༧སྐྱབས་རྗེ་དྭགས་པོ་རིན་པོ་ཆེ་བློ་བཟང་འཇམ་དཔལ་བྱམས་པ་རྒྱ་མཚོ་མཆོག་གིས་འདས་པའི་མི་ལོ་ ༦༠ ལྷག་གི་རིང་ཧྥ་རན་སིའི་ནང་ཞི་བདེ་བག་ཡངས་ཀྱི་སྤྱི་ཚོགས་ཤིག་བསྐྲུན་པར་ནང་ཆོས་ཀྱི་ཐོག་ནས་ཞབས་འདེགས་གནང་ཡོད་པར་ཆེད་བསྟོད་དུ་ཧྥ་རན་སིའི་ན་ཡེ་ཊི་ཤ་ཝི་ལིར་ཞེས་པའི་གཟེངས་རྟགས་དེ་དབུལ་གཏན་ཁེལ་འདུག
ཟླ་འདིའི་ཕྱི་ཚེས་ ༡༣ ཉིན་ཧྥ་རན་སིའི་ནང་སྲིད་ལྷན་ཁང་གིས་༧སྐྱབས་རྗེ་དྭགས་པོ་རིན་པོ་ཆེ་བློ་བཟང་འཇམ་དཔལ་བྱམས་པ་རྒྱ་མཚོ་མཆོག་གིས་འདས་པའི་མི་ལོ་ ༦༠ ལྷག་གི་རིང་རྒྱལ་ཁབ་དེའི་ནང་ཞབས་འདེགས་བསྒྲུབས་པའི་དབང་གིས། ཁོང་ཉིད་ལ་ཧྥ་རན་སི་རྒྱལ་ཁབ་ཀྱི་གཟེངས་རྟགས་མཐོ་ཤོས་(Legion of Honour) ཀྱི་གཟེངས་རྟགས་རིམ་པ་ལྔ་པ་སྟེ། ན་ཡེ་ཊི་ཤ་ཝི་ལིར་(Knight Chevalier) ཞེས་པའི་གཟེངས་རྟགས་ཐོབ་ཡོད་པ་གསལ་བསྒྲགས་གནང་འདུག
ཡོངས་ཁྱབ་གསལ་བསྒྲགས་དེའི་ནང་། ༧སྐྱབས་རྗེ་དྭགས་པོ་རིན་པོ་ཆེ་བློ་བཟང་འཇམ་དཔལ་བྱམས་པ་རྒྱ་མཚོ་མཆོག་གིས་འདས་པའི་མི་ལོ ༦༠ ལྷག་རིང་འགྲོ་བའི་དོན་དུ་ནང་པ་སངས་རྒྱས་པའི་ཆོས་དར་སྤེལ་དུ་གཏོང་བར་འབད་འབུངས་གནང་ཡོད་ཅིང་། རིན་པོ་ཆེ་མཆོག་གིས་བོད་རིག་པ་བ་རྣམས་དང་། བོད་དང་ཧྥ་རན་སི་གཉིས་ཀའི་མི་སེར་ཡིན་པའི་སྐད་བསྒྱུར་བ་གཙོས། ཁོང་གི་འཆད་ཁྲིད་ལ་ཉན་མཁན་མང་པོའི་སེམས་སུ་བག་ཆག་ཟབ་མོ་བཞག་ཡོད་པའི་ཁར། ཧྥ་རན་སི་རྒྱལ་ཁབ་ཏུ་དམ་པའི་ལྷ་ཆོས་སྤེལ་ནས་ཞི་བདེ་དང་འཆམ་མཐུན་གྱི་རྒྱལ་ཁབ་ཅིག་བསྐྲུན་རྒྱུར་ཞབས་འདེབས་བསྒྲུབས་ཡོད་སྐོར་སོགས་གསལ་འདུག
སྤྱིར་བཏང་Legion of Honour ཞེས་པའི་གཟེངས་རྟགས་དེ་ཕྱི་ལོ་ ༡༨༠༢ ལོར་ཐོག་མར་ཧྥ་རན་སི་རྒྱལ་ཁབ་དེར་དམག་དོན་དང་སྤྱི་ཚོགས་ཞབས་ཞུ་སྒྲུབ་མཁན་རྣམས་ལ་འབུལ་བའི་མགོ་བཙུགས་ཡོད་པ་དང་། རྒྱལ་ཁབ་དེའི་རིམ་པ་ཆེས་མཐོ་ཤོས་ཀྱི་གཟེངས་རྟགས་ཤིག་ཡིན་ཞིང་། གཟེངས་རྟགས་དེར་རིམ་པ་མི་འདྲ་བ་ལྔ་ཡོད་པའི་ཁྲོད། ན་ཡེ་ཊི་ཤ་ཝི་ལིར་(Knight Chevalier) དང་། ཨོ་ཧྥི་སིར་(Officer)། ཁ་མན་ཌིར་( (Commander) གྷ་རེན་ཌི་ཨོ་ཧྥི་སིར་ (Grand Officer)། གྷ་རེན་ཌི་ཁོ་རི་སི་ (Grand Cross) བཅས་ཡིན་འདུག
རིན་པོ་ཆེ་མཆོག་ཕྱི་ལོ་ ༡༩༣༢ ལོར་ཀོང་པོའི་ཡུལ་དུ་སྐུ་འཁྲུངས་ཤིང་། ༡༩༣༣ ལོར་རྒྱལ་མཆོག་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་གིས་དྭགས་པོ་བླ་མ་རིན་པོ་ཆེ་འཇམ་དཔལ་ལྷུན་འགྲུབ་རྒྱ་མཚོ་མཆོག་གི་ཡང་སྲིད་དུ་ངོས་འཛིན་མཛད་དེ་དགུང་གྲངས་དྲུག་ཐོག་བཀའ་གདམས་བང་རིམ་ཆོས་སྡེ་དང་། དགུང་གྲངས་ ༡༣ ལ་ཕེབས་སྐབས་དྭགས་པོ་བཤད་སྒྲུབ་གླིང་གྲྭ་ཚང་དུ་ཆོས་བཞུགས་མཛད་དེ་བོད་ཀྱི་རིག་གནས་སྤྱི་དང་གཞུང་ཆེན་བཀའ་པོད་ལྔ་གཙོས་པའི་མདོ་སྔགས་ཀྱི་གཞུང་ལུགས་དུ་མར་གསན་བསམ་རྒྱ་ཆེར་མཛད། དགུང་གྲངས་༢༤ སྐབས་བོད་ཀྱི་དབུས་སུ་ཕེབས་ཏེ་དཔལ་ལྡན་འབྲས་སྤུངས་སྒོ་མང་གྲྭ་ཚང་དུ་ཆོས་བཞུགས་ཀྱིས་བཤེས་གཉེན་དུ་མར་བསྟེན། ཕྱི་ལོ་ ༡༩༥༩ ལོར་བོད་ནང་དུས་འགྱུར་བྱུང་སྟེ་རྒྱ་གར་དུ་བཙན་བྱོལ་ལ་ཕེབས་དགོས་བྱུང་རྗེས་ ༡༩༦༠ ལོར་ཧྥ་རན་སིར་བོད་མི་བཞི་འབྱོར་ཡོད་པའི་ཁུངས་ནས་གཅིག་ཡིན་འདུག
ཁོང་གིས་ཕ་རི་སིར་རྟེན་གཞི་བྱས་པའི་ཤར་ཕྱོགས་ཀྱི་ཤེས་རིག་དང་སྐད་ཡིག་སློབ་གྲྭ་ཆེན་མོར་ ( INALCO ) བོད་ཀྱི་སྐད་ཡིག་དགེ་རྒན་དང་། ( Sorbonne university ) སོར་བོན་མཐོ་སློབ་ནང་ཞིབ་འཇུག་སློབ་སྦྱོང་སོགས་གནང་ཡོད་པ་མ་ཟད། ད་བར་ཧྥ་རན་སི་གཙོས་པའི་ནེ་ཐར་ལེན་ཌི་དང་། སུད་སི། མ་ལེ་ཤི་ཡ། ཨིན་ཌོ་ནེ་ཤི་ཡ་སོགས་ཤར་ནུབ་ཀྱི་རྒྱལ་ཁབ་ཁག་ཅིག་གི་ནང་ཆོས་ཚོགས་ཆེ་ཆུང་ཁག་ཅིག་ཆེད་འཛུགས་གནང་སྟེ་ཆོས་ཕྱོགས་ཀྱི་མཛད་འཕྲིན་བསྐྱངས་དང་སྐྱོང་བཞིན་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་པ། པདྨ་མཚོ།
