བོད་རང་སྐྱོང་ལྗོངས་ཟེར་བའི་ནང་མི་ལོ་ ༤༤ ཙམ་རིང་མགོ་འཁྲིད་སོགས་ཀྱི་ལས་ཀ་བྱས་མྱོང་བའི་ཝུའུ་ཡེན་ཅེ་ཡིས་རྒྱ་སྒོར་ས་ཡ་ ༣༤༣ ལྷག་གི་ལྐོག་རྔན་བླངས་བའི་ནག་ཉེས་འོག་ལོ་གཉིས་ཕར་འགྱངས་ཀྱི་སྲོག་ཁྲིམས་བཅད་ཡོད་འདུག 
འདི་ལོའི་ཕྱི་ཟླ་ ༣ པའི་ནང་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཟུར་པ་ཝུའུ་ཡེན་ཅེ་ (Wu Yingjie)ཡིས་ཁྲིམས་འགལ་སྒྲིག་འགལ་ཚབས་ཆེན་བྱས་རྐྱེན་དམར་ཤོག་ཚོགས་པ་དང་ལས་གནས་ནས་གནས་དབྱུང་བཏང་ཡོད་པ་ལྟར། ཁ་སང་ཕྱི་ཚེས་ ༡༦ ཉིན་པེ་ཅིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། ཝུའུ་ཡེན་ཅེ་ཡིས་རྒྱ་སྒོར་ས་ཡ་ ༣༤༣ ལྷག་གི་ལྐོག་རྔན་བླངས་བའི་ནག་ཉེས་འོག་ལོ་གཉིས་ཕར་འགྱངས་ཀྱི་སྲོག་ཁྲིམས་བཅད་པ་ཕྱིར་བསྒྲགས་བྱས་འདུག འོན་ཀྱང་། རྒྱ་ནག་གི་ལོ་གཉིས་ཕར་འགྱངས་ཀྱི་སྲོག་ཁྲིམས་དེ་ཚོ་ཚེ་བཙོན་སོགས་ཀྱི་ངོ་བོར་འགྱུར་འགྲོ་བ་ཡོང་གི་ཡོད་པ་རེད།
ཝུའུ་ཡེན་ཅེ་ཟེར་བ་དེ་རིག་གནས་གསར་བརྗེའི་དུས་སྐབས་ཏེ་ཕྱི་ལོ་ ༡༩༧༤ ལོར་ཐོག་མར་བོད་ཉིང་ཁྲི་ས་ཁུལ་དུ་ན་གཞོན་ཤེས་ཡོན་ཅན་གྱི་མིང་ཐོག་ནས་ལས་བགོས་བྱས་ཡོད་པ་དང་། དེ་ནས་ཕྱི་ལོ་ ༡༩༧༧ ལོར་ལྷ་ས་ལྷོ་ཁུལ་གློག་ཁང་དུ་ལས་ཀ་བྱས། ཕྱི་ལོ་ ༡༩༧༩ ལོར་བོད་རང་སྐྱོང་ལྗོངས་མི་རིགས་སློབ་གླིང་གི་རྒྱ་ཡིག་ཚན་ཁག་ཏུ་སློབ་གཉེར་བྱས། ཕྱི་ལོ་ ༡༩༨༣ ལོར་བོད་རང་སྐྱོང་ཟེར་བའི་ཤེས་རིག་ལྷན་ཁང་དུ་ལས་ཀ་བྱས་ནས་རིམ་གྱིས་གོ་གནས་འཕར་ཏེ། ཕྱི་ལོ་ ༢༠༠༣ ལོ་ནས་བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་འཁྲིད་གཞོན་པ་དང་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་གཞོན་པ་དང་དམར་ཤོག་རྒྱུན་ལས་ལྷན་ཁང་གི་དྲུང་ཆེ་སོགས་བྱས་ཏེ། ཕྱི་ལོ་ ༢༠༡༦ ནས་ ༢༠༢༡ ཟླ་ ༢ པ་བར་དུ་བོད་རང་སྐྱོང་ཟེར་བའི་དམར་ཤོག་དྲུང་ཆེ་ཡི་ལས་ཀ་བྱས་ཡོད་པ་བཅས་ཁྱོན་མི་ལོ་ ༤༤ ཙམ་རིང་བོད་རང་སྐྱོང་ཟེར་བའི་ནང་ལས་ཀ་བྱས་ཡོད་འདུག
ཝུའུ་ཡིས་བོད་རང་སྐྱོང་ལྗོངས་ཟེར་བའི་ནང་མགོ་འཁྲིད་ཀྱི་ལས་ཀ་བྱས་པའི་རིང་གོ་དབང་བེད་སྤྱད་དེ་འགྲོ་བ་མིའི་ཐོབ་ཐང་རྡོག་རོལ་བཏང་བ་མ་ཟད། བོད་ནང་གི་བོད་ཕྲུག་མང་དག་ཅིག་བཙན་གྱིས་རྒྱ་ནག་གཞུང་གིས་ཆེད་གཉེར་སློབ་གྲྭ་ཁག་ཏུ་བཅུག་སྟབས། ཨ་རིའི་ཕྱི་སྲིད་ལྷན་ཁང་གིས་བོད་རང་སྐྱོང་ལྗོངས་ཟེར་བའི་མགོ་ཁྲིད་ཟུར་བ་ཁོའི་ཨ་རིར་ཡོད་པའི་རྒྱུས་དངོས་རྣམས་བཀག་སྡོམ་བྱས་ཡོད་ཅིང་། འདས་ལོའི་ཕྱི་ཟླ་ ༡༠ ནང་ཁེ་ན་ཌའི་གཞུང་གིས་ཁེ་ན་ཌས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་འབྲེལ་ནས་དམིགས་བསལ་དཔལ་འབྱོར་གྱི་ཐབས་ལམ་ཁག་ལ་སྟངས་འཛིན་བྱེད་པའི་སྒྲིག་གཞི་ (Regulations on Special Economic Measures) ཟེར་བ་ལག་བསྟར་འོག རྒྱ་ནག་གི་ཆེས་མཐོའི་དཔོན་རིགས་བརྒྱད་ཀྱིས་བོད་དང་ཤར་ཊུར་ཀི་སི་ཐན། རྒྱ་ནག་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བཏང་བར་བརྟེན། དཔོན་རིགས་དེ་དག་གི་རྒྱུ་དངོས་རྣམས་གཞུང་འབྲེལ་བཀག་སྡོམ་དང་། འབྱུང་འགྱུར་ཁེ་ན་ཌའི་མི་མང་གིས་ཉེས་ཆད་བཀལ་བའི་རྒྱའི་དཔོན་རིགས་དེ་དག་དང་མཉམ་དུ་རྒྱུ་དངོས་དང་ཚོང་ལས་སོགས་ཀྱི་ལས་དོན་གང་ཡང་སྤེལ་མི་ཆོག་པའི་བཀའ་ཁྱབ་བསྒྲགས་ཡོད་ཅིང་། དེའི་ཁྲོད་དུ་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཟུར་པ་ཝུའུ་ཡེན་ཅེ་ཟེར་བའང་ཡོད་འདུག
ཕྱི་ལོ་ ༢༠༢༤ ཟླ་ ༡༢ ཚེས་ ༡༡ ཉིན་རྒྱ་ནག་གཞུང་གིས་ཝུའུ་ཡེན་ཅེ་ཡི་དམར་ཤོག་ཚོགས་པར་དད་སེམས་ཉམས་པ་དང་ཏང་གཤིས་ཀྱི་རྩ་དོན་ཤོར་བ། ཕུགས་བསམ་ཉམས་པ་སོགས་ཀྱི་ཉེས་མིང་འོག་ནས་དམར་ཤོག་ཚོགས་ཁོངས་ནས་ཕྱིར་ཕུད་བཏང་སྟེ་ཞིབ་བཤེར་མགོ་བཙུགས་ཡོད་པ་དང་། ཟླ་འདིའི་ཕྱི་ཚེས་ ༨ ཉིན་རྒྱ་ནག་རྒྱ་ནག་ཧུའུ་ནན་ཞིང་ཆེན་ཁྲེན་ཀྲོའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་མགོ་ཁྲིད་གཞོན་པ་ཟུར་པ་ཝང་ཡུང་གིས་ལྐོག་རྔན་རྒྱ་སྒོར་དུང་ཕྱུར་ ༢ དང་བྱེ་བ་ ༧ ། ས་ཡ་ ༡ ལྷག་བླངས་བའི་ནག་ཉེས་འོག་་ལོ་གཉིས་ཕར་འགྱངས་ཀྱི་སྲོག་ཁྲིམས་བཅད་ཡོད་པ་རེད།
ཕྱི་ལོ་ ༢༠༢༤ ལོའི་ཟླ་ ༢ ཚེས་ ༣ ཉིན་དཀར་མཛེས་ཁུལ་རྟའུ་རྫོང་ཉེན་རྟོག་ལས་ཁུངས་ཀྱི་དཔོན་པོ་གཞོན་པ་ཡེ་ཤེས་རྡོ་རྗེ་དང་། ཕྱི་ལོ་ ༢༠༢༢ ལོའི་ཟླ་ ༡༡ ཚེས་ ༢༤ ཉིན་ཆབ་མདོ་གྲོང་ཁྱེར་འཐབ་ཕྱོགས་གཅིག་གྱུར་ཁང་གི་འགན་འཛིན་ཚེ་རིང་འགྱུར་མེད། དེ་བཞིན་ཕྱི་ལོ་ ༢༠༢༢ ལོར་བོད་ཀྱི་མཚོ་ཤར་དང་མཚོ་ནུབ་ཁུལ། སྐྱེ་རྒུ་མདོ་ཁུལ་སོགས་སུ་ལོ་ངོ་ ༣༣ ལྷག་ཙམ་རིང་མགོ་ཁྲིད་བྱས་མྱོང་བའི་རྒྱ་དཔོན་ཝུན་གོ་ཏུང་ཟེར་བ་སོགས་ཚུད་པའི་ཉུང་མཐར་བོད་ཁུལ་གྱི་མཐོ་རིམ་དཔོན་རིགས་མང་དག་ཅིག་ལ་ཞིབ་བཤེར་དང་བཙོན་འཇུག་བྱས་པའི་གནས་ཚུལ་ཐོན་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་པ། པདྨ་མཚོ།
