རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་མན་ཉིང་གིས་རྒྱ་གར་གྱི་སྲིད་བློན་མུ་དྷི་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་ལ་འཚམས་འདྲི་ཞུས་པར་སྐྱོན་བརྗོད་ཤུགས་ཆེན་བྱས་འདུག
ཟླ་འདིའི་ཕྱི་ཚེས་ ༦ ཉིན་ཏེ་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་ཉིན། རྒྱ་གར་སྲིད་བློན་མུ་དྷི་མཆོག་གིས་མགོན་པོ་གང་གི་འཁྲུངས་སྐར་ལ་འཚམས་འདྲི་དང་སྐུ་ཚེ་ཡུན་རིང་བརྟན་པའི་སྨོན་ལམ་བཏབ་ཡོད་པ་ལྟར། ཁ་སང་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་མན་ཉིང་གིས་རྒྱུན་ལྡན་གསར་འགོད་གསལ་བསྒྲགས་ཤིག་གི་སྟེང་སྐྱོན་བརྗོད་ཤུགས་ཆེན་བྱས་འདུག
སྐབས་དེར་མོས། རྒྱ་ནག་གཞུང་གིས་བོད་ཀྱི་གནད་དོན་ལ་བཟུང་བའི་ལངས་ཕྱོགས་དེ་བརྟན་པོ་དང་གསལ་ཁ་ལྡན་པ་ཞིག་ཡིན། འཛམ་གླིང་ཁྱོན་ཡོངས་ཀྱིས་ཤེས་གསལ་བཞིན། ༧གོང་ས་ཏཱ་ལའི་བླ་མ་ནི་ཁ་བྲལ་བ་ཞིག་དང་ཆོས་ལུགས་ཁ་ལ་ཁྱེར་བའི་ཆབ་སྲིད་ཀྱི་སྐྱབས་བཅོལ་བ་ཞིག་རེད། ཅེས་དང་། རྒྱ་གར་གཞུང་གིས་རྒྱ་དཀར་ནག་གཉིས་ཀྱི་འབྲེལ་ལམ་སྲ་བརྟན་ཆེད། ཚོར་སྣང་ཧ་ཅང་སྐྱེན་པའི་བོད་ཀྱི་གནད་དོན་དང་། དེ་བཞིན་རྒྱ་ནག་ནང་གི་གནད་དོན་ལ་ཐེ་ཇུས་བྱེད་མཚམས་གཞག་དགོས་པའི་སྐྱོན་བརྗོད་ཤུགས་ཆེན་བྱས་འདུག
༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་ཉིན། རྒྱ་གར་གྱི་སྲིད་བློན་མུ་དྷི་མཆོག་གིས། ངས་དེ་རིང་རྒྱ་གར་གྱི་མི་གྲངས་ཐེར་འབུམ ༡།༤ དང་ལྷན་༧གོང་ས་རྒྱལ་བ་རིན་པོ་ཆེ་མཆོག་དགུངས་གྲངས་ ༩༠ ཕེབས་པའི་སྐུའི་འཁྲུངས་སྐར་ལ་འཚམས་འདྲི་ཞུ་ཡི་ཡོད། ཁོང་ནི་བརྩེ་བ་དང་། སྙིང་རྗེ། བཟོད་སེམས་བཅས་ཀྱི་དོན་དམ་གྱི་མཚོན་དོན་ཉག་ཅིག་ཡིན། ཁོང་གི་བསླབ་གདམས་དག་ལ་ཆོས་ལུགས་པ་དག་གིས་ཡིད་སྨོན་དང་གུས་བཀུར་བྱེད་ཀྱི་ཡོད། ང་ཚོས་མུ་མཐུད་ཁོང་གི་སྐུ་གཟུགས་གསལ་ཐང་དང་སྐུ་ཚེ་ཡུན་རིང་བརྟན་པའི་སྨོན་ལམ་འདེབས་ཀྱི་ཡིན། ཞེས་གསུངས་འདུག
དེ་བཞིན་རྒྱ་གར་གྲངས་ཉུང་མི་རིགས་ཀྱི་བློན་ཆེན་རན་རི་ཇི་ཇུ་( Kiren Rijiju ) མཆོག་གིས་རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་བདག་དབང་ཐད་ཐེ་ཇུས་བྱེད་མཚམས་གཞག་དགོས་པའི་མུར། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་འགན་དབང་ཆ་ཚང་སྐུ་སྒེར་ལ་ཡོད་སྐོར་སོགས་གསུངས་སྟབས། ཡང་རྒྱ་ནག་གི་ཕྱི་སྲིད་མགྲིན་ཚབ་པ་མན་ཉིང་ཟེར་བས། རྒྱ་གར་གཞུང་གིས་རྒྱ་དཀར་ནག་གཉིས་ཀྱི་འབྲེལ་ལམ་འཕེལ་རྒྱས་ལ་གནོད་འཚེ་མི་ཐེབས་སླད། རྒྱ་ནག་ནང་གི་གནད་དོན་ལ་ཡིག་ངག་གཉིས་ཀྱི་ཐོག་ནས་ཐེ་ཇུས་བྱེད་མཚམས་གཞག་དགོས་ལུགས་སོགས་བཤད་འདུག་ལ། བོད་བརྒྱུད་ནང་བསྟན་གྱི་འགྲོ་ལུགསབཞིན། སྐུའི་ཡང་སྲིད་འཚོལ་ཞིབ་དང་། གསེར་བུམ་སོགས་དཀྲུག་པར་རྒྱ་ནག་གཞུང་གི་ཆོག་མཆན་དགོས་ལུགས་སོག་བཤད་འདུག
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
