རྒྱ་གར་གྱི་གནས་མཇལ་བ་ཚོ་དངོས་སུ་བོད་ནང་གནས་མཇལ་དུ་ཕྱིན།

རྒྱ་གར་གྱི་མི་གྲངས་ ༥༠ ཅན་གྱི་གནས་མཇལ་བ་རྣམས་ཀྱིས་གངས་རིན་པོ་ཆེ་དང་མ་ཕམ་གཡུ་མཚོ་སོགས་སུ་གནས་མཇལ་བྱེད་མུས་ཡིན་འདུག

In this handout image released by the Chinese Embassy on June 26, 2025, the first batch of Indian pilgrims at the Manasarovar Lake, in Tibet.

ཉེ་ལམ་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་གོ་སྒྲིག་འོག རྩིས་འཕྲུལ་རྒྱན་དཀྲུག་(Computerized lottery) བྱས་པ་བརྒྱུད། རྒྱ་གར་གྱི་གནས་མཇལ་བ་མི་གྲངས ༧༥༠ ལྷག་བོད་ཀྱི་གངས་རིན་པོ་ཆེ་དང་མ་ཕམ་གཡུ་མཚོ་སོགས་སུ་གནས་མཇལ་དུ་གཏོང་གིན་ཡོད་པ་ལྟར། ཁ་སང་ཕྱི་ཚེས་ ༢༦ ཉིན་རྒྱ་གར་གྱི་སྡེ་ཚན་དང་པོའི་གནས་མཇལ་བ་རྣམས་དངོས་སུ་གནས་མཇལ་དུ་ཕེབས་ཡོད་ཅིང་། དེ་ནི་རྒྱ་ནག་གཞུང་གིས་མི་ལོ་ལྔ་ཡི་རྗེས་སུ་རྒྱ་གར་གྱི་གནས་མཇལ་བ་རྣམས་བོད་ནང་ཤར་གཏོང་བྱས་པ་ཞིག་ཡིན་འདུག

འདི་ལོའི་གནས་མཇལ་བའི་ནང་མི་གྲངས་ ༥༠ ཅན་གྱི་སྡེ་ཚན་མི་འདྲ་བ་ ༡༥ རུ་བགོས་ཡོད་པའི་ཁྲོད། སྡེ་ཚན་ལྔས་རྒྱ་གར་བྱང་རྒྱུད་ཀྱི་ཨུ་ཐར་ཀན་མངའ་སྡེའི་ལི་པུ་ལེག་ལ་ ( Lipulekh Pass) བརྒྱུད་ནས་གནས་མཇལ་དུ་འགྲོ་རྒྱུ་དང་། སྡེ་ཚན་བཅུས་རྒྱ་གར་བྱང་ཤར་ཁུལ་འབྲས་ལྗོངས་ཀྱི་སྣ་ཐོད་ལ་(Nathu La) བརྒྱུད་ནས་གནས་མཇལ་དུ་འགྲོ་རྒྱུ་ཡིན་ཞིང་། རྒྱ་གར་བྱང་རྒྱུད་ཀྱི་ཨུ་ཐར་ཀན་མངའ་སྡེའི་ལི་པུ་ལེག་ན་འགྲོ་མཁན་གྱི་གནས་མཇལ་བ་རེ་རེས་འགྲུལ་གླ་སོགས་ཧིན་སྒོར་འབུམ་༡།༧༤ དང་། སྣ་ཐོད་ལ་ནས་འགྲོ་མཁན་ཚོས་ཧིན་སྒོར་འབུམ་ ༢།༨༣ སྤྲོད་དགོས་ཀྱི་ཡོད་འདུག་ལ། སྡེ་ཚན་ཚང་མའི་གནས་མཇལ་དུས་ཡུན་བདུན་ཕྲག་གཉིས་ཡིན་འདུག་ལ། ད་ལྟ་རྒྱ་གར་གྱི་གནས་མཇལ་བ་སྡེ་ཚན་དང་པོ་བོད་ནང་དངོས་སུ་སླེབས་ཡོད་འདུག

ཕྱི་ལོ་ ༢༠༢༣ ལོར་རྒྱ་ནག་གཞུང་གིས་གནས་ཆེན་གངས་རིན་པོ་ཆེ་བསྐྱར་དུ་སྒོ་ཕྱེས་པ་དང་བསྟུན། གནས་མཇལ་གྱི་རིན་གོང་སྤྱི་ཡོངས་ནས་ལྡབ་འགྱུར་གྱིས་འཕར་ཡོད་པ་མ་ཟད། རྒྱ་གར་གྱི་གནས་མཇལ་བར་རིན་གོང་མཐོ་བོ་བཟོས་ཏེ་དམིགས་བསལ་གྱིས་དམ་དྲག་དང་ལྟ་སྲུང་བྱས་པའི་གནས་ཚུལ་ཐོན་ཡོད་པ་རེད། དེ་སྔོན་གནས་མཇལ་བའི་ལག་གཡོག་བ་ཚོར་རྩྭ་སར་གུན་གསབ་ (grass damage charge) ཟེར་བའི་མིང་ཐོག་ནས་ཨ་སྒོར་ ༡༠༠ རེ་ལེན་གྱི་ཡོད་ཀྱང་། ལོ་དེ་ནས་བཟུང་ཨ་སྒོར་ ༣༠༠ ལ་འཕར་ཡོད་པ་མ་ཟད། ཡུལ་སྐོར་སྣེ་ཤན་པའི་ཉིན་གྲངས་བཅོ་ལྔའི་མཐོང་མཆན་གཅིག་པུར་ཧིན་སྒོར་ ༡༣༠༠༠ སྤྲད་དགོས་བྱུང་ཡོད་པ་རེད།

གནས་མཆོག་གངས་རིན་པོ་ཆེ་ནི་བོད་ཀྱི་མངའ་རིས་ས་ཁུལ་སྤུ་ཧྲེང་རྫོང་གི་བྱང་རྒྱུད་ཀྱི་མ་ཕམ་གཡུ་མཚོའི་ཉེ་ཁུལ་དུ་ཆགས་ཤིང་། ནང་པ་དང་ཧིན་རྡུ། རྗེའུ་ཆོས་ལུགས། བོན་བཅས་ཀྱི་གནས་ཁྱད་པར་ཅན་ཞིག་ཡིན་ལ། ལོ་ལྟར་གངས་རིན་པོ་ཆེར་གནས་བསྐོར་དུ་འགྲོ་བ་ནི་ལོ་གསར་པ་ཞིག་གི་ཆོས་ཕྱོགས་ཀྱི་འགྲུལ་བཞུད་གལ་ཆེ་ཤོས་ཤིག་ཏུ་གྱུར་ཡོད་ལ། བོད་རང་དབང་རང་བཙན་ཡིན་པའི་སྐབས་སུ་གནས་མཆོག་དེར་བཀག་སྡོམ་གང་ཡང་མེད་ཀྱང་། བོད་ས་ཡོངས་རྫོགས་རྒྱ་ནག་དམར་གཞུང་གིས་བཙན་བཟུང་བྱས་རྗེས་གངས་རིན་པོ་ཆེ་སོགས་སུ་གནས་སྐོར་དུ་འགྲོ་བར་ཐ་ན་བོད་ནང་གི་གནས་མཇལ་བ་ཚོ་ལའང་སྟངས་འཛིན་བཀག་སྡོམ་བྱེད་ཀྱི་ཡོད་པ་མ་ཟད། ལོ་ལྟར་ཚོང་རྫས་ལྟ་བུ་ཞིག་ཏུ་བསྒྱུར་ནས་དམ་དྲག་སྔར་ལྷག་བྱེད་བཞིན་ཡོད་པ་རེད།

གསར་འགོད་པ། དཔལ་ལྡན།