བོད་མི་མང་སྤྱི་འཐུས་ཁག་ཅིག་ཞུ་གཏུག་བྱས་པའི་གནད་དོན་ཐོག་གསར་འགོད་གསལ་བསྒྲགས་བྱས་སོང་།

དྭང་བླངས་མི་མང་ལས་འགུལ་ཚོགས་པས་ཆེས་མཐོའི་ཁྲིམས་ཞིབ་ཁང་དུ་བོད་མི་མང་སྤྱི་འཐུས་ཁག་ཅིག་ཞུ་གཏུག་བྱས་པའི་གནད་དོན་ཐོག་གསར་འགོད་གསལ་བསྒྲགས་སྤེལ་སོང་།

དེ་རིང་སྔ་དྲོ་ཆུ་ཚོད་ ༡༠ སྟེང་མེག་གྷན་གྱི་བྷག་སོའུ་གསོལ་མགྲོན་ (Hotel Bhagsu) ཁང་དུ། དྭང་བླངས་མི་མང་ལས་འགུལ་ཚོགས་པས་གསར་འགོད་གསལ་བསྒྲགས་ཤིག་སྐོང་ཚོགས་གནང་སོང་བ་དང་། སྐབས་དེར་དྭང་བླངས་མི་མང་ལས་འགུལ་ཚོགས་པའི་སློབ་སྟོན་པ་དང་ཚོགས་གཙོའི་ལས་ཚབ་ཕུ་པ་དཔོན་ལགས་ཀྱིས། ཆེས་མཐོའི་ཁྲིམས་ཞིབ་ཁང་དུ་ཕུལ་བའི་ཁ་མཆུའི་ཞུ་རྩ་སྒྲོག་སྦྱང་དང་འབྲེལ་བའི་གསལ་བཤད་དང་། ཚོགས་པའི་རྒྱུན་ལས་སྒོ་སྤེལ་ཡོན་ཏན་རྒྱ་མཚོ་ལགས་ནས་དབུ་མའི་ལམ་གྱི་བྱུང་རབས་དང་འབྲེལ་དབུ་མའི་ལམ་གྱི་གྲུབ་འབྲས་ཇི་ཐོན་སྐོར་ལ་གཏམ་བཤད་སྤེལ་སོང་།

སྐབས་དེར་དྭང་བླངས་མི་མང་ལས་འགུལ་ཚོགས་པའི་ཚོགས་གཞོན་ལས་རོགས་ངག་དབང་དཔལ་བཟང་ལགས་ཀྱིས། ཕྱི་ལོ་ ༢༠༢༥ ཟླ་ ༤ ཚེས་ ༡༡ ནས་བཟུང་ཁེ་ན་ཌར་རང་བཙན་ཚོགས་ཆེན་ལ་མཉམ་ཞུགས་ཀྱིས་དབུ་མའི་ལམ་གྱི་སྲིད་བྱུས་ལ་ཟུར་ཟ་དང་། འཁྱོག་བཤད། ཁྱད་གསོད་བྱེད་མཁན་ལས་ཐོག་སྤྱི་འཐུས་རྣམ་པ་བདུན་གྱིས་ ༼   བཅའ་ཁྲིམས་ལ་རྩིས་མེད་དང་། སྤྱི་འཐུས་ཀྱི་འོས་ཆོས་མ་ཚང་བའི་སྐོར་ ༽   ཁྲིམས་ཞིབ་ཁང་ལ་སྙན་ཞུ་ཕུལ་བ་དང་། དེ་བཞིན། བཟང་སྤྱོད་ཀྱི་སྒོ་ནས་སྤྱི་འཐུས་རྣམ་པ་བདུན་དགོངས་ཞུ་དགོས་པའི་སྙན་བཀུར་ཇི་ལྟར་ཞུས་ཀྱང་གསན་བཞེས་གཏན་ནས་མ་གནང་བར་བརྟེན། ཕྱི་ལོ་ ༢༠༢༥ ཟླ་ ༥ ཚེས་ ༢༤ ཉིན་གསར་འགོད་གསལ་བསྒྲགས་མི་ཞུ་ཐབས་མེད་བྱུང་བ་དང་། དུས་མཚམས་དེ་ནས་ཉིན་བཅུའི་ནང་ཚུད་མཐའ་མའི་དགོངས་བཞེས་གང་ཡང་མ་གནང་ཚེ། ཁྲིམས་ཐོག་ནས་ཞུ་གཏུག་བྱ་རྒྱུ་ཞེས་གོ་སྐབས་ཕུལ་ཡང་སྐབས་དེར་བརྡ་ལན་གང་ཡང་བྱུང་མེད་པ་བཅས་ལ་བརྟེན་ནས་སྤྱི་མང་གཏུག་བཤེར་ཁྲིམས་ལུགས་ཀྱི་དགོངས་དོན་བཞིན། ཕྱི་ལོ་ ༢༠༢༥ ཟླ་ ༦ ཚེས་ ༤ ཉིན་ནས་ཟླ་ ༧ ཚེས་ ༡༨ བར་ཡིག་འབྲེལ་ཐེངས་བཅུ་གཅིག་གི་ལམ་ནས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ལ་ཞུ་གཏུག་གི་སྙན་ཞུ་ཕུལ་ཡང་། ཆེས་མཐོའི་ཁྲིམས་ཞིབ་ཁང་གི་ཁྲིམས་དྲུང་ལས་ཁུངས་ནས་སྤྱི་མང་གཏུག་བཤེར་འགྲོ་ལུགས་ཀྱི་ཁྲིམས་ཡིག་དོན་ཚན་བཅུ་གསུམ་དང་ཉི་ཤུ་རྩ་བཞིའི་འབྲུ་དོན་འཐུས་ཚང་བྱུང་མེད་པ་ཁོ་ན་གསུངས་ནས་ཕྱིར་སློག་བྱས་པར་བརྟེན། དྭང་བླངས་མི་མང་ལས་འགུལ་ཚོགས་པས་གསར་འགོད་གསལ་བསྒྲགས་ཞུ་ཡི་ཡོད། ཅེས་བརྗོད་སོང་།

གསར་འགོད་གསལ་བསྒྲགས་སུ་དོན་ཚན་བཞི་ཅན་གྱི་བསྒྲགས་གཏམ་ཞིག་འགྲེམས་སྤེལ་བྱས་པའི་ནང་། དང་པོ། སྤྱི་མང་གཏུག་བཤེར་ཁྲིམས་ཡིག་དོན་ཚན་བཅུ་གསུམ་གྱི་འབྲུ་དོན་གཞིར་བཟུང་ཁྲིམས་མཐུན་ཞུ་སྙན་རིམ་པར་ཕུལ་བའི་སྙིང་དོན།

སྐབས་ ༡༦ པའི་བོད་མི་མང་སྤྱི་འཐུས་གྲོས་ཚོགས་ཀྱིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་གསུམ་དུས་གཅིག་ཏུ་གནས་དབྱུང་བཏང་བ་དང་། ཁྲིམས་དཔོན་རྣམ་གསུམ་བསྐྱར་དུ་ལས་གནས་སུ་ཕེབས་པར་གྲོས་ཚོགས་ཀྱིས་ཡིག་ཆ་ཨང་ ༣༩ པར་བརྙད་དེ་ལུགས་མཐུན་ངོས་བཞེས་མ་གནང་བ། ཁྲིམས་ཞིབ་པ་ཆེ་བ་དང་གཞན་གཅིག་བགྲེས་ཡོལ་དུ་ཕེབས་རྗེས་སྐབས་ ༡༧ པའི་གྲོས་ཚོགས་ནས་དུས་ཐོག་འདེམ་བསྐོ་གནང་ཐུབ་མེད། ཁྲིམས་ཞིབ་པ་གཞན་གཅིག་སྟེ་སྐུ་ངོ་བསྟན་འཛིན་ལུང་རྟོགས་མཆོག་ལ་ཁྲིམས་ཁང་ནང་བཙན་འཛུལ་བྱེད་མཁན་དང་ཁྲིམས་རྫུན་རེད་ཅེས་གསུངས་པ་ལ་སོགས་པའི་གྲོས་ཚོགས་ཀྱི་ཡིག་ཆ་ཨང་ ༣༩ ལུང་དྲངས་ཏེ་དགག་བྱ་སྣ་ཚོགས་གནང་བ་བཅས་གོང་གསལ་བྱུང་རིམ་དེ་དག་གིས་རྐྱེན་པས། ཕྱི་ལོ་ ༢༠༢༥ ལོའི་སྤྱི་འཐུས་གྲོས་ཚོགས་འཚོགས་ཐེངས་ ༩ པའི་བར་ཆེས་མཐོའི་ཁྲིམས་ཞིབ་པ་གསུམ་བསྐོ་གཞག་གནང་ཐུབ་མེད་པ་མ་ཟད། གྲོས་ཚོགས་དང་སྤྱི་འཐུས་རྒྱུན་ལས་ནས་ཁྲིམས་ཞིབ་པ་སྐུ་ངོ་བསྟན་འཛིན་ལུང་རྟོགས་མཆོག་ཁྲིམས་མཐུན་ཡིན་པའི་ངོས་བཞེས་གནང་བའི་ཚད་ལྡན་ཡིག་ཆ་གང་ཡང་མེད་པ་ཡོངས་གྲགས་གནས་སྟངས་དེའི་རྐྱེན་པས། སྐབས་དེར་གུས་ཅག་གིས་སྙན་ཞུ་ཕུལ་ཡང་བདག་སྤྲོད་གནང་མཁན་མེད་པ་ས་རིས་ཐང་གསལ་རེད།

གཉིས་པ། མི་མང་ནས་མཁྱེན་རྟོགས་སླད་སྤྱི་མང་གཏུག་བཤེར་གྱི་འགྲོ་ལུགས་ཁྲིམས་ཡིག་དོན་ཚན་བཅུ་གསུམ་ དང་། ཉི་ཤུ་རྩ་བཞི་པ་ངོས་སྦྱོར་ཞུ་རྒྱུ།

ཁྲིམས་ཡིག་དོན་ཚན་བཅུ་གསུམ་པ། ཁྲིམས་ཞིབ་བྱ་རྒྱུར་གཞི་རྩའི་ཆ་རྐྱེན་ནང་གསེས་༼ ག ༽   དོན་ཚན་འདིའི་ནང་གསེས་ ༼ ཀ ༽    ནང་གསལ་དུས་ཐོག་ཅེས་པ་ཆ་འཛིན་བྱ་ཡུལ་ནི། སྤྱིར་ཁ་མཆུ་གང་འདྲ་ཞིག་ཡིན་རུང་ཞུ་སྦྱོར་གང་སྔ་བྱ་རྒྱུར་འབད་རྩོལ་བྱེད་དགོས་པ་ཡིན། འོན་ཀྱང་རྩོད་གཞི་གང་དེ་བྱུང་བ་ནས་བཟུང་ཞུ་སྦྱོར་བྱེད་མཚམས་བར་ཟླ་བ་བརྒྱད་ལས་འགྱངས་ན་མི་འགྲིག གལ་ཏེ་དེ་ལས་འགྱངས་བ་ཞིག་ཡིན་ན་འགྱང་དོན་རྒྱུ་མཚན་དང་འབྲེལ་ཁྲིམས་ཞིབ་ཁང་ནས་བཀའ་འཁྲོལ་ཞུ་དགོས་པ་ཡིན། བཀའ་འཁྲོལ་ཞུ་སྙན་ནང་དོ་བདག་དེར་ཁག་མེད་པའི་གནས་ཚུལ་བྱུང་བའམ། གྱོད་གཞིའི་ངོ་བོའི་ཆ་ནས་རན་འཚམས་ཀྱི་རྒྱུ་མཚན་ཡང་དག་མཐོང་ན་རྒྱུ་མཚན་གང་དེ་ཁྲིམས་ཞིབ་ཁང་གི་རྩ་འཛིན་ཁོངས་བཞག་ཐོག་ཁྲིམས་ཞིབ་ཁང་ནས་བཀའ་འཁྲོལ་སྤྲོད་ཆོག་པ་ཡིན།

དོན་ཚན་ཉེར་བཞི་པ། ཞུ་སྦྱོར་དེབ་འགོད། ༼ ང ༽   ཞུ་སྦྱོར་ཡིག་ཆར་ཁྲིམས་ལུགས་གང་རུང་ཞིག་མ་འགྲིགས་པས་ཞུ་རྩ་དེབ་འགོད་མ་བྱས་པར་ཕྱིར་སློག་བྱས་པ་ཞིག་ལ།  ཞུ་སྦྱོར་བས་རྗེས་སུ་སླར་ཡང་ཞུ་སྦྱོར་བྱས་ཏེ་ཁྲིམས་མཐུན་བྱེད་སྒོ་རྣམས་འགྲིགས་ཡོད་ན་དེབ་འགོད་ཆོག་པ་ཡིན། གོང་གསལ་འབྲུ་དོན་གཞིར་བཟུང་ཐོག་ནས་ཁྲིམས་དྲུང་ལས་ཁུངས་སུ་མགྲིན་པ་ས་ཕབ་ཀྱིས་ཐོག་ནས་སྙན་ཞུ་ཐེངས་བཅུ་གཅིག་ཕུལ་ཡང་ངོས་བཞེས་གནང་མ་ཐུབ་པར་ཁྲིམས་ཡིག་དོན་ཚན་བཅུ་གསུམ་དང་ཉེར་བཞི་གཉིས་ཀྱི་འབྲུ་དོན་བསྐང་ཐུབ་མིན་གསུངས་ཏེ་ཕྱིར་སློག་གནང་བྱུང་།

གསུམ་པ། ཕྱི་ལོ་ ༢༠༢༤ ཟླ་ ༧ ཚེས་ ༡༣ ནས་  ༡༥ བར་ཀེ་ན་ཀྲར་བསྐོང་ཚོགས་ས་པའི་རྒྱལ་སྤྱིའི་བོད་རང་ བཙན་ཚོགས་ཆེན་ཐེངས་བདུན་པའི་ནང་སྐུ་མགྲོན་དུ་ཕེབས་ནས་གཞུང་དམངས་གཉིས་ཀྱིས་གཏན་ཕབ་པའི་དབུ་མའི་ལམ་གྱི་སྲིད་བྱུས་ལ་ཁྱད་གསོད་དང་། ཟུར་ཟ། འཁྱོད་བཤད་གང་བ་དེ་དག་ནི།

༡༽   བཅའ་ཁྲིམས་ལེའུ་ལྔ་པ། དོན་ཚན་ང་བདུན་པ།  སྤྱི་འཐུས་བྱེ་བྲག་པ་འཕོ་འགྱུར།  ༡) སྤྱི་འཐུས་སུ་འོས་འདེམས་ཟིན་པའི་སྐྱེ་བོ་གང་ཞིག་བཅའ་ཁྲིམས་འདིའི་དོན་ཚན་ ༣༨ ནང་གསལ་བའི་སྤྱི་འཐུས་ཀྱི་འོས་ཆོས་གང་རུང་མ་ཚང་བ་གྱུར་པའམ། སྤྱི་འཐུས་ལྷན་ཚོགས་ནས་འཕོ་འགྱུར་བྱ་རྒྱུཪ་རྩ་འབོར་གསུམ་ཆ་གཉིས་ཡན་གྱིས་ཐག་གཅོད་བྱུ་བ་བཅས་ཀྱི་སྐབས་རང་ཉིད་སྤྱི་འཐུས་ནས་འཕོ་དགོས་ཞེས་དང་། ཡང་གོང་གསལ་ལེའུ་ལྔ་པ། དོན་ཚན་ ༣༨ པ།  སྤྱི་འཐུས་ཀྱི་འོས་ཆོས་ཞེས་པའི་ནང་གསེས་ཨང་ ༨ པ་དང་ ༩ པའི་ནང་དུ། སྤྱི་འཐུས་ལྷན་ཚོགས་ཀྱིས་གཏན་འབེབས་བྱས་པའི་འོས་བསྡུའི་ཁྲིམས་ལུགས་སམ། ཁྲིམས་སྒྲིག་ཅི་རིགས་དང་མི་འགལ་བ་དང་། ཞེས་གསལ་ཡོད་པ་ཞིག་ལ། སྤྱི་འཐུས་ཀྱི་ལས་འཁུར་དམ་བཅའ་ནང་གསལ་བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱི་ཐོག་ནས། སྤྱི་འཐུས་ཀྱི་ལས་འཁུར་ཞུ་སྒོ་མཐའ་དག་བཅའ་ཁྲིམས་ཀྱི་དགོངས་དོན་འགལ་མེད་ཐོག་ཞུ་རྒྱུའི་དམ་བཅའ་དང་ཡོངས་སུ་འགལ་ཡོད།

༢༽   བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ཀྱི་ཆེས་མཐོའི་གྲོས་ཚོགས་ནས་གཏན་འབེབས་གནང་བའི་དབུ་མའི་ལམ་ནི་ ༸གོང་ས་ྋསྐྱབས་མགོན་ཆེན་པོའི་རླབས་ཆེའི་དགོངས་བཞེད་ལ་གཞིས་བྱེས་མི་མང་བརྒྱ་ཆ་ ༦༤་་༦༠ ལྷག་གིས་རྒྱབ་སྐྱོར་ཞུས་པ་དང་བོད་མི་མང་ཆེས་མཐོའི་གྲོས་ཚོགས་སམ་ཁྲིམས་བཟོ་ལྷན་ཚོགས་ནས་འོས་བསྡུ་བྱ་མ་དགོས་པར་སྤྱི་མོས་ཀྱིས་ཡང་ཡང་གཏན་འབེབས་གནང་བའི་སྲིད་བྱུས་ལ། སྤྱི་འཐུས་རྣམ་པ་བདུན་གྱིས་མཁྱེན་བཞིན་ཁྱད་གསོད་ཀྱིས། ཀེ་ན་ཀྲར་སྐོང་ཚོགས་བྱས་པའི་བོད་རང་བཙན་ཚོགས་ཆེན་ཐེངས་བདུན་པ་ཟེར་བའི་ཚོགས་ཐོག་སྤྱི་འཐུས་ལས་ཐོག་དགེ་བཤེས་སྨོན་ལམ་མཐར་ཕྱིན་གཙོ་མགྲོན་དང་། དེ་བྱིངས་སྤྱི་འཐུས་ལས་ཐོག་རྣམ་པ་མཉམ་ཞུགས་བྱས་པ་མ་ཟད། དོན་དངོས་དང་མ་མཚུངས་པའི་དབུ་མའི་ལམ་ལ་གྲུབ་འབྲས་མ་ཐོན་པའི་ལོ་རྒྱུས་གང་བྱུང་དུ་གཏམ་བཤད་དང་འབྲེལ་རང་བཙན་གྱི་གཞུང་ཞིག་གསར་འཛུགས་བྱ་རྒྱུ་ཡོད་བཟོ་བསྟན་པ་ལ་སོགས་པའི་གནང་ལམ་དེའི་རྐྱེན་པས་རང་རེའི་སྤྱི་ཚོགས་ནང་གི་ཅོལ་ཆུང་བསམ་མེད་ཁ་ཤས་ཀྱིས་བོད་རང་བཙན་ཁར་འཁྱེར་གྱིས་༸གོང་ས་མཆོག་ལ་མཚན་སྨད་སྒྲོ་བཀུར་བྱུང་རྒྱལ་དུ་ཞུས་པས་མ་ཚད། མགོན་པོ་མཆོག་གི་སྐུ་ཕྱྭ་ལའང་ཇི་མི་སྙམ་པར་ཐོ་བརྩམ་རྒྱུའི་འཇིགས་སྐུལ་ཞུ་ནུས་པའི་ཚད་དུ་སླེབས་པ་དེ་དག་ཆུ་མགོ་ནས་རྙོག་པས་ངན་འབྲས་ཡིན་པར་ས་རིས་ཐང་གསལ་དུ་གྱུར་ཡོད་སྟབས། ཁོང་རྣམ་པ་བོད་མི་མང་སྤྱི་ འཐུས་ཀྱི་མཚན་གནས་བཞེས་རྒྱུར་འོས་འཚམ་གཏན་ནས་མེད།

བཞི་པ། གོང་གསལ་གནད་དོན་དེ་དག་གཙང་སེལ་མ་བྱུང་བར་དེ་མུར་འཇོག་ཐབས་རྩ་བྲལ་ལ་སོང་། རྒྱ་བལ་གཉིས་དང་། ཕྱི་རྒྱལ་ཡུལ་གྲུ་ཁག་ལ་ཞུགས་པའི་དྭང་བླངས་མི་མང་ངོས་ནས་མུ་མཐུད་ཁྲིམས་མཐུན་གྱི་ལས་འགུལ་སྤེལ་རྒྱུའི་གསར་འགོད་གསལ་བསྒྲགས་སུ། ཞེས་གསལ་འདུག

གསར་འགོད་པ། སྐལ་བཟང་སྦྱིན་པ། བློ་བཟང་སྒྲོལ་མ། བསྟན་འཛིན་ཉི་སྒྲོན།