བོད་ནང་དུས་ལོག་བྱུང་སྐབས་ཐོས་བསམ་སྒོམ་གསུམ་ཡ་མ་བྲལ་བ་བྱས་པར་ཧ་ཅང་ཕན་ཐོགས་བྱུང་ཞེས་གསུངས།

༧གོང་ས་རྒྱལ་བ་རིན་པོ་ཆེ་མཆོག་ནས་ངོས་ཀྱི་ཉམས་མྱོང་གི་ཐོག་ནས་དཀའ་ངལ་འཕྲད་པའི་སྐབས་ཆོས་ཕྱོགས་ཀྱི་བསམ་བློས་དཀའ་ངལ་ལ་གདོང་ལེན་བྱེད་པར་ནུས་པ་ཆེན་པོ་འདུག་ཅེས་བཀའ་སློབ་བསྩལ་སོང་།

དེ་རིང་ཕྱི་ཚེས་ ༢༥ ཉིན་ལ་དྭགས་ཟངས་དཀར་དཀར་ཤ་ཕོ་བྲང་དུ། ཟངས་དཀར་ནང་པའི་ཚོགས་པ་དང་། ཟངས་དཀར་དགོན་པ་ཚོགས་པ། དཀར་ཤ་དབྱར་ཆོས་ཆེན་མོ་གོ་སྒྲིག་ཚོགས་ཆུང་བཅས་ནས་ཇི་ལྟར་གསོལ་བ་བཏབ་པ་ལྟར། ༸གོང་ས་རྒྱལ་བ་རིན་པོ་ཆེན་པོ་ཆེ་མཆོག་ནས་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་མཛད་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ཧི་མ་ལ་ཡའི་རི་རྒྱུད་ཀྱི་མི་མང་ཚོ་ཆོས་དད་ཤུགས་ཆེན་པོ་ཡོད་བསྡད་པ་ཞིག་ཆགས་ཡོད། ག་རེ་གལ་ཆེན་པོ་འདུག་ཟེར་ན། ང་ཚོས་དད་པ་བྱེད་སའི་ཆོས་ག་འདྲ་ཡིན་པར་ཏོག་ཙམ་དོ་སྣང་དང་སློབ་སྦྱོང་བྱེད་དགོས། མདུན་དུ་སྟོན་པའི་སྐུ་བསམ་གྱིས་མི་ཁྱབ་པ་ཞིག་བཞེངས་ཡོད།  སྟོན་པ་བཀའ་དྲིན་ཅན་གྱིས་ང་ཚོར་བསླབ་བྱ་ག་འདྲ་བསྟན་ཡོད་པ་རེད། དེ་དག་ཤེས་པ་བྱས་ནས་ཆོས་བྱེད་པར་དངོས་གནས་དྲང་གནས་སྙིང་སྟོབས་བསྐྱེད་པ་དང་སྤོབས་པ་བསླེབ་པར་ཧ་ཅང་ཕན་ཐོགས་འདུག ངོས་རང་ལ་ཆ་བཞག་ནའང་ཕ་ཡུལ་ས་ཐག་རིང་པོ་ནས་ཡོང་བ་རེད། ཆུང་ཆུང་སྐབས་ནས་དཔེ་ཆར་བལྟས་པ་ཡིན། དེ་ནས་རིམ་བཞིན་དུས་ལོག་ཡོང་བའི་སྐབས་སངས་རྒྱས་ཀྱི་ཞག་རྩི་མཐོང་ནས་ཐོས་བསམ་སྒོམ་གསུམ་ཡ་མ་བྲལ་བ་བྱས་པར་ཧ་ཅང་ཕན་ཐོགས་བྱུང་། ཆོས་གྲོགས་ཚོར་ཆ་བཞག་ནའང་སངས་རྒྱས་ཀྱི་ཆོས་ཤེས་ནས་དད་པ་ཐོབ་པ་བྱུང་ན་མི་ཚེ་དོན་དང་ལྡན་པ་དང་སྐྱིད་པོ་གཏན་གཏན་ཡོང་གི་རེད་ལ། སྤྱི་ཚོགས་ནང་དུ་ཞི་བདེ་དང་འཆམ་མཐུན་ཡག་པོ་ཆགས་ཐུབ་པ་ཞིག་ཡོང་གི་རེད། ཅེས་གསུངས་སོང་།

ཡང་༧མགོན་པོ་གང་ཉིད་མཆོག་ནས། ཕྱི་ལོགས་ཀྱི་ལྷ་ཁང་རྫིག་པོ་དེ་གཙོ་བོ་མ་རེད། གཙོ་བོ་བསམ་བློའི་ཐོག་ནས་སངས་རྒྱས་དང་། ཆོས། དགེ་འདུན་གསུམ་ལ་སྐྱབས་སུ་འགྲོ་བའི་བསམ་བློ་ཡོད་མཁན་ཞིག་ཡིན་ན་སྡུག་བསྔལ་དང་ལེན་གྱི་བཟོད་པ་བྱ་དགོས། གང་ལྟར་བསམ་བློའི་ཐོག་ནས་འགྱུར་བ་འགྲོ་བ་ཞིག་ཆགས་ཡོད་དུས། ཆོས་ཡོད་མཁན་དང་ཆོས་མེད་མཁན་གྱི་མི་ལ་སྡུག་བསྔལ་མྱོང་བ་འདྲ་འདྲ་ཡིན་ཡང་། ཆོས་ཡོད་མཁན་གྱི་མིས་སྡུག་བསྔལ་དེ་མི་འདོད་པ་རྐྱང་རྐྱང་མཐོང་ནས་སེམས་ཞུམ་གྱི་ཡོད་པ་མ་རེད། གང་ལྟར་ཆོས་ཀྱི་ཐོག་ནས་བསམ་བློ་འཁོར་ཡོང་དུས་སྔོན་གྱི་བདེ་སྡུག་སེལ་བ་དང་། ཚེ་འདིར་ཕྱིན་ཅི་ལོག་པའི་བློ་རིམ་བཞིན་ཞི་སྟེ་མཐར་སངས་རྒྱས་བཅོམ་ལྡན་འདས་ཀྱི་ལམ་བགྲོད་པ་ལྟར། ང་ཚོས་རིམ་བཞིན་བློ་ཡར་རྒྱས་བཏང་སྟེ་སངས་རྒྱས་བཅོམ་འདས་བཞིན་སེམས་ཤུགས་བསྐྱེད་པ་དེར་ནུས་པ་ཆེན་པོ་འདུག ཆོས་མེད་པར་བསྡད་པ་ཡིན་ཚེ་སྡུག་སྐད་བརྒྱབ་པ་མ་གཏོགས་གང་ཡང་མི་འདུག ཆོས་ཡོད་མཁན་ཞིག་ཡིན་ན་སྐད་བརྒྱབ་པ་མ་ཡིན་པར་སྡུག་བསྔལ་གྱི་རྩ་བ་དང་དེའི་གང་བསྐྱེད་པར་ལྟ་བཞིན་ཡོད། སྟོན་པ་བཅོམ་ལྡན་འདས་ཀྱིས་མངོན་པར་རྫོགས་པའི་སངས་རྒྱས་པའི་མཛད་པ་མཛད་དེ་ཆོས་འཁོར་བསྐོར་བ་རེད། སངས་རྒྱས་བཅོམ་ལྡན་འདས་འཁྲུངས་བ་ནས་སངས་རྒྱས་བ་ཞིག་ཆགས་མེད། ཆོས་ཀྱིས་མིའི་བསམ་བློའི་ནང་སྤོབས་པ་བསྐྱེད་པ་དང་། དངོས་གནས་དྲང་གནས་སེམས་ཤུགས་བསྐྱེད་པའི་ཁྱད་པར་ཆེན་པོ་འདུག ཅེས་གསུངས་སོང་།

 ༧གོང་ས་མཆོག་ནས། ངོས་རང་ལ་ཆ་བཞག་ནའང་ཆུང་དུས་ནས་སངས་རྒྱས་ཀྱི་ཆོས་ལ་སློབ་སྦྱོང་བྱས་པ་རེད། གཙོ་བོ་ཡོངས་འཛིན་རྡོ་རྗེ་འཆང་གི་ཐུགས་རྗེ་བཀའ་དྲིན་ལ་བརྟེན་ནས་དཔེ་ཆ་མང་པོར་བལྟས་ཡོད། དེས་སེམས་ལ་ལྗིད་ཁོག་ཡོང་བའི་ཕན་ཐོགས་འདུག  སྔོན་མ་ངོས་རང་པེ་ཅིན་དུ་བསླེབས་སྐབས། མའོ་ཙེ་ཏུང་དང་ངེད་གཉིས་འཆམ་པོ་ཡོད།  མའོ་ཙེ་ཏུང་གིས་ངོས་ཀྱི་བསམ་བློ་དེ་རིག་གནས་དང་མཐུན་པ་ཧ་ཅང་ཡག་པོ་རེད། ཡིན་ནའང་ཆོས་ཞེས་པ་དེ་དུག་རེད་མ་གཏོགས་ཕན་པ་ཡོད་པ་མ་རེད་ཟེར། ངོས་ཀྱིས་དེ་གོ་ནས་མའོ་ཙེ་ཏུང་ལ་སྙིང་རྗེ་སྐྱེས་སོང་། ངོས་ཀྱིས་དགག་པ་གང་ཡང་མ་བརྒྱབ་པར་ཁ་རོགས་བསྡད་ཡིན། ཆོས་ཕྱོགས་ཀྱི་བསམ་བློ་ཡོད་ན་སེམས་ཀྱི་གཏིང་དུ་ལྗིད་ཁོག་དང་ཞག་རྩི་ཡོད་པར་ཕན་ཐོགས་གཏན་གཏན་འདུག ང་ཚོའི་མི་ཚེའི་ནང་རྐྱེན་ངན་འཕྲད་པ་དེ་ཆོས་ཉིད་རེད། རྐྱེན་ངན་དེ་འདྲར་འཕྲད་པའི་སྐབས་སུ་གདོང་ལེན་བྱེད་ཐུབ་པར་ཆོས་ཕྱོགས་ཀྱི་བསམ་བློའི་ཁྱད་པར་ཆེན་པོ་འདུག ཅེས་གསུངས་སོང་།

ཡང་༧གོང་ས་མཆོག་ནས། ཆུང་དུས་རྐྱེན་ངན་འཕྲད་པར་གདོང་ལེན་བྱ་ཐུབ་པར་དོ་སྣང་གང་ཡང་མ་བྱུང་། རིམ་བཞིན་ཆོས་ཀྱི་བསམ་བློ་དེ་གཏིང་ཟབ་ཏུ་ཕྱིན་དུས་རྐྱེན་ངན་འཕྲད་པར་གདོང་ལེན་བྱེད་པའི་སེམས་ཤུགས་ཡོང་གི་འདུག ངོས་ཀྱི་མི་ཚེའི་ནང་ཆོས་ཕྱོགས་ཀྱི་བསམ་བློ་དེས་རྐྱེན་ངན་ག་འདྲ་འཕྲད་ཀྱང་སེམས་ཤུགས་མ་ཆགས་པར་དངོས་གནས་དྲང་གནས་བསྟན་པའི་ཞབས་འདེགས་ཚུལ་བཞིན་དུ་བསྒྲུབ་བསམ་པའི་སྙིང་སྟོབས་སྐྱེས་ཡོང་གི་འདུག ངོས་ཀྱི་ཉམས་མྱོང་གི་ཐོག་ནས་དཀའ་ངལ་འཕྲད་སྐབས་ཆོས་ཕྱོགས་ཀྱི་བསམ་བློས་དཀའ་ངལ་གདོང་ལེན་བྱེད་པར་ནུས་པ་ཆེན་པོ་རེད་འདུག དེ་བཞིན་གཞན་ཕན་བསྒྲུབ་པའི་སེམས་ཤུགས་བསྐྱེད་ཡོང་དུས་ཧ་ཅང་ཕན་ཐོགས་འདུག འཛམ་གླིང་ལ་འགྱུར་བ་ག་འདྲ་འགྲོ་བ་ཚད་ཐིག་གི་མི་འདུག་ཀྱང་། སོ་སོའི་ངོས་ནས་ཆོས་ཕྱོགས་ཀྱི་བསམ་བློ་ཟིན་ཐུབ་ཚེ་དངོས་གནས་དྲང་གནས་ཕན་ཐོགས་ཀྱི་འདུག  ཅེས་གསུངས་སོང་།

དེ་རིང་སྔ་དྲོར་ཟངས་དཀར་དུ་༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རུ་ན་ཅཱལ་གྱི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། ལྷ་རྒྱལ་རིན་པོ་ཆེ་མཆོག་ལ་མཇལ་ཁ་སྩལ་ཡོད་འདུག་ལ། མཛད་རིམ་ལྟར་ན། སང་ཉིན་སྔ་དྲོར་༧གོང་ས་མཆོག་ཟངས་དཀར་ནས་ལ་དྭགས་གླེ་རུ་ཆིབས་བསྒྱུར་བསྐྱང་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།