཅང་ཆེན་པོ་ཆགས་ཡོད། ༧གོང་ས་མཆོག་ནས་བོད་མིའི་རང་དབང་དང་ཆེ་མཐོང་ཆེད་དུ་ཕྱག་ལས་གནང་ཡོད་ཅིང་། གྲོས་ཚོགས་ནས་རྒྱལ་དབང་སྐུ་ཕྲེང་བཅུ་བཞི་པ་མཆོག་དགུང་གྲངས་ ༩༠ ལ་ཕེབས་པའི་སྐུའི་འཁྲུངས་སྐར་སྲུང་གཙི་དང་བསྟུན་ནས། ཁོང་མཛད་རྗེས་ལ་གུས་བཀུར་ཞུ་རྒྱུ་ནི་འོས་འཚམ་ཆགས་ཡོད། ཁོང་གི་སྐུའི་འཁྲུངས་སྐར་རྗེས་མ་དེ་ལྷ་སར་སྲུང་གཙི་ཞུ་ཐུབ་པའི་སྨོན་འདུན་ཞུ། ཞེས་བརྗོད་འདུག
དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱིས། གྲོས་ཆོད་འདིས་༧གོང་ས་རྒྱལ་བ་རིན་པོ་ཆེ་མཆོག་ནི་འཛམ་གླིང་གི་བྱམས་བརྩེའི་མཚོན་རྟགས་དང་། ཁོང་གིས་སྐུ་ཚེ་ཧྲིལ་པོར་བོད་མིའི་ཞི་བདེ་དང་དྲང་བདེན་གྱི་ཆེད་དུ་ཕྱག་ལས་མཛད་པར་ངོས་འཛིན་གནང་བ་ཞིག་ཡིན་ལ། གྲོས་ཚོགས་འཐུས་མི་སྐུ་ཞབས་མཱ་ཡེ་ཀལ་མེ་ཁོལ་མཆོག་དང་གྲོས་ཚོགས་འཐུས་མི་སྐུ་ཞབས་ཇེམ་མེག་གྷ་ཝིན་མཆོག་གིས་སྣེ་ཁྲིད་འོག་གྲོས་ཆོད་བཞག་པ་འདིས་༧གོང་ས་མཆོག་དགུང་གྲངས་ ༩༠ ལ་ཕེབས་པའི་དུས་དྲན་ཞུ་མཁན་ཡོངས་ལ་དགའ་སྤྲོ་དང་སེམས་ཤུགས་སྦྱིན་ཐུབ་པ་མ་ཟད། རྒྱ་ནག་གཞུང་གི་དམ་དྲག་འོག་ནས་༧གོང་ས་མཆོག་གི་འཁྲུངས་སྐར་སྲུང་གཙི་བྱེད་ཐབས་མེད་པའི་བོད་ནང་གི་བོད་མི་རྣམས་ལ་རེ་བ་དང་སེམས་ཤུགས་སྤྲོད་ཐུབ་ཀྱི་ཡོད། ཅེས་བརྗོད་འདུག
ཐེངས་འདིའི་གྲོས་ཆོད་ཐོག་ཨ་རིའི་གྲོས་ཚོགས་འཐུས་མི་ཇོ་ཝིལ་སོན་ (Joe Wilson) ལགས་དང་། མའེ་ཁི་ལོ་ལར་ (Mike Laawler) ལགས། རཱ་ཇཱ་ཀིར་ཤི་ནཱ་མོར་ཐི་ (Raja Krishnamoorthi) ལགས་དང་། ཇེ་མི་རཱ་སི་ཀིན་ (Jamie Raskin) ལགས། ཡང་ཀིམ་ (Young Kim) ལགས་བཅས་ཀྱིས་རྒྱབ་སྐྱོར་གནང་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
